Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Noviembre de 2015

TLAMACHTIL TLEN IKA PEUA

¿Tleka tlaltikpaktlakamej motlatlaujtiaj?

¿Tleka tlaltikpaktlakamej motlatlaujtiaj?

“Onechpaktiaya nimauiltis pampa nikpias tomin. Onimotlatlaujtiaya pampa oniknekiaya niktlanis miak tomin. Amo keman onikpixki tomin.” (Samuel, * Kenia)

“Kanin onimomachtiaya san omonekiaya tikmatiskej seki rezos noso tlen ika motlatlaujtiaj tlaltikpaktlakamej, uan satepan omonekiaya tikojpauiskej tla otikinmilnamikiayaj.” (Teresa, Filipinas)

“Nimotlatlaujtia ijkuak nitlajyouijtok. Uan noijki pampa ma nechtlapojpoluikan notlajtlakoluan uan pampa nikchiuas ken Cristo.” (Magdalene, Ghana)

Tlen kijtoaj Samuel, Teresa uan Magdalene techmachtiaj tlaltikpaktlakamej motlatlaujtiaj pampa kitlajtlani miak tlamantli, seki okachi kuali uan okseki amo. Seki tlatlaujtilistli melauak kichiua ika nochi inyolo, pero oksekimej san kiojpauiaj. Pero maski san itech tlen motlatlaujtiaj tlaltikpaktlakamej —pampa kuali tlanankiliskej ijkuak kipiaj examen, pampa kitlanis inmiequipo, pampa kuali yetoskej inkalchanejkauan noso san tlen kitlajtlaniskej— sapanoa miakej motlatlaujtiaj. Uan noijki ijkuak okintlajtlanijkej sekimej tlaltikpaktlakamej, miakej okijtojkej maski amo kipiaj intlaneltokalis noijki motlatlaujtiaj.

Uan tejuatsin, ¿noijki timotlatlaujtia? ¿Uan itech tlen timotlatlaujtia? Maski nochipa timotlatlaujtia noso amo, uelis timotlajtlania: “¿Melauak ipati ma nimotlatlaujti? ¿Ikaj nechkaki?”. Se tlakatl tlen tlajkuiloa okijto tlatlaujtilistli “san ken se pajtli [...] ken tikpiaskiaj se michin akin iuan timotlapouiskiaj”. Sekimej akinmej tlapajtiaj noijki ijkon mokuayejyekoaj, kijtoaj tlatlaujtilistli san ken se pajtli. ¿Tejuatsin tlen tikneltoka? ¿Tlaltikpaktlakamej san motlatlaujtiaj pampa ijkon moneki kichiuaskej noso kitaj ken se pajtli?

Biblia okse tlamantli techmachtia. Kijtoa tlatlaujtilistli amo san ken se pajtli. Techyekiluia totlatlaujtiluan ikaj kinkaki tla tikchiuaj ijkon ken moneki. ¿Melauak ikaj techkaki? Ma tikitakan.

^ párr. 3 Otikinpatilijkej intoka.