Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2016

Sekimej techtlajtlaniaj

Sekimej techtlajtlaniaj

Ezequiel tlakotonal 37 tlajtoa itech ome tlakotl tlen mosetiliaj uan mochiuaj san se. ¿Tlen kijtosneki nin tlamantli?

Ika profecía tlen okijkuilo Ezequiel, Jehová okijto itekipanojkauan mokuepaskiaj itech Tlali tlen okijto kinmakaskia uan oksepa yetoskiaj san sekan ken se altepetl. Noijki okijto itlamian tonalmej itekipanojkauan toTajtsin Dios yetoskiaj san sekan ken se altepetl.

Jehová okilui Ezequiel ma kinkitski ome tlakotl uan itlaj itech ma kijkuilo. Itech se tlakotl omonekiaya kijkuilos: “Pampa Judá uan pampa altepetl Israel akinmej iuan katej”. Uan itech okse omonekiaya kijkuilos: “Pampa José, itlako Efraín, uan nochtin akinmej katej itech kali Israel uan akinmej iuan katej”. Uan noijki itech ome tlakotl, toTajtsin Dios okilui Ezequiel: “San se tlakotl ma mochiua itech moma” (Ezequiel 37:15-17).

 ¿Tlen kijtosneki tokayotl “Efraín”? Nechikol itech Efraín non tlen okachi oueyititoka itech nochi Israel, tlen okipiaya majtlaktli nechikolmej tlen okatkaj ik norte. Uan achto ueyi tekiua tlen ompa otlanauati omotokayotiaya Jeroboán uan okiski itech nechikol itech Efraín (Deuteronomio 33:13, 17; 1 Reyes 11:26). Nin nechikol oualaya itech se ikone José, tlen omotokayotiaya Efraín (Números 1:32, 33). Uan José okiseli se ueyi tlateochiualistli tlen okimakak Jacob. Ik non, “itlako Efraín” kineskayotia majtlaktli nechikolmej tlen okatkaj ik norte. Miak xiuitl achto Ezequiel kijkuiloskia nin profecía, asirios okimoaxkatijkej non tekiuajkayotl uan okinuikakej tlaltikpaktlakamej. Ijkon opanok itech xiuitl 740 achto itech xiuitl 1 (2 Reyes 17:6). Miak xiuitl satepan, babilonios okintlanilijkej asirios. Ik non, ijkuak Ezequiel okijkuilo profecía itech ome tlakotl, miakej israelitas okatkaj itech nochtin altepemej kanin otlanauatiayaj babilonios.

Itech xiuitl 607 achto itech xiuitl 1, babilonios okimoaxkatijkej tekiuajkayotl itech Judá, tlen okipiaya ome nechikolmej tlen okatkaj ik sur. Uan tlaltikpaktlakamej okinuikakej Babilonia. Uelis noijki okinuikakej akinmej omokajkej itech tekiuajkayotl tlen okatka ik norte. Tekiuajkej itech tekiuajkayotl tlen okatka ik sur oualaya itech inechikol Judá. Uan teopixkej ochantiayaj Judá, pampa ompa okitekichiuiliayaj Jehová itech teokali itech Jerusalén (2 Crónicas 11:13, 14; 34:30). Ik non, uelis tikijtoskej tlakotl “pampa Judá” kineskayotia ome nechikolmej tlen okatkaj ik sur.

¿Keman omosetilijkej ninmej ome tlakotl? Itech xiuitl 537 achto itech xiuitl 1. Itech non xiuitl, sekimej tlen opouiayaj itech tekiuajkayotl tlen okatka ik sur uan norte, omokuepkej Jerusalén pampa kiyektlaliskej teokali. Ijkuakon, altepetl Israel ayakmo oxelitoka. Nochtin israelitas oksepa san sekan okiueyichijkej Jehová (Ezequiel 37:21, 22). Ijkon ken Ezequiel, Jeremías uan Isaías noijki okinmijkuilojkej profecías tlen okijtoayaj ken san sekan yetoskiaj israelitas (Isaías 11:12, 13; Jeremías 31:1, 6, 31).

¿Tlen okijto profecía tlen okijkuilo Ezequiel itech tlaneltokalistli tlen melauak? Okijto Jehová kichiuaskia akinmej melauak itekipanojkauan ma mochiuakan san se (Ezequiel 37:18, 19). Itech ninmej tonalmej, non tlajtoli opejki mochiua itech xiuitl 1919. Ijkuak ayamo oajsiaya non xiuitl, Satanás okinekiaya sepa kinxelos itekipanojkauan toTajtsin Dios. Pero itech xiuitl 1919 ik tlayekapan, yolik oksepa omosetilijtiajkej uan san sekan opejkej tekitij.

Ijkuakon, miakej itekipanojkauan toTajtsin Dios okichiayaj yaskej iluikak uan yetoskiaj tekiuajkej uan teopixkej iuan Jesús (Apocalipsis 20:6). Yejuan okatkaj itlako Judá. Uan san sekimej okichiayaj chantiskej itech Tlaltikpak. Satepan okachi omomiaktilijkej (Zacarías 8:23). Yejuan okatkaj ken itlako José.

Itech ninmej tonalmej, akinmej yaskej iluikak uan akinmej mokauaskej Tlaltikpak san sekan kitekichiuiliaj Jehová uan kipiaj san se ueyi intekiua, Jesús. Itech profecía tlen okijkuilo Ezequiel, nin tekiua kiluiaj “notekipanojka David” (Ezequiel 37:24, 25). Se tonal ijkuak Jesús otlapojtoka itech imachtijkauan, ijkin okilui iTajtsin: “Maseititokah nochteh, ijkó kemi Tejwatsi iwa Ne tiseititokeh” (Juan 17:20, 21). * (Xikita tlajtoli tlen kiualika tlakxitlan). Jesús noijki okijto “oksikimeh ichkameh” uan tlapejpenalmej ‘yetoskiah sansikah’ uan kipiaskiaj “san se tlájpixki” (Juan 10:16). Ijkon ken okijto Jesús, nochtin itekipanojkauan Jehová axkan setitokej, akinmej kichiaj yaskej iluikak uan akinmej kichiaj chantiskej itech Tlaltikpak.

^ párr. 10 Ijkuak Jesús okintlapoui imachtijkauan itech itlamian tonalmej, okinmilui miakej neskayomej. Achto otlajto itech se “tlakeuali yolmelajki uan ixtlamatki”, nin kijtosneki sekimej tlapejpenalmej tlen kiyekanaskiaj ialtepe toTajtsin Dios (Mateo 24:45-47, TNM). Satepan okijto miakej neskayomej tlen otlajtoayaj itech nochtin tlapejpenalmej (Mateo 25:1-30). Uan saiktlami, otlajto itech akinmej kinpaleuiskiaj ikniuan Cristo uan mokauaskiaj itech Tlaltikpak (Mateo 25:31-46). Noijki, ijkuak opejki mochiua itech ninmej tonalmej profecía tlen okijkuilo Ezequiel, achto omochi intech akinmej okichiayaj yaskej iluikak. Uan maski majtlaktli nechikolmej itech Israel amo kinneskayotiaj akinmej mokauaskej itech Tlaltikpak, tlen okijto Ezequiel techilnamiktia ken sekan katej akinmej chantiskej itech Tlaltikpak uan akinmej yaskej iluikak.