DILONGI 24
Yinki kele kedika samu na bambasi?
Yehova zola beto longuka mambu metadila dibuta na yandi yina kele na dizulu. Dibuta yango mesangisa bambasi, yina bakebokidilaka ‘bana ya Nzambi.’ (Yobi 38:7) Yinki Biblia metuba samu na bambasi? Yinki bupusi bakevuandaka na yau samu na bantu? Mpe bambasi nionso kele na kati ya dibuta ya Nzambi?
1. Bambasi kele banani?
Yehova semaka bambasi tekila yandi sala ntoto. Lokola yandi, bakemonanaka ve mpe bakezingaka na dizulu. (Baebreo 1:14) Konso mbasi kele na kimuntu na yandi, atako bakele bamilion. (Kusonga 5:11) ‘Bakesadilaka mpova [ya Yehova], bakezitisaka ndinga na yandi.’ (Nkunga 103:20) Na ntangu ya ntama, Yehova vuandaka tinda bambasi samu na kuzabisa nsangu na yandi, kusadisa mpe kuvukisa bisadi na yandi. Bubu yayi, bambasi ketuadisaka Baklisto na bantu yina zola zaba Nzambi.
2. Satana mpe bademo kele banani?
Ndambu ya bambasi bikanaka ve ya kukuikama na Yehova. Mbasi ya ntete yina tombokilaka Nzambi kele ‘yina bakebokidilaka Diabulu mpe Satana, yina kena kuvuna ntoto ya mvimba.’ (Kusonga 12:9) Satana zolaka kuma mfumu, na yau yandi tindaka muntu ya ntete mpe bambasi yankaka basangana na yandi na butomboki na yandi. Bakebokidilaka bambasi yango bademo. Yehova kukaka bau na dizulu, yandi lozaka bau na ntoto mpe yandi kekufua bau.—Tanga Kusonga 12:9, 12.
3. Yinki mutindu Satana mpe bademo kemekaka kuvuna beto?
Satana mpe bademo kevunaka bantu na nzila ya bisalu ya bampeve ya yimbi, yazola tuba, baketindikaka bantu basosa kusolola na bampeve. Na kifuani, bantu yankaka kekuendaka na bantu yina kesalaka astroloji, bantu yina kesamunaka mambu yina kekuiza, bantu yina kesololaka na bampeve, banganga nkisi mpe bandoki. Bayankaka kesosaka lusadusu ya bampeve ya yimbi kana bamebela. Bantu kendimaka diaka ti balenda solola na bantu ya kufua. Kasi Yehova mekebisa beto mutindu yayi: ‘Kukuenda ve na bantu yina kesololaka na bampeve ya yimbi, mpe kuyuvusa ve bantu yina kesamunaka mambu yina kekuiza.’ (Levi 19:31) Yandi mekebisa beto samu na kutanina beto na bantambu ya Satana mpe bademo na yandi. Bakele bambeni ya Nzambi, mpe bakezolaka kusala beto yimbi.
KOTA NA MPINDA
Sosa kuzaba mambu ya mbote yina bambasi kesalaka, bivonza ya bisalu ya bampeve ya yimbi, mpe yina beto lenda sala samu beto kukitanina na bantambu ya Satana mpe bademo.
4. Bambasi kesadisaka bantu bazaba mambu metadila Yehova
Bambasi ya Nzambi kesamuninaka ve bantu nsangu ya mbote mbala mosi. Kasi, baketuadisaka bisadi ya Nzambi na bantu yina zola kuwa malongi na yandi. Tanga Kusonga 14:6, 7, mpe na manima tadila biuvu yayi:
-
Samu na yinki beto kele na nsatu ya lusadusu ya bambasi na kisalu ya kusamuna?
-
Nge mekindusua na kuzaba ti bambasi lenda tuadisa nge na bantu yina kele na nsatu ya kuwa malongi ya Biblia? Samu na yinki?
5. Manga bisalu ya bampeve ya yimbi
Satana mpe bademo kele bambeni ya Yehova. Bakele diaka bambeni na beto. Tanga Luka 9:38-42, mpe na manima tadila kiuvu yayi:
-
Yinki mambu bademo kesalaka bantu?
Beto zola ve ti bademo vuanda na bupusi na luzingu na beto. Tanga Kulonga 18:10-12, mpe na manima tadila biuvu yayi:
-
Yinki mutindu bademo kemekaka kuvuanda na bupusi na luzingu na beto mpe kusolola na beto? Yinki bisalu ya bademo nge kemonaka na kisika yina nge kevuandaka?
-
Nge mekanisa ti yakele mbote Yehova pekisa beto bisalu ya bampeve ya yimbi? Samu na yinki?
Tula VIDEO, mpe na manima tadila biuvu yayi melanda.
-
Nge mekanisa ti kima yina Palesa vuatisaka muana na yandi vuandaka na kivonza? Samu na yinki?
-
Yinki yalombaka Palesa sala samu yandi kukitanina na bademo?
Baklisto ya kedika keteleminaka ntangu nionso bademo. Tanga Bisalu 19:19 mpe 1 Bakorinto 10:21, mpe na manima tadila kiuvu yayi:
-
Samu na yinki yakele mfunu kubebisa konso kima yina kele na nguizani na bampeve ya yimbi?
6. Nunga Satana mpe bademo na yandi
Satana ketuadisaka bademo. Kasi bambasi ya kukuikama ketuadusuaka na Mikaele Mfumu ya bambasi, yina kele nkumbu yankaka ya Yesu. Yinki kilendo Mikaele kele na yau? Tanga Kusonga 12:7-9, mpe na manima tadila biuvu yayi:
-
Nani kele na kilendo mingi? Mikaele mpe bambasi na yandi to Satana mpe bademo na yandi?
-
Nge mekanisa ti banlonguki ya Yesu fueti banga Satana na bademo na yandi?
Nge lenda nunga mvita na Satana mpe bademo na yandi. Tanga Yakobo 4:7, mpe na manima tadila kiuvu yayi:
-
Yinki mutindu nge lenda kukitanina na Satana mpe bademo na yandi?
BANTU YANKAKA METUBA: “Yakele yimbi ve kusala bansaka to kutala bafilme yina kemonisaka bampeve ya yimbi. Yakele kaka mutindu ya kulutisa ntangu.”
-
Samu na yinki dikanisi yango kele kivonza?
BUNKUFI
Bambasi ya kukuikama kesadisaka beto. Satana mpe bademo kele bambeni ya Yehova, mpe bakena sadila bisalu ya bampeve ya yimbi samu na kuvuna bantu.
Mvutukulu
-
Yinki mutindu bambasi ya Yehova kesadisaka bantu bazaba yandi?
-
Satana mpe bademo kele banani?
-
Samu na yinki nge mebaka nzengolo ya kumanga bisalu ya bampeve ya yimbi?
SOSA
Sosa kuzaba yinki kena kumonisa ti Yesu kele Mikaele Mfumu ya bambasi.
Tadila mambu yina kena kumonisa ti Diabulu kele mpenza muntu.
Tala mutindu nketo mosi katukaka na kinanga ya bademo.
“Azwi ntina kati na bomoi” (Linɔ́ngi ya Mosɛnzɛli ya 1 Juillet 1993)
Sosa kuzaba mutindu Satana kena kusadila bisalu ya bampeve ya yimbi samu na kuvuna bantu.
“Solo na likambo etali nkisi, bondɔki, mpe bonganga-nkisi” (Nzela ya bomoi ya seko, kitini 5)
