Levitike 13:1-59
13 Yehova landilaka kuzonza na Moyize mpe Aroni:
2 “Kana ditutu* me basika na mpusu ya muntu,* to lota me basika yandi, to tashe, mpe kana ya lenda kuma kimbevo ya bwazi* na mpusu ya yandi, ba me fwana kunata yandi na sika ya nganga-nzambi Aroni, to na sika ya mosi ya bana ya yandi, banganga-nzambi.
3 Nganga-nzambi ke tala mbote-mbote kisika ya mpusu ya yandi yina ke na kimbevo. Kana yandi tala ti mika ya kisika yina ke na kimbevo me kuma mpembe, mpe ya ke na lakisaka ti kimbevo me kota tii na yisi ya mpusu, ya ke kimbevo ya bwazi. Nganga-nzambi ke tala yawu mbote-mbote mpe ke zonza ti muntu yango ke ve ya kuvedila.
4 Kasi, kana tashe yina ke na mpusu ya yandi me kuma mpembe, mpe ya ke na lakisaka ti ya me kota ve tii na yisi ya mpusu, mpe mika me kuma ve mpembe, nganga-nzambi ke tula mbevo yayi na kisika ya yandi mosi bilumbu 7.
5 Na manima nganga-nzambi ke tala dyaka yandi mbote-mbote na kilumbu ya 7, mpe kana ya ke na talanaka ti kimbevo yango me suka mpe ya me mwangana ve na mpusu, nganga-nzambi ke tula dyaka yandi na kisika ya yandi mosi bilumbu 7.
6 “Nganga-nzambi ke tala dyaka yandi mbote-mbote na kilumbu ya 7, mpe kana kimbevo me banda kumanisa mpe me mwangana ve na mpusu, nganga-nzambi ke zonza ti muntu yango ke ya kuvedila. Ya vandaka kaka lota. Muntu yango ke sukula bilele ya yandi mpe ke vanda ya kuvedila.
7 Kasi, kana na manima ya ntangu yina nganga-nzambi me zonza ti yandi ke ya kuvedila, kimbevo yango me mwangana ya tsyeleka na mpusu ya yandi, yandi ke talana dyaka* na mantwala ya nganga-nzambi.
8 Nganga-nzambi ke tala yawu mbote-mbote, mpe kana lota me mwangana na mpusu, nganga-nzambi ke zonza ti yandi ke ve ya kuvedila. Ya ke kimbevo ya bwazi.
9 “Kana kimbevo ya bwazi me basika na muntu, ba me fwana kunata yandi na sika ya nganga-nzambi,
10 mpe nganga-nzambi ke tala yandi mbote-mbote. Kana ya ke na ditutu ya mpembe na mpusu mpe ya me kumisa mika mpembe, mpe ditutu yango me sala mputa ya nene,
11 ya ke kimbevo ya bwazi yina ke manisaka ve, mpe nganga-nzambi ke zonza ti yandi ke ve ya kuvedila. Yandi ke tula ve yandi na kisika ya yandi mosi, samu muntu yango ke ve ya kuvedila.
12 Kana kimbevo ya bwazi me basika na mpusu ya yandi nyonso, mpe ya me fuka nzutu ya muntu yango, kubanda na yintu tii na dikulu, bisika nyonso yina nganga-nzambi lenda tala,
13 mpe kana nganga-nzambi me tala yandi mbote-mbote mpe me tala ti kimbevo ya bwazi me fuka mpusu ya yandi nyonso, yandi ke zonza ti mbevo ke ya kuvedila.* Mpusu nyonso me kuma mpembe, mpe yandi ke ya kuvedila.
14 Kasi konso ntangu yina mputa ya nene ke talana na mpusu, yandi ke vanda ve ya kuvedila.
15 Ntangu nganga-nzambi ke tala mputa ya nene, yandi ke zonza ti muntu yango ke ve ya kuvedila. Mputa ya nene ke mvindu. Ya ke kimbevo ya bwazi.
16 Kasi kana mputa yango ya nene me kuma dyaka mpembe, yandi ke kwenda na sika ya nganga-nzambi.
17 Nganga-nzambi ke tala yandi mbote-mbote, mpe kana kisika yina kimbevo kele me kuma mpembe, nganga-nzambi ke zonza ti mbevo yango ke ya kuvedila. Yandi ke ya kuvedila.
18 “Kana bibon me basika na mpusu ya muntu, mpe ya me manisa,
19 mpe na kisika yina bibon vandaka, ditutu ya mpembe to tashe ya mpembe ya mwa mbwaki me basika, muntu yango me fwana kutalana na sika ya nganga-nzambi.
20 Nganga-nzambi ke tala yawu mbote-mbote. Kana ya ke na lakisaka ti ya me kota tii na yisi ya mpusu, mpe mika me kuma mpembe, nganga-nzambi ke zonza ti muntu yango ke ve ya kuvedila. Ni kimbevo ya bwazi me basika na kati ya bibon.
21 Kasi kana nganga-nzambi me tala yawu mbote-mbote, mpe yandi me tala ti ya ke ve na mika na kati ya yawu, mpe ya me kota ve tii na yisi ya mpusu, mpe ya ke na lakisaka ti ya me banda kuyuma, nganga-nzambi ke tula yandi na kisika ya yandi mosi bilumbu 7.
22 Mpe kana ya me mwangana ya tsyeleka na mpusu, nganga-nzambi ke zonza ti muntu yango ke ve ya kuvedila. Ya ke kimbevo ya bwazi.
23 Kasi kana tashe me bikana na kisika mosi, mpe ya me mwangana ve, ya ke kaka kuvimba ya bibon, mpe nganga-nzambi ke zonza ti muntu yango ke ya kuvedila.
24 “To kana mpusu ya muntu me kuya na tiya mpe musuni ya kati me talana, mpe kana tashe ya mpembe ya mwa mbwaki, to ya mpembe me basika na kisika yina yandi kuyaka,
25 nganga-nzambi ke tala yawu mbote-mbote. Kana mika ya tashe yango me kuma mpembe, mpe ya ke na lakisaka ti tashe yango me kota tii na yisi ya mpusu, ya ke kimbevo ya bwazi yina me basika na kisika yina yandi kuyaka na tiya. Nganga-nzambi ke zonza ti muntu yango ke ve ya kuvedila. Ya ke kimbevo ya bwazi.
26 Kasi kana nganga-nzambi tala yawu mbote-mbote mpe yandi me tala ti ya ke ve na mika ya mpembe na tashe yango, mpe ya me kota ve tii na yisi ya mpusu mpe ya me banda kuyuma, nganga-nzambi ke tula muntu yango na kisika ya yandi mosi bilumbu 7.
27 Nganga-nzambi ke tala yandi mbote-mbote na kilumbu ya 7, mpe kana tashe me mwangana ya tsyeleka na mpusu, nganga-nzambi ke zonza ti muntu yango ke ve ya kuvedila. Ya ke kimbevo ya bwazi.
28 Kasi kana tashe me bikana na kisika mosi mpe ya me mwangana ve na mpusu mpe ya me banda kuyuma, ya ke kaka ditutu na kisika yina yandi kuyaka na tiya. Nganga-nzambi ke zonza ti muntu yango ke ya kuvedila samu ya ke kuvimba ya kisika yina yandi kuyaka na tiya.
29 “Kana kimbevo me basika kento to bakala na yintu to na didofo,*
30 nganga-nzambi ke tala kimbevo yango mbote-mbote. Kana ya ke na lakisaka ti ya me kota tii na yisi ya mpusu mpe bansuki me kuma jone mpe ya me kuma fioti, nganga-nzambi ke zonza ti muntu yango ke ve ya kuvedila. Ya ke kimbevo ya mpusu ya yintu to ya mpusu ya kizizi.* Ya ke kimbevo ya bwazi ya yintu to ya didofo.
31 Kasi kana nganga-nzambi tala ti kimbevo yango me kota ve tii na yisi ya mpusu, mpe ya ke ve na bansuki ya ndombe na kisika yina, nganga-nzambi ke tula mbevo na kisika ya yandi mosi bilumbu 7.
32 Nganga-nzambi ke tala mbote-mbote kimbevo yango na kilumbu ya 7. Kana kimbevo me mwangana ve, mpe bansuki me kuma ve jone kisika yina, mpe ya ke na lakisaka ti kimbevo me kota ve tii na yisi ya mpusu,
33 muntu yango ke zenga bansuki ya yandi, kasi yandi ke zenga ve bansuki ya kisika yina ke na kimbevo. Na manima nganga-nzambi ke tula yandi na kisika ya yandi mosi bilumbu 7.
34 “Na kilumbu ya 7, nganga-nzambi ke tala dyaka mbote-mbote kisika yina kimbevo kele. Kana kimbevo ya mpusu ya yintu mpe ya mpusu ya kizizi me mwangana ve mpe ya ke na lakisaka ti ya me kota ve tii na yisi ya mpusu, nganga-nzambi me fwana kuzonza ti muntu yango ke ya kuvedila. Muntu yango ke sukula bilele ya yandi, mpe ke vanda ya kuvedila.
35 Kasi, kana kimbevo me mwangana ya tsyeleka na mpusu na manima ya yina yandi me kukivedisa,
36 nganga-nzambi ke tala yandi mbote-mbote mpe kana kimbevo me mwangana na mpusu, nganga-nzambi ke ve na nsatu ya kusosa kana ya ke na bansuki ya jone; muntu yango ke ve ya kuvedila.
37 Kasi kana na manima ya kutala yawu mbote-mbote, ya me talana ti kimbevo yango me mwangana ve mpe bansuki ya ndombe me kula na kisika yina, ya zola zonza ti kimbevo me manisa. Muntu yango ke ya kuvedila, mpe nganga-nzambi ke zonza ti yandi ke ya kuvedila.
38 “Kana batashe me basika na mpusu* ya bakala to kento mpe batashe yango ke mpembe,
39 nganga-nzambi ke tala yawu mbote-mbote. Kana batashe yina ke na mpusu ke mpembe ya kunzuluka, ya ke kaka mwa kimbevo ya fioti yina me basika na mpusu ya yandi. Muntu yango ke ya kuvedila.
40 “Kana bansuki ya yintu ya bakala mosi ke na katukaka, mpe yandi me kuma na dibashi, yandi ke ya kuvedila.
41 Kana bansuki yina ke na mantwala ya yintu ya yandi ke na katukaka mpe ya me kuma na dibashi, yandi ke ya kuvedila.
42 Kasi kana mputa ya mpembe ya mwa mbwaki me basika na dibashi ya yintu ya yandi to na mbunzu ya yandi, ya ke kimbevo ya bwazi yina me basika na dibashi ya yintu ya yandi to ya mbunzu ya yandi.
43 Nganga-nzambi ke tala yandi mbote-mbote, mpe kana ditutu yina me basika samu na kimbevo ke mpembe ya mwa mbwaki na kati-kati ya yintu ya yandi kisika yina ke dibashi, to na mbunzu ya yandi, mpe ya ke na talanaka mutindu kimbevo ya bwazi na zulu ya mpusu,
44 yandi ke na kimbevo ya bwazi. Yandi ke ve ya kuvedila, mpe nganga-nzambi ke zonza ti muntu yango ke ve ya kuvedila samu na kimbevo yina ke na zulu ya yintu ya yandi.
45 Muntu yina ke na kimbevo ya bwazi fwana kulwata bilele yina ke ya kupasuka, mpe yandi ke yidika ve bansuki ya yandi mpe yandi ke fuka yinwa* ya yandi mpe ke zonza na ndinga ya ngolo ‘Mvindu, mvindu!’*
46 Yandi ke vanda mvindu* ntangu nyonso yina yandi ke vanda na kimbevo yango. Samu yandi ke ve ya kuvedila, yandi ke zinga na kisika ya yandi mosi. Yinzo ya yandi ke vanda ntama ya kisika yina bantu ke vandaka.
47 “Kana kimbevo ya bwazi me kuzwa kinkuti, ya vanda kinkuti yina ba me yidika na lene* to na lino,
48 to ya me kuzwa basinga* ya lino yina ba me sadila samu na kuyidika kinkuti, to basinga ya lene, to mpusu, to kima ni kima yina ba yidikaka na mpusu ya kibulu,
49 mpe kana tashe ya kimbevo yina ke na talanaka mutindu maza ya saka-saka yina ba me tokisa, to yina ke mbwaki me kuzwa kinkuti, to mpusu, to basinga* yina ba me sadila samu na kuyidika kinkuti, to kima ni kima yina ba yidikaka na mpusu ya kibulu, ya me katuka na kimbevo ya bwazi, mpe ba ke lakisa yawu na nganga-nzambi.
50 Nganga-nzambi ke tala mbote-mbote kima yina me kuzwa tashe yango, mpe yandi fwana kutula yawu na kisika ya yawu mosi bilumbu 7.
51 Na kilumbu ya 7, ntangu yandi ke tala mbote-mbote tashe yango, kana yandi me tala ti ya me mwangana na kinkuti, na basinga* yina ba me sadila samu na kuyidika kinkuti, to na mpusu (ya vanda faso ni faso ba ke sadilaka mpusu yango), ya ke kimbevo ya bwazi ya ngolo mpe kima yango ke mvindu.*
52 Yandi ke yoka kinkuti yango to basinga yina ba me sadila samu na kuyidika lene to lino, to kima ni kima yina ba me yidika na mpusu ya kibulu yina me kuzwa kimbevo yango, samu ya kele kimbevo ya bwazi ya ngolo. Ba me fwana kuyoka yawu na tiya.
53 “Kasi kana nganga-nzambi me tala tashe yango mbote-mbote, mpe yandi me tala ti ya me mwangana ve na kinkuti to na basinga yina ba me sadila samu na kuyidika kinkuti, to na kima ni kima yina ba me yidika na mpusu ya kibulu,
54 nganga-nzambi ke tumisa ti ba sukula kima yina me kuzwa kimbevo, mpe yandi ke tula dyaka yawu na kisika ya yawu mosi bilumbu 7.
55 Na manima ya kusukula mbote-mbote kima yina kuzwaka kimbevo, nganga-nzambi ke tala yawu mbote-mbote. Kana ya ke na lakisaka ti tashe ke kaka faso ya vandaka, ata ti kimbevo me mwangana ve na kima yango, ya ke mvindu.* Nge ke yoka yawu na tiya samu ti kimbevo me kudya yawu, ya vanda na kati to na ngaanda.
56 “Kasi kana nganga-nzambi me tala tashe yango mbote-mbote mpe ya me banda kuzimbana na manima ya ntangu yina ba sukulaka yawu mbote-mbote, yandi ke katula kitini ya kinkuti, to ya mpusu, to ya basinga yina kuzwaka tashe yango.
57 Kasi kana ya me basika dyaka na kisika ya nkaka ya kinkuti to ya basinga yina ba me sadila samu na kuyidika kinkuti, to ya kima ni kima yina ba me yidika na mpusu ya kibulu, ya zola zonza ti ya ke na mwanganaka. Nge ke yoka na tiya kima nyonso yina me kuzwa yawu.
58 Kasi kana tashe me zimbana na kima yina nge me sukula, ya vanda na kinkuti to na basinga yina ba me sadila samu na kuyidika kinkuti to na kima ni kima yina ba me yidika na mpusu ya kibulu, ba ke sukula yawu mbala ya zole, mpe ya ke vanda ya kuvedila.
59 “Ni yawu musiku yina me tadila kimbevo ya bwazi na kati ya kinkuti ya lene to ya lino, to na kati ya basinga yina ba me sadila samu na kuyidika kinkuti, to na kati ya kima ni kima yina ba me yidika na mpusu ya kibulu, samu na kuzonza kana kima ke ya kuvedila to ya ke ve ya kuvedila.”
Banoti ya yisi ya paje
^ To “diwumbu.”
^ Na ndinga ya ntete, “na mpusu ya musuni ya muntu.”
^ Na ndinga ya Kiebre, nzonzolo “kimbevo ya bwazi” ke lakisaka bamambu mingi. Na kati ya yawu kele na bimbevo mingi ya mpusu yina lenda kuzwa muntu ya nkaka. Ya ke mpe na bimbevo yina ke kuzwaka bilele mpe bayinzo.
^ To “mbala ya zole.”
^ To “ti muntu ya nkaka lenda kuzwa ve maladi.”
^ To “dikodi.”
^ To “to ya mandefo.”
^ Na ndinga ya ntete, “na mpusu ya musuni.”
^ To “fuka mandefo yina ke na zulu ya yinwa.”
^ To “Ya kuvedila ve, ya kuvedila ve.”
^ To “ya kuvedila ve.”
^ To “mika ya mameme.”
^ To “basinga ya kutelama to ya kulala.”
^ To “basinga ya kutelama to ya kulala.”
^ To “basinga ya kutelama to ya kulala.”
^ To “ya kuvedila ve.”
^ To “ya kuvedila ve.”
