Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2016

Tiktlasojkamatiliaj Jehová tlamantli kuali tlen amo technamiki tikpiaskej

Tiktlasojkamatiliaj Jehová tlamantli kuali tlen amo technamiki tikpiaskej

“Tinochtin otikselijkej [...] tlamantli kuali tlen amo technamiki tikpiaskej itech tlamantli kuali tlen amo technamiki tikpiaskej” (JUAN 1:16, TNM).

TLAKUIKALMEJ: UAN 13

1, 2. (1) Xikijto san ika seki tlajtolmej tlapoualistli itech tlakatl tlen okipiaya iviña. (2) ¿Ken kiteititia nin neskayotl itech tlen tiktemakaj uan itech tlamantli kuali tlen amo technamiki tikpiaskej?

SE TLAKATL okipiaya iviña. Se tonal, kualkan oyajki tiankistli okintlakeuato sekimej tlakamej. Okinmilui kech kintlaxtlauiskia uan yejuan okijtojkej kipaleuiskiaj. Okachi yitlajka tlakatl okitak omonekiaya oksekimej ma kipaleuikan. Ik non, miak uelta oyajki okintlakeuato oksekimej tlakamej. Uan nochtin okinmilui kuali kintlaxtlauis. Ijkuak otlanki tekitl, okinnechiko pampa kintlaxtlauis. Sekimej otekitikej nochi tonal, pero oksekimej san se hora. Pero tlakatl okatka yolkuali uan nochtin okintlaxtlaui ken okinmilui. Pero tlakamej tlen otekitikej nochi tonal, okualankej. Tlakatl okinmilnamikti yejuan okijtojkej kiseliskiaj tomin tlen okinmilui kinmakaskia. Noijki okinmilui ye uelis kintlaxtlauiskia tlakeualmej san  kech kinekiskia. Satepan okintlajtlani kox omoxikoayaj pampa nochtin okintlaxtlaui ken okinmilui (Mateo 20:1-15, TNM).

2 Jesús okijto nin tlapoualistli pampa tlamachtis itech “tlamantli kuali tlen amo technamiki tikpiaskej” tlen techmaka toTajtsin Dios (xiktlajtolti 2 Corintios 6:1, TNM). * Sekimej kijtoaj tlakamej tlen otekitikej nochi tonal omonekiaya okachi ma kintlaxtlauikan. Pero tlakatl tlen iaxka viña ajsitok okintlaxtlaui akinmej amo nochi tonal otekitikej. Se ixtlamatki okijto tlajtoli “tlamantli kuali tlen amo technamiki tikpiaskej” kijtosneki “itlaj tlen tikseliaj tlen amo tiktlaxtlauaj uan amo technamiki tikpiaskej” uan itlaj tlen “kimaka se tlaltikpaktlakatl, pero amo okimotlanili nion okichi itlaj pampa kiselis”.

SE TETLIOKOLIL TLEN OTECHMAKAK JEHOVÁ

3, 4. (1) ¿Tleka Jehová okinmakak nochtin tlaltikpaktlakamej tlamantli kuali tlen amo technamiki tikpiaskej? (2) ¿Uan ken okichi?

3 Biblia kijtoa tlamantli kuali tlen amo technamiki tikpiaskej tlen techmaka toTajtsin Dios se tetliokolil (Efesios 3:7). Ken amo ueli tiktlakamatij Jehová itech nochi tlen tikchiuaj, amo technamiki ma techmaka tlamantli tlen kuali. Technamiki ma timikikan. Ueyi tekiua Salomón okijto: “Itech Tlaltikpak amo onka se tlakatl yolmelauak tlen nochipa kichiua tlen kuali uan amo tlajtlakolchiua” (Eclesiastés 7:20). Satepan, tlatitlanil Pablo okijto “nochteh otlajtlakolchijkeh, iwa okimopolilijkeh iweyijkachiwalis Dios” uan “tlajtlákoli tetlaxtlawia ika mikílistli” (Romanos 3:23; 6:23a).

4 Jehová sapanoa kintlasojtla nochtin tlaltikpaktlakamej, ik non, “okitemakti non sanwel Ye se Ikone” ma mikiki topatka. Ijkon Jehová okiteititi okachi otechmakak tlamantli kuali tlen amo technamiki tikpiaskej (Juan 3:16). Pablo okijto “Dios itech itlasojtlalis okinek mamiki n Cristo por tinochteh, iwa axa kipia weyílistli iwa mawistílistli porke omikki por tejwah” (Hebreos 2:9). Pero “tlan Dios kitetliokolia ye n nemílistli non ayik tlami keman tiseititokeh iwan Toteko Cristo Jesús” (Romanos 6:23b).

5, 6. (1) ¿Tlen techpanoa pampa titlajtlakolejkej? (2) ¿Ken techpaleuia tla tikkauiliaj itlasojtlalis Jehová ma kiyekana tonemilis?

5 ¿Tleka titlajtlakolchiuaj uan timikij? Biblia kijtoa “ika itlajtlakol se tlakatl, Adán, nochteh n tlakah mikkih”. Ken tiikoneuan Adán, tinochtin titlajtlakolchiuaj uan timikij (Romanos 5:12, 14, 17). Pero maski titlajtlakolejkej, amo ma tikkauilikan tlajtlakoli ma technauati. ¿Ken uelis tikchiuaskej? Ma titlaneltokakan itech imikilis Cristo. Ijkon tikkauiliaj itlasojtlalis Jehová ma kinauati tonemilis. Biblia kijtoa: “Pero ijkuak tikmatih miak tlajtlákoli tikpiah, iteiknomatilis Dios omomiakili. Yika, ijkó kemi n tlajtlákoli otlanawatijtiwalayah iwa okualík mikílistli, axa noiwa itlasojtlalis Dios matlanawati ika iyekmilawalis para matikpiakah nemílistli nochipa, por Toteko Cristo Jesús” (Romanos 5:20, 21).

6 Maski ok titlajtlakolejkej, amo ma tikkauilikan tlajtlakoli ma technauati. Ik non, ijkuak tikchiuaj itlaj tlen amo kuali, tikiluiaj Jehová ma techtlapojpolui. Pablo  okijto: “Tlajtlákoli ayakmó kipias weletílistli nomotech, porke nomejwah ayakmó nonkateh imak itlanawatil Moisés yej nonkateh imak itlasojtlalis Dios” (Romanos 6:14). Tla tikkauiliaj itlasojtlalis Jehová ma kiyekana tonemilis, ¿ken techpaleuis? Pablo okijto ‘tikkawaskeh nochi tlan amokuali techyoltilanah itech nin tlaltíkpaktli’ uan ‘tinemiskeh ika totlalnamikilis chipawak, tinemiskeh ika yolsewílistli iwa tikmopantiskeh Dios’ (Tito 2:11, 12).

TOTAJTSIN DIOS “TLATLAMANTLI TECHITITIA” ITLASOJTLALIS

7, 8. ¿Tlen kijtosneki “tlatlamantli techititia” Jehová itlasojtlalis? (Xikinmita tlaixkopinalmej tlen ika peua tlamachtil).

7 Tlatitlanil Pedro okijto: “Ken sejse onankiselijkej tetliokolil, xiktekitiltikan ijkuak nanmopaleuiskej ken akinmej tlamaluiaj itech tlamantli kuali tlen amo technamiki tikpiaskej tlen tlatlamantli techititia toTajtsin Dios” (1 Pedro 4:10, TNM). ¿Tlen kijtosneki Jehová ma kiteititi itlasojtlalis “tlen tlatlamantli techititia”? Kijtosneki maski san tlen ouijkayotl tikpiaskej, ye techpaleuia ma titlaxikokan (1 Pedro 1:6). Nochipa techmaka tlen moneki pampa tikxikoskej nochi ouijkayotl.

Maski san tlen ouijkayotl tikpiaskej, Jehová nochipa techmaka nochi tlen moneki pampa ma titlaxikokan

8 Ken tikitaj, Jehová techmaka miak tlamantli kuali. Tlatitlanil Juan okijkuilo: “Tinochtin otikselijkej nochi tlen ye kipia, noijki tikseliaj tlamantli kuali tlen amo technamiki tikpiaskej itech tlamantli kuali tlen amo technamiki tikpiaskej” (Juan 1:16). Ken Jehová tlatlamantli kiteititia itlasojtlalis, tikseliaj miakej tlateochiualismej. Ma tikinmitakan seki.

9. (1) ¿Ken techpaleuia itlasojtlalis toTajtsin Dios? (2) ¿Ken tikteititiaj tiktlasojkamatiliaj?

9 Jehová techtlapojpoluia. Pampa Jehová techtlasojtla, techtlapojpoluia. Pero techtlapojpoluia tla melauak timoyolkuepaj uan timochijchikauaj ayakmo tikchiuaskej tlen amo kuali (xiktlajtolti 1 Juan 1:8, 9). Pablo okinyekilui tlapejpenalmej ken Jehová tetlapojpoluia. Ye okijto itech toTajtsin Dios: “Otechmakixti imak iweletilis n tleyuálistli, iwa otechtlali kan tlanawatia Ikone non saikpanoa kitlasojtla, Akin otechmakixti, iwa otechtlapojpolwi de totlajtlakolwah” (Colosenses 1:13, 14). Tla tiktlasojkamatiliaj Jehová nochi tlen yotechmakak, tikteititiskej ijkuak tikueyichiuaskej. Uan ken techtlapojpoluia, uelis tikseliskej okachi miakej tlateochiualismej.

10. ¿Tlen tikseliaj pampa tikpiaj itlasojtlalis toTajtsin Dios?

10 Uelis tikpiaskej yolseuilistli iuan toTajtsin Dios uan kuali iuan timouikaskej. Ken titlajtlakolejkej, desde ijkuak tinesij amo timouikaj iuan toTajtsin Dios. Pero maski titlajtlakolejkej, Pablo okijto: “Dios otechtlapojpolwi ika imikilis Ikone ijkuak tejwah ok otikkokoliayah” (Romanos 5:10). Pampa Jesús omotemakak, uelis timouikaskej iuan toTajtsin Dios. Nin kijtosneki uelis tikpiaskej yolseuilistli iuan toTajtsin Dios uan kuali iuan timouikaskej. Pero ¿ken  mouika nin iuan itlasojtlalis toTajtsin Dios? Pablo okiyekijto tleka ijkuak okinmilui tlapejpenalmej: “ToTajtzin Dios ya techita tichipawakej de totlajtlakol porke tikneltokaj tlan Yej techilwia [...]. ToSeñor Jesucristo Yej okichij ma timotlapojpolwikan iwan Dios. Iwan por yen Cristo iwan porke tikneltokaj tlan techilwia, axan tiwelij timijkuaniaj inawak Dios ika iteiknotlamachilis maski mach totech opowia timijkuanianij inawak, iwan axan ya timoyekketokej itech iteiknotlamachilis” (Romanos 5:1, 2, ITlajtol toTajtzin Dios [NHY]). ¡Melauak tiktlasojkamatiliaj Jehová pampa iuan tikpiaj yolseuilistli uan iuan timouikaj!

Techkauilia ma tikkakikan kuali tlajtolmej. (Xikita párrafo 11).

11. ¿Ken kinualikaj tlapejpenalmej “oksikimeh ichkameh” itech melajkayotl?

11 Uelis tiyetoskej tiyolmelauakej ixpan toTajtsin Dios. Teotlajtojki Daniel okijto itech itlamian tonalmej tlapejpenalmej “miakej kinualikaskej itech melajkayotl” (xiktlajtolti Daniel 12:3). * ¿Ken kichiuaj? Kintlapouiaj itech Tekiuajkayotl uan kinmachtiaj itlanauatiluan Jehová “oksikimeh ichkameh” tlen sapanoa miakej (Juan 10:16). Ijkon kinpaleuiaj tlaltikpaktlakamej pampa toTajtsin Dios ma kinmita yolmelauakej. Ijkon kinmita pampa ye tetlasojtla. Pablo okiyekijto: “Dios ika iteiknomatilis techchipawa tinochteh san ijki, akimeh tikneltokah, porke Cristo Jesús okitlaxtla ika iesso por totlajtlakolwah” (Romanos 3:23, 24).

Techkauilia ma tiktlatlaujtikan. (Xikita párrafo 12).

12. ¿Ken mouika “iteiknotlamachilis” toTajtsin Dios iuan tlatlaujtilistli?

12 Uelis timotokiskej itech toTajtsin Dios ika tlatlaujtilistli. Pampa Jehová  techiknomati, uelis tiktlatlaujtiskej. Pablo kijtoa “ma timijkuanikan inawak Dios katlej kinawatia nochi tlamantle iwan katlej kipia weyi iteiknotlamachilis” uan “amo ma timomawtikan de tiktlajtlaniliskej ma techpalewi” (Hebreos 4:16NHY). Ika Jesús nochipa uelis tiktlatlaujtiskej Jehová. Nin se ueyi tlateochiualistli. Pablo okijto: “Timijkuaniah inawak Dios, iwa ayakmitla tikmawiliah por n tlaneltokálistli non tikpiah itech” (Efesios 3:12).

Techpaleuia ijkuak moneki. (Xikita párrafo 13).

13. ¿Ken techpaleuia “iteiknotlamachilis” toTajtsin Dios ijkuak okachi moneki?

13 Jehová uelis techpaleuis ijkuak okachi moneki. Pablo otechilui ma tiktlatlaujtikan Jehová ijkuak monekis, pampa “ma techiknomati iwan de ma kipia iteiknotlamachilis towan. Nijkuak tejwan okachi tiknekiskej ma techpalewi ijkuakón Yej techpalewis” (Hebreos 4:16NHY). Ijkuak tikpiaskej se ouijkayotl ma tikiluikan Jehová ma techpaleui. Ye technankilia maski amo moneki. Miak uelta kintekitiltia tokniuan pampa techpaleuis. Ken Jehová technankilia uelis tikijtoskej: “Amo nimawi, amaka weletis itla nechtoktis porke Dios nechpaleuia” (Hebreos 13:6).

14. ¿Ken noijki techpaleuia “iteiknotlamachilis” toTajtsin Dios?

14 Uelis techyolseuis. Ijkuak timoyolkokoaj Jehová uelis techyolseuis pampa techtlasojtla (Salmo 51:17). Ijkuak akinmej okichiuayaj ken Cristo tlen ochantiayaj itech altepetl Tesalónica okintojtokayaj, Pablo okinmilui: “Toteko Cristo Jesús, sansikah iwa n Totajtsi Dios, Akin iwa kichiwa matimochiakah ika pakílistli [...] kichiwa porke de milajka techiknomati, manomechyolchikawa iwa manomechmaka chikawálistli” (2 Tesalonicenses 2:16, 17). Techyolseuia tikmatiskej Jehová techmaka tlamantli kuali tlen amo technamiki tikpiaskej uan techmaluia pampa techtlasojtla.

15. ¿Tlen chialistli tikpiaj pampa techtlasojtla toTajtsin Dios?

15 Tikchiaj tiyoltoskej nochipa. Ken titlajtlakolejkej, amo itlaj kuali tikchiaskiaj tla Jehová amo techpaleuiskia (xiktlajtolti Salmo 49:7, 8). * Pero Jehová techmaka se kualtsin chialistli. ¿Tlen? Jesús okijto: “Porke tlan Notajtsi Dios kineki Ye ni: nochteh akimeh kitaskeh Ikone Dios iwa kineltokah, maya mamikikah moyolitiskeh” (Juan 6:40). Ken tikitaj, pampa Jehová techtlasojtla uelis tiyoltoskej nochipa. Pablo okijto: “Dios, yotechnextili kenijki satlawel techtlasojtla, iwa ika non tlasojtlálistli non Ye techpialia, nochteh n tlaltikpaktlakah weletis momakixtiskeh” (Tito 2:11).

MASKI TOTAJTSIN DIOS TECHTLASOJTLA AMO SAN MA TITLAJTLAKOLCHIUAKAN

16. ¿Tlen okichijkej sekimej akinmej opejkej kichiuaj ken Cristo?

16 Ken yotikitakej, pampa Jehová techtlasojtla, techmaka miakej tlateochiualismej. Pero maski techtlasojtla, amo san ma titlajtlakolchiuakan. Itech achto siglo, ijkuak sekimej opejkej kichiuaj ken Cristo, miakej omokuayejyekojkej ‘welis kichiwaskiaj itlaj tlajtlakole san tlan yejwan kinekiskiaj, iwan okijtojkej ke Dios kipia weyi iteiknotlamachilis iwan mach kintlajyowiltiskia’ (Judas 4NHY). Ninmej okineltokayaj uelis  tlajtlakolchiuaskiaj uan Jehová nochipa kintlapojpoluiskia. Noijki okinekiayaj oksekimej ma tlajtlakolchiuakan ken yejuan. Axkan, akin ijkon mokuayejyekoa, sapanoa tlajtlakolchiua uan amo kitlakaita itlasojtlalis toTajtsin Dios (Hebreos 10:29).

17. ¿Tlen okijto Pedro moneki ma tikchiuakan?

17 Axkan, Satanás yokinkajkaya sekimej tokniuan pampa ma kineltokakan uelis tlajtlakolchiuaskej uan Jehová san niman kintlapojpoluis. Jehová kineki techtlapojpoluis pero tla melauak timoyolkuepaj. Pero noijki kineki ma timochijchikauakan amo ma tikchiuakan tlen amo kuali. Uan okinauati Pedro ma kijkuilo nin: “Ximotlachilikah, para amo manomechkajkayawakah n tlajtlakolchijkeh, iwa nonwetsiskeh de nomoyeknemilis. Okachi kuali, ximoskaltikah itech ikualtilis iwa iixtlamatilis n Toteko iwa Totemakixti Cristo Jesús” (2 Pedro 3:17, 18).

KUALI MA TIKTEKITILTIKAN ITLASOJTLALIS TOTAJTSIN DIOS

18. Ken Jehová techtlasojtla, ¿tlen moneki ma tikchiuakan?

18 Tla melauak tiktlasojkamatij itlasojtlalis toTajtsin Dios, tiktekitiltiskej nochi tlen techmaka pampa tikueyichiuaskej uan tikinpaleuiskej oksekimej. ¿Ken uelis tikchiuaskej? Pablo okijto: “Dios otechmajmák tlatlamantli toteki, ijkó kemi Ye okimonekilti techmajmakas”. Noijki okijto: “tla Dios otechmák n tekitl para matitepalewikah, matikinyekpalewikah” oksekimej noso ma titetlapouikan. Uan saiktlami okijto: “Akin weleti tlamachtia, makimopanti mayektlamachti. Akin kimati teyolchikawa, makinyolchikawa oksikimeh [...]. Akin kimpalewia akimeh kimpoloa tlan ika panotoskeh, makimpalewi ika pakílistli” (Romanos 12:6-8). ¿Tlen kijtosneki nochi nin? Ken Jehová techtlasojtla, moneki ma timochijchikauakan ma titetlapouikan, ma kinmachtikan oksekimej itech Biblia, ma tikinyolchikauakan tokniuan uan ma tikintlapojpoluikan akinmej techyolkokoaj.

19. ¿Tlen tikitaskej itech okse tlamachtil?

19 Pampa techtlasojtla Jehová yotechmakak miakej tlateochiualismej, ik non, moneki ma timochijchikauakan ‘matitetlapowikah de n kualitlájtoli non techmatiltia kenijki Dios satlawel techtlasojtla’ (Hechos 20:24). Itech okse tlamachtil, tikitaskej nin tekitl tlen miak ipati.

^ párr. 2 2 Corintios 6:1 kijtoa: “Ken iuan titekitij, tejuan timechtlatlaujtiaj amo xikselikan tlamantli kuali tlen amo technamiki tikpiaskej tlen techmaka toTajtsin Dios uan ayakmo xikchiuakan itlanekilis”.

^ párr. 11 Daniel 12:3 kijtoa: “Uan akinmej kipiaskej ixtlamatilistli petlaniskej ken petlani nochi iluikak; uan miakej kinualikaskej itech melajkayotl, yetoskej nochipa ken sitlalimej”.

^ párr. 15 Salmo 49:7, 8 kijtoa: “Amo uelis kimakixtiskej se inmikni, nion kimakaskej se tlaxtlauili toTajtsin Dios pampa kipaleuiskej inmikni (tlaxtlauili pampa uelis kimakixtiskej inyolilis sapanoa miak ipati uan amo keman uelis kitemakaskej)”.