Zekadia 1:1-21
1 Mu kweji wa mwānda, mu mwaka wa bubidi wa Dadiusa,+ kinenwa kya Yehova kyaiya kudi mupolofeto Zekadia*+ mwanā Belekia mwanā Ido amba:
2 “Yehova wafītyīlwe bashenu mutyima bininge.+
3 “Wibasapwile amba, ‘Yehova wa bibumbo wanena namino amba: “‘Jokelai kondi,’ i Yehova wa bibumbo unena, ‘nami nkajokela komudi,’+ i Yehova wa bibumbo unena.”’
4 “‘Kemwakekalai pamo bwa bashenu, bobasapwidile kudi bapolofeto ba kala amba: “Yehova wa bibumbo wanena namino amba, ‘Nemwisāshila, vundaminai* mashinda enu mabi ne bilongwa byenu bibi.’”’+
“‘Ino abo kebaivwenepo, kadi kebatelepo mutyima kondi,’+ i Yehova unena.
5 “‘Le pano bashenu badi kwepi? Le bapolofeto baikele bōmi nyeke?
6 Inoko, mwene binenwa byami ne mbila yami byonasoñenye bengidi bami, bapolofeto, byatene bashenu?’+ Ebiya bajokela kondi kebanena’mba: ‘Yehova wa bibumbo wetulonga mwendele mashinda etu ne bilongwa byetu, monka mwaadi usumininwe kulonga.’”+
7 Mu difuku dya 24 dya kweji 11, ko kunena’mba, kweji wa Shebate,* mu mwaka wa bubidi wa Dadiusa,+ kinenwa kya Yehova kyaiya kudi mupolofeto Zekadia mwanā Belekia mwanā Ido amba:
8 “Namwene kimonwa bufuku. Kudi muntu umo wadi ukende pa kabalwe katyila, waimana mu mityi ya milete mu kinkolankola; kunyuma kwandi kwadi tubalwe tutyila, ne tutyila tukundabale, ne tutōka.”
9 Penepo nanena’mba: “A mfumwami, le bano’ba i bāni?”
Mwikeulu wadi wisamba nami wanondolola’mba: “Nsa kukulombola’bo.”
10 Ebiya muntu wadi wimene mu mityi ya milete wanena’mba: “Bano’ba i boba batuma Yehova kunangakana pa ntanda.”
11 Penepo banena mwikeulu wa Yehova wadi wimene mu mityi ya milete amba: “Tubanangakana pa ntanda, ino tala! ntanda yonso idi talala kadi pampikwa kukambakanibwa.”+
12 Ebiya mwikeulu wa Yehova wanena’mba: “A Yehova wa bibumbo, le i kufika ne kitatyi’ka kyokaleka kufwila Yelusalema ne bibundi bya Yuda lusa,+ byowafītyilwe mutyima mu ino myaka 70?”+
13 Yehova walondolola mwikeulu wadi wisamba nami na binenwa biyampe kadi bisenga.
14 Penepo mwikeulu wadi wisamba nami waunena’mba: “Ela lubila’mba, ‘Yehova wa bibumbo wanena namino amba: “Ne mupyasakene Yelusalema ne Ziona bupyasakane bukatampe.+
15 Ne mwiifītyilwe mutyima bininge mizo idi talala nyā,+ mwanda nafītyilwe mutyima bityetye,+ ino ayo yabweja’ko kyamalwa.”’+
16 “O mwanda Yehova wanena namino amba: ‘“Nkajokela kudi Yelusalema na lusa,+ kadi njibo yami ikobakwa’mo,”+ i Yehova wa bibumbo unena, “kadi lukamba lwa kupima nalo lukatamunwa pa Yelusalema.”’+
17 “Ela lubila monka unene amba, ‘Yehova wa bibumbo wanena namino amba: “Bibundi byami bikayula monka buyampe bā; Yehova ukasenga monka Ziona+ ne kutonga monka Yelusalema.”’”+
18 Penepo natala, namona masengo aná.+
19 Ebiya naipangula mwikeulu wadi wisamba nami amba: “Le i bika byobi?” Walondolola’mba: “Ano’a i masengo apalakenye Yuda,+ ne Isalela,+ ne Yelusalema.”+
20 Penepo Yehova wanombola basendwe baná.
21 Naipangula’mba: “Le bano’ba bāyanga kulonga bika?”
Wanena’mba: “Ano’a i masengo apalakenye Yuda bininge kufika ne byakomenwe muntu nansha umo kwimika mutwe wandi. Bano bakwabo nabo bakāya kwiazakaja, kutyumuna masengo a mizo yaimikīle ntanda ya Yuda masengo ayo, mwanda wa kumupalakanya.”
Kunshi kwa Dyani
^ Ko kushintulula’mba “Yehova Wavuluka.”
^ Nansha’mba “jokai ku.”
^ Tala Mbwejo B15.
