Elimbururo lyomoBibeli

 “Nonsapi doUhompa,” edi ava tumbura poyiruwo yimwe asi “nonsapi dokoUhompa,” kwa tamba kononkondo dokupatwilira vantu nzira “mokuza moUhompa waKarunga.” (Mateusa 16:19; The New American Bible; Yirugana 14:22) a Jesus kwa geve kwaPeturusa “nonsapi dokoUhompa wemeguru.” Eyi kutanta asi Peturusa kwa gwene nonkondo dokuuyunga kuhamena vantu wovalimburukwi, pokugwana mpepo zokupongoka zaKarunga, awo kuvhura kuhafera situmbukira sokuza moUhompa waKarunga wemeguru.

Kovantu musinke va ruganesere nonsapi?

 Peturusa kwa ruganesere nonkondo edi ga mu pere Karunga a zegwilira nzira nombunga ntatu va hwilire moUhompa:

1.   Vajuda ntani vantu ava va litjindjire va kare Vajuda. Konyima zonomfa daJesus, Peturusa kwa korangedere mbunga zoVajuda ava va kere vapuli va tambure Jesus ngaHompa goUhompa ogu ga horowora Karunga. Peturusa kwa va tanterere eyi nava rugana yipo va paruke. Monkedi ezi age ngwendi kwa va zegwilire nzira mokuza moUhompa ntani mayovi govantu kwa “tambwire nehafo eyi ga tente.”​—Yirugana 2:38-41.

2.   Vasamaliya. Konyima Peturusa kwa mu tumine koVasamaliya. b Age hena kwa ruganesere nsapi zoUhompa apa nage nomupositoli Johanesa va, ‘kandererere asi vapuli owo va gwane mpepo zokupongoka.’ (Yirugana 8:14-17) Eyi kwa zegwililire nzira Vasamaliya va hwilire moUhompa.

3.   Vantu ava va dilire kukara vapuli. Nomvhura ntatu noharufa konyima zonomfa daJesus, Karunga kwa tanterere Peturusa asi Vantu ava va dilire kukara vapuli (vantu ava va dilire kukara Vajuda) nawo ngava kara nompito zokuza moUhompa. Peturusa kwa ruganesere nsapi zimwe pokuzuvhisira vantu ava va dilire kukara vapuli, monkedi ezi age ngwendi kwa va zegwilire evero yipo va gwane mpepo zokuponga, va kare Vakriste, ntani va kare vamwe woUhompa waKarunga.​—Yirugana 10:30-35, 44, 45.

Yisinke ayi tanta “mokuza moUhompa waKarunga”?

 Ava ava ‘zi moUhompa’ kukapangera kumwe naJesus meguru. Bibeli kwa pumba asi awo ngava ‘ka hingira va ka pangure’ ntani ngava ka “pangera ngovahompa evhu nalinye.”​—Rukasa 22:29, 30; Ehororo 5:9, 10.

Magano gepuko kuhamena nonsapi doUhompa

 Egano lyepuko: Eguru kwa ndindilire Peturusa a tokore asi siruwo musinke sokuruganesa nonsapi doUhompa.

 Usili: Apa Jesus ga uyungire kuhamena nonsapi doUhompa, age kwa tanterere Peturusa asi: “Nkenye eyi ngo manga pevhu, nemeguru namo ngava yi manga, ano nkenye eyi ngo mangurura pevhu, nemeguru namo ngava yi mangurura.” (Mateusa 16:19, The New American Bible) Nampili ngomu vamwe ava kwata egano asi nonkango edi kutamba asi Peturusa ga kara nononkondo dokutokora eyi ayi horoka meguru, nonkangorugano domoRugereka kulikida asi Peturusa kwa kweme matokoro aga va tulire po meguru mevango lyokugapitisira. c

 Bibeli kulikida asi Peturusa nage kwa mu horowere a ze meguru apa ga ruganesere nonsapi doUhompa. Pasihonena, age kwa limburukwire komavyukiso gokutunda kwaKarunga apa ga ruganesere nsapi zautatu.​—Yirugana 10:19, 20.