Go Thaba go sa Šetšwe go Golofala o Šoro

Ka ge go anega José Godofredo Várguez

Ke belegwe ke phetše gabotse mmeleng gomme ka gola ke le bjalo. Ge ke e-na le nywaga e 17, ke ile ka thoma go šoma mošomo wa go tšhumelela. Ka morago ga nywaga e mebedi, ke be ke tšhumelela ke le kgaufsi le dithapo tšeo di sepedišago mohlagase o montši, ge pula e thoma go tšhologa. Ke ile ka swarwa o šoro ke mohlagase woo o ilego wa ntahlela fase dimithareng tše 14 go tloga moo ke bego ke le gona gomme ka idibala. Ke ile ka idibala dikgwedi tše tharo. Ke be kgona go šikinya hlogo ya-ka feela. Ke be ke golofetše go tloga molaleng go ya fase gomme ke ikwa ke se na mohola!

MATHOMONG, ke ile ka galefela Modimo gomme ka mmotšiša gore ke ka baka la’ng a ntumeletše ke phela. Ke ile ka ba ka nagana go ipolaya. Ke ile ka nyaka thušo dikerekeng tše mmalwa, eupša ga go na yeo e ilego ya nnea khomotšo ya kgonthe goba go kgotsofatša dinyakwa tša-ka tša moya. Ge e le gabotse, di be di bile di sa kgothaletše batho go phela ka dithuto le ditekanyetšo tša Beibele! Ge mma a e-hwa ka 1981, ke ile ka thoma go nwa bjala le go petšha. Ke be ke nagana gore ka baka la boemo bja-ka, Modimo o tla nkwela bohloko gomme a ntebalela ge ke tagwa. Ke ile ka ba ka thoma go phela bophelo bjo bo gobogilego le mosadi yo ke bego ke se ka mo nyala.

Phetogo e Kgolo Tseleng Ya-ka ya go Nagana

Ge ke be ke e-na le nywaga e 37, ke ile ka kopana la mathomo le Dihlatse tša Jehofa. Mma, a tutueditšwe ke mabarebare, ka mehla o be a re ke bodumedi bjo bobe go feta madumedi ka moka. Go sa šetšwe seo, ke ile ka ba amogela ka gae—ka boikemišetšo bja go ba bontšha gore ba fošitše, ka ge ke be ke nagana gore ke tseba Beibele kudu. Lega go le bjalo, ke ile ka tlabja ke ge ke lemoga gore ke be ke sa tsebe selo! Go feta moo, baeng ba-ka ba ile ba mmakatša ka go diriša Beibele go araba dipotšišo tša-ka ka moka. Kapejana ke ile ka kgolwa gore ke hweditše therešo.

Ka manyami, mosadi yoo ke bego ke dula le yena o ile a gana bodumedi bja-ka bjo bofsa gomme re ile ra arogana. Ke ile ka tšwela pele ke hlwekiša bophelo bja-ka le go fetoša tshekamelo ya-ka le monagano gore di dumelelane le dithuto tša Beibele. Ka thušo ya Modimo ke ile ka kgona go lokiša tsela ya-ka ya go nagana le maikwelo  a-ka mabapi le bogole bjoo bo bakilwego ke kotsi yeo e ilego ya nkwela—moo e lego gore nywaga e 20 e fetilego, ke ile ka kgona go hwetša kgotsofalo ge ke hlankela ke le moebangedi wa nako e tletšego. Ka baka la bogole bja-ka, batho ba bantši ba ipotšiša gore ke kgona bjang. Go ba gona, ga ke noši. Ke dula le moratho’a-ka Ubaldo, yo a nago le bolwetši bja Down. Ubaldo le yena o amogetše therešo ya Beibele gomme re hlankela Jehofa re le gotee.

Re a dirišana e bile re a hlokomelana. Ge re boledišana le batho ka Beibele, Ubaldo o kgorometša setulo sa-ka sa digole gomme o kokota mojakong legatong la-ka, gomme ge ke boledišana le beng ba ntlo, o nthuša ka Beibele le go ba bontšha dikgatišo tše di swanetšego. Le gona o nthuša le dilong tše dingwe tša nama. Nna ke hlokomela bobedi bja rena ka tša ditšhelete ka go rekiša ditlolo. Go tlaleletša moo, ditho tša phuthego ya rena ya Dihlatse tša Jehofa di thuša ka go apea le ka mediro ya ka ntlong gotee le go re iša ngakeng—e lego dilo tšeo nna le Ubaldo re di lebogago kudu!

Ka phuthegong ya Bokriste, ke na le tokelo ya go hlankela ke le mogolo, gomme bana bešo ba moya ka mehla ba ikemišeditše go nthuša ka dinyakišišo tša Beibele. Ke kgona go thalela dintlha tše bohlokwa ka dikgatišong tša rena tša go ithuta ka go swara phentshele ka molomo.

Ge batho ba mpotšiša gore ke thabile, ka mehla ke araba ka pelo ka moka ka gore ee! Ke ka baka la’ng ke swanetše go ikwa ka tsela e nngwe? Ke hweditše morero wa kgonthe bophelong gomme ke lebeletše pele nakong e kgahlišago yeo Modimo a e lokišeditšego barapedi ba gagwe ba botegago—bophelo bjo bobotse Paradeiseng e tlago ya mo lefaseng.—Jesaya 35:5, 6; Luka 23:43.

[Seswantšho go letlakala 23]

José a e-na le nywaga e 18, ngwaga pele a ka welwa ke kotsi

[Seswantšho go letlakala 24]

Hlatse-gotee e phetla matlakala ka Beibeleng ya-ka ge ke nea polelo Holong ya Mmušo

[Seswantšho go letlakala 24]

Nna le moratho wa-ka Ubaldo, re dirišana gabotse ge re boledišana le batho ka Beibele kua Mexico

[Seswantšho go letlakala 24]

Ditho tša phuthego di thuša ka go apea le mediro e mengwe ya ka gae