Na o Bona go Feta Kamoo Mahlo a Gago a Bonago ka Gona?

BAOTLEDI ba dikoloi ba ka se kgone go bona ka kakaretšo go dikologa mothinya o sa bonagalego. Eupša ka thušo ya seipone seo se beilwego mothinyeng, go ka bonwa dikoloi tše tlago gomme dikotsi tša phengwa. Ka mo go swanago, batho ge e le gabotse ba ka se kgone go bona Mmopi yo a sa bonagalego. Na go na le tsela ya go tseba gore Motho yo bjalo o gona?

Mongwadi wa lekgolong la pele la nywaga o ile a bolela kamoo re ka lemogago ka gona seo re sa kgonego go se bona. O ngwadile gore: “Tše di sa bonwexo tša [Modimo], e lexo matla a neng le neng, le bomodimo bya xaxwe, le tšôna xo tloxa thlolong ya lexohle, ba ka di hlatha ka xo bôna ditirô tša xaxwe, ’me ba hlôka tše ba kaxo latola ka tšôna.”—Ba-Roma 1:20.

Nagana ka seo. Na o bona bohlale bjo bo bonagatšwago dilong tšeo di re dikologilego tšeo di phagametšego bokgoni bja motho bja go bopa? Na dilo tše bjalo di go thuša go bona ka “mahlo a gago a kwešišo” gore go na le motho yo mongwe yo mogolo go feta motho? Anke re ele hloko mehlala e mengwe.—Ba-Efeso 1:18, King James Version.

Go Ithuta go tšwa Tlholong

Na o kile wa makatšwa ke letago la leratadima le phadimago leo le tletšego ka dinaledi bošegong bjo go se nago ngwedi, o bona ka go lona bohlatse bja Modiri yo Mogolo? Mohlalosi wa bogologolo o ile a bolela gore: “Maxodimo a re anêxêla boxolo bya Modimo; medirô ya ’atla tša xaxwe e rêtwa ke leratadima.” Monna yo o ile a naganišiša ka gore: “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé O di beilexo, ke re motho ké eng, xe O bile O sa mo lebale? Ngwana wa motho ké eng, xe O bile O mo êla hlôkô?”—Psalme 8:3, 4; 19:1.

 E tloga e le ga tlhago go rena gore re makatšwe ke tlhago yeo e lego e botse go ka kopišwa ke batho. Lefoko le lengwe le tumilego la sereto le re: “Ke Modimo feela yo a ka dirago sehlare.” Lega go le bjalo, seo se makatšago le go feta ke go bopša ga ngwana, moo go tšwelelago ka ntle le tlhahlo le ge e le efe e tšwago go batswadi ya tlholo. Ge peu yeo e tšwago go tate e kopana le lee leo le tšwago go mma, dipolane kapejana di thalwa ka gare ga DNA ya sele yeo e sa tšwago go bopša bakeng sa go tšweletša ngwana. Go thwe ditaelo tša ka gare ga DNA “ge di ka ngwalwa di ka tlala dipuku tše sekete tša matlakala a 600.”

Seo ke mathomo feela. Sele ya mathomo e a arogana bakeng sa go dira tše pedi, ka morago tše nne, tše seswai, bjalo bjalo. Ka morago ga mo e ka bago matšatši a 270, ngwana yo a dirilwego ka disele tše dikete tše dimilione tša mehuta e fetago 200 o a belegwa. Go sa lebalwe gore sele ya mathomo e be e e-na le tsebišo ka gare ga yona bakeng sa go dira mehuta ka moka e fapanego ya disele le go di tšweletša ka nako e swanetšego! Na o tutueletšega go tumiša Mmopi wa rena? Ela hloko tumišo yeo e dirilwego ke mopsalme yo a ngwadilego gore: “Xobane ké Wene mmopi wa letswalô la-ka; ke loxilwe ke Wene mmeleng wa mmê. Ke a Xo leboxa x’O mpopile wa matete-tete.”—Psalme 139:13-16.

Bao ba ithutilego “mehlolo” ye ba na le maikwelo a tlhompho. Dr. James H. Hutton, yo e bego e le mopresidente wa Tirelo ya tša Kalafo ya Mmušo ya ditšhaba tša Chicago le Illinois, o itše o be a tlabilwe ke “bokgoni [bja sele] bjo bo phagamego bja go kgona go fetišetša go disele tšeo di hlatlamago tsebišo yeo di nyakago e tšweletšwa gape. Ruri ke mo go kgahlišago gore bo-rathutamahlale ba rena bao e lego banyakišiši ba kgonne go ithuta ka dilo tše bjalo. Eupša Bohlale bja Modimo e le ka kgonthe bo swanetše go ba bo rulagantše ditiragalo tše.”

Dr. Hutton o tšwetše pele ka gore: “Go šomeng ga-ka ka diela tša mmele, thuto ya go dira ga diela tša mmele le go šarakana ga dithaka go oketša kgodišegong ya gore Matla a Modimo a swanetše go ba a ikarabela bakeng sa go raragana mo go makatšago le go dira ga dikarolo tše tša bohlokwa.” O phethile ka gore: “Go nagana ka dimakatšo tše go bonala e le lebaka leo le nyakago šedi bakeng sa go dumela gore matla ohle le tsebo e feletšego di rulagantše legohle le, tšeo di dirago le go okamela godimo ga lona.”

Ka morago ga go bolela ditlhaloso tše, Dr. Hutton o ile a botšiša: “Na Ke Modimo yo e lego motho yo a elago hloko go wa ga thaga e nngwe le e nngwe?” O ile a araba ka gore: “Ka mokgwa o itšego ke belaela seo. E bile ga ke dumele gore O ela hloko ka tsela e itšego ditiragalo tša-ka tša letšatši le letšatši tšeo di sego bohlokwa kudu.”

Ke ka baka la’ng ba bantši ba lemoga gore bohlale bjo ke bjo bo bonagalago “mehlolong” ya tlholo eupša ba belaela go ba gona ga Modimo yo a tshwenyegago ka batho?

Na Modimo Ruri o na le Taba le Rena?

Ba bantši ba bea mabaka ka gore ge nkabe go na le Modimo, o be a ka se dumelele batho ba tlaišega ka tsela ye. Potšišo e tlwaelegilego yeo ba bangwe ba e botšišago ke gore, “Modimo o be a le kae ge re be re mo nyaka?” Motho yo mongwe yo a phologilego go bolawa ga ba dimilione ke ma-Nazi Ntweng ya II ya Lefase o be a nyamišitšwe kudu ke tlaišego yeo a e bonego moo a ilego a re: “Ge e ba o be o ka latswa pelo ya-ka, e be e tla go tsenya mpholo.”

Ka gona ke tlalelo bakeng sa ba bantši. Bjalo ka ge mohlalosi wa bogologolo yo go boletšwego ka yena pejana a boletše, bohlatse bja Mmopi ke bjo bo lego molaleng ge re hlahloba thulaganyo le ditlhamo tša mohlolo tša dilo. Lega go le bjalo, ge e ba E le Modimo yo a nago le taba le rena, A ka dumelela bjang tlaišego e sehlogo? Ge e ba re nyaka go kwešiša le go rapela Modimo ka tsela e swanetšego, re swanetše go ba le karabo e kgotsofatšago potšišong yeo e bohlokwa. Re ka e hwetša kae?

Re go laletša gore o hwetše kopi ya poroutšha ya Na Modimo Ruri o na le Taba le Rena? Go letlakala 32 la Phafoga! ye, o tla bona gore o ka e kgopela bjang. Re nagana gore tlhahlobo e tseneletšego ya dikarolo tše di rego “Lebaka Leo ka Lona Modimo a Dumeletšego Tlaišego” le “Mafelelo a Borabele e Bile Afe?” di tla go nea dikarabo tše kgotsofatšago.

[Seswantšho go letlakala 10]

Na o bona bohlatse bja go ba gona ga Mmopi dilong tše?