Levitike 2:1-16
-
Dikabu ya bambuma (1-16)
2 “‘Kasi, kana muntu* pesa dikabu ya bambuma* na Yehova, dikabu ya yandi fwana kuvanda farine ya kitoko. Yandi ke mwangisa mafuta na zulu ya yawu, mpe yandi ke tula maaka ya nsunga ya kitoko na zulu ya yawu.
2 Na manima, yandi ke nata yawu na sika ya bana ya Aroni, banganga-nzambi. Nganga-nzambi ke baka diboko ya kufuluka ya farine ya kitoko yango, na mafuta mpe maaka ya yawu nyonso ya nsunga ya kitoko. Yandi ke yoka yawu samu ya basisa mulinga na zulu ya dikuku ya minkayulu, mutindu kidimbu ya dikabu nyonso, dikabu yina me yokama na tiya, nsunga mosi ya kitoko yina ke sepelisaka* Yehova.
3 Nyonso yina ke bikana na dikabu ya bambuma kele ya Aroni na bana ya yandi. Ya ke kima ya kulutila santu yina ba me baka na kati ya makabu ya Yehova yina me yokama na tiya.
4 “‘Kana nge pesa dikabu ya bambuma yina ba me lamba na kati ya fure, ya ke salama na farine ya kitoko. Ya lenda vanda mampa yina ke ve na levire yina ke mutindu milunga mpe yina ba me vukisa na mafuta, to bipapala yina ke ve na levire, yina ba me tula mafuta na zulu ya yawu.
5 “‘Kana dikabu ya nge kele dikabu ya bambuma yina ba me kalinga,* ya ke salama na farine ya kitoko, yina ke ve na levire mpe yina ba me vukisa na mafuta.
6 Ba ke zenga yawu na bitini, mpe nge fwana kutula mafuta na zulu ya yawu. Ya ke dikabu ya bambuma.
7 “‘Kana dikabu ya nge ke dikabu ya bambuma yina ba me lamba na nzungu, ya ke salama na farine ya kitoko mpe mafuta.
8 Nge ke natina Yehova dikabu ya bambuma yina me salama na bima yayi, mpe ba ke pesa yawu na nganga-nzambi, mpe yandi ke nata yawu pene-pene na dikuku ya minkayulu.
9 Nganga-nzambi ke katula ndambu ya bambuma mutindu kidimbu ya dikabu nyonso, mpe yandi ke yoka yawu samu ya basisa mulinga na zulu ya dikuku ya minkayulu, mutindu dikabu yina me yokama na tiya, nsunga mosi ya kitoko yina ke sepelisaka* Yehova.
10 Yina ke bikana na dikabu ya bambuma kele ya Aroni na bana ya yandi. Ya ke kima ya kulutila santu yina ba me baka na kati ya makabu ya Yehova yina me yokama na tiya.
11 “‘Ata dikabu mosi ya bambuma yina nge ke pesa Yehova ke vanda na levire, samu beno me fwana ve kusala ti mafuta ya nyosi to pate yina ba me vimbisa basisa mulinga mutindu dikabu yina me yokama na tiya samu na Yehova.
12 “‘Beno lenda pesa yawu na Yehova mutindu dikabu ya bambuma ya ntete, kasi beno me fwana kunata ve yawu na dikuku ya minkayulu mutindu kima ya nsunga ya kitoko yina ke sepelisaka.*
13 “‘Nge fwana kutula mungwa na makabu nyonso ya bambuma. Nge fwana kuzimbana ve kutula mungwa ya luwawanu ya Nzambi ya nge na kati ya dikabu ya nge ya bambuma. Nge ke pesa makabu ya nge nyonso na mungwa.
14 “‘Kana dikabu ya bambuma yina nge me pesa Yehova me katuka na bima ya ntete yina nge me buka na bilanga, nge ke pesa bambuma ya malu-malu yina ba me kalinga na tiya, bambuma ya malu-malu* yina ba me tuta. Ya ke vanda dikabu ya bambuma ya bima ya nge ya ntete ya bilanga.
15 Nge ke tula mafuta na zulu ya yawu mpe nge ke tula maaka ya nsunga ya kitoko na zulu ya yawu. Ya ke dikabu ya bambuma.
16 Nganga-nzambi ke yoka ndambu ya bambuma yina ba me tuta mpe mafuta na maaka ya yawu nyonso ya nsunga ya kitoko, samu ya basisa mulinga, mutindu kidimbu ya dikabu nyonso. Ya ke dikabu yina me yokama na tiya samu na Yehova.
