Wantu Bazolele Zay’e Mvutu
Wantu Bazolele Zay’e Mvutu
“Konso muntu una ye ngindu zandi mu kuma kia Yesu. Twakala ye lukwikilu yovo ve, yeto awonso tukiyuvulanga: ‘Nani i muntu ndioyo?’”—STAN GUTHRIE, NSONEKI.
WU bevavanga zaya mayingi mu kuma kia Yesu. Ndonga beyangalelanga e nkanda mivaikiswanga mu kuma kiandi. E filme mu kuma kia Yesu zau zitoma songwanga. Kana una vo i wau, yuvu mu kuma kia Yesu yakinu. Wantu ngindu zaswaswana bekalanga zau mu kuma kia Yesu.
Ke mvu miayingi ko miavioka, amwangi a nsangu wole balomba kwa wantu bavan’e mvutu za kiuvu eki: “O Yesu nani kakala?” Tala e mvutu bavana o wantu:
●“Nanga nlongi kakala ona wasisa mbandu ambote ya songa nkenda.”
●“Mpasi muntu kakala ona wakala ye zingu kiaswaswana ye kia wantu akaka.”
●“Ka vena ziku ko kisonganga vo Yesu kazinga kikilu.”
●“Yesu i Mwan’a Nzambi ona wawutuka, fwa yo fulwa mu kutuvevola muna masumu. Wakinu zinga yamu unu, osinga kwiza diaka ova nza.”
●“Ikwikilanga vo Yesu Kristu i mwan’amosi kaka a Nzambi, ona wina vo muntu ye Nzambi vana vau.”
●“Lusansu mu kuma kia Yesu savu ya wan’akete.”
Kieleka, e mvutu zazi zaswaswana ke zawonso ko zilenda kala zaludi. Nga vena ye nto yasikididi tulenda sololwela mvutu zasikila za yuvu tuyuvulanga mu kuma kia Yesu? Amwangi a finkanda fiafi bekwikilanga vo Bibila i Diambu dia Nzambi. Diau kaka dikutuzayisanga e ludi kiawonso mu kuma kia Yesu. *—2 Timoteo 3:16.
Mun’elongi dilanda, tubadika mvutu za Nkand’a Nzambi za yuvu yakaka iyuvulwanga mu kuma kia Yesu. Yandi kibeni wavova vo “konso on’okwikilanga muna yandi” ovuluzwa. (Yoane 3:16) Tulombele wafimpa e mvutu zazi yo sola ngeye kibeni kana vo ozola longoka mayingi mu kuma kia Yesu ye una olenda songela lukwikilu muna yandi.
[Mvovo Vana Yand’a]
^ tini. 11 Muna zaya mayingi, tala muna kapu kia 2, “Nkand’a Nzambi—Nkanda Watuka kwa Nzambi,” muna nkanda O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
