ហេតុអ្វីសាក្សីព្រះយេហូវ៉ាមិនធ្វើបុណ្យអ៊ីស្ទើរ៍?

លេង

អ្វីដែលមនុស្សជាច្រើនយល់ច្រឡំ

រឿងមិនពិត: មូលហេតុដែលសាក្សីព្រះយេហូវ៉ាមិនធ្វើបុណ្យអ៊ីស្ទើរ៍ គឺដោយសារពួកគេមិនមែនជាគ្រិស្តសាសនិកទេ។

រឿងពិត: យើងជឿថាលោកយេស៊ូជាអ្នកសង្គ្រោះយើង ហើយយើងខំធ្វើអស់ពីសមត្ថភាពដើម្បី«ដើរតាមលំអានដានរបស់លោកឲ្យបានដិតដល់»។—ពេត្រុសទី១ ២:២១; លូកា ២:១១

រឿងមិនពិត: សាក្សីព្រះយេហូវ៉ាមិនជឿថា លោកយេស៊ូបានត្រូវប្រោសឲ្យរស់ឡើងវិញទេ។

រឿងពិត: យើងជឿថាលោកយេស៊ូបានត្រូវប្រោសឲ្យរស់ឡើងវិញ។ យើងទទួលស្គាល់ថានោះគឺជាមូលដ្ឋានគ្រឹះនៃជំនឿរបស់គ្រិស្តសាសនិក ហើយយើងលើកបញ្ជាក់អំពីរឿងនោះក្នុងកិច្ចបម្រើផ្សាយរបស់យើង។—កូរិនថូសទី១ ១៥:៣, ៤, ១២-១៥

រឿងមិនពិត: សាក្សីព្រះយេហូវ៉ាមិនខ្វល់អំពីអារម្មណ៍របស់កូន ដែលកូនមិនបានរីករាយនាឱកាសបុណ្យអ៊ីស្ទើរ៍។

រឿងពិត: យើងស្រឡាញ់កូនរបស់យើង។ យើងធ្វើអ្វីៗទាំងអស់ដែលយើងអាចធ្វើបានដើម្បីបង្រៀនពួកគេនិងជួយពួកគេឲ្យសប្បាយរីករាយ។—ទីតុស ២:៤

ហេតុអ្វីសាក្សីព្រះយេហូវ៉ាមិនធ្វើបុណ្យអ៊ីស្ទើរ៍?

ពិធីបុណ្យអ៊ីស្ទើរ៍មិនមានមូលដ្ឋានលើគម្ពីរទេ។
លោកយេស៊ូបានបង្គាប់យើងឲ្យធ្វើពិធីរំលឹកមរណភាពរបស់លោក មិនមែនការរស់ឡើងវិញរបស់លោកទេ។ ជារៀងរាល់ឆ្នាំ យើងធ្វើពិធីរំលឹកមរណភាពរបស់លោកស្របតាមខែនៃប្រតិទិនចន្ទគតិក្នុងគម្ពីរ។—លូកា ២២:១៩, ២០
យើងជឿថា ដើមកំណើតនៃទំនៀមទម្លាប់បុណ្យអ៊ីស្ទើរ៍គឺមកពីក្បួនរីតិនៅសម័យបុរាណដែលផ្ដល់នូវសមត្ថភាពបង្កើតកូន។ នេះជាហេតុដែលធ្វើឲ្យព្រះមិនពេញចិត្តនឹងពិធីបុណ្យអ៊ីស្ទើរ៍។ ព្រះតម្រូវឲ្យយើងមាន«ភក្ដីភាពផ្ដាច់មុខ»ចំពោះលោក ហើយលោកទាស់ចិត្ត បើការគោរពប្រណិប័តន៍របស់យើងមានទាក់ទងនឹងពិធីបុណ្យដែលលោកមិនពេញចិត្ត។—និក្ខមនំ ២០:៥,ព.ថ.; ពង្សាវតារក្សត្រទី១ ១៨:២១

យើងជឿថាការសម្រេចចិត្តរបស់យើងមិនធ្វើបុណ្យអ៊ីស្ទើរ៍គឺមានមូលដ្ឋានរឹងមាំក្នុងគម្ពីរ ដែលលើកទឹកចិត្តយើងឲ្យ‹រក្សាសេចក្ដីដែលមានប្រយោជន៍ និងគំនិតវាងវៃ›ជាជាងធ្វើតាមទំនៀមទម្លាប់របស់មនុស្ស។ (សុភាសិត ៣:២១; ម៉ាថាយ ១៥:៣) ពេលអ្នកឯទៀតសួរយើងអំពីបុណ្យអ៊ីស្ទើរ៍ យើងឆ្លើយប្រាប់អំពីជំនឿរបស់យើង ហើយក៏គោរពការសម្រេចចិត្តរបស់ពួកគេដែរ។—ពេត្រុសទី១ ៣:១៥