“Amo nonkimatih kemania walmuikas Nomoteko” (MATEO 24:42).

TLAKUIKALMEJ: 136 UAN 54

1. ¿Tleka moneki ma tiijsatokan uan ma tikitakan tlen panotok? Xikijto se neskayotl (xikita tlaixkopinal tlen ika peua tlamachtil).

MA TIMOKUAYEJYEKOKAN yipeuas se ueyi nechikol. Akin kiyekanas ueyi nechikol panoa tlayekapan uan kijtoa yipeuas. Tlatsotsonali yipeuas. Nochtin akinmej ompa katej kimatij moneki motlaliskej. Kinekij kikakiskej kuajkualtsitsintin tlakuikalmej uan nochtin tlapoualismej. Pero uelis sekimej amo kikaktokej tokni akin kiyekana ueyi nechikol nion kikakij tlatsotsonali tlen yopejki. Ken amo kuali tlakaktokej, amo kitaj ueyi nechikol yopejki uan ok nejnentinemij noso motlapouijtokej iuan inyolikniuan. Nin neskayotl techititia tlen uelis panos tla amo kuali titlachixtokej kanin tikatej noso amo tikitaj tlen panotok. Nin techmachtia itlaj tlen miak ipati pampa ayakmo miak kauitl poliui uan peuas itlaj tlen okachi miak ipati uan moneki ma tiijsatokan. ¿Tlen panos?

2. ¿Tleka Jesús okinmilui imachtijkauan ma ijsatokan?

2 Jesucristo okinmilui imachtijkauan ma ijsatokan uan  ma moyektlalikan pampa ijkuak tlamiskia nochi tlen amo kuali. Uan okinmilui: “Xiijsatokah, xiyektlachixtokah iwa ximotiotsajtsilijtokah, porke mach nonkimatih kemania kalakiki non tonati”. Satepan, miak uelta okinmilui: “Xiijsatokah” (Mateo 24:3; xiktlajtolti Marcos 13:32-37). Evangelio tlen okijkuilo Mateo noijki kiteititia Jesús miak uelta okintlapoui imachtijkauan itech nin tlamantli. Okinmilui: “Xiijsatokah, porke amo nonkimatih kemania walmuikas Nomoteko”. Uan noijki ijkin okinnemachti: “Xiijsatokah, porke Ne Non onimochi ni tlakatl niwalkalakiki ijkuak nomejwah mach nonnechchiah”. Uan oksepa okinmilui: “Xiijsatokah nomejwah, porke amo nonkimatih tlan tonati nion tlan ora niajsiti” (Mateo 24:42-44; 25:13).

3. ¿Tleka moneki tiktlakamatiskej tlen okijto Jesús?

3 ITlaixpantijkauan Jehová tiktlakamatij tlen okijto Jesús. ¿Tleka? Pampa tikmatij tikatej itlamian tonalmej uan ayakmo miak poliui peuas ueyi tlajyouilistli (Daniel 12:4; Mateo 24:21). Ijkon ken okijto Jesús, ialtepe Jehová tetlapouijtok itech Tekiuajkayotl itech nochi Tlaltikpak. Uan ken Jesús okijto, axkan okachi onka guerras, kokolistli, chikauak tlalolini, onka apistli uan san kanin tlachtekij noso temiktiaj. Uan noijki teopixkej tlakajkayauaj (Mateo 24:7, 11, 12, 14; Lucas 21:11). Tiknekij ma ajsiki tonal ijkuak Jesús uits uan ma kichiua itlanekilis iTajtsin (Marcos 13:26, 27).

TONAL YIUITS

4. (1) ¿Tleka tikijtoaj Jesús kimati keman mochiuas Armagedón? (2) Maski amo tikmatij keman peuas ueyi tlajyouilistli, ¿tlen kuali tikmatij?

4 Ijkuak tiauij ueyi nechikol, tikmatij tlen hora peuas. Pero amo tikmatij tlen tonal peuas ueyi tlajyouilistli. Ijkuak Jesús okatka Tlaltikpak okijto: “Pero n tonati iwa n ora ijkuak ijkó tlamochiwas amaka kimati, nion ángelteh non kateh ilwikak, nion Ne, yej sanwel Notajtsi kimatok” (Mateo 24:36). Ken ye Jesús akin kiyekanas guerra itech Armagedón, uelis tikijtoskej axkan yikimati keman peuas non guerra (Apocalipsis 19:11-16). Pero tejuan amo tikmatij tlen tonal nion tlen hora tlamis tlen amo kuali. Ik non, moneki ma tiijsatokan. Jehová yikimati keman peuas ueyi tlajyouilistli. Uan non tonal yiuits, ken kijtoa Biblia: “¡Amo uejkauas!” (xiktlajtolti Habacuc 2:3). * ¿Ken tikmatij ijkon panos?

Jehová yikimati keman peuas ueyi tlajyouilistli

5. Xikijto se neskayotl tlen kiteititia nochi tlen kijtoa Jehová mochiua itech kauitl tlen okijto.

5 Nochi tlen Jehová kijtoa mochiua, melauak mochiua itech kauitl tlen okijto. Se neskayotl, ma timokuayejyekokan itech tonal 14 metstli nisán xiuitl  1513 achto itech xiuitl 1 (a.i.x. 1). Itech non tonal toTajtsin Dios okinkixti israelitas itech Egipto. Satepan, Moisés okijkuilo Jehová okinmakixti: “Ijkuak opanok cuatrocientos treinta xiuitl, itech non tonal, nochtin tlaltikpaktlakamej tlen iaxkauan Jehová okiskej itech altepetl Egipto” (Éxodo 12:40-42). Nonmej 430 xiuitl opejkej itech tonal 14 metstli nisán xiuitl 1943 a.i.x. 1, ijkuak Jehová opejki kinteochiua ixuiuan Abrahán ijkon ken okilui kichiuaskia (Gálatas 3:17, 18). Satepan, Jehová okilui Abrahán ixuiuan chantiskiaj itech okseki altepemej, yetoskiaj tlakeualmej uan kintlajyouiltiskiaj 400 xiuitl (Génesis 15:13; Hechos 7:6). Nonmej 400 xiuitl opejkej itech xiuitl 1913 a.i.x. 1, ijkuak Ismael opejki kipinatia Isaac. Uan otlankej ijkuak Jehová okinmakixti israelitas itech Egipto (Génesis 21:8-10; Gálatas 4:22-29). Ken tikitaj, miak xiuitl achto Jehová okijto tlen tonal kimakixtiskia ialtepe.

6. ¿Tleka uelis tikneltokaskej Jehová kimakixtis ialtepe?

6 Josué noijki okiski itech Egipto. Miak xiuitl satepan, ye okinmilui israelitas: “Namejuan kuali nankimatij ika nochi namoyolo uan ika nochi namoyolilis, nion se tlajtoli opoliuik itech nochi kuali tlajtolmej tlen okijto Jehová namoDios. Nochi melauak omochijkej. Nochi tlen okijto omochi” (Josué 23:2, 14). Jehová yokinmilui itekipanojkauan kinmakixtis ijkuak uits ueyi tlajyouilistli uan kinmakas yolilistli tlen amo keman tlamis itech Xochitlali. Uelis tikneltokaskej melauak ijkon kichiuas. Ik non, tla tiknekij tiyoltoskej itech Xochitlali, moneki ma tiijsatokan.

MONEKI TIIJSATOSKEJ TLA TIKNEKIJ TIMOMAKIXTISKEJ

7, 8. (1) Yiuejkika, ¿tlen okichiuaya akin otlamaluiaya? (2) ¿Tlen uelis panoskia tla akin otlamaluiaya okochiaya? Xikijto se neskayotl.

7 Uelis itlaj timomachtiskej itech tlakamej tlen yiuejkika okinmaluiayaj altepemej. Jerusalén uan okseki altepemej okipiayaj uejkapan tepamitl tlen okinyaualoaya pampa amo uelis kalakiskiaj akinmej okinkokoliayaj. Akinmej otlamaluiayaj omoketokaj ipan tepamitl kanin uelis kitaskiaj nochi tlen opanotoka. Oksekimej otlamaluiayaj itech ikaltlatsakuil altepetl. Nochtin akinmej otlamaluiayaj omonekiaya ijsatoskej se tonal uan se yoak. Uan ijkuak okitayaj youalayaj akinmej okinkokoliayaj, omonekiaya kinnauatiskej nochtin tlaltikpaktlakamej (Isaías 62:6). Okimatiayaj sapanoa omonekiaya ijsatoskej uan kuali kitaskiaj tlen opanotoka. Tla amo ijkon kichiuaskiaj, miakej tlaltikpaktlakamej mikiskiaj (Ezequiel 33:6).

8 Itech xiuitl 70, soldados romanos okalakej Jerusalén. ¿Ken okalakej? Se tlakatl judío ixtlamatki tlen omotokayotiaya Josefo, kijtoa sekimej tlen otlamaluiayaj okochkej. Ik non, romanos okalakej, okitlatijkej teokali uan okipojpolojkej altepetl. Ijkuakon okachi otlajyouijkej judíos.

9. ¿Tlen amo kimatij tlaltikpaktlakamej?

9 Axkan, miakej tekiuajkej kinpiaj soldados uan teposmej tlen ika tlamaluiaj kanin tlami inmialtepe. Ijkon amo itlaj  uelis kichiuiliskej altepetl. Pero nonmej tekiuajkej amo kimatij itech iluikak kajki se Tekiuajkayotl tlen okachi chikauak tlen kiyekana Jesucristo. Ayakmo miak poliui uan nin Tekiuajkayotl moteuis iuan nochtin tekiuajkayomej tlen katej Tlaltikpak (Isaías 9:6, 7; 56:10; Daniel 2:44). Tiknekij ma uiki non tonal uan noijki tiknekij tiijsatoskej ijkuak uits. Ik non, nochipa ma tiijsatokan uan ma tikitakan ken mochijtok tlen Biblia kijtoa mochiuaskia uan nochipa ma tiktekichiuilijtokan Jehová (Salmo 130:6).

AMO MA TIKOCHIKAN

10, 11. (1) ¿Itech tlen moneki timomaluiskej, uan tleka? (2) ¿Tleka tikneltoka Diablo “kinmixtlapoyawaltia” tlaltikpaktlakamej amo ma kajsikamatikan tlen kijtoa Biblia panos?

10 Ma timokuayejyekokan itech ikaj akin tlamaluia tlen oijsatoka nochi yoak. Ijkuak yitlanesis, okachi kochisneki, ik non, sapanoa oui kimachilia ijsatos. Noijki ijkon, axkan tikatej itlamian tonalmej pampa yitlamis nochi tlen amo kuali. Ik non, moneki timomaluiskej pampa tiijsatoskej. ¿Tleka? Pampa ijkuak okachi yiuits tonal ijkuak tlamis nochi tlen amo kuali, okachi oui tiijsatoskej. Amo kuali tikchiuaskej tla axkan tikochiskej. Ma tikitakan eyi tlamantli tlen uelis kichiuas ma tikochikan noso ayakmo chikauak ma tikpiakan totlaneltokilis.

11 Diablo tlakajkayaua. Achto mikiskia Jesús, eyi uelta okinmilnamikti imachtijkauan, Satanás ye “akin kinawatia nin tlaltíkpaktli” (Juan 12:31; 14:30; 16:11). Diablo kintekitiltia tlaneltokalismej pampa kinkajkayauas tlaltikpaktlakamej. Ik non, miakej amo kineltokaj ijkuak Biblia kijtoa ayakmo miak poliui pampa tlamis nochi tlen amo kuali (Sofonías 1:14). Kuali tikitaj Satanás “kinmixtlapoyawaltia” tlaltikpaktlakamej (2 Corintios 4:3-6). Ik non, miakej amo techkakij ijkuak tikinmiluiaj yitlamis nochi tlen amo kuali uan Cristo yitlanauatijtok. Miakej techiluiaj: “Amo itlaj nikneki nikmatis”.

12. ¿Tleka amo ma tikkauilikan Diablo ma techkajkayaua?

 12 Miakej amo kinekij kimatiskej tlen Biblia kijtoa panos. Pero amo ma timoyolkokokan pampa ijkon kichiuaj. Tikmatij tleka moneki ma tiijsatokan. Tlatitlanil Pablo okinmilui tokniuan: “Nomejwah ya nonkimatokeh ijkuak Toteko walmuikas amaka kimati non tonati, Ye kalakiki ijkuak amaka kichia, kemi se yuali ijkuak se tlachtek walkalaki” (xiktlajtolti 1 Tesalonicenses 5:1-6). Uan Jesús okijto: “Xiijsatokah, porke mach nonkimatih kemania niwalkalakiki Ne Non onimochi ni tlakatl” (Lucas 12:39, 40). Amo miak poliui uan Satanás ika okse tlamantli kinkajkayauas tlaltikpaktlakamej. Kichiuas ma kineltokakan “ya tikateh ika kuali, iwa ya tikpiah yolsewílistli” itech nochi Tlaltikpak. Pero san niman uits itonal Jehová. Tlaltikpaktlakamej sapanoa momojtiskej. ¿Uan tejuan? Tla tiknekij tiijsatoskej, amo ma tikkauilikan Diablo ma techkajkayaua ijkon ken kinkajkayaua oksekimej. Axkan moneki ma tikchiuakan tlen okijto tlatitlanil Pablo: “Amo matikochtokah kemi n oksikimeh, yej matiijsatokah ika kuali totlalnamikilis”. Ik non, moneki mojmostla ma tiktlajtoltikan Biblia uan ma timokuayejyekokan itech tlen Jehová techiluia.

13. (1) ¿Ken kinmijtlakoa “espíritu de nin tlaltíkpaktli” tlaltikpaktlakamej? (2) ¿Tlen uelis tikchiuaskej pampa amo ma techijtlako?

13 “Espíritu de nin tlaltíkpaktli” kinmijtlakoa tlaltikpaktlakamej. Axkan miakej tlaltikpaktlakamej kineltokaj amo moneki kixmatiskej toTajtsin Dios (Mateo 5:3). Mochijchikauaj kipiaskej miak tlamantli tlen onka itech nin Tlaltikpak (1 Juan 2:16). Noijki, axkan onka miak tlamantli tlen ika moyolpaktiaj. Ik non, miakej san intech mokuayejyekoaj uan san kinekij moyolpaktiskej (2 Timoteo 3:4). Uan kilkauaj tlen okachi ipati uan amo kinekij mouikaskej iuan toTajtsin Dios. ¿Tlen uelis tikchiuaskej pampa amo techijtlakos “espíritu de nin tlaltíkpaktli”? Tlatitlanil Pablo okijto amo moneki san timoyolpaktiskej. Tla ijkon tikchiuaj, tiijsatoskej (Romanos 13:11-14).

Tiknekij ma techyekana iespíritu toTajtsin Dios uan amo “espíritu de nin tlaltíkpaktli”

14. ¿Tlen technejmachtia Lucas 21:34, 35?

14 Tiknekij ma techyekana iespíritu toTajtsin Dios uan amo “espíritu de nin tlaltíkpaktli”. Jehová techpaleuia ika iespíritu pampa tikmatiskej tlen san niman panos (1 Corintios 2:12) [1] (xikita nota kanin tlami tlamachtil). Pero moneki timomaluiskej. Onka miak tlamantli tlen uelis techtsakuilis ijkuak tiktekichiuiliaj Jehová (xiktlajtolti Lucas 21:34, 35). Miakej uelis techiluiskej amo titlalnamikij pampa tikneltokaj tikatej itlamian tonalmej (2 Pedro 3:3-7). Pero amo ma timosotlauakan. Kuali mota yitlamis nochi  tlen amo kuali. Tla tiknekij ma techyekana iespíritu toTajtsin Dios, moneki nochipa ma tiakan nechikolmej.

¿Timochijchikajtokej pampa tiijsatoskej? (Xikinmita párrafos 11 a 16).

15. ¿Tlen okipanok Pedro, Santiago uan Juan uan ken uelis ijkon techpanos?

15 Ken titlajtlakolejkej oui techchiuilia tiijsatoskej. Jesús okimatiaya tlaltikpaktlakamej tlajtlakolejkej uan kichiuaj tlen amo kuali. Ma tikitakan tlen opanok itech yoak achto kimiktiskiaj Jesús. Ye amo okipiaya tlajtlakoli, pero okimatiaya omonekiaya kiluiskia Jehová ma kipaleui ma yeto yolmelajki uan okilui Pedro, Santiago uan Juan amo ma kochikan ijkuak omotlatlaujtijtoka. Pero yejuan amo okajsikamatkej omonekiaya ijsatoskej non yoak. ¿Tlen okinpanok? Ken sapanoa osotlauakej, okochkej. Jesús noijki osotlauatoka, pero oijsatoka uan okitlatlaujtijtoka iTajtsin. Uan itlatitlaniluan omonekiaya ijkon kichiuaskiaj (Marcos 14:32-41).

16. Ijkon ken okijto Jesús itech Lucas 21:36, ¿tlen moneki tikchiuaskej pampa tiijsatoskej?

16 ¿Tlen techpaleuis ma tiijsatokan uan ma timoyektlalikan ijkuak uits iueyi tonal Jehová? Moneki melauak ma tiknekikan tikchiuaskej tlen kuali. Pero amo san non. Seki tonalmej achto kimiktiskiaj Jesús, okinmilui imachtijkauan ma kiluikan Jehová ma kinpaleui (xiktlajtolti Lucas 21:36). Pampa tiijsatoskej itlamian tonalmej, moneki nochipa ma timotlatlaujtikan (1 Pedro 4:7).

MONEKI TIIJSATOSKEJ

17. ¿Ken uelis tikmatiskej kox timoyektlalijtokej pampa ijkuak tlamis nochi tlen amo kuali?

17 Jesús okinmilui imachtijkauan ye uits ‘ijkuak yejwah mach kichiah’ (Mateo 24:44). Ik non, moneki nochipa ma tiijsatokan. Amo moneki ma tiktemokan tlen onka itech nin Tlaltikpak. Miakej kijtoaj tiyolpakiskej ika tlen onka itech nin Tlaltikpak. Pero tikmatij non amo melauak. Jehová uan Jesús techiluia itech Biblia ken uelis tiijsatoskej. Ik non, moneki ma tikitakan ken mochijtok tlen omoijto itech Biblia. Moneki okachi kuali ma timouikakan iuan Jehová uan ma tiktlalikan iTekiuajkayo achto itech tonemilis. Ijkon timoyektlaliskej ijkuak tlamis nochi tlen amo kuali (Apocalipsis 22:20). San ijkon uelis tiyoltoskej.

^ [1] (párrafo 14): Xikita tlamachtil 21 itech amochtli El Reino de Dios ya está gobernando.

^ párr. 4 Habacuc 2:3 kijtoa: “Pampa kochtemikilistli mochiuas itech kauitl tlen yomoijto mochiuas, uan totoka yaui hasta itlamian nochi, uan amo tekajkayauas. Maski uejkauas, ¡xitlachixto! Pampa melauak mochiuas. ¡Amo uejkauas!”.