Maeke Nakai e Lalolagi ke Kaufakalataha?

KUA teitei mafola nakai e lalolagi ha tautolu po ke tata lahi ke he matematekelea? Liga maeke e tau onoonoaga ua nei ke igatia mo e manatu.

Ke he taha faahi, ko e falu he tau takitaki he lalolagi ne tutala mauokafua kua maeke ke mafola e lalolagi katoa​—liga ha kua matakutakuina ke manamanatu ke he falu puhala. Ke he taha faahi, tokologa kua vivivivi he tau hūhū tuga anei: Ko e tau motu fe ne fai kanavaakau ne lahi e moumouaga? Liga loto malolō nakai a lautolu ke fakaaoga e tau kanavaakau ia? Ko e heigoa ka tupu kaeke ke fakaaoga ai e lautolu?

Kua kitia ai ke he fakamauaga tuai ko e fetokoaki mo e onoono hifo kua fakatauhele aki e tau amaamanakiaga ma e kaufakalataha, ti lahi foki e matagahua he lotu he fakaohooho e fekehekeheaki ka e nakai utakehe. “Ko e ha mena ni ne vehe aki e tau tagata kua fakatupu ai e totoko, ti ko e lotu e taha matapatu he vehe malolō nei,” he tohia he tagata tohi tala ko James A. Haught. “Pete kua laulahi ke talitonu ko e lotu ka taute e tau tagata ke ‘mahani mitaki,’ kua maaliali ai ko e lotu ne taute falu tagata ke fakafitā ke he tau gahua ne muitui e kelea.” Kua pihia foki e onoonoaga he tagata tohia ko Steven Weinberg. “Ma e tau tagata mitaki ke taute e tau mena kelea muitui,” he tohi e ia, “ko e vehe fakalotu ati pihia ai.”

Kua fai amaamanakiaga nakai to kaufakalataha e lalolagi ha tautolu? E! Ka ko e punaaga he kaufakalatahaaga he lalolagi to nakai mai he tagata po ke tau lotu ne fakatutū he tagata, tuga ka mailoga e tautolu.

[Blurb he lau 3]

Kua tatai kia e lalolagi mo e pomo kua teitei ke pā?