Lucas 20:1-47
-
Xi kyqanin te Jesús alkye tzaj qʼonte toklen (1-8)
-
Ejemplo kyiʼj xjal xi qʼoʼn tqan uva majen kye ex e bʼiyen (9-19)
-
Dios ex César (20-26)
-
Xi kyqanin jun xjel te tiʼj ambʼil aj kyjaw anqʼin kyimni (27-40)
-
¿In nokpe Cristo te tkʼwal David? (41-44)
-
Xi tqʼamaʼn kye tdiscípulo tuʼn tok kyxqʼuqin kyibʼ kyiʼj escriba (45-47)
20 Jun kyxol qʼij aju, xi tqʼoʼn Jesús xnaqʼtzbʼil kye xjal toj templo ex yolin kyukʼil tiʼj tbʼanel noticia. Pero e pon pal nim kyoklen tukʼil junx kyukʼil escriba ex qe ansyan,
2 ex xi kyqanin te: «Qʼamantza qeye, ¿tiʼ toklena at tuʼn tbʼant tkyaqil jlu tuʼna? ¿Ex alkye ma tzaj qʼonte toklena?».
3 Xi ttzaqʼweʼn Jesús kye: «Ax ikx weye kxel nqanine jun xjel kyeye ex waje tuʼn ttzaj kytzaqʼweʼne.
4 ¿Alkye xi qʼonte toklen Juan tuʼn tbautisarin? ¿A Dios at toj kyaʼj moqa aʼye xjal?».
5 E oktzun ten yolil kyxolx ex kyqʼama: «Qa ma txi qqʼamaʼn te qa a Dios tzaj qʼonte toklen Juan, ktzajel tqanin qe: ‹¿Tiquʼn mintiʼ ma txi kyokslaʼne?›.
6 Pero qa ma txi qqʼamaʼn qa kyuʼn xjal, kʼokel xoʼn abʼj qiʼj kyuʼn xjal porke qʼuqli kykʼuʼj tiʼj qa jun profeta te Juan».
7 Tuʼntzunju xi kytzaqʼweʼn te Jesús qa mintiʼtoq ojtzqiʼn kyuʼn.
8 Atzunte Jesús xi tqʼamaʼn kye: «Ax ikx weye mlay txi nqʼamaʼne kyeye alkye ma tzaj qʼonte woklene tuʼn tbʼant tkyaqil jlu wuʼne».
9 Entonces kubʼ tqʼoʼn Jesús ejemplo lu kywitz xjal: «Jun maj, ok tawaʼn jun xinaq* uva toj ttxʼotxʼ ex xi tqʼoʼn te majen kye junjun xjal. Yajxitl ex bʼet nim ambʼil ex viajarin toj juntl tnam.
10 Tej tpon ambʼil tuʼn tjaw chmet twitz awal, xi tqʼamaʼn xinaq te jun tmajen tuʼn t-xiʼ kyukʼil xjal tuʼn ttzaj kyqʼoʼn tpart. Pero bʼaj golpearin kyuʼn xjal ex mintiʼ jun tiʼ xi kyqʼoʼn te tej tmeltzʼaj.
11 Xi tqʼamaʼn xinaq te juntl tmajen tuʼn t-xiʼ. Pero ax ikx bʼaj golpearin, kubʼ qʼoʼn tchʼixwi ex mintiʼ jun tiʼ xi qʼoʼn te tej tmeltzʼaj.
12 Ex xi tqʼamaʼn xinaq te juntl toxin tmajen tuʼn t-xiʼ. Pero ax ikx bʼaj golpearin ex xi qʼiʼn kyuʼn xjal tiʼjxi.
13 Yajxitl kubʼ t-ximen xinaq tajaw awal ex tqʼama: ‹¿Tiʼ kbʼantel wuʼne? Kxel nqʼamaʼne te nkʼwale tuʼn t-xiʼ. Qape jaku che respetarin te›.
14 Tej tok kyqʼoʼn xjal kywitz tiʼj tkʼwal, e ok ten yolil kyxolx ex kyqʼama: ‹A kʼwal lu kjel tajaw txʼotxʼ. Qoʼqe ex qbʼiyonku tuʼntzun tkyaj ttxʼotxʼ te qe›.
15 Tuʼntzunju ex kyiʼn tiʼjxi txʼotxʼ ex kubʼ kybʼyoʼn. ¿Tiʼ kxel tbʼinchaʼn xinaq tajaw tqan uva kyukʼil xjal lu?
16 Tzul ex che kbʼel tbʼyoʼn xjal lu ex kxel tqʼoʼn tqan uva te majen kye junjuntl xjal».
Tej tok kybʼiʼn xjal lu, kyqʼama: «¡Noqwit miʼn bʼaj jlu!».
17 Pero xi tkeʼyin Jesús toj kywitz ex tqʼama: «Qa ikju, ¿tiʼ tzʼelpun yol lu tzʼibʼin toj tyol Dios? ‹Aju abʼj nyatoq kyajbʼil xjal tuʼn tajbʼen kyuʼn tuʼn tjaw kybʼinchaʼn ja, atzun abʼj mas nim toklen›.*
18 Alkye ma jaw tzʼaq tiʼj abʼj lu, kbʼajel kʼixbʼi ex grave kjel. Ex qa ma kubʼ tzʼaq abʼj lu tibʼaj jun xjal, kbʼel petzʼj tuʼn».
19 Tej tel kynikʼ escriba ex qe pal nim kyoklen qa kubʼ tqʼoʼn Jesús ejemplo lu tuʼn tyolin kyiʼj, kyajbʼiltoq tuʼn ttzaj kytzyuʼn toj rat aju. Pero e tzaj xobʼ kywitz xjal.
20 Tuʼntzunju ok kykeʼyin tnejel tiʼ bʼant tuʼn Jesús. Ex yajxitl xi kychjoʼn kye junjun xjal toj ewaj tuʼn tok kyqʼon kyibʼ te bʼaʼn xjal ex tuʼn tkubʼ tzʼaq Jesús kyuʼn tojx tyol. Kubʼ kyximen tuʼn t-xi kyqʼoʼn toj tkwent gobierno ex toj tqʼabʼ gobernador.
21 Xi kyqanin xjal lu te: «Xnaqʼtzal, ojtzqiʼn quʼne qa in yolina toj tumel ex qa toj tumel xnaqʼtzbʼil in tqʼoʼna. Junx kyoklen xjal toj twitza ex in xi tyekʼina axix tok tiʼj Dios kye.
22 ¿Bʼaʼnpe tuʼn t-xi qchjoʼne impuesto te César moqa nya?».
23 Pero el tnikʼ Jesús tiʼj kyximbʼetz nya bʼaʼn, tuʼntzunju xi tqʼamaʼn kye:
24 «Kyiʼntze jun denario* tuʼn tok nkeʼyine. ¿Alqetzun tilbʼilal tok tiʼj pwaq lu ex alkye tbʼi tzʼibʼin tiʼj?». Xi kytzaqʼweʼn te: «Te César».
25 Atzunte Jesús xi tqʼamaʼn kye: «Entonces kyqʼonxe te César aju te César, pero kyqʼonxe te Dios aju te Dios».
26 Ex mintiʼ kubʼ tzʼaq Jesús kyuʼn tojx tyol kywitz xjal. Oʼkx e jaw labʼin tiʼj tzaqʼwebʼil xi tqʼoʼn ex ya mintiʼ e yolin.
27 Entonces e pon junjun saduceo tukʼil aqeju in kubʼ kyximen qa mlay che jaw anqʼin kyimni, ex xi kyqanin te:
28 «Xnaqʼtzal, kubʼ ttzʼibʼin Moisés jlu: ‹Qa ma kyim ttzik jun xinaq ex mintiʼ jun tkʼwal ma tzul itzʼj tukʼil t-xuʼjil, il tiʼj tuʼn tkubʼ mojeʼ xinaq tukʼil t-xuʼjil qtzan ttzik tuʼn tkyaj jun t-xel›.
29 Jun maj, e ten siete xjal kyitzʼin kyibʼ qxole. Kubʼ mojeʼ tnejel kʼwalbʼaj ex mintiʼ jun tkʼwal kyaj tej tkyim.
30 Ax ikx kubʼ mojeʼ tkabʼin
31 ex toxin kʼwalbʼaj tukʼil xuʼj.* Ex axju bʼaj kyukʼil qeju siete, e kyim ex mintiʼ jun kykʼwal kyaj.
32 De último, ax ikx kyim xuʼj.
33 Aj kyjaw anqʼin kyimni, ¿alkye kʼokel te tchmil xuʼj? Porke e kubʼ mojeʼ qeju siete tukʼil».
34 Xi ttzaqʼweʼn Jesús kye: «In che kubʼ mojeʼ xinaq ex xuʼj toj ambʼil jaʼlo.*
35 Pero alkye qeju ma txi tqʼoʼn Dios kyoklen tuʼn kyanqʼin toj ambʼil tzul ex tuʼn kyjaw anqʼin kyxol kyimni, mlay che kubʼ mojeʼ ni xinaq ni xuʼj.
36 Ex mlay che kyim juntl maj porke che okel ik tzeʼn qe anjel, ex tkʼwal Dios qe tuʼnju che jawil anqʼin kyxol kyimni.
37 Nya oʼkxju, ax ikx tzaj tyekʼin Moisés qa che jawil anqʼin kyimni toj relato in yolin tiʼj tal tzeʼ in kʼant tuʼn qʼaqʼ. Tzaj tqʼamaʼn qa a Jehová* ‹Tdios Abrahán, Tdios Isaac ex Tdios Jacob›.
38 Nya jun Dios kye kyimni, sino kye qeju itzʼ, porke toj twitz Dios kykyaqil itzʼ qe».
39 Tej tok kybʼiʼn junjun escriba jlu, xi kyqʼamaʼn te: «Xnaqʼtzal, toj tumel aju ma tmaya».
40 Ex ya mintiʼ kynimarin kyibʼ tuʼn t-xi kyqanin juntl xjel te.
41 Entonces xi tqanin Jesús kye: «¿Tiquʼn in kyqʼamaʼn xjal qa in nok Cristo te tkʼwal David?
42 Porke tqʼama David jlu toj uʼj te Salmos: ‹Xi tqʼamaʼn Jehová* te Wajawe: «Qekuya ntxlaje toj lado derecho
43 tzmaxi aj tokx nqʼoʼne tjaqʼ tqana kykyaqil aj qʼoj tiʼja»›.
44 Qa in nok tqʼoʼn David Cristo te Tajaw, ¿entonces tzeʼn jaku tzʼok te tkʼwal?».
45 Tej in che bʼin kykyaqil xjal, xi tqʼamaʼn Jesús kye tdiscípulo:
46 «Kyxqʼuqink kyibʼe kyiʼj escriba, porke kygan tuʼn kybʼet tukʼil kyxbʼalun in kuʼpun t-xe kyqan ex tuʼn kyok qʼolbʼen kyuʼn xjal kyoj plas te merkad. Ax ikx tuʼn kykubʼ qeʼ kyoj tnejel lugar* toj ja te kʼulbʼil* ex qe lugar mas tbʼanel kyoj fiesta.
47 In nel kyelqʼan kyja xuʼj viud ex in che naʼn Dios nim ambʼil tuʼn tok kyqʼoʼn txqantl kywitz kyiʼj. Mas nim kykastiw xjal lu kbʼel qʼoʼn kywitz txqantl».
Tqanil
^ Toj junjuntl lugar «ichan».
^ Jun abʼj kubʼ qʼoʼn toj esquina te kabʼe pared te jun ja tej chʼixtoq tjapun bʼaj tuʼntzun tok te mas kyuw.
^ Jun moneda bʼinchaʼn tuʼn plata ex ajbʼen kyuʼn xjal te Roma. Qʼonka twitza tiʼj xnaqʼtzbʼil B14.
^ Toj junjuntl lugar «qya».
^ Qʼonka twitza tiʼj diccionario.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Moqa «kyoj tbʼanel lugar».
^ Moqa «sinagoga».
