OVELELE pome (maçã) muna ntayi. Onukwiti e bundu vitila watula kio muna kitunga. Ola zayingi osadidi, kansi kuyoyele ko, wakubama mu sala diaka salu kiankaka. O ngudi aku wina vana ndambu a nti ye kiese kiawonso mu sala kena yo mokena ye yitu yankaka ye akundi ana bekunsadisanga mu vela e bundu. Owau okitukidi se nleke, nze una kakala vava ongeye wakala kingyana-ngyana mu mvu miviokele. Kukwikidi ko vo i yandi wamona ekolo kanunuvanga mu nza eyi iviokele. Wamona vava ngudi aku kayoyanga mu kuma kia mayela, wakunsimba muna koko vava kiafinama lufwa lwandi ye wadila vana ziami kiandi. Owau una diaka o moyo yo vimpi wambote kumosi ye ankaka.

Tuzeye wo vo ediadi disinga vangama. Tuzeye wo kadi e nsilu mia Nzambi lungana kaka milungananga. Mu kunku kiaki, tubadika una nsilu miankaka mia Kintinu milunganena ke kolo ko yo twasa e vita ya Armangedo. Tufimpa mpe miaka nsilu mia Kintinu milungana vava Armangedo ivioka. Ekwe kiese tukala kiau vava Kintinu kia Nzambi kiyala nza yawonso yo vanga lekwa yawonso se yampa!