Tsoma Thušo

“Ó tee a ka fenywa; ba babedi ba tlo êmêlana.”—Mmoledi 4:12.

GE BATHO ba bangwe ba re thekga, re ba le sebaka se segolo sa go ka fenya lenaba—go sa šetšwe gore lenaba leo ka mang goba ke eng. Ka gona ge e le gore o nyaka go fenya mokgwa wa go kgoga, o ka ba bohlale ka go tsoma thušo go ba lapa le bagwera—goba go motho le ge e le ofe yo a ka go thekgago le go se go felele pelo.

Naganela go tsoma bao ba kgaoditšego go kgoga, ka ge ba ka se go kwele bohloko feela eupša ba ka ba ba go thuša. Torben, Mokriste wa kua Denmark o re: “Thekgo ya ba bangwe e be e le bohlokwa kudu go nna.” Abraham, yo a dulago India, o ngwala gore: “Lerato la kgonthe leo ke le bontšhitšwego ke ba lapa lešo le Bakriste-gotee le nthušitše go kgaotša go kgoga.” Eupša ka dinako tše dingwe thekgo ya ba lapa le bagwera ga se ya lekana.

Monna yo a bitšwago Bhagwandas o re: “Ke kgogile nywaga e 27, eupša ka baka la go ithuta seo Beibele e se bolelago ka mekgwa e sa hlwekago, ke ile ka dira phetho ya go kgaotša go kgoga. Ke ile ka leka go fokotša. Ka hwetša bagwera ba bafsa. Gomme ka ya go baeletši. Gwa se be le nko e tšwago lemina. Mafelelong, bošegong bjo bongwe ke ile ka tšhollela Jehofa Modimo sa mafahleng ka thapelo gomme ka mo lopa gore a nthuše. Ke moka, mafelelong ke ile ka kgona!”

Selo se sengwe seo o ka se dirago ke go itokišeletša go fenya mapheko ao o tlago go lebeletšana le ona. Mapheko a ke afe? Sehlogo se se latelago se nea tlhaloso.

[Lepokisi go letlakala 5]

NA O SWANETŠE GO DIRIŠA DIHLARE?

Dihlare tša go thuša bakgogi go kgaotša go kgoga, tše bjalo ka nicotine patch, di dirišwa ke batho ba bantši kudu. Pele o dira phetho ya go diriša dihlare, ela hloko dipotšišo tše di latelago:

Go na le mehola efe? Ditsela tše dintši tša tša kalafo go thwe di oketša dibaka tša gago tša go kgaotša go kgoga ka go fokotša maswao a go kgaotša. Lega go le bjalo, go sa išanwa kua le kua mabapi le mehola ya tšona ya nako e telele.

Go na le dikotsi dife? Dihlare tše dingwe di ka ba le ditla-morago, tše bjalo ka go tlaba-tlabja ke dibete, kgateletšego le dikgopolo tša go nyaka go ipolaya. Dula o gopola gore dihlare tša go tšeela motšoko legato e fo ba e le tsela e nngwe ya go go nea sehlare-tagi gotee le dikotsi tša sona tša tša maphelo. Ka baka leo, ge re bolela therešo, motho yoo a di dirišago o sa dutše a lemaletše selo se itšego.

Go na le mekgwa efe e mengwe? Nyakišišo e nngwe e bontšha gore 88 lekgolong ya batho bao ba atlegilego go kgaotša go kgoga ba itše ba tlogetše go kgoga gatee-tee ntle le thušo ya dihlare.