Xikita nochi

Tlen kiualika

 TLAMACHTIL TLEN IKA PEUA

¿Ikaj techkaki?

¿Ikaj techkaki?

Miakej tlaltikpaktlakamej kineltokaj amo ikaj techkaki ijkuak timotlatlaujtiaj, uan san tikpoloaj tokauitl. Oksekimej motlatlaujtiaj pero kimachiliaj amo ikaj kinnankilia. Se tonal se tlakatl akin amo otlaneltokaya itech toTajtsin Dios omokuayejyeko ken yetoskia toTajtsin Dios uan okitlatlaujti: “Maski san itlaj ichtaka xinechilui”. Pero ye okijto toTajtsin Dios amo okinankili.

Pero Biblia techiluia toTajtsin Dios melauak techkaki ijkuak tiktlatlaujtiaj. Itech Biblia katej ninmej tlajtolmej tlen yiuejkika okinmiluijkej sekimej tlaltikpaktlakamej: “Ye [toTajtsin Dios] melauak mitspaleuis ijkuak kikakis tiktlatlaujtia ma mitspaleui; ye san niman mitsnankilis ijkuak mitskakis” (Isaías 30:19). Uan noijki itech Biblia kijtoa toTajtsin Dios kinkaki akinmej yolmelajkej (Proverbios 15:8).

Jesús okitlatlaujti iTajtsin uan ye “okikak” (Hebreos 5:7)

Biblia noijki techtlapouia itech sekimej tlen kema okinkakej. Itech Hebreos 5:7 kijtoa Jesús “chikawak omotiotsajtsili iwa ochokak; okitlatlaujti Dios makimakixti imak mikílistli; iwa Dios [...] okikak itiotsajtsilis”. Uan noijki itech Daniel 9:21 uan 2 Crónicas 7:1 techiluia okseki neskayomej.

¿Tleka sekimej tlaltikpaktlakamej kijtoaj amo ikaj kinkaki? Tla tiknekij ma techkaki Jehová, * itech akin Biblia techtlapouia, moneki san ye ma tiktlatlaujtikan. Amo ma tikintlatlaujtikan okseki teotsitsintin nion tokojkoluan. Uan noijki Jehová kineki ma tiktlatlaujtikan ijkon ken “Ye kipaktia”. Tla ijkon tikchiuaj, melauak techkakis (1 Juan 5:14). Ik non, tla tiknekij ma techkaki toTajtsin Dios, moneki ma tikixmatikan uan ma tiktlakamatikan.

Miakej tlaltikpaktlakamej kineltokaj tlatlaujtilistli amo san kisa itech tlaneltokalistli, yejuan kineltokaj toTajtsin Dios melauak kinkaki uan kinnankilia. Isaac, akin chanti itech ueyi altepetl Kenia, kijtoa: “Oniktlatlaujti toTajtsin Dios pampa ma nechpaleui ma nikajsikamati Biblia. Satepan ikaj omotoki nonauak uan onechpaleui”. akin chanti itech ueyi altepetl Filipinas, ayakmo okinekiaya tlachichinas. Miak uelta omochijchika pampa ayakmo tlachichinas, pero amo keman ueli okichi. Inamik okilui ma kitlatlaujti toTajtsin Dios ma kipaleui. Satepan ijkuak omotlatlaujti, okijto: “Onimotlajtlachialti ken onechpaleui. Ayakmo oniknekiaya nitlachichinas. Uan satepan ayakmo onitlachichinaya”.

Tla itlaj mitstekipachoa uan kipia kitas iuan itlanekilis Jehová, ¿ye kinekis mitspaleuis?

^ párr. 6 Biblia kijtoa toTajtsin Dios itoka Jehová.