Ña̱ káʼa̱n Biblia xa̱ʼa̱ ña̱yóʼo

 Ta̱ Caín xi̱kuu se̱ʼe nu̱ú ta̱ Adán xíʼin ñá Eva, ti̱ndaʼa̱ra xíʼin ku̱ʼvara á sana xíʼin iin ñá táʼanra. Ña̱ va̱ʼa kunda̱a̱ka-iniyó xa̱ʼa̱ ta̱yóʼo, Biblia káʼa̱nña xa̱ʼa̱ra xíʼin xa̱ʼa̱ na̱ veʼera.

Ña̱ kúnda̱a̱-iniyó xa̱ʼa̱ ta̱ Caín xíʼin xa̱ʼa̱ na̱ veʼera

•   Ndiʼi miíyó na̱ yiví va̱xiyó ti̱xin na̱ veʼe ta̱ Adán xíʼin ñá Eva. Ndióxi̱ “iin ta̱a kuití kúú ta̱ i̱xava̱ʼara [ta̱ Adán], ta ti̱xin ta̱yóʼo kúú ña̱ ki̱xi ndiʼi na̱ ñuu ña̱ va̱ʼa sandákutúna iníí nu̱ú ñuʼú” (Hechos 17:26). Nda̱a̱ táki̱ʼva káʼa̱n Génesis 3:20, ñá Eva ñá xi̱kuu ñá síʼi ta̱ Adán “xa̱a̱ñá kooñá siʼí ndiʼi na̱ yiví”. Ña̱kán ta̱ Caín ti̱ndaʼa̱ra xíʼin iin ñá ki̱xi ti̱xin na̱ veʼe yivára.

•   Ta̱ Adán xíʼin ñá Eva ni̱xi̱yo ku̱a̱ʼá se̱ʼena. Ta̱ Caín xíʼin ta̱ Abel xi̱kuu se̱ʼena na̱ nu̱ú (Génesis 4:1, 2). Tá ta̱xína ta̱ Caín xa̱ʼa̱ ña̱ xa̱ʼníra ñanira ni̱ka̱ʼa̱nra ña̱yóʼo: “Nda̱a̱ ndáakana ná ndani̱ʼí yi̱ʼi̱, kaʼnívana yi̱ʼi̱” (Génesis 4:14). ¿Ndáana xi̱yiʼví ta̱ Caín nu̱ú? Biblia káʼa̱nña ña̱yóʼo xa̱ʼa̱ ta̱ Adán “ni̱xi̱yo se̱ʼeta̱ara xíʼin se̱ʼe-síʼira” (Génesis 5:4). Ta sana na̱yóʼo xi̱kuni̱na kaʼnína ta̱ Caín.

•   Tá sa̱kán ki̱xáʼa na̱ yiví íyona nu̱ú ñuʼú yóʼo, xi̱tindaʼa̱na xíʼin na̱ táʼanna. Ta̱ Abrahán, iin ta̱a ta̱ nda̱kú ni̱xi̱yo ini xíʼin Ndióxi̱, ti̱ndaʼa̱ra xíʼin ku̱ʼva ndáʼvira (Génesis 20:12). Tiempo saá, tá xi̱kaku se̱ʼe na̱yóʼo va̱ása níxi̱kaku chíʼña na̱ va̱lí kán xa̱ʼa̱ ña̱ xi̱tindaʼa̱ na̱ yivána xíʼin na̱ táʼanna. Tá ni̱ya̱ʼa tiempo ña̱ ni̱xi̱ʼi̱ ta̱ Caín, saá ta̱xi Ndióxi̱ ley ndaʼa̱ ta̱ Moisés ña̱ kǒo xíniñúʼu tindaʼa̱na xíʼin na̱ táʼanna (Levítico 18:9, 12, 13).

•   Biblia káʼa̱nña ña̱ ndixa ni̱xi̱yo na̱ veʼe ta̱ Adán xíʼin ñá Eva. Libro ña̱ Génesis ña̱ ka̱ʼyi ta̱ Moisés, ta saátu ña̱ nátúʼun ta̱ Esdras xíʼin ta̱ Lucas káʼa̱nña xa̱ʼa̱ na̱ veʼe ta̱ Adán (Génesis 5:3-5; 1 Crónicas 1:1-4; Lucas 3:38). Ta saátu inka na̱ ka̱ʼyi Biblia káʼa̱nna ña̱ ndixa ni̱xi̱yo ta̱ Caín (Hebreos 11:4; 1 Juan 3:12; Judas 11).