Lucas 15:1-32
15 Ax ikx, kukx e pon kykyaqil qeju in che cobrarin impuesto tukʼil Jesús ex qeju aj il tuʼn tok kybʼiʼn tyol.
2 Atzun kye fariseo ex qe escriba e ok ten yolil nya bʼaʼn tiʼj Jesús ex kyqʼama: «In xi tqʼoʼn xinaq* lu ambʼil kye aj il tuʼn kyten tukʼil ex in waʼn junx kyukʼil».
3 Entonces kubʼ tqʼoʼn Jesús ejemplo lu kywitz:
4 «Qo ximen tiʼj qa jun kyxole at 100 trit.* Qa ma txi tzʼaq jun kyxol, ¿mlaypetzulo che kyaj tqʼoʼn qeju 99 toj campo ex kxeʼl jyolte rit ma txi tzʼaq tzmaxi aj tkanet tuʼn?
5 Aj tkanet tuʼn, in tzaj tiʼn tibʼaj tqul ex in tzalaj.
6 Ex aj tpon tja, in che tzaj txkoʼn tamiw ex qe tvesin ex in xi tqʼamaʼn kye: ‹¡Che tzalaje junx wukʼile, porke ma kanet nrite otoq txi tzʼaq!›.
7 Axtzun jlu kxel nqʼamaʼne kyeye, mas nim tzalajbʼil ktel toj kyaʼj aj tajtz tiʼj tanmi jun xjal aj il kywitz 99 xjal tzʼaqli nya il tiʼj tuʼn tajtz tiʼj kyanmi.
8 Jaʼlo, qo ximen tiʼj qa kʼuʼn 10 moneda de plata* tuʼn jun xuʼj.* Qa ma txi tzʼaq jun tuʼn, ¿mlaypetzulo tzʼok ttxqoʼn jun kandil tuʼn t-xi tjyoʼn ex chebʼe kbʼajel tmasoʼn toj tja tzmaxi aj tkanet tuʼn?
9 Ex aj tkanet tuʼn, in che tzaj txkoʼn tamiw, qe tvesin ex in xi tqʼamaʼn kye: ‹¡Che tzalaje junx wukʼile, porke ma kanet moneda de plata xi tzʼaq wuʼne!›.
10 Axtzun jlu kxel nqʼamaʼne kyeye, in che tzalaj t-anjel Dios aj tajtz tiʼj tanmi jun xjal aj il».
11 Ex tqʼamatl jlu: «Jun maj, attoq kabʼe tkʼwal jun xinaq.
12 Ex xi tqanin mas kʼwalx te tman: ‹Papá, qʼontza nparte tiʼj herencia kjel tqʼoʼna qeye›. Ex xi tqʼoʼn mambʼaj tpart teyele junjun kye tiʼj herencia.
13 Tej tikʼ junjun qʼij, ok tchmoʼn kʼwal tkyaqilju at te ex xiʼ toj juntl tnam najchaq. Ex bʼaj tmalgastarin aju xi qʼoʼn te tuʼn tman tuʼn tbʼinchan il.
14 Tej tbʼaj tgastarin tkyaqilju at te, tzaj weʼyaj toj tnam ex ikʼx weʼyaj tuʼn.
15 Hasta xiʼ jyol taqʼun tukʼil jun xjal toj tnam aju, ex xi tqʼamaʼn te tuʼn t-xiʼ xqʼuqil kye bʼoch toj campo.
16 Ex pon tkʼuʼj tiʼj kywa bʼoch tuʼn tel weʼyaj tiʼj, pero mintiʼ jun xjal xi qʼonte te.
17 Tej tkubʼ ten ximel tiʼjju bʼant tuʼn, tqʼama: ‹¡Nim qe tmajen nmane in che aqʼunan tukʼil ex at nim kywa, atzun weye chʼix nkyime tuʼn weʼyaj tzalu!
18 Mas bʼaʼn chin meltzʼajele tja nmane ex kxel nqʼamaʼne te: «Papá, ma chin bʼinchane il twitz Dios* ex twitza.
19 Ya mintiʼ woklene tuʼn woke te tkʼwala, chin tqʼoʼnka ik tzeʼn jun tmajena»›.
20 Entonces kubʼ bʼe tuʼn ex meltzʼaj tja tman. Tej naʼmxtoq tpon, el tnikʼ tman tiʼj ex tzaj qʼaqʼan tkʼuʼj tiʼj. Etz kanolte, tzaj tchleʼn tukʼil kʼujlabʼil ex el ttzʼubʼan twitz.
21 Entonces xi tqʼamaʼn kʼwalbʼaj te tman: ‹Papá, ma chin bʼinchane il twitz Dios ex twitza. Ya mintiʼ woklene tuʼn woke te tkʼwala›.
22 Pero xi tqʼamaʼn mambʼaj kye tmajen: ‹Kyiʼntze xbʼalun mas tbʼanel aju in kuʼpun t-xeʼ qqan ex kyqʼonke tiʼj, pero juratx qeye. Ax ikx kyqʼonke jun anillo tiʼj tqʼabʼ ex kyqʼonke t-xjabʼ.
23 Ex kyiʼntze tman wakx mas tbʼanel ex kybʼyonkuye tuʼn qwaʼn ex tuʼn qtzalaj tiʼj nkʼwale ma meltzʼaj.
24 Porke aju nkʼwale lu otoq kyim, ex ma jaw anqʼin, otoq tzʼel tzpet ex ma kanet›. Ex xi tzyet tuʼn kytzalaj.
25 Atzunte tzikbʼaj atztoq taʼ toj campo. Tej tmeltzʼaj ex chʼixtoq tpon tja, ok tbʼiʼn música in qʼajt ex qe xjal in che bʼixin.
26 Tuʼntzunju tzaj ttxkoʼn jun kyxol majen ex xi tqanin te tiʼ in bʼaj.
27 Xi ttzaqʼweʼn majen te: ‹Ma tzul juntl maj titzʼina ex ma kubʼ tbʼyoʼn tmana jun tbʼanel tman wakx porke bʼaʼn ma tzul›.
28 Pero tzaj tqʼoj tzikbʼaj ex nyatoq taj tuʼn tokx toj ja. Tuʼntzunju etz mambʼaj yolil tukʼil ex kubʼsan twitz tuʼn tokx.
29 Pero xi ttzaqʼweʼn te tman: ‹Nimku abʼqʼi o chin aqʼunane tukʼila ik tzeʼn jun tmajena ex kukx in chin bʼine teya. Pero ni jun maj o tzaj tqʼoʼna jun tal chiv weye tuʼn nwaʼne kyukʼil wamiwe.
30 Pero tej sul tkʼwala lu, ma kubʼ tbʼyoʼna jun tbʼanel tman wakx maske ma bʼaj tmalgastarin tkyaqilju at teya kyukʼil prostituta›.
31 Entonces xi ttzaqʼweʼn mambʼaj te: ‹Nkʼwal, kukx o tena wukʼile ex teya tkyaqilju at weye.
32 Pero iltoq tiʼj tuʼn qtzalaj tuʼnju ma meltzʼaj titzʼina, porke otoq kyim ex ma jaw anqʼin. Otoq tzʼel tzpet ex ma kanet›».
