Seo Batswadi ba se Bolelago

Ge bana ba gago ba dutše ba gola, o ka ba thuša bjang go ithuta bohlokwa bja go kwa? O ka ba ruta bjang mediro yeo e tlago go ba hola ge ba dutše ba gola? Ekwa seo batswadi ba bangwe lefaseng ka bophara ba se boletšego.

GO BA RUTA MEDIRO YA KA NTLE LE YA KA GAE

“Ge re eja gotee e bile re bolela gore re hlwele bjang, ngwana yo mongwe le yo mongwe o ithuta go theetša. Ge ba re bona re theetša ka go se fele pelo, seo se dira gore ba hlomphane le go itlhompha.”—Richard wa Brithania.

“Re a thaba ge re bona bana ba rena ba swarana ka tlhompho le go ba bona ba rarolla mathata a bona ntle le gore re tsene ditaba gare. Le gona ba boledišana le batho ba bagolo ka kgodišego.”—John wa Afrika Borwa.

“Ga se ka phethagala gomme ka dinako tše dingwe ke kweša bana ba ka bohloko maikwelong ke se ke ka ikemišetša. Ge seo se direga, go bohlokwa kudu gore ke kgopele tshwarelo ya phošo yeo ke e dirilego.”—Janelle wa Australia.

“Re tlwaetša bana ba rena go dira mediro e bohlokwa ya ka gae. Go ba ruta go thuša batho ba bangwe go dira gore dilo di sepele ka thelelo le ka khutšo ka lapeng gomme seo se dira gore bana ba rena ba ikwe ba na le mohola.”—Clive wa Australia.

“Ga go bonolo eupša go bohlokwa go ba ruta go kwešišana, go hlomphana le go lebalelana.”—Yuko wa Japane.

BOHLWEKI LE TŠA MAPHELO

“Ge bana ba rena e be e sa le ba banyenyane, re ile ra ba ruta go itlhapiša gomme ra dira gore ba thabele seo ka gore ba diriše sesepa seo se bopegilego bjalo ka bathwana, lepotlelwana la sesepa sa go hlapa hlogo leo le nago le diswantšhana le dipontšhana tšeo di bopegilego bjalo ka diphoofotšwana.”—Edgar wa Mexico.

“Ge re be re dula moo go bego go se na dipompi tša meetse, ka mehla ke be ke kgonthišetša gore re bea sesepa le sekotlelo sa meetse kgauswi le mojako e le gore re ka hlapa matsogo ge re tsena ka ntlong.”—Endurance wa Nigeria.

“Ka mehla re nea bana ba rena dijo tšeo di nago le phepo, le gona re ba hlalosetša lebaka leo go lego bohlokwa go ja dijo tše di lekalekanego. Bana ba nyaka go tseba dilo tše di fapafapanego tšeo di tšhetšwego ka dijong, ka gona ke ba kgopela gore ba nthuše ge ke apea. Nako yeo re e fetšago re le gotee e re nea sebaka sa go boledišana.”—Sandra wa Brithania.

“Go itšhidulla go bohlokwa, ka gona rena batswadi re leka go bea mohlala o mobotse. Bana ba rena ba thabela go sepelasepela, go rutha, go bapala thenese goba basketball, goba go ragela dipaesekele re le lapa. Ba ithuta gore go itšhidulla go bohlokwa e bile go bose.”—Keren wa Australia.

“Bana ba tloga ba hloka nako yeo ba ka e fetšago ba na le batswadi ba bona. Ga go na selo seo se ka e tšeelago legato—e ka ba tšhelete, dimpho goba go tšea maeto. Ke šoma diiri tša mesong feela ge bana ba ile sekolong. Ke moka ke fetša nako ka moka ya thapama ke na le bona.”—Romina wa Italia.

 TAYO

“Re lemogile gore tayo e ka newa ka mekgwa e fapafapanego, go ithekgile ka maemo. Ka dinako tše dingwe tayo e akaretša go ntšhetšana sa mafahleng gomme ka dinako tše dingwe e ka ba go gana ngwana ka selo se itšego seo a se thabelago.”—Ogbiti wa Nigeria.

“Re kgopela bana ba rena gore ba bušeletše ditaelo tšeo re ba neilego tšona go kgonthišetša gore ba a di kwešiša. Ke moka re dira ka mokgwa wo re bego re boletše ka gona. Ge re nyaka gore bana ba rena ba theetše ge re bolela le bona, re swanetše go kgatha tema ya rena ka go ba otla ge e ba ba dirile phošo.”—Clive wa Australia.

“Ke bone go na le mohola gore ke khuname ge ke phošolla bana ba ka e le gore re lebanye difahlego. Se se dira gore ba kgone go nkwa gabotse. Le gona se dira gore ba šetše kudu ponagalo ya sefahlego sa ka gomme ba nkwešiše kudu.”—Jennifer wa Australia.

“Re leka gore re se botše bana ba rena gore, ‘Ga le kwe,’ le ge go bonagala seo e le therešo. Le gona, ga re kgale yo mongwe wa bana ba rena pele ga ba bangwe. Re mo kgala ka go mo sebela goba re mo iša ka thoko gore re bolele yena a nnoši.”—Rudi wa Mozambique.

“Bana ba huetšega gabonolo le gona ba rata go ekiša batho ba bangwe. Ka baka leo, re swanetše go lwantšha moya o senyago wa bao ba tsenago le bona sekolo, mekero ya ditaba, tikologo yeo ba phelago go yona gomme re thuše bana ba rena gore ba be le mekgwa e mebotse yeo e theilwego melaong ya motheo e nepagetšego. Mekgwa e mebotse e ba thuša go gana selo le ge e le sefe seo se gobatšago.”—Grégoire wa Democratic Republic of the Congo.

“Ge re nea tayo re swanetše go tiiša letsogo, go lekalekana le go se fetofetoge. Bana ba swanetše go tseba gore go tla direga eng ge ba ka dira phošo gomme ba tsebe gore o tla dira seo o se boletšego.”—Owen wa Engelane.

[Ntlhakgolo go letlakala 14]

“Le se ke la befediša bana ba lena e le gore ba se nyame.”—Bakolose 3:21

 [Box/​Picture on page 15]

KANEGELO YA LAPA

Go Atlega ga Motswadi yo a se Nago Molekane

Go boledišanwa le Lucinda Forster

Ke tlhohlo efe e kgolo yeo o lebeletšanego le yona ka ge o le motswadi yo a se nago molekane?

Go ba motswadi ka bogona go thata, eupša ka ge ke le motswadi yo a se nago molekane go tloga go le thata gore ke laole tsela yeo ke dirišago nako le matla a ka. Go tšea nako gore o rute bana melao le mekgwa gomme o hwetše le sebaka sa gore le iketle le go thaba le le gotee. Gantši ke gapeletšega go dira mediro ya ka gae ka nako yeo ke bego ke swanetše go iketla ka yona.

O kgona bjang go dula o na le poledišano e botse le barwedi ba gago?

Ka morago ga tlhalo, bana ba ka ikwa ba sa šireletšega e bile ba befetšwe. Ke lemogile gore ge mathata a tšwelela, go ba lebelela ka mahlong le go bolela ka lentšu la tlase go bohlokwa. Ke leta go fihlela re theošitše maswafo ke moka ke leka go bolela dilo tšeo di ntshwenyago ntle le go hlafiša boemo. Ke ba botšiša dipono tša bona, ka theetša ka kelohloko gomme ka ba bontšha gore ke tloga ke tšeela godimo maikwelo a bona. Ke kgahlegela modiro wa bona wa sekolong le gona ke a ba reta ka seo ba se dirago. Ka mehla re ja re le gotee tafoleng re iketlile ka tlase ga maemo a kgahlišago. Le gona ke dula ke ba botša gore ke a ba rata.

O ba laya bjang?

Bana ba nyaka gore o ba beele melao, le gona go bohlokwa gore o se ke wa e fetofetoša. Ke leka gore ke be botho eupša ke tiiša letsogo. Ke swanetše go nea bana ba ka mabaka gomme ke ba hlalosetše lebaka leo boitshwaro bjo itšego bo fošagetšego. Le gona ke leka go ba botšiša dipotšišo pele ga ge nka ba nea tayo gore ke bone lebaka leo ba dirilego seo ba se dirilego. Ge e ba ke fošitše—ka mohlala, ge e ba ke se ka kwešiša boemo—ke kgopela tshwarelo.

O ruta bana ba gago bjang gore ba hlomphe batho ba bangwe?

Ke ba gopotša seo Jesu a se rutilego—go swara batho ba bangwe ka mokgwa wo o ka nyakago ba go swara ka wona. (Luka 6:31) Ke kgothaletša banenyana ba ka gore ba rarolle diphapano tša bona kamoo ba ka kgonago ka gona, le gona ke ba ruta bohlokwa bja go araba ka boleta le ka botho ge ba galefile.

Le itapološa ka’ng?

Ga se ka mehla re kgonago go ya maikhutšong kgole, ka gona re lebelela mafelo ao a bitšago tšhelete ya tlase dikuranteng. Re ya dipikiniking goba ra sepelasepela re tšama re bona dibjalo dirapaneng. Re bjala merogo ka serapeng sa rena gomme ra thabela go kga merogo ya rena gore re yo apea. Boitapološo bo bohlokwa gaešita le ge re fo fetša nako re le phakeng ya mo kgauswi.

Ke’ng seo se ilego sa go thabiša le gona o hweditše meputso efe?

Go be go le thata go dula ka legaeng la motswadi yo a se nago molekane, eupša seo se dirile gore re batamelane gomme re ithutile go leboga ditšhegofatšo tšeo re nago le tšona. Ke thabela go bona kamoo ngwana yo mongwe le yo mongwe a nago le semelo sa gagwe. Nywageng ye ba lego go yona ba nyaka go fetša nako le nna gomme ke tloga ke thabela go ba le bona. Ba kgona go lemoga ge ke thabile le ge ke nyamile le gona ka dinako tše dingwe ba fo nkgokarela go mpontšha gore ba a nthata. Ke thaba kudu ge ba mpontšha gore ba a nthata. Sa bohlokwa kudu re bone kamoo Mmopi yo a nago le taba le rena a bontšhitšego ka gona gore o a re rata ge re be re le mathateng a mantši. Beibele e nneile matla a gore ke tšwele pele ke leka go ba motswadi yo botse.—Jesaya 41:13.

[Seswantšho]

Lucinda le barwedi ba gagwe e lego Brie le Shae