Nkonko ya babadi

Bu mudi Yehowa muikale witaba bua kubuikidilangana mpekatu bua mulambu wa Muanende udi upikula bantu, bua tshinyi bena Kristo badi ne bua kutonda mpekatu kumpala kua bakulu ba tshisumbu?

Tudi mua kumvuila bualu ebu bimpe mu tshilumbu tshia Davidi ne Beta-sheba, pavua Yehowa mumubuikidile mpekatu nansha muvuaye munene, bualu wakadilengeja ku bubi buende. Pakayikila nende muprofete Natana, Davidi wakatonda patoke ne: “Nakenzela Yehowa bibi.”​—2 Samuele 12:13.

Tshiakumanya ntshia se: Yehowa kêna anu witaba ditonda mpekatu ne muoyo mujima patupu to, kadi udi kabidi ubuikidila udi muenze mpekatu ne ulongolola mushindu wa kuambuluisha muntu eu udi mupambuke bua kupetululaye makanda a mu nyuma. Bua Davidi, muprofete Natana ke wakamuambuluisha. Lelu, mu tshisumbu tshia bena Kristo mudi balume bakole mu nyuma anyi bakulu. Muyidi Yakobo udi umvuija bualu ebu ne: ‘Muntu udi ne disama [dia mu nyuma] munkatshi muenu anyi? Abikile biende bakulu ba ekeleziya; buobu bamulombele Nzambi, bamuele manyi mu dîna dia Mukalenge; ne kulomba kudi ne ditabuja nekusungile muena disama, ne Mukalenge neamubishe; ne bikalaye muenze bualu bubi, Nzambi neamubuikidile bubi buende.’​—Yakobo 5:14, 15.

Bakulu bapiluke badi benza muabu muonso bua kutuyisha kanyinganyinga ka didipisha kadi mu mutshima wa muntu udi muenze mpekatu. Badi badienzeja  bua kuidikija Yehowa padibu bambuluisha muenji wa mpekatu eu. Kabatu basue kuikala bena malu makole nansha padibi bikengela kufila dinyoka dikole to. Kadi, badi bakonkonona ne luse luonso malu adi muntu au nawu dijinga. Ku diambuluisha dia Dîyi dia Nzambi, badi badienzeja ne lutulu bua kululamija ngelelu wa meji wa muntu udi mupambuke eu. (Galatia 6:1) Nansha muntu yeye kayi muditondele mpekatu wende, udi anu mua kunyingalala bua bubi buende padi bakulu bayikila nende, anu muakenza Davidi pavua Natana muyikile nende. Diambuluisha didi bakulu bafila didi dipesha muntu udi mupambuke mushindu wa kuepukaye dienzulula mpekatu umue-umue au ne ntatu minene idi mua kumuvuila yeye mulue muenji wa mpekatu wa mutshima mupape.​—Ebelu 10:26-31.

Ki mbipepele bua kutonda malu mabi audi umona akuatshisha bundu kumpala kua bantu bakuabu, bua kukeba dibuikidila to. Bidi bikengela kuikala ne muoyo mukole. Anji ela meji kakese bua tshidi mua kuenzeka wewe kuyi muenze nanku. Muanetu mukuabu wakabenga bua kuambila bakulu mpekatu wende munene uvuaye muenze mu tshisumbu, wakamba ne: “Mvua ngumvua kanyinganyinga mu mutshima kavua kakayi mua kujika to. Ngakabanga kuenza mudimu wa budimi bikole, kadi kanyinganyinga aku kavua anu kuoku.” Uvua wela meji ne: kutondela Nzambi mpekatu mu disambila kuvua kukumbane, kadi kakuvua kukumbane to, bualu uvua anu udiumvua muvua Mukalenge Davidi udiumvua. (Musambu 51:8, 11) Bulelela, mbitambe buimpe bua kuitaba diambuluisha didi Yehowa utupeshila ne dinanga kudi bakulu!