Na Phetogo ya Kgonthe e a Kgonega?

“Ga go na motho le o tee yo a ka gapeletšago motho yo mongwe gore a fetoše mekgwa. Phetogo e swanetše go tšwa mothong ka boyena le ka go rata.”—VIVIEN STERN, A SIN AGAINST THE FUTURE—IMPRISONMENT IN THE WORLD.

THAROLLO ya bohlokwa e lebišago phetogong ya kgonthe gare ga bagolegwa e ithekgile ka thuto le phetogo ditekanyetšong tša boitshwaro le ponong. Ka ntle le pelaelo, go na le batho ba botegago bao ba dirago maiteko a go ruta le go thuša bagolegwa. Mošomo o mobotse le wa go hloka boithati wa batho ba bjalo o lebogwa e le ka kgonthe ke bagolegwa ba bantši.

Batho ba bangwe ba ka ganetša ka gore tshepedišo ya kgolego ka kakaretšo e ka se fetoge le gore go ka se kgonege gore bagolegwa ba fetoge tikologong e bjalo. Le ge e ka ba e le therešo gore go golegwa go nnoši ga go mediše ditekanyetšo tše difsa tša boitshwaro, thuto ya Beibele e thušitše ba bangwe go fetoša maphelo a bona. Se se bontšha gore phetogo e a kgonega go ithekgile ka motho ka o tee ka o tee.

Lehono ka thušo ya Beibele, bagolegwa ba bangwe ba dira diphetogo tšeo di tšweletšago kgopolo e nepagetšego le boitshwaro. Bjang? Ka go ela hloko keletšo ya Beibele e rego: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse  le se se kxahlišaxo, se e lexo sa botlalô.” (Ba-Roma 12:2) Se se phethwa bjang?

Tema Yeo e Kgathwago ke Beibele

Batho ba bantši ba nagana gore bodumedi bo ka kgatha tema e kgolo go thušeng bagolegwa go sokologa ditirong tša bona tša pele. Ke therešo gore bothata bja motheo ka se ke gore phetogo le ge e le efe ya semelo yeo e bonagatšwago kgolegong, e ka nyamelela gatee-tee ge mogolegwa a lokolotšwe. Mogolegwa yo mongwe o bea taba ka tsela ye: “Batho ba bantši ba hwetša Kriste lefelong le—eupša ge ba e-tšwa mo, ba tlogela Kriste!”

Phihlelo e bontšhitše gore phetogo ya kgonthe e swanetše go direga ka gare—ka monaganong le ka pelong ya sesenyi—le gore motheo e swanetše go ba go itshola ga kgonthe bakeng sa phošo ya nakong e fetilego. Lenaneo la thuto ya Beibele le ka thuša motho go tseba kamoo Modimo a ikwago ka gona ka bokgopo le lebaka leo ka lona bo fošagetšego. Se se ka mo nea mabaka a tiilego a go se nyake go tšwela pele tseleng e bjalo.

Dihlatse tša Jehofa di swara lenaneo le le bjalo la thuto ya Beibele dikgolegong tše mmalwa go dikologa lefase, ka mafelelo a kgahlišago. (Bona letlakala 10.) Mogolegwa yo mongwe o boletše gore: “Re thušitšwe go lemoga seo Bibele e se bolelago ka morero wa bophelo le ditšhegofatšo tšeo bokamoso bo di huparetšego batho.” O okeditše ka gore: “Ke thuto e makatšago gakaakang!” Mogolegwa yo mongwe o boletše gore: “Re dira diphetho tšeo di theilwego keletšong ya Modimo. . . . Re bona diphetogo go rena. Re tseba dilo tšeo di tlago pele bophelong.”

Ke therešo gore go nyakega ga phetogo go fetela le ka kua ga maboto a kgolego. Tharollo ya kgonthe mathateng a dikgolego e letše go tlošweng ga go nyakega ga dikgolego. E nngwe ya ditherešo tše di kgahlišago tša Beibele yeo e kgomilego dipelo tša bagolegwa ba bantši e bolelwa kholofetšong ya Modimo e rego: “Ba babe ba tlo lôba; . . . Baloki e ba beng ba naxa, ba dula mo xo yôna ka mehla le ka mehla.”—Psalme 37:9, 29.

Ge seo se direga, ditekanyetšo tša Modimo tše di phagamego di tla kgonthišetšwa ke mmušo o sa senyegego wo e lego wa lerato le o tiilego, Mmušo wa Modimo wa legodimong ka tlase ga Kriste—mmušo woo Bakriste ba rutilwego go o rapelela. (Mateo 6:10 ) Lefaseng leo le lefsa, modudi yo mongwe le yo mongwe o tla fetošwa ke go ithuta melao e phagamego ya Modimo. Ke moka, e tla ba therešo go feta le ge e le neng pele gore “xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:9) Ka mafelelo afe? Baagi bao ba kwago molao ba lefase le lefsa “ba tlo ithabela khutšong e kgolo.”—Psalme 37:11, PK.

 [Lepokisi/Diswantšho go letlakala 10]

Go Bula Sebaka sa go ba le Kholofelo

Mo e ka bago ka nywaga e fetago e 20, badiredi ba baithapi ba Dihlatse tša Jehofa ba ile ba iša lenaneo le le atlegago la thuto yeo e theilwego Beibeleng kgolegong ya mmušo kua Atlanta, Georgia, U.S.A. Lebakeng leo la nako, bagolegwa ba fetago 40 ba ile ba thušwa go ba badiredi ba kolobeditšwego ba Dihlatse tša Jehofa, gomme bagolegwa ba bangwe ba fetago 90 le bona ba ile ba holwa ke dithuto tša ka mehla tša Beibele.

Phafoga! e sa tšwa go boledišana le barutiši ba mmalwa ba Beibele bao ba bego ba šoma kgolegong yeo ka go hloka boithati.

▪ Ke ka baka la’ng thuto ya Beibele e le e atlegago gakaakaa go tutuetšeng bagolegwa ba bangwe gore ba fetoše maphelo a bona?

David: Bagolegwa ba bantši ke batho bao ba sa kago ba bontšhwa lerato gaešita le go tloga bjaneng. Ka gona ge ba thoma go lemoga gore Modimo o a ba rata le ge ba tšhollela dipelo tša bona go yena ka thapelo gomme a araba dithapelo tša bona, e ba wa kgonthe go bona. Dipelo tša bona di tutueletšega go mo rata ka mo go swanago.

Ray: Yo mongwe wa bagolegwa bao ke bego ke ithuta le bona o ile a gobošwa e sa le ngwana. Ge ke be ke mmotšiša seo se mo gogetšego go Jehofa, o ile a araba ka gore, ge o ithuta therešo ya Beibele, o lemoga gore Jehofa o go kwešiša e le ka kgonthe. Se se mo dirile gore a nyake go ithuta ka mo go oketšegilego ka semelo sa Modimo yo bjalo yo lerato.

▪ Ba bangwe ba ka bolela gore bagolegwa ba kgomarela bodumedi ka baka la maikemišetšo a fošagetšego—bakeng sa go fokotša kahlolelo ya bona goba go fo fetiša nako. Ke eng seo phihlelo ya lena e le bontšhitšego sona?

Fred: Ge bagolegwa ba e-tla dithutong tša rena, ga re leke go tsoša maikwelo a bona a feteletšego. Re fo ithuta Beibele le bona. Kapejana, ba lemoga gore ba tlo ithuta ka Beibele le gore ke sohle seo re se dirago. Ba bangwe ba fela ba e-tla go nna gomme ba nkgopela thušo tabeng ya go swaragana le melato ya bona ya tsheko. Ke be ke sa boledišane le bona ka se. Ka baka leo, bao ba tlago sehlopheng sa thuto le go dula moo ka nako e itšego, ruri ba nyaka go ithuta seo Beibele e se bolelago.

Nick: Selo se sengwe seo ke se lemogago ke diphetogo tšeo bagolegwa ba bangwe ba di dirago ge ba le ka kgolegong. Ba bangwe ba bona ba ile ba ba ­badiredi ba kolobeditšwego gomme ba tlaišega kudu ba tlaišwa ke bagolegwa ba bangwe. Seo se thata go bona. Ge nkabe Beibele e be e se ya kgoma dipelo tša bona, nkabe ba sa ka ba kgona go dula ba botega ka tlase ga maemo a bjalo.

Israel: Ka kakaretšo, ke batho bao ba nago le kganyogo e tseneletšego ya go ithuta ka Jehofa gomme ba bontšha seo ka tsela e kgahlišago. O kgona go bona gore e-tšwa dipelong tša bona.

Joe: Bao e bago Bakriste ba therešo ba ile ba thoma go kwešiša lebaka leo ka lona dilo di ba sepelelago gampe maphelong a bona. Gape ba kwešiša gore go na le kholofelo bakeng sa phetogo—sebaka sa kholofelo se a ba bulegela. Bjale ba ka lebelela pele go phethagatšweng ga dikholofetšo tša Jehofa tša bokamoso.

▪ Ke ka baka la’ng tshepedišo ya kgolego e nnoši e ka se kgone go fetoša disenyi?

Joe: Morero wa tshepedišo ya dikotlo ga se go kgopamolla mekgwa, eupša ke go tloša disenyi kgole kudu le setšhaba ka moka. Seo ke modu wa bothata—tshekamelo ya menagano e sa fetogego ya tshepedišo ya tša kgolego ka banna ba.

Henry: Tshepedišo ya kgolego ga e kgone go fetoša ditshekamelo tša disenyi. Bontši bja batho ba ba tla bušeletša bosenyi bja bona ge ba tšwile kgolegong.

[Seswantšho go letlakala 8, 9]

Bontši bja bagolegwa bo thušitšwe go ithuta therešo ya Beibele