Mbotubona malilo anshotucita pamalilo shileendelana a Baibo nshoyaamba, kwiilikaawo ashitokonkelaawo nsheshi twaambeewo:

•   Cilibo kabotu kulila na shikamukowa nabi shicibusa wesu wafwa. Bashikwiiya bakwe Yesu bakalinga kulila na shikamukowa nabi shicibusa wabo wafwa. (Joni 11:33-35, 38; Milimo 8:2; 9:39) Aboobo tatuboni malilo anga nciindi ca kusekelela akunwa bwalwa. (Shikushimikila 3:1, 4; 7:1-4) Sombi tulabona ayi nciindi cakutondesha nkuumbu akuyeeyelako bamwi.​—Bene Loma 12:15.

•   Bafu taaku ncobeshi. Teshi mulandu ankotwakakulila na tunshiyanshiya bantu bakumusena nkotukala ntobakonkela, tulaleya kushoma shintu shiteendelani a Baibo nshoyaamba, mbuli kushoma ayi muntu na wafwa tafwitilili alimwi ayi alatalika kupensha bantu boomi. (Shikushimikila 9:5, 6, 10) Tunshiyanshiya bantu ntobakonkela tuleelikawo a kukuunka mililo pa malilo kulindilila citumbi, kusebensesha maali aanji abuumbi pa malilo apa kwiibaluka mufu, kupa shipo bafu, kubandika abafu akubasenga shintu alimwi ashintu shimwi bantu nshobacita kuwooyo wafwitwa ngwaeebenaakwe. Tulaleya kwaabanamo lubasu mutunshiyanshiya utu mukwiinga tulakonkela Baibo nshoyaamba ayi: ‘Amuswe pakati ka bakunsengwe, . . . alimwi mutacati cintu citasalalite.’​—2 Bene Kolinto 6:17.

•   Bafu balaakubushikwa. Baibo ilaamba ayi kulaakuba kubuka kwa bafu alimwi kulaakuba ciindi lufu ndyeshi lukabule kubaako. (Milimo 24:15; Ciyubululo 21:4) Kulangila uku kulatucafwa kutanoolila cakwiindilisha na shikamukowa nabi shicibusa wesu wafwa, bweenka mbokwakabacafwa Beneklistu bakutaanguna.​—1 Bene Tesalonika 4:13.

•   Baibo ilatuyumisha kuba bantu baliceesha. (Tushimpi 11:2) Tatuboni malilo ayi nciindi ca “kulisumpula” pa shintu nshotucite na beshicibusa mbotucite. (1 Joni 2:16) Tulaleya kupanga malilo esu anga kuli nshotutosekelela, mbuli kuula bokisi idulite abuumbi na kufwala shakufwala shidulite kwaamba ayi bantu batukuumbwe.

•   Tatukakatishi bantu kushoma nshotushoma pamakani amalilo. Tulakonkela Baibo nshoyaamba ayi: ‘Muntu woonse alaakulyaambilila kuli Lesa nshaakacita.’ (Bene Loma 14:12) Nacibi boobo, na bantu batwiipusha pa nshotushoma anshotucita pamalilo, tulabasansulwiita munshila ya bulemu alimwi cakulibombya.​—1 Pita 3:15.

Ino malilo a Bakamboni alaba buyani?

 Malilo nkwaabeta: Mukwashi ucite malilo ngoosala malilo nkweshi abete mbuli Ŋanda ya Bwaami njeshi basebenseshe, ŋanda ya malilo alimwi amaanda mufu nkweshi abikwe.

 Likani lyapa malilo: Likani lilaambwa kuyuminisha baabo bacite buumba kwiinda mukubasansulwiita Baibo nshoyaamba pa bafu alimwi apakulangila kwa kubushikwa kwa bafu. (Joni 11:25; Bene Loma 5:12; 2 Pita 3:13) Mulikani lyapa malilo, mwaambi inga waamba apa mibo ibotu mufu njaakalinga kucite, alimwi kucita boobo inga kwayuminisha baabo bacanikaako kumalilo.​—2 Samwelo 1:17-27.

 Inga beemba alwiimbo lweendelana a Baibo nshoyaamba. (Bene Kolose 3:16) Likani lilamana amupailo wakuyuminisha baabo batoolila.​—Bene Filipi 4:6, 7.

 Kupa maali: Tatulipilishi bantu na besa mukubungana andiswe nabi na besa kumalilo esu, alimwi tatwiinshimo mbale yakusenga maali.​—Mateyo 10:8.

 Beelete kucanikaako: Bantu bateshi Bakamboni abalo cilibo kabotu kucanikaako kumalilo na atolwa ku Ŋanda ya Bwaami, bweenka mbociba pakubungana kumwi nkotubaako.

Sa Bakamboni balacanikaako kumalilo na muntu wa kubupailishi bumwi wafwa?

 Kamboni uli woonse alyeelete kulisalila mwiine kweelana anjeelacaamba yakwe yakaiishikwa a Baibo. (1 Timoti 1:19) Sombi tulaleya kwaabanamo lubasu mushintu shimwi bantu nshobacita pamalilo nshotubona ayi tasheendelani a Baibo nshoyaamba.​—2 Bene Kolinto 6:14-17.