Ombiimbeli inayi popya kondandalunde kombinga yokusigula. * Ihe shoka tayi popi kombinga yomwenyo neso otashi tu kwathele tu kale tu na etaloko li li pandjele. Okweeta eso kashi shi oshinima shi li mondjila, ihe inashi pumbiwa wo okuninga oonkambadhala dha pitilila okukaleka omuntu nomwenyo ngele oku li pokusa.

Ombiimbeli otayi popi kutya Kalunga Omushiti gwetu, “oluthithiya lwomwenyo.” (Episalomi 36:9; Iilonga 17:28) Momeho gaJehova, omwenyo ogu na ongushu noonkondo. Omolwetompelo ndyoka, Kalunga ita popile okudhipaga omuntu nokwiidhipaga. (Eksodus 20:13; 1 Johannes 3:15) Shimwe ishewe, Ombiimbeli otayi ulike kutya otu na okukala hatu ningi ngaashi tatu vulu tu gamene oomwenyo dhetu noomwenyo dhayalwe. (Deuteronomium 22:8) Osha yela kutya, Kalunga okwa hala tu kale twa lenga omagano gomwenyo.

Ongiini ngele omuntu oku na uuvu tawu fala meso?

Ombiimbeli itayi popile okukutha omuntu omwenyo nonando omuntu ngoka oku li pokusa neso lye itali vulu okukeelelwa. Oshiholelwa shimwe tashi ambidhidha oshinima shoka, oshomukwaniilwa gwaIsrael  Saul. Oshikando shimwe sho a li e ehamekwa nayi moluhodhi, okwa lombwele omumati omuhumbati gwomatati ge e mu dhipage. (1 Samuel 31:3, 4) Omumati ngoka okwe shi tindi. Ihe oshikando shilwe ishewe, omulumentu gulwe okwe ke mu dhipaga, nokwa ti kutya Saul oye mwene e mu lombwele e shi ninge. Omulumentu ngoka okwa li a talika ko kuDavid, omuntu ngoka a li e na etaloko lyaKalunga kombinga yoshinima shoka, kutya oku na ondjo yombinzi. — 2 Samuel 1:6-16.

Mbela omuntu oku na okukalekwa nomwenyo ngaashi tashi vulika?

Ngele omuntu oku li pokusa, Ombiimbeli itayi ti kutya na kalekwe nomwenyo. Pehala lyaashono otayi tu kwathele tu kale tu na etaloko li li pandjele. Eso omutondi gwetu omunene, ndyoka lye etithwa kuulunde wetu. (Aaroma 5:12; 1 Aakorinto 15:26) Nonando kapu ngoka ha kala a hala okusa, eso ka li na okutilika, molwaashoka Kalunga oku uvaneka oku ka yumudha mboka taya si. (Johannes 6:39, 40) Omuntu ngoka a simaneka omwenyo, oku na okukonga epango lyopaunamiti lya dhenga mbanda ndyoka lyi li po. Ihe okuninga ngaaka itashi ti kutya otu na okuhogolola epango ndyoka tali kaleke omuntu nomwenyo nonando oku li nale pokusa.

Mbela okwiidhipaga eyono ihaali dhiminwa po?

Aawe, Ombiimbeli inayi popya kutya okwiidhipaga eyono ihaali dhimwa po. Nonando okwiikutha omwenyo eyono lya kwata miiti, * Kalunga oku shi iinima mbyoka hayi ku etitha ngaashi uuwehame wopamadhiladhilo, ostress ya pitilila nokuli niikala mbyoka omuntu a thigulula hayi pendutha ehalo lyokwiidhipaga. (Episalomi 103:13, 14) Oha hekeleke aantu mboka ye li muudhigu, okupitila mOmbiimbeli. Shimwe ishewe, Ombiimbeli otayi ti kutya “Kalunga ota ka yumudha aantu ayehe kuusi, naawanawa naawinayi.” (Iilonga 24:15) Shika otashi ulike kutya opu na etegameno lyeyumuko lyaantu mboka ya ninga omayono ga kwata miiti, ngaashi mboka yi idhipaga.