Nuenu bansonga, nenuenze tshinyi matuku atshilualua?

‘Meme ndi ndumbila nunku, tshiyi nsesuka mu njila; ndi nduangana ne mbata tshiyi bu muntu udi widikija.’​—1 KOL. 9:26.

1, 2. Bua kuikala ne nsombelu muimpe mu dikola diebe, udi dijinga ne tshinyi?

WEWE wenza luendu muaba uudi kuyi mumanye bimpe, newikale dijinga ne karte ka ditunga ne kaleji nord. Karte nekakuambuluishe bua kumanya muaba uudi ne kumanya njila wa kulonda. Kaleji nord nekakuambuluishe bua kushala mu njila muimpe. Kadi bintu bibidi ebi kabiakukuambuluisha wewe kuyi mumanye kuudi uya to. Bua kubenga kujimina, udi ne bua kumanya bimpe kuudi uya.

² Udi upeta bualu bua mushindu wa muomumue paudi wenda ukola. Udi ne karte kimpe ne kaleji nord. Bible nkarte kadi mua kukuambuluisha bua kusungula njila wa kulonda. (Nsu. 3:5, 6) Kondo kebe ka muoyo koku kalongesha bimpe kadi mua kukuambuluisha bua kushala mu njila muimpe. (Lomo 2:15) Kadi mua kukuambuluisha anu bu kaleji nord. Kadi bua kuikala ne nsombelu muimpe udi kabidi ne bua kumanya kuudi uya. Udi ne bua kuikala ne bipatshila bisunguluke.

3. Mmalu kayi mimpe adi muntu udi ne bipatshila upeta adi Paulo muakuile mu 1 Kolinto 9:26?

³ Mupostolo Paulo wakaleja mu tshikoso buimpe bua kuikala ne bipatshila ne kuditatshisha bua kubikumbaja pakafundaye ne: ‘Meme ndi ndumbila nunku, tshiyi nsesuka mu njila; ndi nduangana ne mbata tshiyi bu muntu udi widikija.’ (1 Kol. 9:26) Wewe muikale ne bipatshila, newenze malu ne dishindika. Newikale ne bua kuangata mapangadika manene adi atangila malu bu mudi ntendelelu webe, mudimu uudi mua kuenza, dibaka ne dîku diebe. Imue misangu newikale udimona kumpala kua malu a bungi, upanga tshia kuenza. Kadi wewe mulongolole tshiwenza kumpala kua dîba, wangata mapangadika mashindamene pa bulelela ne mikenji idi mu Dîyi dia Nzambi, neushale anu mu njila muimpe.​—2 Tim. 4:4, 5.

4, 5. (a) Ntshinyi tshidi mua kukuenzekela wewe kuyi ne bipatshila? (b) Bua tshinyi udi ne bua kuangata mapangadika adi asankisha Nzambi?

⁴ Wewe kuyi udifundila bipatshila, balunda bebe ne balongeshi bebe badi mua kukuenzeja bua wenze tshidibu bobu bela meji ne: ke tshimpe buebe wewe. Kadi nansha wewe muikale ne bipatshila bisunguluke, manya ne: bantu bakuabu nebakuambile anu tshia kuenza. Paudi ubateleja, diebeja ne: ‘Malu adibu bangambila bua kuenza neangambuluishe bua kuvuluka Mufuki wanyi mu bunsonga buanyi anyi peshi neapangishe?’​—Bala Muambi 12:1.

⁵ Bua tshinyi udi ne bua kuangata mapangadika adi asankisha Nzambi? Bualu Yehowa mmutupeshe bintu bionso bimpe bitudi nabi. (Yak. 1:17) Yonso wa kutudi udi ne bua kuikala ne dianyisha kudi Yehowa. (Buak. 4:11) Mushindu muimpe uudi mua kuleja dianyisha diebe nkuvuluka Yehowa paudi udifundila bipatshila. Tuakule bua bipatshila bimpe biudi mua kudifundila ne tshiudi mua kuenza bua kubikumbaja.

Bipatshila biudi mua kudifundila

6. Ntshipatshila tshinene kayi tshiudi mua kudifundila? Bua tshinyi?

⁶ Anu bu mutuvua bamone mu tshiena-bualu tshishale, tshipatshila tshinene tshiudi  mua kudifundila ntshia kudijadikila ne: malu adi Bible wamba mmalelela. (Lomo 12:2; 2 Kol. 13:5) Balongi benu badi mua kuikala bitaba ne: bintu mbidienzekele anyi bitaba malongesha makuabu a dishima bualu bakuabu mbabambile ne: ke tshidibu ne bua kuitaba. Kadi wewe kuena ne bua kuitaba tshintu anu bualu bakuabu mbasue bua utshitabe to. Vuluka ne: Yehowa mmusue bua umuenzele mudimu ne lungenyi luebe luonso. (Bala Matayo 22:36, 37.) Tatu wetu wa mu diulu mmusue bua ditabuja diebe dikale dishindame pa malu malelela.​—Eb. 11:1.

7, 8. (a) Mbipatshila kayi biudi mua kukumbaja mu matuku makese bidi mua kukolesha ditabuja diebe? (b) Ntshinyi tshiwapeta paudi wenda ukumbaja bipatshila ebi?

⁷ Bua kukolesha ditabuja diebe, udi mua kudifundila bipatshila biudi mua kukumbaja mu matuku makese. Tshilejilu, udi mua kudifundila tshipatshila tshia kusambila dituku dionso. Bua kubenga kuambulula malu amue amue mu masambila ebe ne bua kuikalawu masunguluke, udi mua kuela meji anyi kufunda malu masunguluke a mu dituku audi musue kubueja mu masambila ebe. Kuikadi usambila anu bua ntatu yebe to, kadi ikala usambila kabidi bua malu avua makusankishe. (Filip. 4:6) Tshipatshila tshikuabu ntshia kubala Bible dituku dionso. Udi mumanye ne: wewe ubala mabeji matue ku anayi dituku dionso, udi mua kubala Bible mujima mu tshidimu tshimue anyi? * Musambu wa 1:1, 2 udi wamba ne: ‘Disanka didi kudi muntu udi ne disanka diende mu mikenji ya Yehowa, ne mu mikenji yende mudiye welangana meji munya ne butuku.’

⁸ Tshipatshila tshisatu tshiudi mua kukumbaja mu matuku makese ntshia kulongolola bisangilu ne kuandamunamu. Ku ntuadijilu, udi mua kubala diandamuna anyi kubala mvese. Pashishe, udi mua kudifundila tshipatshila tshia kuandamuna mu ebe mêyi. Umanye ne: dîba dionso diudi wandamuna, udi ufila mulambu kudi Yehowa. (Eb. 13:15) Dîba diudi ukumbaja bimue bia ku bipatshila ebi, dieyemena  diebe nedikole, newanyishe Yehowa bikole ne newikale mukumbane bua kudifundila bipatshila biudi mua kukumbaja mu bule bua matuku.

9. Wewe kuyi muanji kuikala mumanyishi wa lumu luimpe, mbipatshila kayi biudi mua kudifundila bua kukumbaja mu bule bua matuku?

⁹ Mbipatshila kayi biudi mua kudifundila bua kukumbaja mu bule bua matuku? Wewe kuyi muanji kutuadija kuyisha lumu luimpe, udi mua kudifundila tshipatshila tshia kulua mumanyishi wa lumu luimpe lua Bukalenge. Wewe mukumbaje tshipatshila tshilenga etshi, udi ne bua kuikala uyisha bimpe pa tshibidilu, kuyi utumpika ngondo to. Udi kabidi mua kulonga mua kumanya kufila mvese bimpe mu buambi. Wewe wenza nunku, neumone ne: mudimu wa kuyisha newikale ukusankisha. Dîba adi udi mua kuvudija mêba audi uyisha ku nzubu ne ku nzubu anyi kudienzeja bua kupeta dilonga dia Bible nansha dimue. Wewe muikale mumanyishi wa lumu luimpe udi kayi muanji kutambula, udi mua kudifundila tshipatshila tshimpe tshia kutambula ne kulua Ntemu wa Yehowa Nzambi udi mudilambule ne mutambule.

10, 11. Mbipatshila kayi bidi bansonga bakadi batambule mua kudifundila bua kukumbaja mu bule bua matuku?

¹⁰ Wewe mumane kuikala Ntemu wa Yehowa mutambule, tangila bimue bipatshila biudi mua kudifundila. Udi mua kuambuluisha imue misangu bisumbu bua kuyisha mu teritware utubu kabayi batamba kuyisha. Udi kabidi mua kudifila bua kuikala mpanda-njila muambuluishi anyi wa pa tshibidilu. Bampanda-njila ba bungi badi benza mudimu wabu ne disanka nebakuambile ne: bumpanda-njila mmudimu muimpe udi ukuambuluisha bua kuvuluka Mufuki webe mu bunsonga buebe. Ebi mbipatshila biudi mua kukumbaja pautshidi ku nzubu kua baledi bebe. Wewe mubikumbaje, newambuluishe kabidi tshisumbu tshienu.

¹¹ Bipatshila bikuabu biudi mua kukumbaja mu bule bua matuku bidi mua kukufikisha ku diambuluisha bantu ba bungi kabayi anu ba mu tshisumbu tshienu. Tshilejilu, udi mua kuya kuyisha muaba mukuabu anyi mu ditunga dikuabu mudibu dijinga ne bamanyishi. Udi mua kuambuluisha bua kuibaka Nzubu ya Bukalenge anyi Betele mu matunga makuabu. Udi nansha mua kuya ku Betele anyi kulua misionere. Kadi kutambula ke tshipatshila tshinene tshiudi ne bua kukumbaja kumpala kua kudifundila bikuabu binene bitudi batele ebi. Wewe kuyi muanji kutambula, tangila tshiudi mua kuenza bua kukumbaja tshipatshila tshinene etshi.

Kumbaja tshipatshila tshia kutambula

12. Mmalu kayi atu asaka bansonga bakuabu bua kutambula? Bua tshinyi malu aa ki mmakumbane?

¹² Mmunyi muudi mua kumvuija tshidi tshisaka muntu bua kutambula? Kudi bantu badi bela meji ne: kutambula kudi kubambuluisha bua kubenga kuenza malu mabi. Bakuabu badi bamona ne: badi ne bua kutambula bualu balunda babu mbatambule. Bansonga bakuabu mbasue kusankisha baledi babu. Kadi kutambula ki ntshintu tshidi tshikupangisha mua kuenza malu audi musue kuenza mu musokoko to. Kuena kabidi ne bua kutambula bua kusankisha bantu. Udi ne bua kutambula paudi umvua bimpe tshidi kuikala Ntemu wa Yehowa kumvuija ne paudi mutuishibue ne: ukadi mukumbane ne udi musue kuambula bujitu ebu.​—Muam. 5:4, 5.

13. Bua tshinyi udi ne bua kutambula?

¹³ Bualu bukuabu budi mua kutusaka bua kutambula budi ne: Yezu wakapesha bayidi bende mudimu wa ‘kuvuija bantu bayidi ne kubabatiza.’ Yeye muine mmutushile tshilejilu pakatambulaye. (Bala Matayo 28:19, 20; Mâko 1:9.) Ditambula didi kabidi bualu bua mushinga budi yonso udi musue kusungidibua ne bua kuenza. Mupostolo Petelo mumane kuakula bua bualu buvua Noa muenze buvua bumuambuluishe bua kupandukaye ne bena mu dîku diende ku mvula wa kabutu, wakamba ne: ‘Mâyi aa kabidi adi tshifuanyikiji bua adi atusungila katataka, nkubatiza mene bua dibika dia Yezu Kristo ku lufu.’ (1 Pet. 3:20, 21) Kadi ebi kabiena biumvuija ne: udi ne bua kutambula  anu bua kusungidibua to. Udi utambula bualu udi munange Yehowa ne udi musue kumuenzela mudimu ne mutshima webe wonso, muoyo webe wonso, lungenyi luebe luonso ne bukole buebe buonso.​—Mâko 12:29, 30.

14. Bua tshinyi kudi bantu batu batshina bua kutambula? Kadi ndishidika kayi diudi nadi?

¹⁴ Kudi bantu batu belakana bua kutambula, bela meji ne: badi mua kulua kubipata mu tshisumbu. Utu pebe ne buôwa bua nunku anyi? Bikalabi nanku, umanya ne: buôwa ebu kabutu anu bubi to. Budi mua kuleja ne: udi mumanye mudi kuikala Ntemu wa Yehowa kuikale ne mushinga wa bungi. Kudiku bualu bukuabu budi bukutshingisha anyi? Pamuapa kuena mutuishibue ne: kulonda mikenji ya Nzambi nkuimpe buebe wewe. Bikalabi nanku, kuela meji ku malu mabi adi afikila bantu badi kabayi batumikila mikenji ya mu Bible kudi mua kukuambuluisha bua kuangata dipangadika dimpe. Ku lukuabu luseke, bidi mua kuikala ne: udi munange mikenji ya Nzambi kadi kuena umona ne: neukumbane bua kuyitumikila. Lungenyi elu ludi mua kuikala luimpe, bualu ludi luleja muudi udipuekesha. Bible kenaku wamba ne: mioyo ya bantu bapanga bupuangane itu ibadinga anyi? (Yel. 17:9) Kadi udi mua kutumikila mikenji ya Nzambi wewe ‘udimuka mudi Dîyi dia Nzambi diamba’ misangu yonso. (Bala Musambu wa 119:9.) Nansha wewe utshina bua kutambula bua bualu kayi, udi ne bua kuenza muebe muonso bua kujikija buôwa ebu. *

15, 16. Mmunyi muudi mua kumanya ne: ukadi mukumbane bua kutambula?

¹⁵ Kadi mmunyi muudi mua kumanya ne: ukadi mukumbane bua kutambula? Udi mua kuediela nkonko bu mudi eyi: ‘Ndiku mumanye mua kumvuija bantu bakuabu malongesha a nshindamenu a mu Bible anyi? Ntu nyisha nansha padi baledi banyi kabayi bayisha anyi? Ntu ndienzeja bua kubuela mu bisangilu bionso anyi? Ndiku mvuluka misangu intu mukandamene balunda babi anyi? Nentungunuke ne kuenzela Yehowa mudimu nansha baledi banyi ne balunda banyi balekele anyi? Ntu nsambila bua malanda anyi ne Nzambi anyi? Ndiku mudilambule ne muoyo wanyi mujima kudi Yehowa mu disambila anyi?’

¹⁶ Ditambula ditu dishintulula nsombelu wa muntu bikole ne ki mbualu bua bilele to. Udiku mukumbane ne mudiakaje bua kutambula anyi? Kuikala mukumbane kakuena kumvuija anu kuenza midimu mimpe mu bisangilu anyi kufila mandamuna mimpe to. Kudi kumvuija kumanya kuangata mapangadika mimpe adi aleja mutudi bumvue mikenji ya mu Bible. (Bala Ebelu 5:14.) Wewe mumone ne: ukadi mukumbane bua kutambula, umanye ne: udi ne diakalenga dinene dia kuenzela Yehowa mudimu ne muoyo mujima ne kuenza malu adi aleja ne: udi mudilambule kudiye bulelela.

17. Ntshinyi tshidi mua kukuambuluisha bua kutantamena ntatu idi mua kukukuata paudi utambula?

 ¹⁷ Diakamue paudi utambula, udi mua kuikala ne disanka dia bungi dia kuenzela Nzambi mudimu. Kadi matuku makese pashishe, udi mua kupeta ntatu idi mua kuteta ditabuja diebe ne lulamatu luebe. (2 Tim. 3:12) Kuedi meji ne: udi ne bua kuluangana ne ntatu eyi nkayebe to. Lomba mibelu kudi baledi bebe. Lomba diambuluisha kudi bena mu tshisumbu bakadi bashindame. Tungunuka ne kulamata bantu badi mua kukuambuluisha. Kupu muoyo dituku nansha dimue ne: Yehowa udi uditatshisha bua bualu buebe ne neakupeshe bukole budi bukengedibua bua kutantamena ntatu yonso idi mua kukukuata.​—1 Pet. 5:6, 7.

Tshia kuenza bua kukumbaja bipatshila biebe

18, 19. Kukonkonona malu adi ne mushinga kudi mua kukuambuluisha ku tshinyi?

¹⁸ Nansha muudi mua kuikala ne meji mimpe, bidiku bimueneka ne: kuena ne dîba dia kuenza tshiudi ne bua kuenza peshi tshiudi musue kuenza anyi? Bikalabi nanku, udi ne bua kutangila malu adi ne mushinga buebe wewe. Tshilejilu: Angata mbeketshi wa ndundu ne elamu mabue manene a bungi. Pashishe, uuja mbeketshi eu ne lusenga. Mbeketshi webe mmuule ne mabue ne lusenga. Bitshikija kadi lama mabue au ne lusenga alu. Mpindieu, anji pingaja lusenga mu mbeketshi ne pashishe teta mua kuelamu mabue. Neumone ne: kakuena muaba, bualu udi muanji kuela lusenga kumpala.

¹⁹ Udi mua kupeta lutatu lua muomumue bua dîba diudi nadi. Wewe uteka dijikija lutetuku pa muaba wa kumpala, neumone ne: kuakuikala ne dîba dia bungi bua kuenza malu a mushinga adi atangila mudimu webe wa Nzambi. Kadi wewe ulonda mubelu wa mu Bible wa “kujadika malu adi makane,” neumone ne: newikale ne dîba dia kuenza malu a Nzambi ne dia kujikija lutetuku.​—Filip. 1:10.

20. Wewe welakana anyi utshina bua kukumbaja bipatshila biebe, ntshinyi tshiudi ne bua kuenza?

²⁰ Imue misangu paudi udienzeja bua kukumbaja bipatshila biebe, too ne tshia kutambula, udi mua kuelakana ne kupeta buôwa. Biobi bikuenzekele, ‘teka bujitu buebe pambidi pa Yehowa ne yeye neakukoleshe.’ (Mus. 55:22) Bua mpindieu, udi ne mushindu wa kuenza mudimu munene mutambe wa katshia ne katshia, wa kuyisha pa buloba bujima ne kulongesha bantu Bible. (Bien. 1:8) Udi mua kusungula bua kubenga kuwenza kadi kushala mutangile mudi bakuabu bawenza. Peshi udi mua kudituamu ne muoyo webe mujima. Kubengi mua kudifila ne biebe bionso biudi nabi bua kuenzela Nzambi mudimu ne kukuatshisha midimu ya Bukalenge. Kuakunyingalala musangu nansha umue bua muudi muenzele ‘Mufuki webe mudimu mu matuku a bunsonga buebe.’​—Muam. 12:1.

[Mêyi adi kuinshi]

Newandamune munyi?

• Bua tshinyi udi ne bua kudifundila bipatshila?

• Mbipatshila kayi bia mushinga biudi mua kukumbaja?

• Kukumbaja tshipatshila tshia kutambula kudi kulomba tshinyi?

• Mmunyi mudi kukonkonona malu adi ne mushinga buebe wewe mua kukuambuluisha bua kukumbaja bipatshila biebe?

[Nkonko ya dilonga]

[Tshimfuanyi mu dibeji 13]

Udiku ne tshipatshila tshia kubala Bible dituku dionso anyi?

[Tshimfuanyi mu dibeji 15]

Ntshinyi tshiakuambuluisha bua kukumbaja tshipatshila tshia kutambula?

[Tshimfuanyi mu dibeji 16]

Ndilongesha kayi diudi upetela ku tshilejilu etshi?