Lefase le ka Phološwa!

DIHLOGO tše di fetilego di ile tša dira gore go be molaleng gore batho ba ka se kgone go tšwelapele ba diriša ditšweletšwa tša lefase ka tekanyo yeo ba di dirišago ka yona mo nakong ye. Ke therešo gore baetapele ba lefase ba dirile maiteko a retegago a go fokotša tšhilafatšo, go senywa ga dithokgwa le mathata a mangwe a tša tikologo. Go thoma ka Ditherišano tša  UN mabapi le Tikologo ya Batho tšeo di bego di swerwe ka 1972 gomme tša latelwa ke ditherišano tše dingwe tšeo di bego di swarwa kgafetša-kgafetša, mo e ka bago ditšhaba tše ka bago tše 163 di ile tša kopana bakeng sa go bontšha thekgo ya tšona megatong yeo e reretšwego go tšewa bakeng sa go fihlelela dipakane tšeo di beilwego. Lega go le bjalo, mafelelo e bile afe? David Hunter yo e lego molaodi wa Center for International Environmental Law o re: “Ka manyami, dikwano tše tše dintši, merero ya go gata megato le mangwalo a mangwe ga di a ka tša bušetša morago go phuhlama ga tikologo ya lefase ka moka.” Ge e le gabotse, Hunter o oketša ka gore: “Mo e ka bago sešupo se sengwe le se sengwe se segolo sa tikologo, se boemong bjo bošoro kudu lehono go feta kamoo se bego se le ka gona nakong ya Ditherišano tša United Nations tša 1992.”

Ke ka baka la’ng go bile le tšwelopele e nyenyane gakaakaa ka morago ga nywaga e fetago e 30 ya go rerišana ka ditaba tša tikologo? Lebaka le lengwe ke go nyakega ga kgolo ya ikonomi. Ikonomi ya dinaga e ithekgile ka tšhelete yeo e dirišwago ke bareki. Se se nyaka gore dikgwebo di tšweletše gomme seo se bolela gore go dirišwe ditšweletšwa tša tlhago. Ke bothata bjo bo sa kgaotšego bjo bo feleletšago ka gore tikologo e lahlegelwe. Ka gona, tharollo ke eng?

Megato e Fošagetšego

Beibele e hlalosa lebaka leo ka lona maiteko a batho a go ipuša a paletšwego ka tsela ye e šiišago. Moporofeta Jeremia o rile: “Morêna, ke a tseba; motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” (Jeremia 10:23) Mantšu ao a itlhatsetše e le therešo gakaakang!

Na o kile wa etela serapa goba phaka? Re kgahlišwa kudu ke tsela yeo dihlare, dihlašana le matšoba di bjetšwego ka lenaneo ka gona! Lega go le bjalo, serapa seo se rulagantšwego gabotse ga se be gona ka go fo itiragalela. Bo-raserapa ba fetša diiri tše dintši ba poma dihlare, ba sega bjang ka bothakga le go hlokomela mafelo ao matšoba a bjetšwego go wona e le gore a bogege gabotse. Nagana feela kamoo lefase leo e lego legae la rena le bego le tlo bogega ka gona ge nkabe lefase ka moka le be le hlokomelwa ka tsela e lerato e swanago le yeo serapa se hlokomelwago ka yona.

Ge e le gabotse, Mmopi wa rena o rerile gore lefase la rena le hlokomelwe ka tsela yeo e lerato. Go ya ka pego ya tlholo yeo e lego ka Lentšung la Modimo le le buduletšwego, ‘Jehofa Modimo o ile a tšea motho a mmea thšemong ya Edene gore a e leme, a e diše.’ (Genesi 2:15) Go oketša moo, lapa la batho le ile la laelwa gore le katološe Paradeise yeo ya mathomo gore e tlale lefaseng ka moka, e sego feela go hlokomela Edene.—Genesi 1:28.

Ka manyami, ka baka la go se kwe ga bona, Adama le Efa ba ile ba lahlegelwa ke sebaka sa go hlokomela le go katološa mellwane ya Paradeise. (Genesi 3:1-6, 23) Ka ge re le bana ba batho bao ba babedi ba pele, re abetše sebe sa bona le go se phethagale. (Ba-Roma 5:12) Go dirišwa gampe ga ditšweletšwa tša lefase tša tlhago ke mohlala o tee feela wa maiteko a fošagetšego a go ipuša ga batho. Go molaleng gore mathata a batho a ka godimo ga matla a bona a go a rarolla. Go nyakega thušo e tšwago mothopong o matla go feta batho.

Tsela ya go Kaonefatša

Ge a be a le lefaseng, Jesu o ile a ruta barutiwa ba gagwe go rapela ka tsela ye: “Mmušô wa xaxo a o tlê; thatô ya a xaxo a e dirwê mono lefaseng byalo ka xe e dirwa lexodimong.” (Mateo 6:10) Beibele e ruta gore ka fase ga Mmušo wa Modimo wa legodimong, lefase le tla dirwa paradeise. (Psalme 37:10, 11) Ka nako yeo dihlare le dibjalo di tla ntšha ditšweletšwa tša tšona tikologong e hlwekilego. (Psalme 72:16) Ka fase ga taolo ya Modimo, lefase le tla hlwekišwa tšhilafalo gomme batho ba tla ithuta go phedišana ka kwano e feletšego le tikologo. Ke ka baka la’ng re ka kgodišega ka seo?

Beibele e bolela gore lefase, “methêô ya lôna O e theile wa xo se sišinyêxe neng le neng.” (Psalme 104:5) Ka nako ya Modimo e swanetšego, bohle bao ba phelago ba tla thabela ditšhegofatšo tša ka mo go sa felego, go akaretša le bophelo bjo bobotse, mohora wa dijo le madulo a mabotse. Na o ka rata go ithuta ka mo go oketšegile ka merero ya Modimo? Bolela le ge e le ofe wa Dihlatse tša Jehofa. Di tla thabela go go thuša gore o bone go tšwa ka Beibeleng kamoo Lefase le ka phološwago—le kamoo le tlago go phološwa!

[Seswantšho go letlakala 10]

Ka fase ga taolo ya Modimo, batho ba tla phedišana ka kwano le tikologo

[Mothopo]

Girl and farmer: © Jeremy Horner/Panos Pictures