Fifitaki e Tagata Taute Tutaki ne Mua
Fifitaki e Tagata Taute Tutaki ne Mua
‘Kia mataala po ke fefe ha mutolu a fanogonogo.’—LUKA 8:18.
1, 2. Ko e ha kua lata a koe ke mataala ke he puhala ne fehagai a Iesu ke he tau tagata he magahala he fekafekauaga haana?
NE FAKAMOOLI e Iesu Keriso e matagahua haana ko e Faiaoga mo e Taute Tutaki ne Mua he magaaho ne pehē a ia ke he tau tutaki haana: “[“Kia mataala,” NW] po ke fefe ha mutolu a fanogonogo.” (Luka 8:16-18) Kua hagaao e matapatu fakaakoaga ia ke he fekafekauaga haau ko e Kerisiano. Kaeke ke mataala a koe ke he tau hatakiaga fakaagaaga, to fakagahuahua ai e koe ti eke mo tagata fakailoa lauia mitaki he Kautu. Mooli, kua nakai maeke ia koe ke logona e leo ha Iesu he vahā nei, ka e maeke ia koe ke totou hagaao ke he tau mena ne talahau mo e taute e ia, tuga ne fakakite i loto he tau Tohiaga Tapu. Ko e heigoa ne fakakite mai hagaao ke he puhala ne fehagai a Iesu ke he tau tagata he fekafekauaga haana?
2 Ko Iesu ko e tagata fakamatala homo ue atu he vagahau mitaki mo e ko e faiaoga ne mua atu he kupu mooli he Tohi Tapu. (Luka 8:1; Ioane 8:28) Ne putoia ke he taute tutaki e gahua fakamatala mo e fakaako, ka kua uka agaia ma e falu Kerisiano ko e tau tagata fakamatala fakamooli ke fakaako e tau tagata mo e lauia mitaki. Ha ko e gahua fakamatala kua putoia e fakapuloaaga he fekau, ti ke fakaako e tau tagata hagaao ki a Iehova mo e tau finagalo haana kua lata he tagata taute tutaki ke atihake e fakafetuiaga mo lautolu. (Mataio 28:19, 20) Kua maeke ke taute e mena nei he fifitaki ki a Iesu Keriso, ko e Faiaoga mo e Taute Tutaki ne Mua.—Ioane 13:13.
3. He fifitaki ki a Iesu ko e heigoa e lauiaaga ka moua e koe he tau laliaga haau ke taute tutaki?
3 Kaeke ke fifitaki e koe e tau puhala fakaako ha Iesu, kua fakatatai atu a koe ke he tomatomaaga he aposetolo ko Paulo: “Kia o fano a mutolu mo e iloilo ki mua ha lautolu i tua, mo e fakaaoga e mutolu e tau aho he mouiaga nai. Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolose 4:5, 6) He fifitaki a Iesu he gahua taute tutaki nukua lata ke lali fakalahi, ka e to taute he mena nei e fakaakoaga haau ke lauia mitaki ha ko e mena to lagomatai a koe “ke tali fakatonu atu ke he tau tagata” he hagaao ke he tau manako ha lautolu takitokotaha.
Fakamalolō e Iesu Falu ke Vagahau
4. Ko e ha ne pehē ai ko e tagata fanogonogo mitaki a Iesu?
4 Mai he vahā tama, ne mahani mau a Iesu ke fanogonogo ke he tau tagata mo e fakamafana a lautolu ke fakakite e tau manatu. Ke fakatai ki ai, he magaaho ne 12 e tau tau moui haana ne moua he tau matua haana a ia he lotouho he tau faiaoga i loto he faituga, “kua fanogonogo kia lautolu, mo e hūhu mena kia lautolu.” (Luka 2:46) Ne nakai fano a Iesu ke he faituga ke fakamā e tau akoako ha ko e haana iloilo. Ne fano a ia ke fanogonogo, ka e hūhū foki e ia e tau hūhū. Ko e hihiga haana ke eke mo tagata fanogonogo mitaki ne liga ko e taha aga ne moua e ia e fiafia mai he Atua mo e tau tagata.—Luka 2:52.
5, 6. Iloa fēfē e tautolu kua fanogonogo a Iesu ke he tau mena ne talahau e lautolu ne fakaako e ia?
5 He mole e papatiso mo e fakauku haana mo Mesia, ne fakatumau e Iesu e fiafia haana ke fanogonogo ke he tau tagata. Ne nakai pipiki katoa a ia ke he tau mena ne fakaako e ia ti nimo mogoia a lautolu ne o mai ke fanogonogo ki a ia ne vagahau. Ti, fa mahani a ia ke fakamaoki hifo, ti hūhū ko e heigoa e manatu ha lautolu, mo e fanogonogo ke he ha lautolu a tali. (Mataio 16:13-15) Ke fakatai ki ai, he mole e mate he tugaane ha Mareta, ko Lasalo, ne tala age a Iesu ki a Mareta: “Ko e tau tagata momoui oti, ke tua mai kia au, nakai mamate tukulagi ni.” Ti hūhū mogoia a Iesu ki a Mareta: “Kua talia nakai e koe e mena ia?” Ti fanogonogo mooli a Iesu he tali age a Mareta: “E, ko e Iki na e, kua talia ni e au, ko koe ko e Keriso ko e Tama he Atua.” (Ioane 11:26, 27) Ko e fiafia ha ia ke logona a Mareta ne fakakite e tua haana ke he puhala ia!
6 He magaaho ne tiaki he tau tutaki tokologa a Iesu, ne fiafia a ia ke logona e tau manatu he tau aposetolo haana. Ti hūhū a ia: “Po ke fia o kehe foki a mutolu?” Ne tali age a Simona Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi. Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.” (Ioane 6:66-69) Kua fakafiafia ha e tau kupu ia ki a Iesu! To fakafiafia foki pihia he fakakiteaga he tua he tagata fakaako Tohi Tapu haau a koe.
Fanogonogo a Iesu mo e Fakalilifu
7. Ko e ha ne tokologa e tau tagata Samaria ne hokotia ke tua ki a Iesu?
7 Taha kakano ne kautū a Iesu he eke mo tagata taute tutaki ha kua leveki atu a ia ke he tau tagata mo e fanogonogo fakalilifu ki a lautolu. He taha magaaho, ne fakamatala a Iesu ke he fifine Samaria ne tata ke he vaipuna ha Iakopo i Sikara. He fakatutalaaga ia, ne nakai ko Iesu ni hokoia ne tutala; ne fanogonogo a ia ke he mena ne talahau he fifine. He fanogonogo ki a ia, ne mailoga e Iesu e fiafia he fifine ke he tapuakiaga ti tala age ko e mena kumi e Atua ki a lautolu ka tapuaki ki a Ia mo e agaaga mo e fakamooli. Ne fakakite e Iesu e fakalilifu mo e kapaletū ke he fifine nei, ati talatala atu e fifine ke he falu hagaao ki a ia, mo e “tokologa e tau tagata Samaria ke he maga ia ne tua kia ia, ha ko e kupu he fifine ne talahau mai.”—Ioane 4:5-29, 39-42.
8. Maeke fēfē he hihiga he tau tagata ke talahau e tau manatu ha lautolu ke lagomatai a koe ke kamata e tau fakatutalaaga he fekafekauaga?
8 Kua fa fiafia e tau tagata ke fakakite e tau manatu ha lautolu. Ke fakatai ki ai, ko e tau tagata Atenai i tuai ne fiafia ke talahau e tau manatu ha lautolu mo e fanogonogo ke he tau tala foou. Ne takitaki atu ai ke he lauga lauia mitaki he aposetolo ko Paulo he Areopako he maaga ia. (Gahua 17:18-34) He magaaho ka kamata e fakatutalaaga mo e tagata he fale he fekafekauaga haau he vahā nei, liga pehē a koe, “Kua aahi mai au ha kua fiafia au ke iloa e manatu haau hagaao ke he [vala tala pauaki].” Fanogonogo ke he manatu he tagata, ti tutala ke he manatu haana, po ke talahau e hūhū hagaao ki ai. Ti fakakite fakamitaki e mena ne talahau he Tohi Tapu hagaao ke he matakupu.
Iloa e Iesu e Mena ke Talahau
9. Ko e heigoa ne taute e Iesu ato ‘fakamatala mai e tau Tohi Tapu’ ki a Kaleopa mo e kapitiga haana?
9 Ne fai talahauaga tumau a Iesu. Pete ko e tagata fanogonogo mitaki, ne fa mataala a ia ke he tau manatu he tau tagata, ti iloa tonu e ia e tau mena ke talahau. (Mataio 9:4; 12:22-30; Luka 9:46, 47) Ke fakatai: Nakai leva e mole he fakaliu tu mai a Iesu, ne ua e tutaki haana ne o mai hui i Ierusalema ki Emau. “Kua vagavagahau a laua, mo e fekumihaki,” he talahau he fakamauaga Evagelia, “ti fakatata mai ai a Iesu, kua o fakalataha mo laua. Ka kua ufia ha laua a tau mata, kia nakai iloa ai e laua a ia. Ti pehe a ia kia laua, Ko heigoa e tau kupu ia kua vagavagahau ai fakahaga a mua, mo e fakatutuku ai a mua? Ko e taha ia laua ne higoa ko Kaleopa, kua tala age kia ia, kua pehe age, Hoko koe ni kia ne api i Ierusalema mo e nakai iloa e tau mena kua tutupu i ai ke he vaha nai? Ti pehe a ia kia laua, Ko [e] heigoa e tau mena?” Ne fanogonogo e Faiaoga ne Mua he fakamaama e laua na fakaako e Iesu ko e Nasareta e tau tagata, taute e tau mana, ti kua tamate tuai. Mogonei ne pehē falu kua fakatū hake a ia he mate. Ne toka e Iesu a Kaleopa mo e kapitiga haana ke fakakite e tau manatu ha laua. Ti fakamaama e ia e tau mena kua lata ia laua ke iloa, ‘he fakamatala mai e tau Tohiaga Tapu’ ki a laua.—Luka 24:13-27, 32.
10. Puhala fe ka iloa e koe e manatu fakalotu he tagata ka feleveia mo koe he fekafekauaga haau?
10 Liga kua nakai fai mena a koe ne iloa hagaao ke he tau manatu fakalotu he taha tagata he fale. Ke iloa ai, liga pehē a koe kua fiafia a koe ke fanogonogo ke he tau manatu he tau tagata hagaao ke he liogi. Ti liga hūhū mogoia a koe, “Manatu nakai a koe kua fai tagata ne fanogonogo mooli ke he tau liogi?” To liga lahi e mena he tali ka fakakite hagaao ke he manatu mo e feakiaga fakalotu he tagata. Kaeke kua hihiga fakalotu a ia, liga maeke ia koe ke futia mai a ia he hūhū age, “Manatu nakai a koe kua fanogonogo e Atua ke he tau liogi oti, po kua fai liogi ne nakai talia e ia?” Maeke he tau hūhū pihia ke takitaki atu ke he fakatutalaaga totoka. He magaaho ka latatonu ke fakakite e manatu he Tohi Tapu, to manako a koe ke taute fakailoilo ai, nakai ke fetoko ke he tau mena ne talitonu he tagata. Kaeke kua fiafia a ia he fanogonogo ki a koe, liga to manako a ia ke liu age a koe. Ka e kua ka liga talahau e ia e hūhū ne nakai maeke ia koe ke tali? Lata ia koe ke taute e kumikumiaga ti liu atu ke talahau e ‘kakano he amaamanakiaga haau, he taute mo e mahani molu mo e hokulo e fakalilifu.’—1 Peteru 3:15.
Fakaako e Iesu a Lautolu kua Lata
11. Ko e heigoa ka lagomatai a koe ke moua a lautolu ne kua lata ke fakaako?
11 Ne ha ha he tagata mitaki katoatoa ko Iesu e loto manamanatu ati maeke a ia ke mailoga a lautolu kua lata ke fakaako. Kua paleko lahi ki a tautolu ke moua a lautolu “ne kotofa ke he moui tukulagi.” (Gahua 13:48) Ti pihia foki e tau aposetolo ne tala age a Iesu ki ai: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata.” (Mataio 10:11) Ke tuga e tau aposetolo ha Iesu, lata ia koe ke kumi e tau tagata kua fakamakai ke fanogonogo mo e ke fakaako e kupu mooli he Tohi Tapu. Maeke ia koe ke moua a lautolu kua lata, he fanogonogo fakamitaki ke he tau tagata oti ti mailoga e aga ha lautolu takitokotaha.
12. Matutaki fēfē a koe ke lagomatai e tagata ne fiafia?
12 He fano kehe mai he tagata ne fakakite e fiafia ke he fekau he Kautu, kua lata ia koe ke matutaki ke manamanatu hagaao ke he tau manako fakaagaaga haana. Kaeke ke tohi hifo e tau mena ne ako e koe he mole e tutala mo e taha tagata hagaao ke he tala mitaki, to lagomatai he mena nei a koe ke matutaki ke lagomatai fakaagaaga e tagata. He liliu aahi atu, lata ia koe ke fanogonogo fakamitaki ke lahi e mena haau ka ako hagaao ke he tau taofiaga, tau aga, po ke tau tutūaga he tagata.
13. Ko e heigoa ka liga lagomatai a koe ke iloa e tau logonaaga he tagata hagaao ke he Tohi Tapu?
13 Fakamafana fēfē e koe e tau tagata ke talaatu e logonaaga ha lautolu hagaao ke he Kupu he Atua? He falu puhala, kua lauia mitaki ke hūhū, “Kua uka kia ia koe ke maama e Tohi Tapu?” Ko e tali ke he hūhū ia kua fa fakakite e aga he tagata ke he tau mena fakaagaaga. Taha puhala foki ke totou e kupu tohi ti hūhū, “Fēfē e manatu haau ke he kupu ia?” Ke tatai mo Iesu, liga to lahi e mena haau ka taute he fekafekauaga he fakaaoga e tau hūhū mitaki. Pete ia, kua lata lahi ke mataala.
Ne Fakaaoga e Iesu e Tau Hūhū Lauia Mitaki
14. He nakai hūhū toko ke he tau tagata, fakakite fēfē e koe e fiafia ke he tau manatu ha lautolu?
14 Fakakite e fiafia ke he tau manatu he falu ka e nakai fakafuafuakelea a lautolu. Muitua ke he puhala ha Iesu. Nakai ko e tagata goagoa a ia ne hūhū toko, ka e fakaaoga e ia e tau hūhū ne fakaohooho manatu. Ko e tagata fanogonogo totonu foki a Iesu ne fakahauhau e tau tagata fakamooli mo e ko e okiokihaga ki a lautolu. (Mataio 11:28) Ne atāina e tau tagata kehekehe oti ke o atu ki a ia mo e tau tupetupe ha lautolu. (Mareko 1:40; 5:35, 36; 10:13, 17, 46, 47) Kaeke ke logona hifo he tau tagata e atāina ke talaatu ki a koe e tau manatu ha lautolu hagaao ke he Tohi Tapu mo e tau fakaakoaga i ai, lata ia koe ke kalo mai he hūhū toko ki a lautolu.
15, 16. Futia fēfē e koe e tau tagata ke tutala hagaao ke he tau mena fakalotu?
15 Lafi ke he fakaaoga he tau hūhū lauia mitaki, maeke ia koe ke atihake e fakatutalaaga he talahau falu mena fakaohooho ti fanogonogo ke he tali. Ke tuga anei, ne pehē a Iesu ki a Nikotemo: “Ka nakai liu foki fanau e tagata, ti nakai maeke ke kitia e ia e kautu he Atua.” (Ioane 3:3) Kua lahi e fakaohooho he tau kupu ia ati nakai taofi a Nikotemo ke fai tali mo e ke fanogonogo ki a Iesu. (Ioane 3:4-20) Liga maeke foki ia koe ke futia e tau tagata ke tutala ke he puhala pihia foki.
16 He vahā nei, kua fa mahani ke tutala ke he tau lotu foou loga ne kua fakatutū he tau motu tuga i Aferika, Europa Lalo, mo Amerika Latini. He tau motu pehēnei, kua maeke ia koe ke kamata e tau fakatutalaaga he pehē: “Kua tupetupe au ha kua loga lahi e tau lotu. Ka e amanaki au to nakai leva ti kitia e tau tagata mai he tau motu oti ka kaufakalataha ke he tapuakiaga mooli. Mitaki nakai e manatu ia ki a koe?” He talahau falu mena ofoofogia hagaao ke he amaamanakiaga haau, liga to maeke ia koe ke taute e tau tagata ke fakakite e tau manatu ha lautolu. Ti kua mukamuka e tau hūhū ke tali he magaaho ka ua ni e tali. (Mataio 17:25) He mole he tali e tagata he fale ke he hūhū haau, kia tali ne koe aki e taha po ke ua e kupu tohi. (Isaia 11:9; Sefanaia 3:9) He fanogonogo fakamitaki mo e tohi hifo e tali he tagata, liga maeke ia koe ke fifili e mena ke tutala ki ai he magaaho ka liu a koe.
Fanogonogo a Iesu ke he Fanau
17. Ko e heigoa ne fakakite kua fiafia a Iesu ke he fanau?
17 Ne fiafia a Iesu nakai ni ke he tau tagata lalahi ka e ke he fanau foki. Ne iloa e ia e tau pelē ne fefeua he tau tama ikiiki mo e tau mena ne talahau e lautolu. Falu magaaho ne uiina e ia e fanau ke o mai ki a ia. (Luka 7:31, 32; 18:15-17) Ne tokologa e fanau ne ha ha he toloaga ne fanogonogo ki a Iesu. He magaaho ne tauhea e tau tama he fakaheke e Mesia, ne mailoga e Iesu mo e fakakite ko e mena na talahau tuai he tau Tohiaga Tapu anei. (Mataio 14:21; 15:38; 21:15, 16) He vahā nei, kua tokologa e fanau hane eke mo tau tutaki ha Iesu. Ti maeke fēfē ia koe ke lagomatai a lautolu?
18, 19. Maeke fēfē ia koe ke lagomatai fakaagaaga e tama haau?
18 Ke lagomatai fakaagaaga e tama haau, lata a koe ke fanogonogo ki a ia. Lata a koe ke maama e tau manatu haana ne liga nakai tatai mo e manamanatuaga a Iehova. Ko e heigoa ni e mena ka talahau he tama haau, kua pulotu ke foaki fakamua e tali ne atihake. Ti fakaaoga mogoia e koe e tau kupu tohi kua latatonu ke lagomatai e tama haau ke maama e onoonoaga a Iehova hagaao ke he matakupu ia.
19 Kua fai magaaho ma e tau hūhū. Ka e nakai fiafia e fanau ke hūhū toko ki ai ke tuga ne tau tagata lalahi. He nakai fakamamafa e tama haau ke tali e tau hūhū uka loga, ko e ha he tutala fakakū hagaao ki a koe ni? He fakalata ke he kupu ne fakatutala ki ai, liga pehē a koe mena fa manatu pihia a koe fakamua ke he taha puhala pauaki ti fakamaama e kakano. Ti liga hūhū e koe, “Pihia foki nakai e manatu haau?” Ko e tali he tama haau to liga takitaki atu ke he fakatutalaaga faka-Tohiaga Tapu ne lagomatai mo e fakamalolō lahi.
Kia Fifitaki Tumau e Tagata Taute Tutaki ne Mua
20, 21. Ko e ha kua lata ke fanogonogo fakamitaki a koe he gahua haau ko e tagata taute tutaki?
20 Pete he fakatutala a koe mo e tama haau po ke taha tagata foki ke he taha matakupu, kua aoga lahi ke fanogonogo fakamitaki. Ko e fakakiteaga mooli a ia he fakaalofa. He fanogonogo, kua fakakite e koe e mahani fakatokolalo, ti kua fakalilifu mo e manamanatu fakaalofa ke he tagata hane vagahau. Mooli, ke fanogonogo kua lata ia koe ke mataala ke he tau mena ne talahau he tagata.
21 He fakalataha a koe ke he fekafekauaga faka-Kerisiano, kia fakatumau ke fanogonogo fakamitaki ke he tau tagata he fale. Kaeke ke mataala a koe ke he tau mena ne talahau e lautolu, to liga mailoga e koe e tau vala he kupu mooli he Tohi Tapu ka fiafia lahi a lautolu ki ai. Ti eketaha ke lagomatai a lautolu he fakagahuahua e tau puhala fakaako kehekehe ha Iesu. He taute pihia e koe, to moua e koe e fiafia mo e mauokafua ha kua fifitaki e koe e Tagata Taute Tutaki ne Mua.
To Tali Fēfē e Koe?
• Fakamafana fēfē e Iesu e falu ke fakakite e tau manatu ha lautolu?
• Ko e ha ne fanogonogo a Iesu ki a lautolu ne fakaako e ia?
• Fakaaoga fēfē e koe e tau hūhū he fekafekauaga haau?
• Ko e heigoa kua lata ia koe ke taute ke lagomatai fakaagaaga e fanau?
[Tau Hūhū he Fakaakoaga]
[Fakatino he lau 22]
He magaaho ka fakamatala, kia lata ke fanogonogo
[Fakatino he lau 24]
Ne fifitaki e tautolu a Iesu he magaaho ka lagomatai fakaagaaga e tautolu e fanau