Levitike 21:1-24
21 Yehova zonzaka dyaka na Moyize: “Zonza na banganga-nzambi, bana ya Aroni, mpe zabisa bawu mambu yayi, ‘Ata muntu na kati ya beno me fwana kukikumisa mvindu samu na muntu* yina me kufwa na kati ya bantu ya yandi.*
2 Kasi yandi lenda sala yawu samu na mpangi ya yandi ya menga mosi, samu na mama ya yandi, tata ya yandi, mwana ya yandi ya bakala, mwana ya yandi ya kento, yaya to leki ya yandi ya bakala.
3 Yandi lenda kukikumisa mpe mvindu samu na kibusi ya yandi, kana yandi zaba ntete ve babakala mpe yandi ke pene-pene na yandi, mpe kana ba me kwela ntete ve yandi.
4 Yandi lenda kukikumisa ve mvindu mpe kukivweza ve samu na kento yina ke na bakala na kati ya bantu ya yandi.
5 Ba me fwana ve kukatula bansuki ya bayintu ya bawu to kuzenga bansongi ya mandefo ya bawu, to kulwalisa banzutu ya bawu.
6 Ba me fwana kuvanda santu samu na Nzambi ya bawu, mpe ba me fwana ve kuvweza nkumbu ya Nzambi ya bawu samu ba ke na pesaka makabu ya Yehova yina me yokama na tiya, dimpa* ya Nzambi ya bawu; ba me fwana kuvanda santu.
7 Ba me fwana ve kukwelana na kento ya kindumba, to kento yina me kukikumisa mvindu to kento ya kufwa makwela, samu nganga-nzambi ke santu samu na Nzambi ya yandi.
8 Nge me fwana kukumisa yandi santu samu yandi ke muntu yina ke na pesaka dimpa ya Nzambi ya nge. Yandi ke vanda santu samu na nge, samu ti munu Yehova, muntu yina ke na kumisaka beno santu, mu ke santu.
9 “‘Kana mwana ya nganga-nzambi ya kento me kukivweza na kusalaka kindumba, yandi me vweza tata ya yandi. Ba ke yoka yandi na tiya.
10 “‘Nganga-nzambi ya nene na kati ya bampangi ya yandi banganga-nzambi, muntu yina ba tulaka mafuta ya kubyeka na zulu ya yintu mpe yina ba tulaka na kisalu* samu na kulwata bilele ya bunganga-nzambi, me fwana ve kubika bansuki ya yandi kidi-kidi to kupasula bilele ya yandi.
11 Yandi me fwana ve kukwenda pene-pene na muntu ya kufwa;* yandi lenda kukikumisa ve mvindu ata ti ya ke tata to mama ya yandi.
12 Yandi me fwana ve kubasika na kisika ya santu mpe yandi me fwana ve kuvweza kisika ya santu ya Nzambi ya yandi, samu ti kidimbu ya kukipesa na Nzambi, mafuta ya kubyeka ya Nzambi ya yandi ke na zulu ya yandi. Mu kele Yehova.
13 “‘Yandi me fwana kukwela kento yina zaba ntete ve babakala.
14 Yandi lenda kwela ve mufwidi, to kento ya kufwa makwela, to kento yina ba me kumisa mvindu, to kento ya kindumba; kasi yandi ke kwela na kati ya bantu ya yandi kento yina zaba ntete ve babakala.
15 Yandi me fwana ve kukumisa bana* ya yandi mvindu na kati ya bantu ya yandi, samu ti mu kele Yehova, muntu yina ke na kumisaka yandi santu.’”
16 Yehova landilaka kuzonza na Moyize:
17 “Zonza na Aroni, ‘Na bambandu nyonso, ata muntu mosi ve na kati ya bana* ya nge yina ke na kifuma lenda kwiza pene-pene samu na kupesa dimpa ya Nzambi ya yandi.
18 Kana muntu ke na kifuma, yandi lenda kwiza ve pene-pene: muntu ya meso ya kufwa to kikata, to muntu yina ke na kizizi ya kubeba,* to muntu yina ke na dikulu to diboko mosi yina me lutila yinda na ya nkaka,
19 to muntu yina ke na dikulu ya kubukana to diboko ya kubukana,
20 to muntu yina ke na nkunki, to muntu ya mutela ya nkufi mingi,* to muntu yina ke na kimbevo na disu, to makwanza to bapata to bambanga ya kubeba.
21 Ata muntu yina ke na kifuma na kati ya bana* ya nganga-nzambi Aroni lenda kwiza pene-pene samu na kupesa makabu ya Yehova yina me yokama na tiya. Samu yandi ke na kifuma, yandi lenda kwiza ve pene-pene samu na kupesa dimpa ya Nzambi ya yandi.
22 Yandi lenda kudya dimpa ya Nzambi ya yandi yina ba me baka na kati ya bima ya kulutila santu mpe na bima ya santu.
23 Kasi yandi lenda kwiza ve pene-pene ya rido mpe yandi lenda kwiza ve pene-pene ya dikuku ya minkayulu, samu yandi ke na kifuma; mpe yandi me fwana ve kuvweza kisika ya munu ya santu samu ti mu kele Yehova, muntu yina ke na kumisaka bawu santu.’”
24 Na yawu Moyize zonzaka na Aroni, na bana ya yandi mpe na bantu nyonso ya Izraele.
Banoti ya yisi ya paje
^ To “mwela.”
^ Ya lenda vanda bantu ya dibuta ya nganga-nzambi. Tala mpe verse 4, 14, na 15.
^ To “madya.” Ya ke samu na kuzonzila minkayulu.
^ Na ndinga ya ntete, “yina ba fulusaka diboko.”
^ To “mwela ya kufwa.” Awa ba me kwelisa nzonzolo ya Kiebre neʹphesh na nzonzolo ya Kiebre yina zola zonza “ya kufwa.”
^ Na ndinga ya ntete, “mbuma.”
^ Na ndinga ya ntete, “mbuma.”
^ Na ndinga ya ntete, “mbombo ya kupasuka.”
^ To ya lenda vanda, “musikimbila.”
^ Na ndinga ya ntete, “mbuma.”
