Anamafunjedha a Yesu tanooidhiwa madhu a Nlungu, thitho tanoa-arela va ingumiiwa. (Ju. 17:6) Mbwenye aliwa tatoododomeya mathuulelo vahora yaphiwile liye ninga lipanga va imurini yooneelavo nyarwa. Yesu atoozindiyela ira aliwa anokaikela namwasa oi katinoidhiwa vyongo, a-kala namwasa oi tatekaana rima othakala. (Luk. 9:44, 45; Ju. 20:9) Ee-no liye atowakami-a vwechecha malemba. Dhoweni nitapanyeni mwemo mwairele liye vyevi naanamafunjedha ambili enao tadhowa wu Emau. Vowaredha naaliwa, Yesu kaate fiyedhela awandela ira utovenyathi-iwa. Malomwee, atooroma afuka vyofuka. N’nga mwasiwa ngwan’ni atooira vyevyo? Vinooneya ira afuna taonge vyali mathuuleloni na rimanimwiwa thitho aliwa tatoongadi. Aliwa tatoom’mwandela ira anodedi-edhela Yesu wenuo unofuna vulumucha Aisraeli mu utongi onyingaleliwa na Aroma. Yesu atoo-indi-edha basa malemba vowakami-a vwechecha vyongo vyaireile. Namaulo adambo lelo, Yesu atookami-a thitho anamafunjedhee enango vwechecha makhundo enala.—Luk. 24:33-48. w24.10 14 ¶9-10

Yesu atoofunjedha kumela wa Babee dhulu vyongo vyofwanelela irana thitho onga. Vosazi-edha Yesu, gulu la Yohova lino-indi-edha basa madhu a Nlungu vofunji-a atu ira taidhiwe vyongo vyofwanelela na vyo-ofwanelela novelela malangi-o. (2 Ti. 3:16, 17) Hora dhothene ninothuuchiwa ira nileringa madhu a Nlungu thitho a-arela. Ninoganyali maningi nafunjedhanga Bibilya vo-indi-edha basa mabukwi-u. Mofwanafwani-a, ninooda fwanafwani-edha vinofunji-a Bibilya namalangi-o anoniva-a gulu. Naona ira malangi-o anowachela i-yo mbokumela malembani, ninoroma roromela maningi gulu la Yohova. (Aro. 12:2) Yesu anoolaleela “milanyu yapama ya Umwene wa Nlungu.” (Luk. 4:43, 44) Yesu atoowandela anamafunjedhee ira talaleelenga vya Umwene wa Nlungu. (Luk. 9:1, 2; 10:8, 9) Malamboano, atu othene ali mugulu la Yohova anolaleela milanyu ya Umwene, mo-obala unokala aliwa. w24.04 9 ¶5-7

Muroromelenga maningi malangi-o okumela wu gulu la Nlungu. Walelene Yohova atoo-indi-edhela basa Mose na Yoswa vovelela malangi-o wa Aisraeli. (Yos. 1:17) Aisraeli tanooraeli-iwa taonanga atu enala ninga oimelela Yohova Nlungu. Vangavirile vyawa vinjinji pingo wa Ikristau watokaathei-iwa thitho arumiwi okwakwana 12 mbavelela malangi-o. (May. 8:14, 15) Vasogolovee mu gulu laatu ovelela malangi-o ala, mwatookala thitho andimuwa awu Yerusalemu. Namwasa o-arela malangi-o aalombwana ororomeleyala, “atu mipingoni tatoodhowanave kaana iroromelo yolimba thitho numero yaatu yatoodhowanave wenjedheleya dambo na dambo.” (May. 16:4, 5) Malamboano ninoraeli-iwa na-arelanga malangi-o okumela wu gulu la Yohova. w24.07 10 ¶10

Yohova anom’dhiveliwana maningi mwene Davide. Yohova atoofiya vom’monga ira, “mutu wavarimani vanga.” Mbwenye Davide atooira vyodawa vilukulu ninga ira unyambi thitho upha mutu. Movwelana na ilamulo yava-iwile Mose na Nlungu, Davide afwanela phiwa. (Lev. 20:10; Num. 35:31) Mbwenye moriya rima Yohova atoom’kami-a ira achinyuwe. Liye atooruma namaongelee Natani angalive ira Davide ali a-anathonyi-edhe chinyuwa uliwethene. Natani atoo-indi-edha basa ifwanafwani-o yofiya varimani wa Davide. Angazindiyele ira atoom’sukwali-a Yohova, Davide atoochinyuwa. (2 Sa. 12:1-14) Vasogolovee, atoolemba Salimo lothonyi-edha dhivwela tangaranga na vyairile liye. (Sal. 51, visimadhu vyavadhulu) Salimoli likadhi lididili-anga atu anjinji odawa thitho alimbi-a ira tachinyuwe. Ninosimba maningi ira Yohova atookami-a rumiwee odhiveliwiwa Davide ira achinyuwe. w24.08 10 ¶9

Atu anjinji anorumela ira samalela a-ima ndi basa lukhulu. Akala muli namabala, akala mutokaana mwana kirikiti nousimbani namwasa om’kami-a ira akaena iroromelo yolimba. (Dot. 6:6, 7) Mwaninyu aulukhulanga unodha roma fuka vyofuka vinango vyorucha vyokhuza vinororomela nyo thitho makhundo a Bibilya okhuza makalelo apama. Voroma munooda dhikhumbanyedha namwasa wa vyofuka vinafukenga mwaninyu. Venango thitho munooda onanga ira iroromeloyee itoroma yeva. Imbarimbari choi mwaninyu aulukhulanga unofwanela fukanga vyofuka naifunelo yoi asikimizele vyongo vinororomela liye. (1 Ak. 13:11) Ee-no kamunofwanela ova. Muonenga ira fuka vyofukavyo unodha uva-ani ngari yom’kami-a ira athuulelenga pama. w24.12 14 ¶1-2

Makristau Aiebere, tafuneela kaana iroromelo yolimba ira tavulumuwe vanyarwa ilukulu yafuna ireya wu Yudeya. (Aeb. 10:37, 38) Yesu atoowenjeli-a anama-arelee ira tadhaona sidade ya Yerusalemu yangarungunuwiwile na anyakondo, tatawele myangoni. Atu othene tafwanela a-rela malangi-o ala masiki akala ali sidadimo venango kabe. (Luk. 21:20-24) Walelene anyakondo tadha dhadhimbinuwela, atu tatawela masidade okaana mipanda ninga mwakalele sidade ya Yerusalemu. Ee-no tawela myangoni waoneya ninga ndi a-thuulela pama thitho vyafuneya ira mutu akaena iroromelo yolimba. Makristau Aiebere tafuneela roromela maningi atu aa-indi-edha basa Yesu vosogolela pingo. Atu aasogolelao, vinooneya ira tatoovelela malangi-o aakami-e Makristawao idhiwa hora yofwanelela tawa na moda mwairele aliwa vyevyo.—Aeb. 13:17. w24.09 10 ¶9-10

Yesu angali vailamboi atoolaba pama basa yam’va-idhe Babee. (Ju. 17:4) Mbwenye Yesu kaana mathuulelo oi, vyongo vingawendile pama aakale ndilabanga ndekene.’ Liye atoofunji-a atu enango ira talabenga pama basila. Yesu atoova-a thitho anamafunjedhee basa yosamalela mabila a Nlungu nosogolela basa yolaleela nofunji-a atu. Yesu atoovelela malangi-o waanamafunjedhee mo-ovira kundu mbwenye moriya rima. Atu enango anookaikela vyongo thitho atowasumulula. (Luk. 24:25-27; Ju. 20:27) Yesu atowakami-a ira taonenga basa yolaleela kala yofuneya maningi kwaranya mabasa enango. (Ju. 21:15) Atowakami-a thitho ira katithuulelenga maningi ngari ya urumiwi inava-iwe atu enango. (Ju. 21:20-22) Atowakami-a mali-a mathuulelo odaweya ana aliwa okuza Umwene. Thitho atowalimbi-a ira tathuulelenga maningi vyolaleela milanyu ya Umwene.—May. 1:6-8. w24.10 15-16 ¶13-14

Ninofunjedhavo ira vwela unovulumucha ingumi. Mofwanafwana na Aisraeli enao ta-adhi vang’ono volowa muilambo yolanyedhiwa, na i-yene thitho ni-adhi vang’ono volowa muilambo inilanyedhile Nlungu. Chineneeva ninoona Yohova achinjanga ilambwila kala paradaizo. (Esa. 35:1; Luk. 23:43) Satana vambo-i na viwanda vyee, anodha kumi-iwavo. (Apk. 20:2, 3) Mareligiau onama katinodha ndimeli-ave atu. (Apk. 17:16) Kavanodha fwanyeya anamatonga onyingalela atu. (Apk. 19:19, 20) Paradaizoni kamunodha fwanyeya mutu o-ovwela. (Sal. 37:10, 11) Wu limburo nlilothene atu anodha a-relanga malamulo olongomana a Yohova enao anolimbi-a vwelano na rendele. Ee-no atu anodha dhivelangana thitho roromelana. (Esa. 11:9) Ninodedi-edhela vyongo vyapama maningi. Wenjedhela vevo akala ninom’vwela Yohova, ninodha dhowanave kala mu paradaizo modhowa nodhowa.—Ju. 3:16. w24.11 9 ¶7

Malamboano ulosi uli va lemba la dambo la penene unaakwakwaneli-edhiwa maningi kwaranya ndulimu. Milanyu ya Umwene inolaleeliwa muviongelo vyokwaranya 1.000 thitho saiti-u ya jw.org inaakami-a atu anjinji vailambo yothene yavathi ira tavwe milanyu yapama.Yesu atoowandela anamafunjedhee ira katinodha “rungunuwa masidadi othene” venango ira laleela wa mutu uliwethene liye a-anadhe dhatonga atu. (Mat. 10:23; 25:31-33) Madhu a Yeswala anaakwakwaneli-edhiwa thitho malamboano. Atu anjinji anokala muvilalambo mwemo munokondi-iwa basa li-u. Naa-ima anjinji enao anobaliwa mumaminutu aliothene. Ninoira yongo iliyothene inaode i-yo ira nilaleele waatu “amaziza othene, iongelo iliyothene na tundu uliwethene.” (Apk. 14:6) Mbwenye imbarimbari choi kaninaode wandela mutu uliwethene milanyu yapama komoni wa ilamboi wa-anafiye. w24.05 10 ¶6-7

Yesu anoonga madhu olimbi-a thitho osisimula atu enango. Liye kaaonga mwauwali waanamafunjedhee. (Luk. 8:47, 48) Yesu atoovelela ifwanafwani-o yapama maningi waalombwana Aikristau! Yesu atoolangi-a alombwana ira takale ororomeleya wa a-iyaniwa. Liye atoo-indi-edha basa madhu a Babee ira lombwana unofwanela “dhowa makala vambo-i na i-yanee.” ( Mat. 19:4-6) Madhu Aigiriki oi “makala vambo-i,” anothapulela “fyetela na lariditi.” Ee-no lombwana na i-yana anofwanela vwelananga maningi akala tatofyeteliwa vambo-i na arditi. Aliwa tamwadhani-iwa, anovwa upha. Lombwana unovwelana maningi na i-yanee kanoonela vyongo vili vyothene vyaumandhave. Liye unodhimbinuwa mombaranya ira “a-aone vyongo vyo-okaana basa.” (Sal. 119:37) Vinokala ninga utovwelana na methwee ira a-aing’ane mosilila a-iyana enango.—Yob. 31:1. w25.01 10 ¶12-13

Atu enango taonga ira tatolevelela anokala tathapulelanga vyongo vyo-iyana iyana. Ee-no Yohova ‘unolevelela na rima othene.’ (Sal. 130:4) Liye ngwaifwanafwani-o yapama yothonyi-edha inothapulela levelela. Mumaversu enango, alimbo lemba Bibilya tatoo-indi-edha basa madhu Aieberi voonga vyolevelela enao ano-indi-edheliwa basa voonga vya Yohova ekhene baa-i, a-kala atu. Yohova alevelela mutu unofudha madawo othene amutuo thitho unokala okoka vauxamwali na liye ninga voroma. Ninosimba ira Yohova unolevelela na rima othene thitho moweli-edha weli-edha. w25.02 8 ¶1-3

Kaiira atu tavuruwana milanyu inolaleela i-yo paevo vanaonge i-yo ira vyongo vitoniwendela pama maningi muurumiwini. Mwasiwa ngwan’ni ninoonga ee-no? Ninoonga ee-no namwasa oi ninoira vyongo vinofuna Yohova na Mwanee ira niviirenga vyevyo vili irela umboni. Masiki na-afwanye atu oi naalaleele milanyu yapama, venango va-akale mutu ovuruwana milanyu inolaleela i-yo, ninokalave osangalala namwasa oi ninoidhiwa ira nitom’sangalali-a Babi-u wa dhulu Yohova. (San. 27:11) Ninokalecha osangalala namalaleya mwinango afwanya mutu una ifunelo muurumiwini. Nsanja ya Namaing’anela inango yatoofwanafwani-edha basa li-u lolaleela na mulimbo saka mwana odimela. Atu anjinji anooda laba basali vosakasaka mumamburo o-iyana-iyana. Mwanuo afwanyeya atu othene enao anosangalala a-kala mutu um’fwaide baa-i. Molandana na vyevi, ninolaba basa yolaleela ninga gulu. Mutu uliwethene pingo unolaba basa yosakasaka atu thitho uliwethene unosangalala mutu m’mbo-i aroma fiya vamigumanoni. w24.04 18 ¶13-14

Ninodedi-edhela vyongo vyosangalali-a maningi vachineneeva. Namaraeli-o a Yohova, ninodedi-edhela ona atu anjinji tafunjedhanga imbarimbari nyarwa ilukulu ya-anarome. Ninosangalala idhiwa ira masiki vahora yorucha maningi va nyarwa ilukulu, ninodha ona atu anjinji takumanga muilambo yothakala ya Satanila, noroma m’titimi-a Yohova vambo-i na i-yo. Va-eeni nitokaana basa linjinji ira nililabe. Nitokaana ngari yolaba basa yoi kinodha ireya okokha, yolaleela milanyu yapama ya Umwene wa Nlungu vailambo yothene yavathi. Vahora imbo-ive yeniyo ninofwanela dhowanave wenjeli-a atu voonga vyevyo vinofuna dhaireya sogolou. Atu anofuneela idhiwa ira komoni wailambo yothakalila uli vakwikwi maningi. Namwasa odhiveliwana milanyu yapama, atu thitho kwaranya vyothene m’dhiveliwana Yohova na dhinalee, ninodhowanave laleela mofunechecha, mombaranya thitho mwathindhi fiyedha Yohova aonge ira “Vitokwakwana, mu-iye laleela.” w24.05 19 ¶14-16

Va dambolee lomari-a, Yesu atom’funji-a Pedru naarumiwi afwee likhundo lofuneya maningi lokhuza dhiyevi-a. Vinooneya ira arumiwao tatoodabwa maningi voona Yesu alabanga basa inolabiwa naanamalaba venango mwinyaa vandhe. Yesu atoungula nguwee yaundhe, notukula tuwalya yamangechana liye yununimwee, no-ela ma-inje basiyani noroma a-uwa manyalwiwa. (Ju. 13:4, 5) Vinooneya ira vyatom’tukhulela hora indendai ira amale u-wa manyalo aarumiwee 12, thangani-avo Yudasi, wenuo ali anga-adhi vang’ono ira am’velele. Mbwenye modhiyevi-a, Yesu atoomala laba basiyo. Ee-no moleva rima Yesu atoonga ira: “N’nga munoidhiwa mwasee u-uweleni miyo manyalwinyu? Nyo munondiitana ira ‘Namafunji-a’ thitho ‘Mbwiye,’ munoongadi vyaimbarimbari, namwasa oi ndili Namafunji-a thitho Mbwiye. Ee-no akala nyo munondiitana Mbwiye thitho Namafunji-a, nditou-uwani  manyalwinyu nyo thitho munofwanela u-wana manyalo aunango na fwee.”—Ju. 13:12-14. w25.03 10 ¶9-11

Muilamboi dhowanave kala vauxamwali na Yohova kai okweya. Atu anjinji katinorumela ira Nlungu utokalao. Thitho hora dhinjinji atu ta-ano-arela makhundo a Nlungu, anooneya ninga vyongo vinoawendela pama. Naonanga vyongo vyevi viireyanga, iroromelo yi-u inooda wesedhiwa. Angalive ira kaninafiye vokaikelanga ira Nlungu utokalaodi, ninooda roma kaikelanga akala unooda nikami-a. Alembile Salimo 73, atooroma kaikela vyongo vyevi. Liye aona ira atu enao anovwalavwali-a malamulo a Nlungu, vyongo vinoawendela pama. Ee-no atooroma kaikela akala m’lambela Yohova koganyali-a. (Sal. 73:11-13) N’nga chini yam’kami-idhe mulimbo lemba Salimula ira arome ona vyongo mofwanelela? Liye atoothuulela vyongo vyaireele atu enao am’duwanle Yohova. (Sal. 73:18, 19, 27) Atoothuulela thitho maraeli-o anofuna dhakaana atu anom’labela Nlungu. Iyo thitho ninooda thuulelanga maraeli-o aniva-idhe Yohova. w24.06 25 ¶16-17

Walelene atu tanoodyela abaliwa kobiri, vowapagali-a mwajuru va kobiri dhafiyarile aliwa. Thitho anamatonga enango tanoodyekeliwa votonga atu o-odawa mo-olongomana. Mbwenye Yohova unoidanana vyongo ninga vyevi. (Zak. 22:12) Mudhifuke ira: ‘N’nga hora dhothene ndinokalelave thuulelanga vya kobiri na vyongo vinagule miyo? N’nga ndafiyari kobiri ndinodembuwecha pagali nothuulelanga ira mwinyaa kobiridho kanodhifuna? N’nga kaana kobiri unondiiri-a ira ndidhionenga kala ofuneya, noimwanananga kami-a atu enango? N’nga ndinoona ira abali naarongola enango anodhiveliwana maningi kobiri namwasa oi atokaana kobiridho? N’nga ndinodhiveliwana waredha naatu ofuma norambelanga waredha naatu osauwa?’ Ee-no ira nidhowenave kala afwee a Nlungu, ninofwanela rambela dhiveliwana maningi kobiri. Ninoirana vyongo vyevi namwasa oi Yohova kanodha ni-iya! w24.06 12-13 ¶17-18

Ira nivibarelenga wu vyowesedha, ninofwanela dhilimbi-edha ira nilavelenga vyongo vyofwanelela. Nafunjedhanga “idanana vyongo vyothakala nodhiveliwangana vyongo vyapama,” ninodha sikimizela rima ira niirenga vyongo vyofwanelela. (Amo. 5:15) Lavela vyongo vyofwanelela unooda niiri-a ira na-atukuleye nagumanana vyowesedha. Ninofwanela pingeyanga na vyongo vyokuza lambela. Nakala vamigumanoni venango muurumiwini, ninolimbi-iwa kaana rima ofuna m’sangalali-a Yohova. (Mat. 28:19, 20; Aeb. 10:24, 25) Naleringa, funjedha thitho thuulela modi-a madhu a Nlungu, ninoroma dhiveliwangana vyongo vyapama noidanangana vyongo vyothakala. (Yos. 1:8; Sal. 1:2, 3; 119:97) Nithuulelenga ira Yesu atoowandela anamafunjedhee ira: “Mudhowenave lobela ira mwa-awesedhiwe.” (Mat. 26:41) Moi ee-no Yohova unonikami-a, thitho nili ofunechecha m’sangalali-a.—Yak. 4:8. w24.07 17-18 ¶14-16

Atu anofunji-a afwiwa, anofwanela sazi-edha moda Yohova munova-a liye zelu. Muthuulelenga ira Yohova unova-a zelu modhala mandha. I-yo thitho nafunji-anga atu enango vyongo viidhi i-yo, ninofwanela irangana modhala mandha. Kaniovenga funji-a atu enango vyongo voova ira anodha nilanda limburo. Kaipama thuulelanga ira: ‘Ndafunjedhile ndekene, naliyene thitho afunjedhe ekene.’ Rima wenuo ngo-ofuneya vari vaatu a Nlungu. Malomwee ninoira vyongo vyothene vinaode i-yo ira naafunji-e yongo iliyothene iidhi i-yo kalanga ninga “ninaava-a ingumii-u.” (1 At. 2:8) Ninodedi-edhela ira “naaliwene thitho tadha kale ofwanelela funji-a atu enango.” (2 Ti. 2:1, 2) Naira ee-no, ninokami-a atu enango ira takale ova-a modhala mandha thitho osangalala. w24.09 29 ¶12-13

Akala munoona ira kamuna dodoliso n’nangolee lavakundu, kamutatile rima. Namawasa oi pyo-okaikeli-a ira mutokaana makalelo enango enao anakami-e pingo. Leri malangi-o a rumiwi Paulo anofwanyeya va lemba la 1 Akoritiyo 12:12-30, nolobelela mwasuo, unodha ukami-ani. Madhu a Paulo anothonyi-edha ira nyo, molandana na rumiwi wa Yohova uliwethene, muli ofuneya maningi pingoni. Muirengana vyongo vyothene vinaode nyo vom’labela Yohova naabali naarongolinyu. Idhiwani ira andimuwa anodha uva-ani vyoira movwelana na vinooda nyo. (Aro. 12:4-8) Makristau othene anofwanela kala vauxamwali wapama na Yohova, nokalanga osangalala namwasa ova-a vyongo atu enango thitho kala ifwanafwani-o yapama waatu enango. w24.11 17 ¶12-13

Ana anoogumanana nyarwa dhedho dhamuiri-a ira alenga. Dhinango mwa nyarwadhi dhali dhoi liye ali vabanja lovalanyiwa thitho i-yana fwee wenuo am’nyoziwo dhinalee ali Penina. Wenjedhela vevo Ana ali o-obala, voi Penina atokaana a-ima. (1 Sa. 1:1, 2) Penina anom’nyoza Ana namwasa oi kaana a-ima. Ana vyatom’phi-a rima maningi moi “kaadya airave ula” thitho “ali osukwala maningi.” (1 Sa. 1:6, 7, 10) N’nga chini yam’kami-idhe Ana? Imbo-i mwa vyongo vyakami-idhe khudhowa kachisini walambela aliwa Nlungu. Liye atooroma m’vepa Yohova ira: “Muone rucheya wa dhaarinyu nondithuulela.” (1 Sa. 1:11) Yohova atoona nyarwa dhee, atoovwa ulawee thitho atom’raeli-a vom’va-a mwana.—1 Sa. 1:19, 20; 2:21. w24.12 21 ¶5-7

Kuto unonifunji-a ira Yesu unodhiveliwana maningi atu, simbwasimbwa anama-arelee. (Ju. 13:1) Mofwanafwani-a, Yesu anooidhiwa ira nyarwa dhothene dhinofuna liye dhagumanana muurumiwee, dhinodha kala dhorucha maningi simbwasimbwa wukwawee. Mbwenye, Yesu atooira vyothene vyevi, a-kala namwasa oi ndi vyam’rumile Yohova irana, mbwenye namwasa oi anoodhiveliwana atu. Ee-no liye atoo-ela rimee va basa lolaleela, funji-a, nolabela atu enango. Masiki va dambo laphiwile liye, Yesu atoo-uwa manyalo aarumiwee, voava-a malangi-o thitho awandela madhu olimbi-a. (Ju. 13:12-15) Ee-no Yesu angali vaimurini yoonelavo nyarwa, atookami-a lipanga kaana idedi-edho thitho atooira masaka-edho oi m’mee asamaleliwenga. (Luk. 23:42, 43; Ju. 19:26, 27)Yesu atoothonyi-edha ira anoodhiveliwana atu, a-kala vonikwela baa-i, mbwenye vaingumiyee yothene. w25.01 23 ¶11

Bibilya lino-indi-edha basa ifwanafwani-o vofuna nikami-a vwechecha ufulu unokaana i-yo Yohova anilevelela na rima othene. Namwasa oi nili odawa thitho ninothuulela vyothakala, nili ninga “adhaari amadawo.” Mbwenye Yohova anilevelela ninokala ninga adhaari “athathuliwile wu madawo.” (Aro. 6:17, 18; Apk. 1:5) Naidhiwa ira Yohova utonilevelela ninokala osangalala ninga adhaari enao athathuliwile. Vo-indi-edha basa sembe ya Mwanee mopipirisa Yohova unoniili-a. (1 Pe. 2:24) Kuto unonikami-a ira nikale okoka vauxamwali na Yohova wenuo wanongeile namwasa wa marenda oophi-ale. Molandana na mutu unosangalala aili-iwa marenda malukhulu, na i-yene thitho ninosangalala naili-iwa mwauzimu nokala okoka vauxamwali wapama na Yohova namwasa oi utonilevelela. w25.02 11 ¶16; 13 ¶17

Muifwanafwani-o ya matalento, Yesu atoonga ira adhaari ambili tali ororomeleya wa mbwiiwa mbwenye m’mbo-i ali o-ororomeleya. (Mat. 25:14-30) Adhaari ambili ororomeleyale anoimelela Makristau ozoziwa ororomeleya. Mbwiiwa Yesu, unowaitana ira “tadhasangalale vambo-i na liye.” Aliwa anodha wachela yotuva yiwa ya dhulu voveyathi-iwa oroma. (Mat. 25:21, 23; Apk. 20:5b) Vyongo vyaireile wa dhaari opolola ndi yowenjeli-a wa ozoziwa othene. Mwasiwa ngwan’ni ninoonga e-no? Mukalenga athindhi. Muvifwanafwani-o vya matalento, ninga mwemo mukalele aliwa na vifwanafwani-o vya anamwali, Yesu kaaro-edha ira ozoziwa anodha kala opolola. Malomwee aonga vyongo vinofuna aireela akala ato-iya kaana thindhi. Aliwa anodha imwanana kala “vari vaatu aitaniwile na Nlungu nowasakula” thitho katinodha rumeli-iwa volowa mu Umwene wa dhulu. w24.09 22 ¶10; 23 ¶12-13

I-yo othene ninofuna ira nifwanye vyongo vyofuneeleya vyavaingumii-u thitho fwanyela atu abanja li-u vyongo vyofuneeleya vyavaingumini. (Nam. 7:12; 1 Ti. 5:8) Nasakanga basa ninothuulela kobiri dhinawachele i-yo. Mbwenye akala mutu unothuulelave vyongo vyevi baa-i unooda kala mutu wenuo unowenda mosogoleliwa na vyongo vinoona liye baa-i. Akala nitokaana iroromelo, ninooda thuulelanga vya basa yeniyo inasakunle i-yo munakhuzele aliwa uxamwali-u na Yohova. Ninooda dhifuka ira: “N’nga basila inodha ndiiri-a ira ndiirenga vyongo vinoidanana Yohova?” (San. 6:16-19) “N’nga ndinodha dodomi-a lambela wanga thitho inodha iri-a ira ndi-iyane na banja langa wahora yolaphela?” Akala ndi-eeno, kavinodha kala pama rumela basiyo angalive ira mabasa anosoweya. Namwasa oi nitokaana iroromelo, vyongo vinasakhunle i-yo vinofwanela thonyi-edhanga ira ninororomela ira Yohova unodha nisamalela.—Mat. 6:33; Aeb. 13:5. w25.03 21 ¶5-6

Hora dhothene nidhilimbi-edhenga ona abali naarongoli-u ninga mwemo munowaonela Yohova. Ninooda irana vyevi voona makalelo apama ana aliwa a-kala othakala oi vira wa hora anoa-iya. Ninooda mali-a a-vwana uliothene. Ee-no atu anofuna ireliwa vyevi anooda kopeya novolowa paradaizoni wauzimu. Ninodha dhowanave m’simba Yohova modhowa nodhowa namwasa wa paradaizo unisaka-edhele liye. Mutu uliwethene unofuna kaana ingumi yapama, didili-iwa, kala o-otekenyeya na obarelaya, unofwanela volowa muparadaizula thitho kanofwanela kumamo. Mbwenye ninofwanela kala osamala namwasa oi Satana unofunechecha anganikumi-idhemo. (1 Pe. 5:8; Apk. 12:9) Kanirumeli-e ira Satana airena vyevyo. Dhoweni niireni vyongo vyothene vinaode i-yo ira paradaizo wauzimula, udhowenave kala ochena, obaleya thitho warendele. w24.04 24-25 ¶18-19

Anamabala, munooda kami-a a-iminyu ira tam’lambelenga Yohova na mirimiwa yothene. Vyoonga na vyoira vinyu, vithonyi-edhenga vyongo vyokuza lambela ninga funjedha Bibilya, fwanyeya va migumanoni thitho laba basa yolaleela ndi vyongo vyofuneya maningi kwaranya yongo iliyothene. Mwa-airenga e-no a-imao anooda dhiona ira mbaa Mboni dha Yohova namwasa oi “ano-arela anamabaliwa.” Vyo-arelavovyee pyoi katina-elenga valimburo loroma lambela waimbarimbari venango thitho i-yelatu lambela Yohova. N’nga mutu u-iidhe lambela Yohova kanooda thitho dhakala okoka vauxamwali na Yohova? Kabe, namwasa oi unooda chinyuwa noroma okoka m’lambela mundhila yofwanelela. Ira vyevi viodeye, unofwanela dhiyevi-a norumela ira akami-iwe naandimuwa avapingoni. (Yak. 5:14) Pyaimbarimbari ira unofwanela kaana thindhi mbwenye thindhilo linom’ganyali-a namwasa oi unoroma thitho kala vauxamwali na Yohova. w24.07 24-25 ¶18-19

N’nga munaire a-vi ira imweendinyu ikale yolemezeya? Imweendi yaulukulanga, munoroma thitho landeya maningi na fwinyuo. N’nga chini inaukami-eni ira mwa-aire vyongo vyothakala? Murambelenga kala ambilive, umwa vyomwa vyolezeli-a maningi thitho tapanyanga myasa dho-ofwanelela dhokuza gonana. (Aef. 5:3) Vyongo vyevi vinooda uiri-ani ira mukaena naluveluve ofuna ogonana thitho ira dhikondi-a ukalenga orucha. Munooda ira pama tapanyanga vaduzi na vaduzi vyongo vinairi-e ira imweendinyu ikalenga yolemezeya. (San. 22:3) Vamwasa othonyi-edhana udhivela Vira wahora ndhila dhinango dhothonyi-edhelana udhivela dhinooda kala dhofwanelela. Mbwenye mwaroma kaana naluveluve ofuna gonana, munooda rucheya sakula vyongo mwazelu. (Nyu. 1:2; 2:6) Mbwenye ndhila dhinango dhothonyi-edhelana udhivela dhinooda iri-a ira muimwanengana dhikondi-a irana vyongo vyo-ofwanelela. (San. 6:27) Ee-no imweendiyo ya-anafiye undendai mutapanyenga novwelana ira mu-indi-edhelenga basa ndhila dhofwanelela thonyi-edhelana udhivela movwelana na makhundo a Bibilyani.—1 At. 4:3-7. w24.05 29 ¶10-11

Nikalenga onyindeleya. Ninofuna ira atu enango taninyindelenga simbwasimbwa vahora yorucha. (San. 17:17) N’nga ninaire a-vi ira nikale atu onyindeleya? Ninofwanela dhilimbi-edhanga thonyi-edha makalelo apama hora dhothene. Mofwanafwani-a, nidhilimbi-edhenga kwakwaneli-edha vilanyedhile i-yo thitho nidhilimbi-edhenga lokota hora. Andimuwa avapingoni onyindeleya anokami-a maningi pingo. N’nga anoirana a-vi vyevi? Namalaleya kanodhikumbanyedha aidhiwa ira unooda ongi-ana na ndimuwa wavapingoni hora iliyothene, simbwasimbwa namalaleya wa gurupuni mwiwa. Anamalaleya anovivwa ira anodhiveliwiwa taidhiwa ira andimuwa avapingoni mbokozeya akami-a. Thitho andimuwa avapingonao tavelela malangi-o okumela Bibilyani na mumabhukwi-u a-kala mathuuleloni mwiwa, abali naarongola anowaroromela. Abali naarongola anowaroromela andimuwa avapingoni enao ta-anoonga myasa yasengeredho naandimuwa avapingoni enao anoira vyongo vilanyedhile aliwa. w24.06 30 ¶14-15

Malamboano kaninadedi-edhele ira Yohova akhumi-e vyorucha vi-u vyothene mbwenye ninodha m’nyindela ira unodha nikami-a. (Sal. 41:3) Liye unooda indi-edha basa zimwee ochena ira aniva-e kopolo, zelu thitho rendele wa rimani ira nivilele. (San. 18:14; Afl. 4:13) Unonilimbi-a thitho voniva-a idedi-edho yoi unodha mali-a marenda othene. (Esa. 33:24) Yohova atoolokhota madhu Bibilyani enao anonikaati-a rima vathi nagumanangana nyarwa dho-iyana i-yana. (Aro. 15:4) Rongola mwinango wau West Africa angafwanyiwile na khansa, akalelechave ula. Liye aongile ira: “Lemba lelo landilimbi-idhe maningi ndi la Esaya 26:3. Versoli linondilimbi-a ira Yohova unodha ndikami-a kaana rendele warimani wenuo unandikami-e idhiwa vyoira ndagumanangana vyowesedha.” Akala mutogumanana nyarwa ilukhulu thitho kamuna yoira, n’nga vatokala lemba lelo linaulimbi-eni? w24.12 24 ¶17-18

Ndimwemo thitho andimuwa avapingoni munoirela aliwa vyongo naatu enao a-olowile. Aliwa anofuna ira mabila odimela “tawelele wa Yohova.” (Luk. 15:22-24, 32) Dhulu unokala sangalala maningi mutu odawa awelela, saasawa thitho vailambo yavathi. (Luk. 15:7) Pyooneelatu ira Yohova kanolema atu o-ochinyuwa. Mbwenye kanoatatilelatu atwao. Unofuna ira aliwa tawelele. Mathuulelo a Yohova waatu odawa atoongiwa va lemba la Oseya 14:4, vevo vanoonga ira: “Ndinodha mali-a a-roromeleya wiwa. Ndinodha adhiveliwana mofuna wanga, namwasa oi ndito-iya anyanyuwela.” Vinooneya ira madhu enala, anokami-a andimuwa avapingoni ira taonenga izindiyelo iliyothene yothonyi-edha ira mutuo utoroma chinyuwa. Madhwala anosikimizela thitho atu am’iidhe Yohova ira liye unowadhiveliwana thitho unofuna ira tawelele mombaranya. w24.08 28 ¶8-9

Imbarimbari choi kai hora dhothene vevo atu vanosimba aliwa vyongo viirile i-yo. Hora dhinango ninooda velela hori-u, kopolo na vyongo vi-u mbwenye vasogolovee, dabwanga ira mutuo kanonisimba vavyongo vim’mwirele i-yo. Akala vyevi vitoniireela, n’nga ninaire a-vi ira na-anyanyuwe nodhowanave kala osangalala? Nithuulelenga kaiira ninosangalala na vyongo vinoira mutu nam’va-a vyongo. (May. 20:35) Ninoodave kala osangalala masiki vioneenga ira mutuo kanosimba. N’nga chini inanikami-e? Mathuulelwi-u takalenga osazi-edha Yohova. Liye unovelela vyongo vyapama waatu mo-obala akala anosimba venango kabe. (Mat. 5:43-48) Yohova unolanyedha ira navelelanga vyongo “mo-odedi-edhela wachela yongo iliyothene,” pyoi “yotuva yi-u inodha kala ilukulu.” (Luk. 6:35) Madhu oi “yongo iliyothene” anooda thapulela thitho vyevyo vinaire atu enango vothonyi-edha simba. Akala atonisimba venango kabe, Yohova unodha niweli-edha namwasa wa vyongo vyapama viirele i-yo atu enango thitho namwasa ‘ova-a mosangalala.’—San. 19:17; 2 Ak. 9:7. w24.09 29 ¶14-16