1. ¿Tlenon kichiuaj akin nemij ipan ikalpan toTajtsin, niman tlenon kinekij makichiuakan oksekimej?

 IPAN yejuin tonajli, nemij sekimej akin san sekan kitekichiuiliaj Jehová ipan ikalpan niman kichiuaj miyek tlen kuajli. Yejuamej melak kuajli nouikaj niman yolpakij pampa yokijtokej ika nochipa kitekichiuiliskej toTajtsin. Niman yejuamej noijki kinekij ika oksekimej kuajli manouikakan iuan Jehová niman manouikakan imiuan akin nemij ipan ikalpan.

2. ¿Tleka melak temojkatlachialti ken nemij itekipanojkauan Jehová?

² Maski aman melak notlauelitalo niman nochiua miyek tlen xkuajli, Jehová kichiua ika akin tinemij ipan ikalpan kuajli matomachilikan (1 Juan 5:19; Apoc. 12:12). Yejua kimatstok ika tlen aman nochiua uelis melak techijtlakos. San ika, pampa melak techtlasojtla, yejua kichiua kuajli matinemikan niman ijkon uelis tiktekichiuiliskej ika toyojlo. Biblia kijtoua ika ikalpan toTajtsin yeskia ken kampa uelis timomanauis niman noijki yeskia ken se “xochitlan yejuan nochipa katekiyaj” (Is. 4:6; 58:11). San akin kitekichiuiliaj Jehová uelis yolpakiskej niman kuajli nomachiliskej ipan yejuin itlamiyan tonaltin (Is. 54:14; 2 Tim. 3:1).

3. ¿Kenon onochiuj teotlajtojli tlen uajnesi ipan Isaías capítulo 65?

³ Ipan Isaías capítulo 65, Jehová okijto kenon chantiskiaj akin nemiskiaj ipan ikalpan. Yejuin teotlajtojli tlen okijkuilo Isaías, onochiuj ipan xiuitl 537 ijkuak xpeuaya xiuitl 1. Ijkuakon, judíos akin onoyolkuepkej okiskej de Babilonia niman  onokuepkej inchan. Jehová okinpaleui oksejpa kualtsin makiyektlalikan Jerusalén pampa melak yokixoxotonijkaj. Noijki okiyektlalijkej teopan niman ijkon oksejpa kuajli kiueyichiuaskiaj toTajtsin (Is. 51:11; Zac. 8:3).

4. ¿Kenon oksejpa inochiujtok teotlajtojli tlen nesi ipan Isaías capítulo 65?

⁴ Teotlajtojli tlen okijto Isaías oksejpa inochiujtok. Opeuj nochiua ipan 1919, ijkuak itekipanojkauan Jehová okiskej itech Ueyixtika Babilonia. Desde ijkuakon, melak miyekej yopeuj kitekichiuiliaj Jehová ipan ikalpan niman chikauak tenojnotsaj itech iTekiuajyo toTajtsin, ika yejon, melak miyek yonochijchiujkej tlanechikoltin. Miyekej akin melak tlauelejkej katkaj niman auilnemiyaj yonopatlakej niman yonotlakentijkej “ika on yenkuik nemilistli” (Efes. 4:24). Teotlajtojli tlen okijto Isaías inochiujtok ipan ikalpan toTajtsin, san ika, más kuajli nochiuas ipan yenkuik tlaltikpaktli. Aman matikitakan kenon techpaleuiya pampa tinemij ipan ikalpan toTajtsin niman tleka noneki nochipa ompa matinemikan.

MELAK TIYOLPAKIJ AKIN TINEMIJ IPAN IKALPAN TOTAJTSIN

5. Ijkon ken kijtoua Isaías 65:​13, ¿tlenon kualtsin tikpiyaj ipan ikalpan toTajtsin?

⁵ Tikpiyaj tlen techyolchikaua niman techkojtilia. Isaías techititia kenon melak tlamantik nemiskiaj itekipanojkauan Jehová (xpoua Isaías 65:13). Teotlajtoketl Isaías okijto ika itekipanojkauan Jehová xtlaj kinpoloskia. Aman Jehová techmaka iespíritu santo, iTlajtol niman miyek tlen ika tomachtiskej. Ika yejon, Isaías okijto ika tejuamej titlakuaskiaj, tatliskiaj niman tiyolpakiskiaj (uelis tikitas Apocalipsis 22:17). Akin xnemij ipan ikalpan toTajtsin xijkon nemij, yejuamej apismikij, amikij niman nopinaujtiaj. Yejuamej xkipiyaj tlen Jehová techmaka (Amós 8:11).

6. ¿Tlenon kijtosneki tlen noteneua ipan Joel 2:​21-24, niman kenon techpaleuiya?

⁶ Ipan se teotlajtojli tlen Joel okijto, okiteneuj tlen Jehová kimakaskia ikalpan, yejua okijto: “Nenkipixkaskej sanoyej miyek trigo, niman no nenkipiyaskej sanoyej miyek vino niman aceite de olivo” (Joel 2:​21-24). Yejuin teotlajtojli kijtosnekiya ika Jehová kinmakaskia itekipanojkauan nochi tlen kinpolouaya niman noijki kinmakaskia tlen kinpaleuiskia makichikauakan intlaneltok. Aman Jehová ijkon ikichiujtok, yejua techmaka Biblia, toamatlajkuiloluan, topágina de internet, tlanechikoltin niman uejueyimej tlanechikoltin. Nochi yejuin mojmostla techyolchikauaj niman techkojtiliaj.

7. ¿Tleka melak tiyolpakij? (Isaías 65:14).

⁷ Tikpiyaj tlen techpaleuiya matiyolpakikan. Melak tiktlasojkamachiliaj Jehová ipampa nochi tlen yejua techmaka, ika yejon, tipajkatsajtsij (xpoua Isaías 65:14). Jehová yotechpaleui matiuelikan tlen melauak temachtia Biblia. Noijki yotiuelkej ika tikpiyaj se tlamachialistli pampa Jesús omik topampa. Niman melak techyolchikaua tlen Jehová techmakas ika tlayekapan. ¡Melak tiyolpakij ijkuak titlajtouaj itech yejuin imiuan oksekimej tokniuan! (Sal. 34:8; 133:​1-3).

8. ¿Tlenon nochiua ipan ikalpan toTajtsin?

⁸ San akin tinemij ipan ikalpan toTajtsin ueli melauak totlasojtlaj niman kuajli touikaj. Ken totlasojtlaj techpaleuiya matiknemilikan kenon kualtsin tinemiskej ipan yenkuik tlaltikpaktli. Ompa más totlasojtlaskej niman más kuajli touikaskej imiuan oksekimej xijkon ken aman (Col. 3:14). Se tokniuj kijtoua tlenon okitak ijkuak okimixmat iteixpantijkauan Jehová, yejua kijtoua: “Melak  onechmojkatlachialti kenon notlasojtlaj iteixpantijkauan Jehová pampa xkeman ijkon nikitaya. Nejua xnikmatiya kenon tiyolpakis pampa nion xniyolpakiya imiuan nochanejkauan”. Tla yakaj kineki yolpakis, noneki nemis ipan ikalpan toTajtsin. Maka matechajmana tlen sekimej kijtouaj totechkopa, matikilnamikikan ika Jehová niman itekipanojkauan kuajli techitaj (Is. 65:15).

9. ¿Tlenon kichiuas Jehová topampa tla yotikixnamijkej tlen xkuajli? (Isaías 65:​16, 17).

⁹ Tikpiyaj tlen techpaleuiya maka matajmanakan. Ipan Isaías 65:​14, kijtoua kenon nomachiliskej akin xkinekij nemiskej ipan ikalpan toTajtsin, ompa kijtoua: “Nemejuamej nenajmankachokaskej pampa nenkipiyaskej miyek ajmantli niman tlajyouilistli”. San ika ¿tlenon kichiuas Jehová topampa tla yotikixnamijkej tlen xkuajli? Jehová ijkin kijtoua: “Nejua nemechkixtilis on tlajyouilistli, niman nikelkauas nochi on tlen xkuajli onenkichijkej” (xpoua Isaías 65:​16, 17). Jehová kipopolos nochi tlen techtlajyouiltia niman kichiuas maka sa matechyolkoko ijkuak tikilnamikiskej tlen xkuajli topan yonochiuj.

10. ¿Tleka melak kualtsin ika tinemij ipan ikalpan toTajtsin? (Noijki xkita tlaixkopinajli).

¹⁰ Melak kuajli tomachiliaj ijkuak tiauej tlanechikoltin pampa ijkuak ompa tinemij, tikilkauaj tlen xkuajli panotika niman techpaleuiya maka matajmanakan. San ika, tejuamej noijki uelis titlapaleuiskej niman ijkon tokniuan kuajli manomachilikan ijkuak yaskej tlanechikojli. ¿Kenon? Tla tikinteititiaj kualtsitsintin kualneskayomej. Kema, matitetlasojtlakan, matiteiknelikan, matoyolyemanilikan, matiyolseujtokan niman matipakikan (Gál. 5:​22, 23). ¡Melak kualtsin tinemis ipan ikalpan toTajtsin! Tla nochipa ompa tinemij, uelis tikitaskej kenon Jehová kiyenkuilia cielo niman tlaltikpaktli.

11. ¿Kenon tomachiliaj pampa tinemij ipan ikalpan toTajtsin? (Isaías 65:​18, 19).

¹¹ Tiyolpakij niman tiktlasojkamatij pampa tinemij ipan ikalpan toTajtsin. Jehová okitlali ikalpan kampa aman tinemij. Niman Isaías okijto ika akin ompa nemiskiaj melak yolpakiskiaj (xpoua Isaías 65:​18, 19). Niman toTajtsin techtekitiltia para matikimijlikan tlaltikpakchanejkej makisakan kampa xkinmachtiaj itech Jehová niman matikinpaleuikan makalakikan ipan ikalpan, kampa melak kuajli tinemij. Melak tiyolpakij pampa yotikixmatkej Jehová, ika yejon, tejuamej noijki tiknektokej tikiminojnotsaskej oksekimej (Jer. 31:12).

12. ¿Kenon timomachilia ijkuak tikamapoua Isaías 65:​20-24, niman tleka?

 ¹² Akin tinemij ipan ikalpan toTajtsin melak tiyolpakij pampa melak kualtsin tlen tikseliskej ika tlayekapan. ¡San xkonnemili nochi tlen tikitas niman tikchiuas ipan yenkuik tlaltikpaktli! Biblia kijtoua: “Ompa xok mikiskej selikakokonej, nion mikiskej ueuentsitsimej tla xe ajsi tonajli para mikiskej”. Niman akin ompa nemiskej “kinchijchiuaskej inkaluan niman kuajli ompa chantiskej, tlatôkaskej ikan uvas, niman yejuamej kikuaskej itlakyo on uvas”. Noijki, “intekiu xsanenkaj kichiuaskej” pampa Jehová kinteochiuas. Niman toTajtsin kijtoua ika nochimej melak yolpakiskej niman kuajli nomachiliskej. Noijki ijkin kijtoua: “Antes nechnotsaskej yejuamej, nejua nikinnankilis; antes tlamis nechnotsaskej, nejua nikinkakis”. Niman kimakas tlakuajli “nochi tlen yoltikaj” (Is. 65:​20-24; Sal. 145:16).

13. ¿Kenon inochiujtika ipan ikalpan toTajtsin tlen kijtoua Isaías 65:25?

¹³ Tiyolseujtokej niman xtomojtiaj. Miyekej tlaltikpakchanejkej akin melak temojtijkej katkaj melak yonopatlakej pampa espíritu santo yokinpaleui (xpoua Isaías 65:25). Yejuamej xok kitechiuiliaj tlen xkuajli (Rom. 12:2; Efes. 4:​22-24). Itekipanojkauan Jehová kemantika nopopolouaj pampa ok tlajtlakolejkej. Maski ijkon, Jehová yokichiuj se milagro pampa yokichiuj ika itekipanojkauan akin melak tlatlamantikej kuajli manouikakan, manotlasojtlakan niman mayolseujtokan (Tito 2:11). ¡San toTajtsin ueli kichiua yejon!

14. ¿Kenon se tokniuj ipan onochiuj tlen kijtoua Isaías 65:25?

¹⁴ Biblia uelis kinpaleuis oksekimej manopatlakan. Matikteneuakan tlen ipan opanok se telpochtli akin kipiya 20 xiuitl. Yejua melak tlauele katka niman melak auilnemiya. Miyekpa okitsajkej pampa kimichtekiya carros niman kichiuaya miyek tlen xkuajli. Noijki san kitejtemojtinemiya iuan akinon nokualanis niman nouisokis. San ika, ijkuak okinojnotskej itech Biblia niman opeuj yauj tlanechikoltin, melak onopatlak. Aman yejua kinekiya kitekichiuilis Jehová ipan ikalpan niman onoapolakti. Yejua miyekpa kinemiliaya kenon ipan yonochiujka tlen kijtoua Isaías 65:25. Yejua melak temojti katka ken se león, san ika, aman onokuep ken se borreguito pampa melak onopatlak.

15. ¿Tleka tiknekij tikinpaleuiskej oksekimej mauajlakan ipan ikalpan toTajtsin, niman kenon tikinpaleuiyaj?

¹⁵ Ipan Isaías capítulo 65, tikitaj ika Jehová yejua akin tlajtoua, niman tlen yejua kijtoua nochipa nochiua (Is. 55:​10, 11). Jehová yokijtojka ika ipan yejuin tonaltin oniaskia se ikalpan. Niman akin ompa tinemij melak kuajli tomachiliaj niman xtomojtiaj maski aman nochiua tlen melak xkuajli (Sal. 72:7). Ika yejon, tiknekij tikinpaleuiskej oksekimej mauajlakan ipan ikalpan toTajtsin, niman san uelis ijkon tikchiuaskej tla tikinnojnotsaj niman tikinmachtiaj (Mat. 28:​19, 20).

KENON UELIS TIKINPALEUISKEJ OKSEKIMEJ MAUAJLAKAN IPAN IKALPAN TOTAJTSIN

16. ¿Tleka sekimej peuaj nonisiuiyaj ipan ikalpan toTajtsin?

¹⁶ Tla tikchiuaj ken Jehová, tlaltikpakchanejkej kinekiskej kalakiskej ipan ikalpan. Jehová xkinchiualtia makalakikan ipan ikalpan, yejua san kualtsin kinnotsa niman yejon kichiua makinekikan makitekichiuilikan (Jer. 31:3; Juan 6:44). Niman akin kipiyaj kuajli inyojlo peuaj kixmatij Jehová niman peuaj kinisiuiyaj. ¿Tlenon uelis más tikchiuaskej niman ijkon oksekimej makinekikan kalakiskej ipan ikalpan toTajtsin?

17. ¿Tlenon uelis tikchiuaskej niman ijkon oksekimej makinekikan makalakikan ipan ikalpan toTajtsin?

 ¹⁷ Tla tiknekij ika oksekimej makalakikan ipan ikalpan toTajtsin, noneki tikintlasojtlaskej tokniuan niman kualtsin tikinnotsaskej. Yeuejkaui, akin kemach opeujkej yauej tlanechikojli ne Corinto okijtojkej: “Dios melauak nemotsajlan nemi”. Tejuamej noijki tiknekij ijkon makijtokan akin kemach uajlaskej ipan tlanechikojli (1 Cor. 14:​24, 25; Zac. 8:23). Ika yejon, melak noneki matinemikan “ikan yolseuilistli cada se inuan oksekimej” (1 Tes. 5:13).

18. ¿Tleka sekimej kinekij kalakiskej ipan ikalpan toTajtsin?

¹⁸ Noijki melak noneki matikimitakan tokniuan ijkon ken Jehová kimita. Matikitakan tlen kualtsin kichiuaj niman maka san matikitstokan kenon nopopolouaj pampa ika tlayekapan yejuamej xok nopopoloskej. Noijki, tla tikpiyaj se tlauejli iuan se tokniuj, matikititikan ika tiktlasojtlaj niman matikchiuakan tlen kijtoua Biblia: “Xmouikakan tenotskej niman yolyemankej iminuan oksekimej, niman xmotlapojpoluikan iminuan oksekimej” (Efes. 4:32). Nochimej akin kinekij melauak makintlasojtlakan, noneki kalakiskej ipan ikalpan toTajtsin. a

NOCHIPA MATINEMIKAN IPAN IKALPAN TOTAJTSIN

19. a) ¿Tlenon kijtouaj sekimej tokniuan akin oksejpa youajnokuepkej ipan ikalpan toTajtsin? (Xkita recuadro “ Ouajnokuepkej akin yokitlalkauijkaj Jehová”). b) ¿Tlenon noneki tikchiuaskej? (Noijki xkita tlaixkopinajli).

¹⁹ ¡Melak kualtsin tinemis ipan ikalpan toTajtsin! Aman melak yotimiyekiyakej niman melak kualtsin tlen ompa nochiua. Nochipa  matiktlasojkamachilikan Jehová ika okitlali se ikalpan para ijkon uelis ompa tinemiskej. Nochimej akin kinekij kipiyaskej tlen makinkojtili niman makinyolpakti noneki kalakiskej ipan ikalpan toTajtsin, ompa xnajmanaskej niman xnomojtiskej. San ika, melak noneki matotlajpiyakan pampa Satanás kineki techkajkayauas niman ijkon techkixtis itech ikalpan toTajtsin. San ika, maka matijkauilikan matechkixti (1 Ped. 5:8; Apoc. 12:9). Xkilnamiki, tejua uelis titlapaleuis para kuajli matlajtokan itech ikalpan Jehová, niman noijki uelis titlapaleuis kuajli manomachilikan niman mayolseujtokan akin nemij ipan ikalpan toTajtsin.