Sofoni 1:1-18
1 Dyambu ya Yehova yina kwizaka na Sofoni* mwana ya Kushi mwana ya Gedalia mwana ya Amaria mwana ya Ezekyase na bilumbu ya Yozyase mwana ya Amoni mfumu ya Yuda:
2 “Mu ke zimbisa bima nyonso na zulu ya ntoto,” Me zonza Yehova.
3 “Mu ke zimbisa muntu mpe kibulu.
Mu ke zimbisa bandeke ya mazulu mpe bambisi ya mubu,Mpe bima yina ke budisaka dibaku* kintwadi na bantu ya yimbi;Mpe mu ke katula bantu na zulu ya ntoto,” me zonza Yehova.
4 “Mu ke tamba diboko ya munu samu na kunwanisa YudaMpe samu na kunwanisa bantu nyonso yina ke zingaka na Yeruzalemi,Mpe mu ke katula na kisika yayi bima nyonso ya Baale,Nkumbu ya banganga-nzambi ya banzambi ya banzenza kintwadi na banganga-nzambi ya nkaka,
5 Mpe ba yina ke fukamaka na baveranda ya zulu ya bayinzo na mantwala ya kimvuka ya basoda ya mazulu,Mpe ba yina ke fukamaka mpe ke kudyaka ndefi ya kuvanda ya kukwikama na YehovaNa ntangu ba ke na kudyaka ndefi ya kuvanda ya kukwikama na Malkame;
6 Mpe ba yina me bika kulanda YehovaMpe ba yina ke sosaka ve Yehova to ke lombaka ve lutwadusu ya yandi.”
7 Beno vanda swi na mantwala ya Yehova Mfumu ya Kulutila Nene, samu kilumbu ya Yehova me kuma pene-pene.
Yehova me bongisa munkayulu; yandi me kumisa santu ba yina yandi me bokila.
8 “Na kilumbu ya munkayulu ya Yehova, mu ke pesa kitumbu na baprinse,Na bana ya mfumu, mpe na ba yina nyonso ke lwataka bilele ya nzenza.
9 Na kilumbu yina, mu ke pesa kitumbu na ba yina nyonso ke yulukaka na kisika ya kuzanguka,*Ba yina ke fulusaka yinzo ya mfumu ya bawu na mambu ya ngolo mpe na luvunu.
10 Na kilumbu yina,” me zonza Yehova,“Ya ke vanda na makelele yina ke katuka na Porte ya Bambisi,Bidilu yina ke katuka na Kartye ya Zole ya mbanza,Mpe makelele ya ngolo yina ke katuka na bamongo ya fioti.
11 Beno dila, beno bantu yina ke zingaka na Makteshe,*Samu ba me kufwa* ba yina nyonso ke salaka mumbungu;Ba me kufwa ba yina nyonso ke tezaka arza.
12 Na ntangu yina, mu ke sosa mbote-mbote Yeruzalemi na bamwinda,Mpe mu ke pesa kitumbu na ba yina ke talaka ti ba ke ya kulunga, ba yina ke zonzaka na bantima ya bawu,‘Yehova ke sala ve mambu ya mbote, mpe yandi ke sala ve mambu ya yimbi.’
13 Ba ke yiba bimvwama ya bawu mpe ba ke mwangisa bayinzo ya bawu.
Ba ke tunga bayinzo, kasi ba ke vanda ve kuna;Mpe ba ke kunda bayinti ya bambuma ya vinu, kasi ba ke kunwa ve vinu ya yawu.
14 Kilumbu ya nene ya Yehova me kuma pene-pene!
Ya me kuma pene-pene, mpe ya ke na kwizaka na mbangu mingi!
Makelele ya kilumbu ya Yehova ke ndudi.
Na kilumbu yango, soda ya ngolo ke ganga.
15 Kilumbu yango ke kilumbu ya nkele,Kilumbu ya mpasi mpe ya mawa,Kilumbu ya mupepe ya ngolo mpe ya kumwangisa,Kilumbu ya mpimpa mpe ya kitombi,Kilumbu ya matuti mpe ya kitombi ya ngolo,
16 Kilumbu ya makelele ya dimpoka mpe ya makelele ya mvita,Ya kunwanisa bambanza ya ngolo mpe ya kunwanisa bayinzo ya yinda mpe ya zulu.
17 Mu ke sala ti bantu vanda na mpasi,Mpe ba ke tambula mutindu bantu ya meso ya kufwa,Samu ya ke ni na ntadisi ya Yehova ba me sumuka.
Menga ya bawu ke mwangana mutindu fundu-fundu,Mpe musuni* ya bawu mutindu matufi ya bibulu.
18 Arza mpe wolo ya bawu ke lenda ve kuvuukisa bawu na kilumbu ya nkele ya Yehova;Samu tiya ya manzangu ya yandi ke yoka ntoto nyonso,Samu yandi ke nata mwangusulu, mwangusulu mosi ya nene, na zulu ya bantu nyonso yina ke zingaka na ntoto.”
Banoti ya yisi ya paje
^ Ya zola zonza “Yehova me Bumba (Me Bumba Mbote-Mbote).”
^ Ya ke na talanaka ti ya ke bima to bansalulu yina ba vanda sadilaka na banzambi ya biteki.
^ To “estrade.” Ya lenda vanda estrade ya kiti ya mfumu.
^ Ya ke na talanaka ti ya ke kitini ya Yeruzalemi yina ke pene na Porte ya Mbanza.
^ Na ndinga ya ntete “ba ke kanga bayinwa.”
^ Na ndinga ya ntete “mityopo.”
