Dihlatse tša Jehofa di thomile go aga ofisi ya lekala e mpsha kgauswi le toropo ya Chelmsford, profenseng ya Essex kua Brithania. Tikologo ye e botse e na le diphedi tše dintši tša nageng tšeo di šireletšwago ke molao wa Wildlife and Countryside Act 1981 moo United Kingdom. Dihlatse tša Jehofa di dira eng ge di dutše di aga gore di se tshele molao woo le go šireletša diphedi?

Dihlatse di diriša mapolankana ao a šalago ge di aga go direla diphedi tše dinyenyane tše di nyakilego di swana le magotlo mafelwana a go dula kgojana le moo di šomago gona. Le gona di agetše magotlwana ao tsejana e nyenyane ka terata gore a kgone go tshela tsela e mpsha go kgonthišetša gore a kgona go fihla mehlareng le mehlašaneng yeo a dulago go yona. Go oketša moo, Dihlatse di diriša mokgwa o kgethegilego wa go hlokomela mehlašana e le gore magotlwana ao a holege. Ngwaga o mongwe le o mongwe ge e le nako ya gore magotlwana ao a tšhabele marega, batho ba ripa karolo e itšego ya mehlašana yeo. Mokgwa wo o dirišwago ka mehla ga o šitiše kudu tsela yeo magotlwana a a phelago ka yona, e bile o šireletša bodulo bja ona le go kgonthišetša gore a hwetša dijo gona moo.

Le gona Dihlatse di šireletša mohuta o itšego wa dinoga tša moo tše di sa lomego, mekgaditswane ye re e tsebago le mekgaditswane e mengwe yeo e se nago maoto le matsogo. Batho bao ba ithutetšego go tseba dimela le diphoofolo ba ile ba topa digagabi tše ka tlase ga dithaele tša go rulela gomme ba di iša lefelong le le šireletšegilego kgojana le moo go agiwago. Lefelo le le lefsa moo digagabi tše di dulago gona le na le mafelwana ao di ka tšhabelago go ona nakong ya marega le fense ya go di šireletša. Dihlatse di fela di lebelela fense ye go kgonthišetša gore ga e na mašoba e le gore digagabi tšeo di se ke tša tsena gomme tša fihla mo go agiwago ke moka tša gobala.

E le gore baagi ba se ke ba šitiša bomankgagane bošego, ba diriša mabone a LED ao a sa fahlego. Mabone a a bonega ge a ekwa koloi e duma, gomme seo sa dira gore bomankgagane ba se šitišege ka ge go dula go le leswiswi. Ka ge gantši bomankgagane ba nyaka dijo bošego mehlašaneng ya kgauswi le mo go agiwago, mehlašana yeo e ka se tlošwe e bile go tla bjalwa e mengwe dikhilomithareng tša ka godimo ga tše pedi le seripa. Go be go ka se kgonege gore mehlare e mengwe e tlogelwe e sa remiwa, ka gona bašomi ba diretše bomankgagane mapokisana gore ba kgone go robala kamoo.

Go na le mehlare e mengwe yeo Dihlatse di sego tša e rema, gomme e le gore e kgone go gola gabotse, dilori tše di dirišwago ge go agiwa ga di dumelelwe go feta kgauswi le medu ya mehlare yeo. Diphedi tše dingwe tše dintši, bomankgagane le dinonyana di dula mehlareng ye. Dihlatse di ikemišeditše go diriša ditsela tše ka moka go tšwela pele di šireletša diphedi tša Chelmsford.