Imma xi koppji jużaw it-​teknoloġija ħażin. Dawn jistaʼ jkollhom problemi bħal . . .

• jużaw il-​ħin li jistaʼ jkollhom flimkien fuq it-​teknoloġija.

• jaħdmu meta ma jkollhomx bżonn.

• jaħbu affarijiet minn xulxin, jew anke jaqilbuha lil xulxin.

META TKUNU FLIMKIEN

Raġel jismu Michael jgħid: “Xi kultant jien u l-​mara nkunu fl-​istess kamra imma ma tagħtix kasi. Tkun qiegħda fuq il-​mowbajl u tgħid: ‘Għax ma kellix ċans niċċekkjah.’” Meta jiġri hekk, raġel jismu Jonathan jgħid: “Mara u raġel jistgħu jkunu fl-​istess kamra, imma fl-​istess ħin qishom qegħdin f’kamra differenti.”

AĦSEB DWAR DAN: Kemm-​il darba nkellem jew nibgħat messaġġ lil xi ħadd waqt li suppost inkun qed inkellem lir-​raġel jew il-​mara tiegħi?—EFESIN 5:33.

XOGĦOL

Xi nies ikollhom iwieġbu l-​mowbajl jew emails il-​ħin kollu minħabba x-​xogħol tagħhom. Imma anke nies li m’għandhomx għalfejn jagħmlu dan, jispiċċaw jaħdmu meta jkunu d-​dar. Raġel jismu Lee jammetti: “Meta niddeċiedi li nqattaʼ ħin mal-​mara, insibha diffiċli biex ma niċċekkjax il-​mowbajl minħabba x-​xogħol.” Mara jisimha Joy tgħid: “Jien naħdem mid-​dar, allura nsibha diffiċli biex nieqaf naħdem. Irrid nagħmel sforz kbir biex insib il-​bilanċ.”

AĦSEB DWAR DAN: Nagħti kas x’qed jgħid ir-​raġel jew il-​mara tiegħi meta tkellimni?—LUQA 8:18.

PERIKLI GĦAŻ-​ŻWIEĠ

Ħafna nies jgħidu li minħabba s-​social media jispiċċaw jargumentaw ħafna għax jaħsbu ħażin f’xulxin. Xi nies ammettew ukoll li bil-​moħbi jitfgħu affarijiet online li ma jridux lill-​mara jew lir-​raġel tagħhom ikunu jafu bihom.

Ħafna nies jgħidu li s-​social media fih ħafna perikli għan-​nies miżżewġin u anke jagħmilha faċli biex jaqilbuha lil xulxin. Ma niħduhiex bi kbira li l-​avukati jgħidu li ħafna jiddivorzjaw minħabba s-​social media.

AĦSEB DWAR DAN: Nipprova naħbi mir-​raġel jew il-​mara tiegħi meta nkellem lil xi ħadd tas-​sess oppost? —PROVERBJI 4:23.

ARA X’INHU L-​IŻJED IMPORTANTI

Persuna li ma tikolx ma tkunx b’saħħitha. Bl-​istess mod, persuna li ma tqattax ħin mar-​raġel jew il-​mara tagħha se jkollha problemi fiż-​żwieġ tagħha.—Efesin 5:28, 29.

Iddiskuti liema minn dawn tixtieq tagħmel, jew ikteb ideat oħra, biex it-​teknoloġija ma tkunx problema fiż-​żwieġ tiegħek.

• Minn tal-​inqas darba kuljum, kulu ikla flimkien

• Agħmlu ħin biex tkunu flimkien mingħajr mowbajls jew tablets

• Ippjanaw biex tagħmlu xi ħaġa speċjali flimkien

• Itfu l-​mowbajls jew it-​tablets billejl u żżommuhomx fejn torqdu

• Agħmlu kwarta kuljum biex tkellmu lil xulxin mingħajr mowbajls jew tablets

• Ieqfu użaw l-​internet f’ċertu ħin kuljum