TLAMACHTILI 28
Xijnexti tijpatiita tlen Jehová uan Jesús kichijkej
¿Kenijkatsa tijyolmati kema se mouampo mitsmaka se tlamantli? Uelis tlauel tiyolpaki uan tijneki mouampo ma kiita tijpatiita tlen mitsmakak. San Jehová uan Jesús techmakatokej se tlamantli tlen tlauel ipati. ¿Tlake tlamantli techmakatokej? ¿Kenijkatsa uelis tijnextisej tijpatiitaj tlen techmakatokej?
1. ¿Kenijkatsa uelis tijnextisej tijtlaskamatij tlen Jehová uan Jesús kichijkej?
Biblia kiijtoua “nochi tlen kineltokasej” Jesús uelis kipiasej nemilistli tlen axkema tlamis (Juan 3:16). ¿Kenijkatsa uelis tijnextisej titlaneltokaj ipan Jesús? Amo san moneki tikijtosej titlaneltokaj ipan ya, moneki tijnextisej ika tlen tijtlapejpeniaj uan ika tlen tijchiuaj (Santiago 2:17). Kema tijnextiaj titlaneltokaj ika tlen tijchiuaj uan ika tlen tikijtouaj, techpaleuia nojua kuali ma timouampojchiuakaj iuaya Jesús uan Jehová (xijpoua Juan 14:21).
2. ¿Kema uelis tijnextisej tijtlaskamatij tlen Jehová uan Jesús kichijkej?
Kema Jesús nechka kimiktiskiaj, kiniljuik itokilijkauaj kenijkatsa ueliskiaj kinextisej kitlaskamatij tlen kichiuaskia. Kiniljuik ma mosentilikaj uan ma kiilnamikikaj tlen Biblia kitokaxtia “toTeko iTlakualis” o Kema moilnamiki Cristo imikilis (1 Corintios 11:20). Jesús kichijki nopa pampa kinekiyaya iapóstoles uan teipa sekinok itokilijkauaj ma kiilnamikikaj ya temaktilijtoya inemilis. Yeka Jesús kiniljuik: “Xijchiuakaj ya ni para inkineskayotisej innechilnamikij” (Lucas 22:19). Tlaj tias kema moilnamikis Cristo imikilis, tijnextis tikintlaskamatilia Jehová uan Jesús pampa kinextijkej tlauel mitsikneliaj.
KUALI XIMOMACHTI
Ma tikitakaj sekinok tlamantli tlen ika uelis tijnextisej tikintlaskamatiliaj Jehová uan Jesús pampa kinextijkej tlauel techikneliaj. Uan kenke tlauel moneki tikilnamikisej Cristo imikilis.
3. ¿Tlake uelis tijchiuasej uan kiampa tijnextisej titetlaskamatiliaj?
Ximoiljui nechka timisauis uan se akajya mitskixtia. ¿Nima tikilkauaskia tlen kichijki nopa maseuali? ¿O tijchiuaskia se tlamantli tlen ika tijnextiskia tijtlaskamatilia?
Jehová tlauel techiknelik, yeka uelis tijpiasej nemilistli tlen axkema tlamis. Xijpouakaj 1 Juan 4:8-10 uan xijnankilikaj ni tlajtlanili:
-
¿Kenke Jesús imikilis tlauel ipati?
-
¿Kenijkatsa tijyolmati kema timoiljuia tlen Jehová uan Jesús kichijkej?
¿Kenijkatsa uelis tijnextisej tijpatiitaj tlen Jehová uan Jesús kichijkej? Xijpouakaj 2 Corintios 5:15 uan nojkia 1 Juan 4:11 uan 5:3. Kema inkipojtiasej sejse texto, xijnankilikaj ni tlajtlanili:
-
¿Kenijkatsa uelis tijnextisej tijtlaskamatij tlen Jehová uan Jesús kichijkej?
4. Ma tijchiuakaj kej Jesús
Nojkia tijnextiaj tijtlaskamatij tlen Jesús kichijki kema tijchiuaj kej ya. Xijpouakaj 1 Pedro 2:21 uan xijnankilikaj ni tlajtlanili:
-
¿Kenijkatsa uelis tijchiuas kej Jesús kichijki?
Jesús tlauel kipatiitayaya toTeotsij iTlajtol, tlajtolmoyauayaya uan kinpaleuiyaya maseualmej.
5. Ma tiakaj kema moilnamiki Cristo imikilis
Tlaj tijneki tijmatis tlake kichijki Jesús ipan nopa youali kema tlakuajki ininuaya itokilijkauaj, xijpouakaj Lucas 22:14, 19, 20. Teipa xijnankilikaj ni tlajtlanili:
-
¿Tlake panok ipan nopa youali?
-
¿Tlake kiixnextia nopa pantsi uan nopa vino? (Xikitakaj versículos 19 uan 20).
Jesús kinekiyaya itokilijkauaj ma kiilnamikikaj sejse xiuitl nopa tonali kema mijki. Yeka, Jehová itlajtoltemakauaj timosentiliaj sejse xiuitl uan kiampa tikilnamikij Cristo imikilis, uan tijchiuaj kej Jesús tlanauatik. Tlaj tijneki tijmatis kenijkatsa mochiua, xikitakaj nopa VIDEO. Teipa xijnankilikaj ni tlajtlanili:
-
¿Tlake mochiua kema moilnamiki Cristo imikilis?
Pantsi uan vino san kiixnextia se tlamantli. Nopa pantsi kiixnextia Jesús itlakayo tlen amo tlajtlakole tlen temaktilik uan nopa vino kiixnextia ieso.
TLEN SEKINOK KIIJTOUAJ: “Tlaj tijneki timomanauis san moneki titlaneltokas ipan Jesús”.
-
¿Kenijkatsa tijtekiuiskia Juan 3:16 uan Santiago 2:17 uan kiampa tijnextilis nopa maseuali moneki tijchiuasej sekinok tlamantli?
TLEN TIMOMACHTIJKEJ
Tijnextiaj tijtlaskamatij tlen Jesús kichijki kema titlaneltokaj ipan ya uan kema timosentiliaj kema moilnamiki imikilis.
¿Tlake tijyekok?
-
¿Kenijkatsa uelis tijnextis nelnelia titlaneltoka ipan Jesús?
-
¿Tijneki Jehová uan Jesús ma kiitakaj tikintlaskamatilia tlen kichijkej? ¿Ika tlake tlamantli tijnekiskia tijnextis tikintlaskamatilia?
-
¿Kenke tlauel moneki tias kema moilnamiki Cristo imikilis?
NOJKIA XIKITA NI
Xikita tlake techyololinia ma tijchiuakaj pampa Jesús temaktilik inemilis.
Xikita sekinok tlamantli tlen kiijtosneki titlaneltokas uan kenijkatsa uelis tijnextis.
“Xijnexti titlaneltoka ipan tlen Jehová techtenkauilijtok” (Tlen Tematiltia, octubre 2016)
Se siuatl kipatlak inemilis kema kikuamachilik Jesús imikilis tlauel techpaleuia. Xikita tlake kipanok kampa kiijtoua “Nama kuali nijyolmati uan niyolpaki”.
“Biblia kinpaleuik kuali ma monejnemiltikaj” (Tlen Tematiltia, agosto 1, 2011)
Xikita kenke kema moilnamiki Cristo imikilis amo nochi kikuaj nopa pantsi uan kiijij nopa vino.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
