Lelo Lulekelo lwa Yehova Lushintulula Bika Kodi?

“Yehova [i] Leza! muyule lusa ne buntu, wija pakufuna bulobo . . . , ulekela bukondame ne kujilula.”—DIV. 34:6, 7.

KIMBA MALONDOLOLO

Le Yehova wālongele namani pa bubi bwa Davida ne Manase, ne mwanda waka?

Mwanda waka Yehova kālekēlepo muzo wa Isalela?

Le i muswelo’ka otubwanya kulekelwa na Yehova?

1, 2. (a) Le Yehova wēlombwele ku muzo wa Isalela bu Leza wa muswelo’ka? (b) Le i kipangujo’ka kyaipangulwa mu kino kishinte?

 MU MAFUKU a Nehemia, kisumpi kya Bene Levi kyāitabije mu milombelo ya bantu bonso amba bakulutuba babo bādi “bapela kukōkela” kyaba ne kyaba ku bijila bya Yehova. Ino kitatyi ne kitatyi, Yehova wādi wilombola bu “Leza upēja kulekela, wa buntu, muyule lusa, wija pa kufuna bulobo, kadi wa kanye ka ntanda ne ntanda.” Yehova wāendelele kulombola kanye ku ino misungi yājokejibwe mu kitatyi kya Nehemia.—Neh. 9:16, 17.

² Umo ne umo mubukata mwetu ukokeja kwiipangula’mba, ‘lelo lulekelo lwa Yehova lushintulula bika kondi?’ Pa kutana malondololo a kino kipangujo kya kamweno, tubandaulei bidi muswelo wāikele Yehova Leza na bana-balume babidi bene bāmwenine mu lulekelo lwandi—ke balopwe babidi ba Davida ne Manase kadi.

BUBI BUKATAMPE BWA DAVIDA

3-5. Le Davida wālongele bubi bukatampe namani?

³ Nansha Davida byaādi muntu wakaminwe Leza, ino wālongele bubi bukatampe. Bubidi bidi i bwa kulubila ba mulume ne mukaji, ba Udia ne Bafesheba. Buno bubi bwebāletele abo bonso busatu bipa bilula. Inoko, muswelo wālemunwinwe Davida na Leza ulombola bivule pa lulekelo lwa Yehova. Tutalei byālongekele.

⁴ Davida wātumine bibumbo bya Isalela kukatēkela Laba, mwipata mwa Bene Amona kasāla. Laba wādi ku makilometele 80 kutunduka kwa Yelusalema, bukila bwa Munonga wa Yodano. Difuku dimo aye papo pa musaka wa njibo yandi mu Yelusalema, Davida wamona Bafesheba—mukaji musongwe—ōya. Wandi mulume kādi’popo. Davida wakokwa pa kumona Bafesheba,  wamuseleja ku yandi njibo, kwine kwaālongele nandi makoji.—2 Sam. 11:1-4.

⁵ Davida pa kuyuka’mba Bafesheba waimita, watumanya bakalete Udia wandi mulume mu Yelusalema, na kikulupiji kya amba ukalala na wandi mukaji. Ino Udia kātwelelepo’nka ne mu njibo yandi mwine—nansha byālongele Davida bukomo bwa kumukankamika atwele’mo. Ebiya, mulopwe wasonekela mudyavita wandi mukanda mu bufyafya atūle Udia ku “mukuku wa kumeso a bulwi po butyityile nakampata” ne kujokeja basola bakwabo kunyuma kwandi. Pa kumutūla kumeso, Udia mulume-nabo wafwa ku divita, enka mwātandikile’kyo Davida. (2 Sam. 11:12-17) Ku bubi bwa mulopwe bwa makoji kwēlundile ne bubi bwa kwipaija muntu wambulwa mambo.

DAVIDA WASHINTA MILANGWE

6. Le Leza wālongele namani pa bubi bwa Davida, ne kino kyālombwele bika padi Yehova?

⁶ Na bubine, Yehova wāmwene bintu byonso byālongekele. Kekudipo kintu nansha kimo kyakamonengapo. (Nk. 15:3) Nansha mulopwe byaāsongele Bafesheba, ino “kine kino’ki kyalongele Davida kyadi kibi kibi mu meso a Yehova.” (2 Sam. 11:27) Penepa, Leza wālongele namani pa bubi bukatampe bwa Davida? Wātumine Natana mupolofeto wandi kudi Davida. Yehova byadi Leza wa lulekelo, bimweka bu wākimbile bubinga bwa kulombwela lusa. Le kumwenepo amba kulonga kwālongele Yehova namino kutenga mutyima mpata? Kāningilepo Davida esāse, ino wātumine’tu Natana akasekunwine mulopwe mānga ilombola mubipilmue bubi bwandi. (Tanga 2 Samwele 12:1-4.) Bine, uno wādi muswelo muyampe wa kupwija uno mwanda mukomo!

7. Le Davida wālongele namani ku kyelekejo kya Natana?

⁷ Kyelekejo kya Natana kyālangwile kusanswa boloke kwa mulopwe. Davida waloba pangala pa mpeta wamusekunwinwa ne kunena Natana amba: “Ne Yehova mūmi, muntu walonga kine kino’ki i mufwaninwe kufwa.” Kadi, Davida wanena’mba muntu walongēlwe buno bukondame ufwaninwe kufutyibwa pangala pa bintu byajimije. Bine, bino byāmusense bininge. Natana wamunena’mba, “muntu’wa i enka abe’o.” Kupwa Davida walombolwa bipa byādi bya kulupuka ku bilongwa byandi amba, “kipete” kekyādipo kya kufunduka ku njibo yandi ne amba kisaka kyandi kyādi kya kuponenwa na kyamalwa. Kadi wādi wa kufwijibwa bumvu ku meso a bantu mwanda wa bilubo byandi. Davida wajingulula mubipile bintu byaālongele, waitabija na kwialakanya amba: “Napi mambo padi Yehova.”—2 Sam. 12:5-14.

MILOMBELO YA DAVIDA NE LULEKELO LWA LEZA

8, 9. Le Mutōto wa 51 unena bika pa milangwe mifyame ya Davida, ne kino kitufundija bika padi Yehova?

⁸ Binenwa bidi mu lwimbo lwābundile Mulopwe Davida mwenda mafuku, bilombola kwialakanya kwandi kwa binebine. Mu Mutōto wa 51 mudi milombelo itenga mutyima yālombele Davida kudi Yehova kadi ilombola patōka’mba, wālongele bivule kutabuka ne pa kwitabija bilubo byandi. Kadi wēsāshile bubi bwandi. Davida wādi utele mutyima dibajinji ku kipwano kyandi na Leza. Wēsāshile amba, “i kudi abe, abe enka, o napīle mambo.” Wālombele kudi Yehova amba: “Umpangululemo mutyima utōka, abe Leza; kadi ungalamune mushipiditu umpya wabukankamane mudi ami. . . . Ngalwije tusepo twa lupandilo lobe; kadi unkwatyije ku mushipiditu obe muswe.” (Mit. 51:1-4, 7-12) Le udi na kininga kya kwisamba pampikwa kafinda kitatyi kyosapwila Yehova bilubo byobe?

⁹ Yehova kātalwilepo bipa bilula byālupukile ku bubi bwa Davida. Bino bipa bilula byādi byakwendelela kumususula mu būmi bwandi bonso. Inoko, Yehova pa kumona  mushipiditu wa Davida wa kwisāsa—ko kunena’mba “Mutyima mutyumuke munekenibwe”—ebiya wamulekela. (Tanga Mitōto 32:5; Mit. 51:17) Leza Mwine Bukomo Bonso uyukile ngikadila ne kukanina kwa mutyima kuyampe kufyeme kunyuma kwa bubi. Pa kyaba kya kuleka batyibi batyibile bano ba makoji mambo a lufu mungya Mukanda wa Bijila wa Mosesa, Yehova wālongele’po kintu na lusa, watyibila ba Davida ne Bafesheba mambo aye mwine. (Levi 20:10) Leza wabikika’nka ne kubikika Solomone wabo mwana ke mulopwe ulonda’ko wa Isalela.—1 Bil. 22:9, 10.

10. (a) Le Yehova wālekele padi Davida pa bubinga’ka? (b) Le i bintu’ka bilengejanga Yehova alombole lulekelo?

¹⁰ Padi kintu kikwabo kyāmulekedile Yehova i pa mwanda wa Davida wālekēle Solo. (1 Sam. 24:4-7) Enka na mwāshintulwidile’kyo Yesu, Yehova witumonanga’nka motumwena bakwetu. Yesu wānene amba, “kemukafwatakenya bakwenu bingi, nenu nankyo mukafwatakanibwa bingi. Ke-pantu monka mo mufwatakaninya bakwenu ne bānwe nenu mukafwatakanībwa enka nabya. Kadi pa kitompekejo kyo mwakebatompekeja, nankyo nenu mukatompekejibwa pa kyonka’kyo.” (Mat. 7:1, 2) Bine, tusengibwanga’po kashā pa kuyuka amba Yehova uketulekela bubi bwetu—ekale bubi bukatampe bwa makoji nansha butapani! Uketulekela shi tudi na mushipiditu wa kulekela, shi twisāsa bubi bwetu kwadi, ne shi tulombola mutyima wa kushinta pangala pa bilongwa byetu bibi. “Kupunguluka kwa mutyima” kutambanga kudi Yehova kitatyi kisāsa bya binebine bipya-mambo.—Tanga Bilongwa 3:19.

MANASE WĀLONGELE BUBI BUKATAMPE INO WESĀSA

11. Le Mulopwe Manase wālongele bibi kumeso a Leza mu miswelo’ka imo?

¹¹ Tubandaulei bidi nsekununi mikwabo ya mu Bisonekwa ilombola mwikadile mutyima wa Yehova wa kulekela. Kintu kya myaka 360 kupwa kwa Davida kushilula kuludika, Manase waikala ke mulopwe wa Yuda. Umbikalo wandi wa myaka 55 wādi mutumbile bibibibi, ne bilongwa byandi bya munyanji byaātopekēlwe na Yehova. Mu bintu byālongele Manase mubadilwa ne kushimika madabahu a Bala, watōta “kibumbo kyonsololo kya mūlu,” wapityija bandi bana mu mudilo, ne kukankamika bilongwa bya majende. Bine, “walonga bubi byamwiko’tu ku meso a Yehova.”—2 Bil. 33:1-6.

12. Le Manase wētolēle kudi Yehova namani?

¹² Mwenda mafuku, Manase waselwa ku yandi ntanda ne kukelwa mu kifungo ku Babiloni. Padi kwine’kwa wāvulukile bino binenwa byānene Mosesa ku Isalela amba: “Kadi podi mu disusu, ne bino bintu bino’bi  byonso bifike kodi, kabidi mu mafuku a kumfulo’kwa uketola kudi Yehova Leza obe ne kuteja diwi dyandi.” (Kup. 4:30) Manase wētolēle kudi Yehova. Muswelo’ka? ‘Wētyepeje pakatampe pene’ ne ‘kulombela’ kudi Leza (monka mokilombwedilwe pa kifwatulo kidi pa paje 23). (2 Bil. 33:12, 13) Ketudipo na pantu palembelwe binenwa bine byānene Manase mu ino milombelo, Ino tubwanya kufwatakanya amba yādi padi idingakene na milombelo ya Mulopwe Davida isonekelwe mu Mutōto wa 51. Nansha shi yādi namani, ino mutyima wa Manase wāshintyile bya binebine.

13. Mwanda waka Yehova wālekēle Manase?

¹³ Le Yehova wālongele namani ku milombelo ya Manase? Yehova “waitabija kwadi [Manase], waivwana kwisasa kwandi.” Pamo bwa Davida wāmubadikidile, Manase wājingulwile bukatampe bwa bubi bwandi ne kwisāsa bya binebine. O mwanda Leza wālekēle Manase ne kumujokejeja mu bulopwe bwa mu Yelusalema. Mfulo mfulō, ‘Manase wayuka’mba Yehova i Leza.’ (2 Bil. 33:13) I kikankamika’po kashā pa kwikala na bukamoni bulombola amba Leza wetu wa lusa ulekelanga boba besāsa bya binebine!

LE LULEKELO LWA YEHOVA KELUDIPO NA MFULO?

14. Le i bika bilombola amba Yehova ukalekela babipya-mambo?

¹⁴ I bantu batyetye kete mu bantu ba Leza dyalelo bakakimba kulekelwa bubi bukatampe na bwālongele ba Davida ne Manase. Inoko, kulekela kwālekēle Yehova bano balopwe babidi kwitukwashanga tuyuke amba Leza wetu ulekelanga’nka ne bubi bukatampe shi kipya-mambo wesāsa bya binebine.

15. Le tubayuka namani amba lulekelo lwa Yehova ke lwa mu kitulumukilapo?

¹⁵ Na bubine, ketubwanyapo kufula ku kunena pambulwa kwitupa’mba Yehova ulekelanga mu kitulumukila bubi bwa bantu bonso. Mu uno mwanda, tudingakanye bidi ngikadila ya Davida ne Manase na ya bantu babomboke ba Isalela ne ba Yuda. Leza wātumine Natana kukatopeka Davida  ne kumupa mukenga wa kushinta ngikadila yandi. Davida wāitabije matope na mutyima wa kufwija’ko. Kitatyi kyāyukile Manase amba udi na bilubo, wāfudile ku kwisāsa bya binebine. Ino divule dine, bekadi ba Isalela ne ba Yuda kebādipo besāsa. O mwanda Yehova kebālekēlepo. Ino, wādi utuma kyaba ne kyaba bapolofeto bandi basapule muswelo wamona mwiendelejo wabo wakubulwa kikōkeji. (Tanga Nehemia 9:30.) Enka ne pobāpwile kutamba ku Babiloni bajokela ku yabo ntanda, Yehova wāendelele kutonga’mo mikendi ya kikōkeji, pamo bwa Ezela mupidishitu ne mupolofeto Malaki. Kitatyi kyonso kyādi kilonga bantu bintu mungya kiswa-mutyima kya Yehova, bādi bemwena nsangaji mikatampe.—Neh. 12:43-47.

16. (a) Le i bika byāfikile muzo wa Isalela mwanda wa kubulwa kwisāsa bubi bwabo? (b) Le i mukenga’ka upēlwe bantu ba ku muzo wa Isalela na Yehova?

¹⁶ Yesu pa kupwa kutumwa pano pa ntanda ne kwela kitapwa kibwaninine kya kikūlwa, Yehova kakidipo witabija bitapwa bya banyema byādi byela Isalela. (1 Yoa. 4:9, 10) Paādi bu muntu, Yesu wāmwekeje mumweno wa Shandi kitatyi kyaānene bino binenwa bitenga mutyima amba: “Yō! Yō! Yo! abe Yelusalema! abe Yelusalema! Abe wakubija bapolofeto, na kwipaya ne kwasa mabwe bo bakutuminanga kōdi; yō! yō! dingi dine dyo nadi nsaka na’mba nkubungakenye pamo bāna bobe, bwa nzolo wa bāna wibabungakenya mu mapapa, nanshi bānwe byobya kemuswele’byo.” Kupwa Yesu wānena amba: “Monaipo bidi, njibo yenu byo yemushīlwa masala.” (Mat. 23:37, 38) O mwanda muzo wa bubi kadi wampikwa kwisāsa wāpingakanibwe na Isalela wa ku mushipiditu. (Mat. 21:43; Ngat. 6:16) Ino le bantu ba Isalela wa ku ngitu nabo le? Nabo bakamwena mu lulekelo ne lusa lwa Yehova shi balombole lwitabijo mudi Leza ne mu kitapwa kya Yesu Kidishitu. Uno mukenga ukashitwilwa ne bantu bāfwile pampikwa kwisāsa bubi bwabo ino bakasangwilwa pa ntanda mitōkejibwe.—Yoa. 5:28, 29; Bil. 24:15.

TUMWENEI MU LULEKELO LWA YEHOVA

17, 18. Le i muswelo’ka otubwanya kulekelwa na Yehova?

¹⁷ Le tukalonga namani pa kulekelwa na Yehova? Bine tufwaninwe kulonga bintu na mwālongele Davida ne Manase. Tufwaninwe kwitabija bubi bwetu, kwisāsa bilubo byetu, kukimba na kininga lulekelo lwa Yehova, ne kumulomba apangulule motudi mutyima utōka. (Mit. 51:10) Shi twi balonge bubi bukatampe, tufwaninwe ne kukimba bukwashi bwa ku mushipiditu bwa bakulumpe. (Yak. 5:14, 15) Nansha shi tudi mu ngikadilo’ka, i biyampe tuvuluke amba Yehova, monka mwaētelele kudi Mosesa; i—“Leza ! muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo; ulamine kanye ka tununu ne tununu, ulekela bukondame ne kujilula.” Yehova kashintyilepo.—Div. 34:6, 7.

¹⁸ Na kwingidija muneno wa kwenzakanya, Yehova wālaile Bene Isalela besāshile kutalula’ko lonso dikeme dya bubi bwabo, kwalamuna bubi bobwa ‘butyila pyā’ ke butōka tō bwa “mpemba.” (Tanga Isaya 1:18.) Penepa lulekelo lwa Yehova lushintulula bika kotudi? Pa kulekelwa lonso bubi ne bilubo byetu, tufwaninwe kulombola mutyima wa kufwija’ko ne wa kwisāsa.

19. Le i bika byotukabandaula mu kishinte kilonda’ko?

¹⁹ Byotulekelwanga na Yehova, le netu tubwanya kumwiula namani mu muswelo otwikele na bakwetu? Le i muswelo’ka otukepuka kwiula ngikadila ya kubulwa kulekela boba balonga bubi bukatampe ino balombola kwisāsa kwa binebine? Kishinte kilonda’ko kiketukwasha tubandaule mityima yetu mwanda wa twikale pamo bwa Yehova Tata wetu, aye wa “mutyima wa lubilo wa kulekela.”—Mit. 86:5.

[Bipangujo bya Kifundwa]

[Kifwatulo pa paje 26]

Pa mwanda wa lulekelo lwa Yehova, Manase wājokejibwe mu bulopwe bwandi mu Yelusalema