Yuvu Y’atangi eto

Nga Mbangi za Yave Betondanga Luwawanu Luankulu?

Mbangi za Yave bebadikilanga Nkand’a Nzambi vo i Diambu dia Nzambi, muna diadi betondanga Luwawanu Luankulu kumosi ye Luwawanu Luampa vo i Diambu dia Nzambi. Kansi, vana fulu kia sadila mvovo Luwawanu Luankulu yovo Luampa, betoma sadilanga mvovo “Sono ya Kiyibere” ye “Sono ya Kingerekia ya Kikristu,” zina vo i ndinga za sina za sonekenwa Nkand’a Nzambi.

Kuna diak’e sambu, awana bekiyikilanga vo Akristu, ke betondanga Luwawanu Luankulu ko. Bevovanga vo e kunku kiaki Nzambi a makasi kiyikanga on’otondanga vita za mpondi ye mavangu ke mena ngwizani ko yo Nzambi azola oyikwanga muna Luwawanu Luampa. Bevovanga mpe vo mambu mena muna Luwawanu Luankulu mu kuma kia Ayuda masonamena, ke mafwanukini Akristu ko. Kansi tu, e nkanikinu una muna Nsiku 12:​32, usonganga vo ke vakudikilwa ko ngatu katulwa diambu. Nga kiaki i kuma kiasikila mu bembola Luwawanu Luankulu lwa Nkand’a Nzambi?

Muna mvu wa 50 wa tandu kia Kristu, vava Paulu wa ntumwa kakingula esi Tesalonika kuna nsi ya Ngerekia, “ubamokesène muna sono, obakwidi, yo songa vo o Kristu ofwete mona mpasi, yo fuluka muna mafwa.” (Mavangu 17:​1-3) Akaka muna awana bawa elongi diandi bakituka Akristu, i bosi Paulu wabavovesa vo: “Una nwatambula kwa yeto diambu dia lutumu, dina vo dia Nzambi, nwatambula dio, ke nze diambu dia wantu ko, una din’e kieleka, diambu dia Nzambi kaka.” (1 Tesalonika 2:​13) Muna 27 ma Sono ya Kingerekia ya Kikristu, Nsangu zambote za Matai kaka zakala zasonama muna kolo kina Paulu kabakingula. Ozevo, e “Sono” kasadilanga Paulu i Sono ya Kiyibere.

Kieleka, e Sono ya Kingerekia ya Kikristu tezo kia nkumbu 320 iyikanga nadede oma mena mu Sono ya Kiyibere. Muna fulu yakaka, iyikanga tezo kia nkumbu 100 oma mena mu Sono ya Kiyibere, kansi mateza swaswana. Ekuma? “Kadi konso mana mateka sonekwa, masonekenwa muna longwa kweto, muna luzindalalu, yo muna fiauzi wa sono; twakala ye vuvu.” (Roma 15:⁠4) Ediadi disonganga vo awana besadilanga Nkand’a Nzambi wamvimba, nluta bebakanga.

E Sono ya Kingerekia ya Kikristu mu nkubilwa ya Sono ya Kiyibere yatuka. I Diambu dia Nzambi kwandi dikutusengomonanga makani ma Nzambi. Muna kuma kiaki, ka tufwete veza e Sono ya Kiyibere ko. Herbert H. Farmer wa nlongi a oma ma Nzambi kuna Faculdade ya Cambridge, wavova vo, Nsangu Zambote “kazilendi bakulwa ko lembi zaya lusansu lwa nkangu w’ekangu diankulu nze una tutanganga muna Luwawanu Luankulu.”

Diambu dia Nzambi ke disobanga ko. Kansi, ‘e ngyend’a nsongi ina nze ntemo ankezimi, ukezimang’aka yavana kutoma kia.’ (Ngana 4:​18) Muna kudikila e Sono ya Kingerekia ya Kikristu muna Nkand’a Nzambi, Nzambi wawokesa e ntemo muna ndungan’ekani diandi, lembi kulula o mfunu wa Sono ya Kiyibere. Sono yayi yawonso i “diambu dia Nzambi, disikila yakwele mvu.”​—⁠1 Petelo 1:​24, 25.