Batho ba Nyaka Bophelo bjo Bobotse!

NYWAGENG e fetago e 2 700 e fetilego moporofeta yo mongwe o boletše ka nako e tlago yeo ka yona bolwetši bo tla bego bo se gona. Boporofeta bjo bo bolokilwe go fihla mehleng ya rena gomme bo hwetšwa pukung ya kgale ya Jesaya. O ngwadile ka nako yeo ka yona ‘go sego yo a tlago gore ke a babja,’ gomme a oketša ka gore: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 33:24; 35:5, 6) Boporofeta bjo bongwe bja Beibele le bjona bo bolela ka nako e bjalo e tlago. Ka mohlala, puku ya mafelelo ya Beibele e lego Kutollo, e bolela ka nako yeo ka yona Modimo a tlago go fediša bohloko.—Kutollo 21:4.

Na dikholofetšo tše di tla phethagala? Na go tla ka gwa ba le nako yeo ka yona moloko wa batho o tlago go thabela bophelo bjo bobotse le yeo bolwetši bo tla bego bo se gona? Ke therešo gore karolo e kgolo ya batho e thabela bophelo bjo bokaone gona bjale go feta meloko e fetilego. Eupša seo ga se bolele gore ba na le bophelo bjo bo kaone-kaone. Batho ba bantši ba sa dutše ba tlaišwa ke malwetši. Poifo ya go babja ka boyona e baka dipelaelo. Le gona selo seo se kwešago bohloko ke gore gaešita le mehleng ye ya sebjale-bjale, ga go yo a ka phemago mefokolo ya mmele le monagano ka mo go feletšego.

Morwalo Woo o Lebeletšanago le Wona

Morwalo wo o tlišwago ke bolwetši o bonala ka ditsela tše di fapa-fapanego. Tsela e nngwe e tshwenyago kudu lehono yeo bolwetši bo imelago batho ka yona ke ditshenyagalelo tše di phagamago tša tša ditšhelete tšeo bo di bakago. Ka mohlala, ngwageng o mongwe o sa tšwago go feta, mathata a tša maphelo a bakile tahlegelo ya matšatši a mošomo a dimilione tše 500 kua Yuropa. Boemo bo a swana le dinageng tše dingwe. Go theoga ga tšweletšo mošomong le ditshenyagalelo tše di oketšegago tša tlhokomelo ya tša maphelo di baka morwalo wa tša ditšhelete wo o kgomago batho ka moka. Dikgwebo gotee le mebušo di lahlegelwa ke tšhelete. E le go fokotša ditshenyagalelo tše, dikgwebo di oketša ditheko tša ditšweletšwa tša tšona gomme mebušo e oketša motšhelo. Ke mang yo a lebeletšanago le morwalo wo? Mafelelong ke wena!

Ka manyami, gantši badiidi ba hwetša go le thata go hwetša tlhokomelo ya maleba ya tša maphelo, ge e ba e le gore ba a kgona go e hwetša. Bjo ke boemo bjo bo nyamišago bja batho ba dimilione dinageng tše di hlabologago bao ba hwetšago ditirelo tše dibotse tša tša maphelo tše di lekanyeditšwego goba bao ba sa kgonego go di hwetša. Gaešita le dinageng tše humilego, ba bangwe ba swanelwa ke go katana gore ba hwetše tlhokomelo e botse ya tša kalafo yeo e lego gona. Se gantši se diragalela bontši bja batho ba dimilione tše 46 bao ba se nago inšuranse ya tša maphelo kua United States.

Morwalo wo o tlišwago ke bolwetši ga se wa tša ditšhelete feela. Morwalo woo re lebeletšanago le wona mafelelong ke tlalelo yeo e tlišwago ke go swarwa ke bolwetši bjo bo bolayago, bohloko bja go kgotlelela sehlabi se se sa alafegego, manyami a go bona ba bangwe ba babja o šoro le go felelwa ke kholofelo ge re lahlegelwa ke moratiwa lehung.

Kholofelo ya gore letšatši le lengwe re tla phela lefaseng leo le se nago bolwetši e tloga e ipiletša. Batho ba nyaka bophelo bjo bobotse! Ba bantši ba dumela gore kholofelo yeo ke ya kgonthe, gaešita le ge go kwagala e sa kgonagale. Go na le ba bangwe bao ba kgodišegilego gore ge nako e dutše e e-ya, mo e ka bago malwetši ka moka a tla fedišwa ka thekinolotši yeo e dirilwego ke batho. Ka lehlakoreng le lengwe, bao ba dumelago Beibele ba dumela gore Modimo o tla dira gore boporofeta bja bogologolo bja mabapi le lefase leo le se nago bolwetši bo phethagale. Na batho ba tla tliša nako yeo ka yona go se nago bolwetši? Na Modimo a ka e tliša? Bokamoso bo re swaretše’ng?