In nok tilil kyuʼn testigo de Jehová tuʼn tkubʼ kyyekʼin tbʼanel kymod ex kykʼujlabʼil kyiʼj kykyaqil xjal. Pero qa at jun qermane ya mintiʼ in nok tchmon tibʼ qukʼile ex ya mintiʼ in nex pakbʼal, in nok tilil quʼne tuʼn qjyoʼne tumel tzeʼn tuʼn qyoline tukʼil tuʼntzun qonine tiʼj tuʼn kukx tajbʼen te Dios. Ax ikx, in xi qqʼamaʼne te qa kʼujlaʼnxix quʼne (Lucas 15:4-7).

 At maj, jaku tzʼex qʼiʼn jun erman toj congregación kyuʼn nya bʼaʼn tbʼinchbʼen (1 Corintios 5:13). Tuʼnju kʼujlaʼnxix qe erman quʼne, in nok tilil quʼne tuʼn qonine tiʼj naʼmxtoq tbʼaj jlu tiʼj. Ax ikx, kukx in kubʼ qyekʼine qkʼujlabʼile tiʼj ex in qo respetarine te ik tzeʼn in tzaj tqʼamaʼn Biblia maske otoq tzʼex qʼiʼn toj congregación (Marcos 12:31; 1 Pedro 2:17).

¿Tiquʼn jaku tzʼex qʼiʼn jun xjal toj congregación?

 In tzaj tqʼamaʼn Biblia qa jaku tzʼex qʼiʼn jun okslal toj congregación qa ma kubʼ tbʼinchaʼn jun matij il ex nya taj tuʼn tchʼexpaj a (1 Corintios 5:11-13). Pero ¿alkye junjun matij il jaku bʼant tuʼn jun xjal tuʼntzun tex qʼiʼn toj congregación? In tzaj tqʼamaʼn Biblia alkyeqe, ik tzeʼn qe aj pajil, qeju in che kʼaʼn nim qʼeʼn, qe bʼyol xjal, qeju in nok kybʼinchaʼn nya bʼaʼn kyiʼj kyfamilia ex qeju in che elqʼan (1 Corintios 6:9, 10; Gálatas 5:19-21; 1 Timoteo 1:9, 10).

 Noqtzun tuʼn, nya jun rat in nex qʼiʼn jun xjal toj congregación, aju otoq kubʼ tbʼinchaʼn jun matij il. ¿Tiquʼn? Tuʼnju tnejel in che onin ansyan b tiʼj tuʼntzun tchʼexpaj tmod (Romanos 2:4). In nok tilil kyuʼn tuʼn kyyolin tukʼil kʼujlabʼil, qʼaqʼbʼil kykʼuʼj ex tbʼanel kymod (Gálatas 6:1). Jaku tzʼonin jlu tiʼj xjal otoq bʼinchaʼn il, tuʼntzun tel tnikʼ tiʼj nya bʼaʼn otoq bʼant tuʼn ex tuʼn tanjtz tiʼj tanmi (2 Timoteo 2:24-26). Pero qa nya taj tuʼn t-xi tbʼiʼn qe consej tkuʼx toj Biblia ex mintiʼ in najtz tiʼj tanmi, maske in xi qʼoʼn onbʼil lu, in nex qʼiʼn toj congregación. Kʼelex kyqʼamaʼn ansyan kye erman toj congregación qa aju xjal, ya nyatl testigo te Jehová.

 ¿Tiʼ tbʼanel in tzaj toj congregación aj tex qʼiʼn jun xjal kukx in bʼinchaʼn jun matij il? Tnejel, in nok qʼet kyoklen tkawbʼil Jehová ex tkabʼin, mlay che el txalpaj txqantl tuʼn nya bʼaʼn tmod xjal lu (1 Corintios 5:6; 15:33; 1 Pedro 1:16). Jakulo tzʼonin jlu tiʼj xjal, tuʼn tkyaj ttzaqpiʼn qe nya bʼaʼn tbʼinchbʼen ex tuʼn tbʼant junjun chʼixpubʼil tuʼn (Hebreos 12:11).

¿Alkye kymod testigo de Jehová in kubʼ kyyekʼin kyukʼil qeju o che ex qʼiʼn toj congregación?

 In tzaj tqʼamaʼn Biblia tuʼn miʼn tok qamiwin qibʼ tukʼil jun xjal o tzʼex qʼiʼn toj congregación nix tuʼn qwaʼn «junx tukʼil» (1 Corintios 5:11). Tuʼntzunju, mintiʼ in qo jyon tumel tuʼn qten junx tukʼil xjal lu. Pero nya a t-xilen jlu qa mintiʼ in nok qqʼoʼne toklen sino in qo respetarine tiʼj. Kukx jaku pon xjal kyoj qchmabʼile ex qa kyaj erman jaku che qʼolbʼen te. c Ax ikx, jaku txi tqanin onbʼil kye ansyan.

 ¿Tiʼ jaku bʼaj qa ma tzʼex qʼiʼn jun xjal toj congregación, atzun te t-xuʼjil ex qe tkʼwal kukx in che ajbʼen te Jehová? Maske ya mintiʼ in che ajbʼen te Jehová junx, mintiʼ in chʼexpaj jun tiʼ kyxol. Tuʼnju in che anqʼin toj ax ja, mintiʼ tuʼn tchʼexpaj tmod chmilbʼaj tukʼil t-xuʼjil ex kyukʼil qe tkʼwal.

 Jaku txi tqanin xjal o tzʼex qʼiʼn toj congregación kye ansyan tuʼn kypon visitaril te. Tukʼil nim kʼujlabʼil jaku che onin ansyan tiʼj tukʼil Tyol Dios tuʼn tanjtz tiʼj tanmi ex tuʼn tmeltzʼaj juntl maj toj congregación (Zacarías 1:3). Qa ma kubʼ t-ximen tuʼn tkyaj tkolin nya bʼaʼn tbʼinchbʼen ex qa in kubʼ tyekʼin qa taj tuʼn t-xi tnimen qe tkawbʼil Dios, jaku meltzʼaj juntl maj toj congregación. Ok kbʼel kynajsaʼn erman til ex kxel kyqʼuqbʼaʼn tkʼuʼj, ik tzeʼn bʼant kyuʼn tnejel okslal te Corinto tej tmeltzʼaj jun xjal otoq bʼinchaʼn il (2 Corintios 2:6-8).

¿Tiʼ in kubʼ kynaʼn qeju i ex qʼiʼn toj ttnam Jehová pero ya o che meltzʼaj jaʼlo?

 Qbʼinx aju in kyqʼamaʼn junjun erman i ex qʼiʼn toj congregación ex ya o che meltzʼaj.

 «Tej nmeltzʼaje, kubʼ nximane qa tzul kyqanin ansyan tkyaqilju otoq bʼant wuʼne kyoj abʼqʼi mintiʼ in tene toj congregación. Pero mintiʼ bʼaj ikju, oʼkx tzaj kyqʼamaʼn: ‹Kukx tzʼok tilil tuʼna›. Tej tok nbʼiʼne jlu kubʼ nnaʼne bʼaʼn» (chi María te tnam Estados Unidos).

 «Kyajtoq erman tuʼn nmeltzʼaje juntl maj, kubʼ kyyekʼin qa kʼujlan qine kyuʼn. E onin wiʼje tuʼn kukx tok tilil wuʼne ex tuʼn tel nnikʼe tiʼj qa otoq kubʼ tnajsaʼn Jehová ex qe erman wile. Kukx tzaj kyqʼuqbʼaʼn ansyan nkʼuʼje ex e onin wiʼje tuʼn tten juntl maj wamiwbʼile tukʼil Jehová ex tuʼn tkyaj toj nwiʼye qa kʼujlan qine tuʼn» (chi Malcom te tnam Sierra Leona).

 «In chin tzalaje tuʼnju taj Jehová tuʼn tten congregación saq tuʼnju kʼujlaʼn tuʼn. Maske kwest ela weye tej wex qʼiʼne toj ttnam Jehová, ok te jun yekʼbʼil tiʼj tkʼujlabʼil. ¡In xi nqʼoʼne chjonte te Jehová tuʼn qʼaqʼbʼil tkʼuʼj ex tuʼnju o kubʼ tnajsaʼn wile!» (chi Sandi te tnam Estados Unidos).