Jehofa o ile a laela Baisiraele ba mehleng ya kgale gore ngwaga le ngwaga ba ntšhe lekgetho, a goba karolo ya lesome ya dilo tšeo ba bego ba e na le tšona bakeng sa gore ba thekge borapedi bja therešo. Modimo o ile a ba botša gore: “O ntšhe karolo ya lesome mabeleng a gago ka moka ao o a bunago mašemong ngwaga le ngwaga.”—Doiteronomio 14:22.

 Molao wa gore batho ba swanetše go ntšha karolo ya lesome e be e le karolo ya Molao wa Moshe, e lego molao woo Modimo a bego a o file Baisiraele ba mehleng ya kgale. Ga go na molao woo o bontšhago gore Bakriste ba swanetše go latela Molao wa Moshe, e bile ga go hlokege gore ba ntšhe karolo ya lesome. (Bakolose 2:13, 14) Go e na le moo, ge Mokriste yo mongwe le yo mongwe a ntšha moneelo, o swanetše go ‘dira feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.’—2 Bakorinthe 9:7.

•  Beibele ya “Testamente ya Kgale” e re’ng ka go ntšha karolo ya lesome?

•  Beibele ya “Testamente e Mpsha” e re’ng ka go ntšha karolo ya lesome?

 Karolo ya lesome go bolelwa ka yona ka makga a mmalwa ka Beibeleng yeo e tsebjago ka Testamente ya kgale. Gantši go bolelwa ka yona ka morago ga gore Jehofa a fe Baisiraele Molao a diriša Moshe, molao woo o tsebja e le Molao wa Moshe. Lega go le bjalo, go na le makga a sego kae moo go boletšwego ka karolo ya lesome pele go ka ba le Molao wa Moshe.

Pele go ka ba le Molao wa Moshe

 Motho wa mathomo yoo go bolelwago ka yena gore o ile a ntšha karolo ya lesome ke Aborama, yoo a tsebjago e le Aborahama. (Genesi 14:18-20; Baheberu 7:4) Go bonagala karolo ya lesome yeo e ilego ya ntšhwa ke Aborama, e be e le mpho ya mathomo e bile e le ya mafelelo yeo e bego e eya go kgoši ya Salema yeo gape e bego e le moperisita. Ga go na bohlatse bjo bo bontšhago gore Aborahama goba bana ba gagwe ba ile ba ntšha karolo ya lesome gape.

 Motho wa bobedi yoo go bolelwago ka yena ka Beibeleng gore o ile a ntšha karolo ya lesome ke setlogolo sa Aborahama e lego Jakobo. O ile a tshepiša Modimo gore ge a ka mo šegofatša, o tla mo fa karolo ya lesome ya selo se sengwe le se sengwe seo a mo fago sona. (Genesi 28:20-22) Go ya ka diithuti tše dingwe tša Beibele, go bonagala Jakobo a ile a ntšha karolo ye ya lesome e le gore a dire dihlabelo tša diphoofolo. Le ge Jakobo a ile a phetha keno ya gagwe ka gore a ntšhe karolo ya lesome, ga se a ka a rweša lapa la gagwe morwalo gore le lona le ntšhe karolo ya lesome.

Ka Tlase ga Molao wa Moshe

 Baisiraele ba mehleng ya kgale ba be ba laetšwe gore ba ntšhe karolo ya lesome bakeng sa gore ba thekge mediro ya bodumedi bja bona.

•   Karolo ya lesome e be e thuša badumedi bao ba bego ba šoma tenteng ya kopano ka nako e tletšego, e lego Balefi, le baperisita bao ba bego ba se na mašemo ao ba ka lemago go ona. (Numeri 18:20, 21) Balefi bao e bego e se baperisita ba be ba amogela karolo ya lesome yeo e bego e etšwa go Baisiraele, gomme “karolo ya lesome” yeo e bego e lebišitšwe go Jehofa, e be e newa baperisita.—Numeri 18:26-29.

•   Go bonagala batho ba be ba swanetše go ntšha karolo ya lesome gabedi mo ngwageng, ka ge e be e tlo thuša Balefi le bao e bego e se Balefi. (Doiteronomio 14:22, 23) Malapa a Baisiraele a be a ntšha karolo ya lesome le nakong ya ge go be go na le mekete yeo e kgethegilego, gomme mengwageng e mengwe dilo tšeo di ntšhitšwego di be di arolelwa le batho bao ba bego ba diila kudu gore le bona ba kgone go hwetša sa go ja.—Doiteronomio 14:28, 29; 26:12.

 Karolo ya lesome e be e balwa bjang? Ngwaga o mongwe le o mongwe Baisiraele ba be ba beela ka thoko karolo ya lesome ya dilo tšeo ba di bunnego mašemong a bona. (Lefitiko 27:30) Ge ba be ba kgetha go ntšha karolo ya lesome ka tšhelete go e na le go ntšha ka dijo tšeo ba di bunnego, gona ba be ba tla swanelwa ke go oketša tšhelete yeo ka diperesente tše 20. (Lefitiko 27:31) Le gona ba be ba laetšwe gape gore ba ntšhe karolo ya lesome ya “mohlape wa dikgomo le wa dihuswane.”—Lefitiko 27:32.

 E le gore Baisiraele ba tsebe gore ke phoofolo efe yeo ba tlago go ntšha karolo ya bona ya lesome ka yona, ba be ba kgetha phoofolo e nngwe le e nngwe ya bo lesome ka lešakeng. Molao o be o bontšha gore ga se ba swanela go hlahloba diphoofolo tšeo ba bego ba yo ntšha karalo ya lesome ka tšona, goba go tliša phoofolo e nngwe legatong la yeo ba bego ba e kgethile. Le gona ba be ba swaneše go ntšha karolo ya lesome ka diphoofolo, e sego ka tšhelete.(Lefitiko 27:32, 33) Lega go le bjalo, Baisiraele ba be ba dumeletšwe gore ge ba ntšha karolo ya lesome la bobedi, ba ka ntšha tšhelete legatong la diphoofolo. Karolo yeo ya lesome e be e tlo dirišwa menyanyeng ya ngwaga le ngwaga. Tokišetšo ye e ile ya thuša Baisiraele bao ba bego ba swanelwa ke go sepela leeto le letelele ge ba eya menyanyeng yeo.—Doiteronomio 14:25, 26.

 Baisiraele ba be ba ntšha karolo ya lesome neng? Baisiraele ba be ba ntšha karolo ya lesome ngwaga o mongwe le o mongwe. (Doiteronomio 14:22) Lega go le bjalo, ngwaga o mongwe le o mongwe wa bošupa, Baisiraele ba be ba laetšwe gore ba se leme. Ngwaga woo e be e le wa Sabatha goba ngwaga wa go khutša ka gobane Baisiraele ba be ba sa swanela go bjala selo le ge e le sefe ngwageng woo. (Lefitiko 25:4, 5) Ka lebaka la maemo a a kgethegilego, go be go sa letelwa gore batho ba ntšhe karolo ya lesome nakong ya puno. Ka Sabatha ya ngwaga o mongwe le o mongwe wa boraro le wa bo tshela, ge Baisiraele ba be ba ntšha karolo ya bona ya lesome ya bobedi, ba be ba arolela badiidi le Balefi.—Doiteronomio 14:28, 29.

 Go be go direga eng ka motho yo a bego a sa ntšhe karolo ya lesome? Molao wa Moshe ga se o bolele gore go be go tlo diragala eng ka motho yo a sa ntšhego karolo ya lesome. Batho ba be ba swanetše go ntšha karolo ya lesome ka gobane ba be ba tseba gore seo se be se le bohlokwa, e sego gore ge ba ka se e ntšhe ba be ba tla otlwa. Ge Baisiraele ba be ba ntšhitše karolo ya lesome, ba be ba eya pele ga Modimo gomme ba mo kgopela gore a ba šegofatša. (Doiteronomio 26:12-15) Ge motho a be a sa nyake go ntšha karolo ya lesome, Modimo o be a lebelela seo e le go mo utswetša.—Maleaki 3:8, 9.

 Na go ntšha karolo ya lesome e be e le morwalo o boima? Aowa. Modimo o be a tshepišitše setšhaba sa Isiraele gore ge e ba se ntšha karolo ya lesome, o tla se šegofatša gomme sona sa se hloke selo. (Maleaki 3:10) Ka lehlakoreng le lengwe, ge setšhaba se se be se sa nyake go ntšha karolo ya lesome se be se tlaišega le gona Jehofa o be a sa se šegofatše ka gobane se be se dira gore mošomo wo o dirwago ke baperisita le Balefi o se sa tšwela pele. Le gona Balefi le baperisita ba ile ba swanela ke gore ba ye ba nyake mešomo ya boiphedišo gomme ba palelwa ke go tšwela pele ba thuša Baisiraele gore ba hlankele Jehofa.—Nehemia 13:10; Maleaki 3:7.

 Nakong ya ge Jesu a be a le mo lefaseng, go ntšha karolo ya lesome go be go le bohlokwa go barapedi ba Modimo. Lega go le bjalo, molao wo o ile wa fedišwa ka morago ga gore Jesu a hwe.

Mehleng ya Jesu

 Karolo ya Beibele yeo e tsebjago e le Testamente e Mpsha, e bontšha gore Baisiraele ba ile ba tšwela pele ba ntšha karolo ya lesome nakong ya ge Jesu a be a sa le mo lefaseng. O be a tseba gore go ntšha karolo ya lesome go be go le bohlokwa go bona, eupša o ile a galefela baetapele ba bodumedi bao ba bego ba ntšha karolo ya lesome eupša ba ‘hlokomologa ditaba tše bohlokwa tša Molao, e lego, toka le kgaugelo le potego.’—Mateo 23:23.

Ka morago ga lehu la Jesu

 Go be go sa hlokagale gore ka morago ga lehu la Jesu batho ba tšwele pele ba ntšha karolo ya lesome. Lehu la Jesu le ile la phumola Molao wa Moshe go akaretša le ditaelo tša go “kgoboketša dikarolo tša lesome.”—Baheberu 7:5, 18; Baefeso 2:13-15; Bakolose 2:13, 14.