Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2016

Ma tiktemokan Tekiuajkayotl uan amo okseki tlamantli

Ma tiktemokan Tekiuajkayotl uan amo okseki tlamantli

“Xiktemokan iTekiuajkayo [toTajtsin Dios], uan ninmej tlamantli namechmakaskej” (LUCAS 12:31, TNM).

TLAKUIKALMEJ: 40 UAN 44

1. ¿Tleka uelis tikijtoskej se tlamantli tlen moneki tikpiaskej uan okse tlamantli tlen tiknekij tikpiaskej?

UELIS tikijtoskej se tlamantli tlen moneki tikpiaskej uan okse tlamantli tlen tiknekij tikpiaskej. Se neskayotl, moneki tikpiaskej tlakuali, tlakemitl uan kanin tichantiskej. Pero uelis noijki tiknekij tikpiaskej miak tlamantli. Miakej amo kimatij amo moneki kipiaskej miak tlamantli pampa uelis yoltoskej.

2. ¿Tlen tlamantli kinekij kipiaskej tlaltikpaktlakamej?

2 Akinmej chantij itech uejueyij altepemej kanin amo onka tomin kinekij tlamantli tlen uelis amo kinekij akinmej chantij itech uejueyij altepemej kanin onka tomin. Itech seki altepemej sekimej kinekij kipiaskej se celular, se motocicleta noso se tlali. Pero itech okseki altepemej tlaltikpaktlakamej kinekij kipiaskej tlakemitl tlen patio, se ueyi kali noso se carro okachi patio. Maski san kanin tichantij noso maski tikpiaj tomin noso amo,  uelis peuas tiknekiskej okachi miak tlamantli tlen amo moneki noso amo uelis tikmokouiskej.

MA TIMOMALUIKAN PAMPA AMO TIKNEKISKEJ TOMIN UAN OKSEKI TLAMANTLI

3. ¿Tlen kijtosneki tiknekiskej tomin uan okseki tlamantli?

3 ¿Tlen kijtosneki tiknekiskej tomin uan okseki tlamantli? Kijtosneki okachi tikpatioitaskej tomin uan okseki tlamantli uan amo timouikaskej iuan Jehová. Tla san tiknekij tomin uan okseki tlamantli, amo tiyolpakiskej san ika tlen tikpiaj. Nochipa tiknekiskej tikpiaskej okachi miak tlamantli. Tinochtin uelis ijkon techpanos, maski amo tikpiaj miak tomin noso amo tikmokouiaj tlamantli patio. Uelis ayakmo tiktemoskej achto iTekiuajkayo toTajtsin Dios (Hebreos 13:5).

4. ¿Tleka Satanás kitekitiltia tlen “toixtololowah noiwa kelewiah”?

4 Satanás kineki ma timokuayejyekokan moneki tikpiaskej miak tlamantli pampa uelis tiyolpakiskej. Ik non, kitekitiltia tlen onka itech nin Tlaltikpak uan noijki tlen “toixtololowah noiwa kelewiah” pampa nochipa ma tiknekikan tikpiaskej miak tlamantli (1 Juan 2:15-17; Génesis 3:6; Proverbios 27:20). Nochipa tikinmitaj anuncios tlen kijtoaj ma tikmokouikan yankuik tlamantli. Uelis se tonal otikmokouijkej itlaj san pampa kualtsin otikitakej noso otikitakej itech se anuncio. Tla ijkon otikchijkej, satepan otikitakej amo omonekiaya ma tikmokouikan. Tla nochipa tikmokouiaj tlamantli tlen amo moneki tikpiaskej, san tikmotemoliskej ouijkayotl. Nin tlamantli uelis kichiuas ayakmo kuali ma tiktekichiuilikan Jehová. Se neskayotl, amo timajxiliskej timomachtiskej Biblia, amo timoyektlaliskej pampa tiaskej nechikolmej uan ayakmo nochipa titetlapouiskej. Ma tikilnamikikan tlatitlanil Juan okijto pojpoliuis nochi tlen onka itech nin Tlaltikpak.

5. ¿Tlen kinpanos akinmej mochijchikauaj kitemoskej tomin uan okseki tlamantli?

5 Satanás kineki ma tiktekitiltikan tochikaualis pampa tiktemoskej okachi tomin uan okseki tlamantli. Amo kineki ma tiktekitiltikan tochikaualis pampa tiktekichiuiliskej Jehová (Mateo 6:24). Pero tla san tiknekij tikmotemoliskej miak tlamantli, tonemilis amo kipias ipati. Uelis timoyolkokoskej noso tikteuikiliskej tomin. Hasta ayakmo titlaneltokaskej itech Jehová uan itech iTekiuajkayo (1 Timoteo 6:9, 10; Apocalipsis 3:17). Jesús okijto ijkuak sekimej “kinekij kipiaskej miek tlamantle” nin mochiua ken uitstli tlen amo kikauilia se xinachtli ma moskalti nion ma tlaki (Marcos 4:14, 18, 19, ITlajtol toTajtzin Dios [NHY]).

6. ¿Tlen techmachtia tlen okipanok Baruc?

6 Ma timokuayejyekokan itech Baruc, akin okipaleuiaya teotlajtojki Jeremías. Ijkuak Baruc opejki kineki “tlamantli tlen ipati”, Jehová okilnamikti ayakmo miak opoliuiaya pampa pojpoliuiskia Jerusalén. Pero okilui ye kimakixtiskia (Jeremías 45:1-5). Baruc amo uelis kichiaskia okseki tlamantli. Jehová amo kimaluiskia tlamantli tlen okipiayaj tlaltikpaktlakamej (Jeremías 20:5).  ¿Tlen techmachtia tlen okipanok Baruc? Axkan noijki ayakmo miak poliui pampa kipojpoloskej nochi tlen Satanás kiyekantok. Ik non, amo ma tiktemojtokan miak tlamantli. Amo ma tikchiakan ijkuak panos ueyi tlajyouilistli ok tikpiaskej tlamantli tlen axkan tikpiaj, maski sapanoa tikinpatioitaj nonmej tlamantli (Proverbios 11:4; Mateo 24:21, 22; Lucas 12:15).

Amo ma tiktemojtokan miak tlamantli

7. ¿Tlen timomachtiskej uan tleka?

7 ¿Ken uelis tikchiuaskej pampa tikpiaskej tlen ika timopanoltiskej pero noijki tiktekichiuiliskej Jehová? ¿Ken uelis tikchiuaskej pampa amo san tiknekiskej tomin uan okseki tlamantli? Ijkuak Jesús oTlamachti itech Tepetl okijto tlen moneki tikchiuaskej (Mateo 6:19-21). Axkan ma tiktlajtoltikan uan ma timomachtikan Mateo 6:25-34. Nin techpaleuis kuali ma tikitakan moneki ma tiktemokan Tekiuajkayotl uan amo tomin uan okseki tlamantli (Lucas 12:31, TNM).

JEHOVÁ TECHMAKA TLEN TECHPOLOA

8, 9. (1) ¿Tleka amo sapanoa ma techtekipacho tlamantli tlen okachi moneki? (2) ¿Tlen okimatiaya Jesús itech tlen okachi moneki?

8 (Xiktlajtolti Mateo 6:25). Jesús okimatiaya imachtijkauan okintekipachoaya kipiaskej tlakuali uan tlakemitl. Ik non, ijkuak oTlamachti itech Tepetl okinmilui: “Amo ximotekipachokah”. Jesús okinekiaya kinpaleuis ma kajsikamatikan tleka amo omonekiaya ma kintekipacho non tlamantli. Maski omonekiaya kipiaskej nonmej tlamantli, Jesús okimatiaya tla imachtijkauan sapanoa motekipachoskiaj, uelis kilkauaskiaj tlen okachi miak ipati. Uan ken sapanoa okintlasojtlaya, itech non tonal naui uelta okinmilui tlen panoskia tla sapanoa motekipachojtoskiaj (Mateo 6:27, 28, 31, 34).

9 Pero ¿tleka Jesús okijto amo ma techtekipacho tlakuali noso tlakemitl? ¿Amo moneki tikpiaskej ninmej tlamantli? Kema moneki tikpiaskej, ik non, ualeua techtekipachoa non tlamantli, okachi tla amo tikpiaj tomin tlen ika timotlakouiskej. Jesús okimatiaya non uan noijki okimatiaya moneki tikpiaskej nonmej tlamantli. Noijki ye okimatiaya imachtijkauan oui kipiaskej tlen okachi moneki itech “iksemi tonatijmeh” (2 Timoteo 3:1). Axkan, miakej amo kajsij tekitl uan okachi tlapatio. Uan itech seki altepemej, miakej amo itlaj kipiaj, san kipiaj tepitsin tlakuali noso sepa amo itlaj kipiaj. Pero Jesús noijki okimatiaya inyolilis tlaltikpaktlakamej okachi ipati amo ken tlakuali uan totlalnakayo okachi ipati amo ken tlakemitl.

Jesús okijto inyolilis tlaltikpaktlakamej okachi ipati amo ken tlakuali uan totlalnakayo okachi ipati amo ken tlakemitl

10. Ijkuak Jesús okinmachti imachtijkauan ken motlatlaujtiskiaj, ¿tlen okinmilui okachi ipati?

10 Achto, Jesús okinmilui imachtijkauan ma kitlajtlanilikan toTajtsin Dios tlamantli tlen okachi moneki ijkuak motlatlaujtiskiaj. Okinmilui ijkin ma motlatlaujtikan: “Xitechmaka axan tlan tikkuaskej” (Mateo 6:11NHY). Okse tonal, okinmilui ijkin ma motlatlaujtikan: “Xitechmaka axan tlan tikkuaskej katlej ika tipanoskej  yin tonale” (Lucas 11:3NHY). Pero nin amo kijtosneki nochipa timokuayejyekojtoskej itech tlamantli tlen okachi moneki. Pampa Jesús noijki okinmilui imachtijkauan okachi moneki tiktlajtlaniskej ma ualtlanauati Tekiuajkayotl uan amo tlen ika timopanoltiskej (Mateo 6:10; Lucas 11:2). Uan pampa kinpaleuis amo sapanoa ma motekipachokan, okinmilnamikti Jehová kimaluia nochi tlen okichijchi.

11, 12. ¿Tlen techmachtia ken Jehová kinmaluia totomej? (Xikita tlaixkopinal tlen ika peua tlamachtil).

11 (Xiktlajtolti Mateo 6:26). Ma timokuayejyekokan itech “totomeh non patlantinemih”. Maski tsikitsitsintin, sapanoa tlakuaj. Tla se tototl yetoskia ueyi ken tejuan, noijki ijkon tlakuaskia ken tejuan. Totomej kikuaj tlakilotl, xinachtli uan okuilimej. Amo moneki tlatokaskej pampa Jehová kinmaka nochi tlen ika mopanoltiskej (Salmo 147:9). Pero amo kintlaliliaj tlakuali itech intenpil. Moneki yaskej kitemotiuij. Pero tlakuali ompa kajki pampa ma kajsikan.

12 Jesús kuali okimatiaya tla Jehová kinmaluia totomej, noijki kinmaluia tlaltikpaktlakamej (1 Pedro 5:6, 7) [1] (xikita nota kanin tlami tlamachtil). Pero ijkon ken moneki tekitiskej totomej, tejuan noijki moneki titekitiskej. Moneki tiktokaskej tlen tikkuaskej noso tiktlaniskej tomin tlen ika timotlakouiskej. Uan Jehová kiteochiuas toteki. Tla amo tikpiaj miak tomin noso tlakuali, ye techmakas tlen ika timopanoltiskej. Se neskayotl, uelis oksekimej techmakaskej tlen techpoloa. Uan okse tlamantli, Jehová kinmaka totomej kanin chantiskej. Kuali okinchijchi totomej pampa uelis kiyektlaliskej intepajsol. Uan noijki okichijchi tlamantli tlen ika kiyektlaliskej. Noijki ijkon, Jehová uelis techpaleuis ma tikajsikan kanin uelis tichantiskej iuan tokalchanejkauan.

13. ¿Tlen kiteititia okachi topati amo ken totomej?

13 Itech Mateo 6:26 Jesús okinmilnamikti imachtijkauan Jehová kinmaka tlen kikuaskej totomej. Uan satepan okinmilui: “¡Iwa nomejwah okachi nomopati ke n totomeh!” (noijki xikita Lucas 12:6, 7). Ijkuak ijkon okinmilui, uelis omokuayejyekojtoka satepan motemakaskia inpampa nochtin tlaltikpaktlakamej. Kema, Jesús amo omikik inpampa totomej noso okse yolkatl. Omikik pampa tejuan uelis tiyoltoskej nochipa (Mateo 20:28). ¡Nin kiteititia melauak okachi topati amo ken totomej!

14. ¿Tlen uelis kipanos akin sapanoa motekipachoa?

14 (Xiktlajtolti Mateo 6:27). ¿Tlen okinekiaya kijtos Jesús ijkuak okijto kox uelis tiyoltoskej okse tonal tla sapanoa timotekipachoskej? Okinekiaya kijtos amo ikaj uelis yoltos okachi xiuitl tla sapanoa motekipachos. Tla ikaj sapanoa motekipachos, uelis mokokos noso mikis.

15, 16. (1) ¿Tlen techmachtia ken Jehová kinmaluia xochimej? (Xikita tlaixkopinal tlen ika peua tlamachtil). (2) ¿Tlen moneki timotlajtlaniskej uan tleka?

15 (Xiktlajtolti Mateo 6:28-30NHY). Tinochtin techpaktia tikpiaskej kuajkualtsin totlaken, okachi pampa tiaskej nechikolmej, titetlapouiskej uan tiaskej uejueyij nechikolmej. Pero ¿moneki sapanoa timotekipachoskej pampa tikpiaskej totlaken? Jesús noijki okinmilnamikti imachtijkauan Jehová kimaluia nochi tlen okichijchi. Jesús okintlapoui itech “xochimej”. Ika nin tlajtoli, uelis Jesús otlapojtoka itech xochimej ken gladiolas, jacintos uan tulipanes. Nion se itech ninmej xochimej amo omonekiaya kimochijchiuiliskej intlaken. Pero melauak kuajkualtsitsintin,  uan Jesús okijto “nion rey Salomón mach semi omotzotzoltij ken se de yon xochitl maski omotzotzoltiaya ika katlej okachi kuale itzotzol”.

16 Ijkuak Jesús okintlapoui imachtijkauan ken “Dios ijkón kitlakentia in xochitl”, noijki okintlajtlani: “¿Kenik amo ma amechtzotzolti namejwan? ¡Namejwan wel tzikitzin namotlaneltokalis!”. Jehová kintlakentiskia. Pero omonekiaya okachi ma tlaneltokakan (Mateo 8:26; 14:31; 16:8; 17:20). Omonekiaya kineltokaskiaj Jehová okinekiaya kinmaluis uan ijkon kichiuaskia. Ik non, axkan ma timotlajtlanikan: “¿Melauak nikneltoka Jehová nechmaluis?”.

¿Melauak nikneltoka Jehová nechmaluis?

17. ¿Tlen uelis kichiuas ayakmo ma timouikakan iuan Jehová?

17 (Xiktlajtolti Mateo 6:31, 32). Miakej akinmej amo kitekichiuiliaj toTajtsin Dios tekitij miak pampa kipiaskej tomin uan miak tlamantli. Pero tla tejuan noijki ijkon tikchiuaskej, ayakmo timouikaskej iuan Jehová. Tikmatij ye toTajtsin uan techtlasojtla. Ika nochi toyolo tikneltokaj tla tikchiuaj tlen techiluia uan achto tiktemoaj iTekiuajkayo, techmakas tlen okachi moneki uan okseki tlamantli. Noijki tikmatij timouikaskej iuan Jehová kichiua ma tiyolpakikan. Nin techpaleuia ma tiyolpakikan “tla tikpiah tlan tikkuaskeh iwa tlan tikmokentiskeh” (1 Timoteo 6:6-8).

¿TIKTLALIAJ ACHTO ITEKIUAJKAYO TOTAJTSIN DIOS ITECH TONEMILIS?

18. ¿Tlen kimati Jehová itech tejuan uan tlen kichiuas?

18 (Xiktlajtolti Mateo 6:33). Tla achto tiktlaliaj iTekiuajkayo toTajtsin Dios itech tonemilis, Jehová kijtoa techmakas tlen ika timopanoltiskej. ¿Ken tikmatij? Ika tlen okijto Jesús itech Mateo 6:32: “Nomotajtsi non kajki ilwikak, iwa Ye ya kimatok tlan nomechpoloa”. Jehová yikimati tlen moneki tikpiaskej achto tejuan tikmatiskej kox moneki tikpiaskej (Filipenses 4:19). Kimati tlen totlaken uan tlen tlakuali techpolos. Uan kimati moneki tikpiaskej kanin tichantiskej iuan tokalchanejkauan. Ye techmakas tlen melauak moneki ma tikpiakan.

19. ¿Tleka amo moneki sapanoa ma timotekipachokan itech tlen panos satepan?

19 (Xiktlajtolti Mateo 6:34). Jesús oksepa okinmilui imachtijkauan: “Amo ximotekipachokah”. Jehová mojmostla techmakas tlen moneki. Ik non, amo sapanoa ma timotekipachokan itech tlen panos satepan. Tla sapanoa timotekipachoaj, uelis peuas okachi totech titlaneltokaskej. Non kichiuas ayakmo kuali ma timouikakan iuan Jehová. Ik non, okachi kuali ma titlaneltokakan itech Jehová (Proverbios 3:5, 6; Filipenses 4:6, 7).

JEHOVÁ TECHMALUIS TLA TIKTEMOAJ ACHTO ITEKIUAJKAYO

¿Uelis ayakmo tikpiaskej miak tlamantli pampa titekitiskej pampa iTekiuajkayo toTajtsin Dios? (Xikita párrafo 20).

20. (1) ¿Tlen tikchiuas pampa okachi tiktekichiuilis Jehová? (2) ¿Tlen uelis tikchiuas pampa ayakmo tikpias miak tlamantli?

20 Amo kuali tikchiuaskej tla san tiktemoaj tomin uan okseki tlamantli uan amo tiktekichiuiliaj Jehová ika nochi toyolo. Ma tikmakakan Jehová tlen okachi kuali tikpiaj, non tlen moneki tikchiuaskej. Ma timokuayejyekokan tlen okachi uelis  tikchiuaskej. Se neskayotl, ¿uelis titlapaleuiskej itech se nechikol kanin moneki okachi motetlapouis? ¿Uelis timochiuaskej precursores? Uan tla yitiprecursores, ¿uelis tiaskej itech Tlamachtil pampa ma tetlapouikan Tekiuajkayotl? ¿Uelis titlapaleuiskej seki tonalmej itech Betel noso itech se Kali kanin tlajtolkuepaj? ¿Uelis titlapaleuiskej iuan tokniuan tlen kijtoaj ken mochijchiuas se Kali noso ijkuak kichijchiuaj se Kali kanin monechikoaj iTlaixpantijkauan Jehová? Ma timokuayejyekokan tlen uelis tikchiuaskej pampa ayakmo tikpiaskej miak tlamantli. Ijkon uelis okachi timajxiliskej uan tichikajtoskej titekitiskej pampa iTekiuajkayo toTajtsin Dios. Recuadro “ ¿Tlen uelis tikchiuaskej pampa ayakmo tikpiaskej miak tlamantli?” kijtoa tlen moneki ma tikchiuakan. Ma tiktlatlaujtikan Jehová ma techpaleui ma tikitakan tlen moneki ma tikchiuakan. Satepan, ma tikitakan tlen moneki tikpatlaskej.

21. ¿Tlen techpaleuis okachi ma timouikakan iuan Jehová?

 21 Jesús otechmachti achto ma tiktlalikan itech tonemilis iTekiuajkayo toTajtsin Dios. Tla ijkon tikchiuaj, ayakmo sapanoa timotekipachoskej itech tlamantli tlen moneki tikpiaskej. Uelis timonauatiskej pampa amo tikmokouiskej nochi tlen tiknekij noso tlen oksekimej kinemakaj maski uelis tiktlaxtlauaskej. Nochi nin uelis techpaleuis okachi kuali ma timouikakan iuan Jehová. Tla amo tikpiaskej miak tlamantli, nin techpaleuis ma tiyetokan yolmelajkej ixpan Jehová uan ma tikpiakan yolilistli tlen amo keman tlamis tlen yokijto techmakas (1 Timoteo 6:19, TNM).

^ [1] (párrafo 12): Ualeua sekimej itekipanojkauan Jehová amo kipiaj miak tlakuali. Pampa uelis tikajsikamatiskej tleka Jehová kitekauilia ijkon ma pano, xikita kanin kijtoaj “Sekimej techtlajtlaniaj” itech Akin Tetlapouijtok 1 de octubre 2014, página 31.