DUMBELELE zole bakangalanga muna zunga kiviokelanga wantu ayingi muna mbanz’a Baguio, kuna Filipinas. Bamona e tandabala kia sila umbangi, kansi ke bafinama kio ko. Mpangi Helen ona wakala vana ndambu a tandabala, wabasevesa. E dumbelele bakwamanana kangala, kansi batoma sivika una e mpangi Helen kabasevesela.

I bosi, vava e dumbelele bavutukanga kuna nzo au muna autocarro, bamona masono mampwena ma jw.org malamikwa muna yaka kia Seka dia Kintinu. Basungamena vo masono mau mamosi bamona vana tandabala kia sila umbangi. Muna kuma kiaki, bakulumuka muna autocarro yo kwenda vana ntwal’a Seka dia Kintinu yo tala e programa ya tukutakanu yalamikwa vana mwelo a Seka dia Kintinu.

E dumbelele zazi bayenda muna lukutakanu lwalanda. Ozeye kana nani bamona vava bakala muna Seka dia Kintinu? I mpangi Helen! Basungamena vo i yandi wabasevesa vana tandabala. Mpangi Helen wavova vo: “Ekolo bayizanga kuna yakala yatokana kikilu, kadi yayindula vo nkia diambu diambi mvangidi.” Kansi, basasila mpangi Helen dina diavangama.

E dumbelele zazi batoma yangalela e malongi bawá muna lukutakanu yo zola basongwa kwa ampangi. Kuna mfoko a lukutakanu vava bamona ampangi bavelelesanga e Seka dia Kintinu, oyau bayuvula kana vo balenda mpe velelesa. Owau, mosi muna yau, wayenda ku nsi ankaka, kansi wankaka okwamanananga kwenda muna tukutakanu yo longoka e Bibila. Mawonso mama mavangama mu kuma kia tusevo!