Jobo 21:1-34
21 Jobo a araba a re:
2 “Ntheetšeng gabotse,Ge le ka dira bjalo ke tla homotšega.
3 Nkgotleleleng ge ke bolela.Ge ke feditše go bolela, ke gona le ka nkwerago.+
4 Na ke llela go motho?
Ge e ba ke llela go yena, go tla bjang gore ke se ke ka fela pelo?
5 Ntebeleleng le maketše,Le thibe melomo ya lena ka diatla.
6 Ge ke nagana ka taba ye, ke a ferekana,Ebile mmele wa ka ka moka o a thothomela.
7 Goreng batho ba babe ba tšwela pele ba phela,+Ba tšofala, ebile ba humile?+
8 Bana ba bona ba dula ba le pele ga bona,Ebile ba phela nako e telele, ba be ba bone le ditlogolo tša bona.
9 Dintlo tša bona di šireletšegile, ga ba tšhoge selo,+Ebile Modimo ga a ba otle ka kgati ya gagwe.
10 Dipoo tša bona di a tswadiša,Dikgomo tša bona tše tshadi di a tswala, ga di folotše.
11 Bana ba bona ba bašemanyana ba kitimakitima go swana le mohlape wa dinku,Gomme bana ba bona ba a tshelatshela.
12 Ba a opela ebile ba letša moropa le harepa,Le gona ba a thaba ge ba ekwa batho ba letša dinaka.+
13 Ba fetša bophelo bja bona ba ipshina,Gomme ka morago ba theogela Lebitleng* ka khutšo.
14 Eupša ba botša Modimo wa nnete ba re: ‘Re tlogele!
Ga re nyake go tseba melao ya gago.+
15 Ramatlaohle ke mang ge e bile re swanetše go mo hlankela?+
Le gona re tla holega ka eng ge re mo rapela?’+
16 Eupša ke a tseba gore batho ba babe ga ba na maatla a go dira gore dilo di ba sepelele gabotse.+
Ga ke nagane go swana le bona.+
17 Lebone la batho ba babe le tingwa gakae?+
Le gona ba welwa ke mathata gakae?
Ke gakae Modimo a ba fedišago a galefile?
18 Na ba swana le lehlokwa leo le tšewago ke phefo,Le mooko woo o tšewago ke ledimo?
19 Modimo o tla otla bana ba motho yo mobe ka baka la melato ya tatago bona.
Ebile o tla otla le motho yo mobe gore le yena a ikwele.+
20 Anke motho yo mobe a ipone ge a fedišwa,Le gona anke a ikwele kgalefo ya Ramatlaohle.+
21 Ka gobane ge palo ya dikgwedi tša gagwe e ka fokotšwa,A ka se be le taba le seo se tlago go diragalela bana ba gagwe ge a se sa le gona.+
22 Ge e ba Modimo e le yena a ahlolago gaešita le batho ba maemo a godimo,+Na go na le yo a ka mo rutago se sengwe?+
23 Motho yo mongwe o hwa a sa na le maatla,+A se na mathata ebile a iketlile,+
24 Ge dirope tša gagwe di tletše makhuraLe marapo a gagwe a sa tiile.
25 Ge e le motho yo mongwe yena o hwa a gateletšegile kudu,A se a ka a latswa le selo se sebotse.
26 Batho ba ka moka ba tla boela leroleng,+Gomme ba jewa ke diboko.+
27 Bonang! Ke tseba gabotse seo le se naganago,Le maano ao le ntogelago ona.+
28 Ka gobane le re: ‘E kae ntlo ya monna yo a tumilego,Le gona e kae tente yeo motho yo mobe a bego a dula go yona?’+
29 Na ga se la botšiša batho bao ba itshepelelago?
Na ga le dumele seo ba se bolelago,
30 Gore motho yo mobe ga a tlaišege letšatšing la kotsi,Le gore o a phologa ge Modimo a galefile?
31 Ke mang a tlago go mmotša mahlong gore ga a dire tšona?Le gona ke mang a tlago go mo lefeletša seo a se dirilego?
32 O tla bolokwa mabitleng,Gomme lebitla la gagwe le tla letwa.
33 O tla tsefelwa ke mobu wo a robetšego go wona,+Gomme batho ka moka ba mo šala morago+Go no swana le ba bangwe ba bantši bao ba mo etilego pele.
34 Ka gona goreng le nkhomotša ka lefeela?+
Dilo ka moka tše le di bolelago ke maaka.”
Mengwalo ya Tlase
^ Bona Tlhaloso ya Mantšu.
