O Kala ye Sungididi Nluta Ditwasanga

NGA walungalala okalanga mu sadila malau ma sila umbangi muna zunga kia nkutakani eno? Mpangi zeto kuna mbanza Turku kuna Finlândia, bamona nluta mia kala ye sungididi.

Ke kolo kiayingi ko kiviokele, ampangi kuna mbanza Turku bamona e buka kia esi Ásia muna mbanz’au bayiza fokola tunga nzaza yampwena vana yanzala kia vangila nzaza kia mbanza yayi. I bosi, mpangi mosi wavava zaya e hotel ina nzenza zazi balekanga. Wazayiswa mpe vo muna mene-mene, makalu mayendanga kuna hotel mu kwenda landa asadi awaya yo kubanata kuna fulu kia salu. Vana vau, wazayisa ampangi bena muna nkutakani a ndinga Kingelezo muna mbanza Turku.

Akuluntu a nkutakani yayi bamona vo e nzenza zayingi zakala muna zunga kiau diakituka s’elau diampwena dia kubasila umbangi. Muna nzaki zawonso, basikidisa dina balenda vanga mu sila umbangi kwa wantu awaya. Kina kia lumingu, ateleki kumi balungana lukufi ye fulu kiningamenanga makalu muna ola ya nsambwadi ya mene. Kansi, ke vakala asadi ko. Ampangi bakiyuvula vo: ‘Nga ke tulweke mu ola yambote ko?’ I bosi, nsadi mosi wakala mu mvwatu mia salu wayiza. Kuna kwalanda nsadi akaka wanlanda, i bosi ayingi bayiza. Ke vavioka kolo ko, e fulu kia vingidila makalu kiazala ye asadi. Ateleki bayantika sila umbangi kw’asadi yo sadila nkanda mia Kingelezo. Vavioka tezo kia ola mosi asadi mu baka e fulu kia fonga mun’ekalu, ediadi diavana ntangwa yafwana kwa mpangi mu mokena ye asadi ayingi. Vava ekalu diayenda, asadi banata 126 dia yinkanda-nkanda ye 329 di’Eyingidilu ye Despertai!

E nluta batambula ampangi miabakasakesa mu vutukila salu kiaki mu lumingu lwalanda muna nkingula a nkengi a zunga. Mu lumbu kimosi kia nokang’e mvula, nkengi a zunga wafila lukutakanu lwa mpaika mu salu kia umbangi muna ola yasambanu ye ndambu, ateleki 24 bayenda kuna fulu kiningamenanga makalu. Mu nkumbu wau, banata nkanda muna nding’a Tagalo kadi bawanana ye nzenza zayingi za esi Filipinas. Muna mene, vava makalu mayenda, asadi banata nkanda 7, yinkanda-nkanda 69 ye 479 di’Eyingidilu ye Despertai! Yindula kiese bamona mpangi z’akala ye z’akento ana basala e salu kiaki!

Vitila asadi bavutuka kuna nsi zau, ampangi bakingula ayingi muna yau kuna hotel yo kubasasila mambu mayingi ma Kintinu. Asadi akaka bavova vo, basilwa kala umbangi kwa Mbangi za Yave muna nsi zakaka. Asadi basonga luyangalalu lwau kwa mpangi muna ngolo bavanga za kubasila umbangi ekolo bakala kuna Finlândia.

Nga osadilanga malau ma sila umbangi muna zunga kia nkutakani eno? Nga osianga ngolo za sila umbangi kwa wantu a nsi zakaka? Avo i wau, ngeye mpe olenda mona kiese bamona mpangi zeto kuna mbanza Turku.

[Nenga kia Nsi/​Foto ina muna lukaya lwa 32]

FINLÂNDIA

Turku

HELSINKI