Il-​Qarrejja Tagħna Jistaqsu

Ix-​Xhieda taʼ Ġeħova Għala Ma Jużawx is-​Salib fil-​Qima?

Ix-​Xhieda taʼ Ġeħova jemmnu b’mod sod li l-​mewt taʼ Ġesù Kristu pprovdiet fidwa li tiftaħ triq għall-​ħajja taʼ dejjem għal dawk li jeżerċitaw fidi fih. (Mattew 20:28; Ġwanni 3:16) Madankollu, huma ma jemmnux li Ġesù miet fuq salib, bħalma hu muri fuq tpinġijiet tradizzjonali. Huma jemmnu li Ġesù miet fuq zokk wieqaf mingħajr travu orizzontali fuqu.

L-użu tas-​salib imur lura għall-​Mesopotamja, madwar elfejn sena qabel Kristu. Is-​slaleb saħansitra kienu jintużaw biex iżejnu t-​tinqix fuq il-​ġebel taʼ l-​Iskandinavi matul Żmien il-​Bronż, sekli qabel twieled Ġesù. Fil-​ktieb tiegħu Symbols Around Us, Sven Tito Achen, storjografu Daniż u espert tas-​simboli, kiteb li wħud bħal dawn li ma kinux Kristjani użaw is-​salib bħala simbolu tal-​maġija biex jagħti protezzjoni u jġib il-​fortuna. Mhux taʼ b’xejn li n-​New Catholic Encyclopedia tammetti li s-​salib jinsab f’kulturi li kienu jeżistu qabel il-​Kristjanità u f’kulturi li m’humiex Kristjani, fejn b’mod ġenerali jissimbolizza l-​univers. Mela, ħafna knejjes għala għażlu s-​salib bħala l-​iktar simbolu sagru tagħhom?

W. E. Vine, studjuż Britanniku rispettat, jippreżenta dawn il-​fatti konkreti: “Sa nofs it-​tielet seklu W.K. . . . il-​pagani kienu milqugħin fil-​knejjes . . . u ġeneralment kienu jitħallew iżommu s-​sinjali u s-​simboli pagani tagħhom. Għaldaqstant ġie adottat it-​Taw jew it-​T, . . . bil-​parti mimduda mniżżla.”—Vine’s Expository Dictionary of Old and New Testament Words.

Vine ikompli jgħid li kemm in-​nom salib u kemm il-​verb sallab jirreferu għal “zokk jew arblu . . . li huma differenti mill-​forma ekkleżjastika taʼ salib b’żewġ travi.” Fi qbil maʼ dan, il-​Companion Bible taʼ l-​Università taʼ Oxford tgħid li l-​evidenza turi li l-​Mulej ngħata l-​mewt fuq zokk wieqaf, u mhux fuq żewġ biċċiet injam imsallbin f’xi angolu fuq xulxin. Jidher ċar li l-​knejjes adottaw tradizzjoni li m’hijiex Biblika.

L-istorjografu Achen, li kkwotajna qabel, osserva li fiż-​żewġ sekli taʼ wara l-​mewt taʼ Ġesù ma jidhirx li l-​Kristjani qatt użaw is-​simbolu tas-​salib. Hu jżid li għall-​Kristjani tal-​bidu s-​salib wisq probabbli kien jissinifika b’mod speċjali l-​mewt u l-​ħażen l-​istess bħalma kienu jfissru l-​giljottina jew is-​siġġu taʼ l-​elettriku għall-​ġenerazzjonijiet taʼ wara.

Iktar importanti minn hekk, kien x’kien l-​istrument li ntuża għat-​tortura u l-​esekuzzjoni taʼ Ġesù, l-​ebda xbieha jew simbolu tiegħu m’għandu jsir oġġett taʼ devozzjoni jew qima għall-​Kristjani. Il-​Bibbja tikkmanda: “Aħarbu mill-​idolatrija.” (1 Korintin 10:14) Ġesù nnifsu ta l-​marka vera li kellha tidentifika lis-​segwaċi veri tiegħu. Hu qal: “B’dan ikun jaf kulħadd li intom dixxipli tiegħi, jekk ikollkom l-​imħabba bejnietkom.”—Ġwanni 13:35.

F’kull aspett tal-​qima, ix-​Xhieda taʼ Ġeħova, bħall-​Kristjani taʼ l-​ewwel seklu, jistinkaw biex isegwu l-​Bibbja minflok it-​tradizzjoni. (Rumani 3:4; Kolossin 2:8) Minħabba f’hekk, huma ma jużawx is-​salib fil-​qima.

[Stampa f’paġna 27]

Riljev li juri sultan Assirjan pagan liebes salib, ċirka 800 Q.E.K.

[Sors]

Photograph taken by courtesy of the British Museum