Eya go dikagare

Eya go menyu wa bobedi

Dihlatse tša Jehofa

Sepedi

Mpho e Kgahlišago Kudu

Mpho e Kgahlišago Kudu

Ka July 2013, Sehlopha se Bušago sa Dihlatse tša Jehofa se ile sa ngwala lengwalo leo le thabišago leo le bego le eya go baromiwa le bana babo rena ba bangwe bao ba lego tirelong e kgethegilego ya nako e tletšego bao ba hlankelago dinageng tše dingwe. Lengwalo le le be le ba tsebiša ka tokišetšo yeo e bego e tlo thuša bao ba hlankelago dinageng dišele gore ba kgone go ya dikopanong tša selete le tša ditšhabatšhaba tšeo di bego di swerwe ka 2014 go fihla mathomong a 2015.

Morero wa tokišetšo ye e be e se feela gore ba ye dikopanong eupša e be e le gore ba kgone go fetša nako le malapa a gabo bona le bagwera. Lengwalo le le be le bolela le gore mokgatlo o tla lefelela dithekethe tša sefofane.

Le ge ditokišetšo tše swanago le tše di ile tša ba gona nakong e fetilego, lekgeng le ditokišetšo di tla dirwa ka tsela e fapanego. Ka tlase ga tlhahlo ya Komiti ya go Ruta ya Sehlopha se Bušago, go ile gwa hlongwa lefapha le lefsa la World Headquarters (WHQ) Travel, e lego lefapha leo le ikarabelago ka go rulaganya maeto.

Ka morago ga go romela lengwalo la taletšo, dikgopelo tša dithekethe tša sefofane di ile tša tsena ka bontši ofising ya WHQ Travel. Ka January 2014, dikgopelo di be di thiba letšatši. Sehlopha seo se bego se ikarabela ka go dira dithulaganyo tša maeto se ile sa dira ditokišetšo tšeo di tseneletšego le go rulaganya dilo ka moka tšeo di bego di hlokagala bakeng sa bana babo rena bao ba lego tirelong e kgethegilego ya nako e tletšego lefaseng ka bophara.

A mangwe a maeto a go be go se bonolo go a rulaganya. Bana babo rena bao ba tšwago Reykjavík, Iceland, ba be ba swanetše go ya Cochabamba, Bolivia. Ba bangwe bao ba bego ba etšwa Nouméa, New Caledonia, ba be ba swanetše go namela difofane tšeo di yago Antananarivo, Madagascar. Ba bangwe ba ile ba tloga Port Moresby, Papua New Guinea, go ya Seattle, Washington, U.S.A. mola ba bangwe ba ile ba tloga Ouagadougou, Burkina Faso, go ya Winnipeg, Canada.

Sehlopha sa WHQ Travel sa batho ba bahlano se ile sa rulaganya difofane tše 19 000. Meneelo yeo e tšwago diphuthegong yeo e bego e beetšwe morero wa go thuša ka maeto a e ile ya dirišetšwa go reka dithekethe tša sefofane tše ka bago tše 4 300 bakeng sa bana babo rena ba tšwago dinageng tše 176.

Tokišetšo ye e ile ya thabelwa kudu. Banyalani ba bangwe ba baromiwa ba ile ba bolela gore: “Lehono re boela kabelong ya rena Borwabohlabela bja Asia. Re tloga re leboga kudu ge le re thušitše go boela nageng yeo re belegetšwego go yona ya Engelane, moo re kgonnego go ba le malapa a gabo rena ka morago ga ge re feditše mengwaga e mehlano re sa ba bone. Ntle le thušo yeo le re neilego yona re be re ka se kgone go boela gae. Re rata go leboga go tšwa pelong bohle bao ba thušitšego gore tokišetšo ye e atlege.”

Moromiwa yo mongwe yo a hlankelago Paraguay o ngwadile gore: “Nna le mosadi wa ka re leboga kudu tokelo ya go ba gona kopanong ya ditšhabatšhaba ya New Jersey, U.S.A. Mathomong a 2011, re ile ra thoma go rulaganya leeto la go ya United States go yo bona ntlokgolo ya lefase ka bophara. Re ile ra boloka tšhelete go tšea leeto le. Lega go le bjalo, ngwageng wona woo ka June re ile ra laletšwa go etela diphuthego tša Paraguay tšeo di dirišago polelo ya diatla. Se se be se bolela go tšea maeto a mantši le a matelele. Ka morago ga go naganišiša kudu ka taba ye, re ile ra phetha ka go se sa tšea leeto la go ya United States go ena le moo ra reka koloi e le gore re kgone go phetha kabelo ya rena gabotse. Ka morago ga moo, re ile ra hwetša taletšo ya go ya kopanong ya ditšhabatšhaba. Toro ya rena e ile ya phethagala e le ruri! Re tloga re leboga Jehofa ka botho le lerato la gagwe leo a le bontšhitšego ka tokišetšo ye e lerato.”

Banyalani ba bangwe ba go tšwa Malawi ba ngwadile gore: “Re rata go ngwala molaetša wo go le leboga. Re kwešiša mošomo, nako le ditshenyagalelo tšeo di dirilwego go rulaganya maeto a. Re leboga mošomo o thata wo le o dirilego. Go feta moo, re leboga lerato leo mokgatlo wa Jehofa o le bontšhitšego ka go dira gore re kgone go ya gae dikopanong tša ditšhabatšhaba le go ba le malapa a gabo rena le bagwera.”

Sehlopha sa WHQ Travel se ile sa thabela kabelo ye. Mileivi o boletše gore: “Go thuša baromiwa gore ba kgone go boela gae go yo bona malapa a gabo bona le bagwera go nkgomile pelo”. Dorise o ile a oketša ka gore: “Se se nthušitše go bona kamoo mokgatlo wo o nago le lerato le le tseneletšego la bana babo rena bao ba hlankelago dinageng di šele.” Rodney yo a bego a okamela lefapha le o boletše gore: “Ke thabetše kudu go ba karolo ya se.”

Dihlatse tša Jehofa lefaseng ka bophara di ile tša thabela go ntšha meneelo e le go thekga tokišetšo ye e lerato ya go thuša bana babo rena bao ba šomago ka thata le bao ba ikgafago kudu.

Ithute ka mo go oketšegilego

KE BOMANG BAO BA DIRAGO THATO YA JEHOFA LEHONO?

Ke ka Baka la Eng Dihlatse tša Jehofa di Eya Dikopanong tše Dikgolo?

Re ba le dikopano tše tharo ngwaga le ngwaga. O ka holwa bjang ke dikopano tše?