ហេតុអ្វីសំណួរនេះសំខាន់?
អត្ថបទអំពីក្របទស្សនាវដ្ដី | តើយើងត្រូវការព្រះទេ?
ហេតុអ្វីសំណួរនេះសំខាន់?
ថ្មីៗនេះមានស្លាកធំមួយដែលសរសេរថា៖ «មនុស្សរាប់លាននាក់គិតថាខ្លួនមិនត្រូវការព្រះទេ។ ចុះអ្នកវិញ?»។ ក្រុមអ្នកមិនជឿថាមានព្រះបានបង់លុយឲ្យគេដាក់ស្លាកនេះ។ តាមមើលទៅ ពួកគេគិតថាខ្លួនមិនត្រូវការព្រះសោះ។
មួយវិញទៀត មនុស្សជាច្រើនដែលអះអាងថាជឿព្រះធ្វើការសម្រេចចិត្តផ្សេងៗហាក់ដូចជាគ្មានព្រះទេ។ មេអេវ៉ែកក្នុងសាសនាកាតូលិកម្នាក់ឈ្មោះសាល់វ៉ាតូរ៉េ ហ្វីស្ស៊ីគែឡា បាននិយាយអំពីសមាជិករបស់វិហារគាត់ថា៖ «សព្វថ្ងៃនេះ ពេលគេមើលមកយើង ប្រហែលគ្មានអ្នកណាស្គាល់ថាយើងជាគ្រិស្តសាសនិកទេ ពីព្រោះរបៀបរស់នៅរបស់យើងដូចជាអ្នកដែលមិនជឿព្រះ»។
អ្នកខ្លះរវល់ពេកគ្មានពេលគិតអំពីព្រះ។ ពួកគេគិតថាព្រះនៅឆ្ងាយពេកឬលោកមិនអាចជួយពួកគេបានឡើយ។ យ៉ាងច្រើន បុគ្គលបែបនេះរកព្រះនៅពេលដែលពួកគេមានបញ្ហាឬត្រូវការអ្វីមួយប៉ុណ្ណោះ ពោលគឺពួកគេចាត់ទុកលោកដូចជាអ្នកបម្រើដែលចង់ហៅពេលណាក៏បាន។
អ្នកខ្លះទៀតមិនធ្វើតាមសេចក្ដីបង្រៀនខាងសាសនារបស់ពួកគេទេ ប្រហែលដោយសារពួកគេមិនគិតថាសេចក្ដីបង្រៀនទាំងនោះមានប្រយោជន៍ឡើយ។ ឧទាហរណ៍មួយ នៅប្រទេសអាឡឺម៉ង់អ្នកកាន់សាសនាកាតូលិក៧៦ភាគរយគិតថា បុរសនិងស្ត្រីអាចរួមរស់ជាមួយគ្នាបានមុនរៀបការ។ ទស្សនៈនេះផ្ទុយពីសេចក្ដីបង្រៀនក្នុងគម្ពីរផងនិងវិហារផង។ (កូរិនថូសទី១ ៦:១៨; ហេប្រឺ ១៣:៤) ប៉ុន្តែ មិនគ្រាន់តែអ្នកកាន់សាសនាកាតូលិកប៉ុណ្ណោះទេដែលឃើញថា សមាជិករបស់ខ្លួនមិនប្រព្រឹត្តតាមសេចក្ដីបង្រៀនរបស់សាសនាខ្លួន តែបព្វជិតពីសាសនាឯទៀតក៏និយាយទាំងសោកស្ដាយថា សមាជិករបស់ពួកគេក៏ប្រព្រឹត្តដូច«ពួកអ្នកដែលមិនជឿថាមានព្រះ»ដែរ។
ជាការសមហេតុផលដែលឧទាហរណ៍ទាំងនេះធ្វើឲ្យឆ្ងល់ថា: តើយើងពិតជាត្រូវការព្រះទេ? នេះមិនមែនជាសំណួរថ្មីទេ ព្រោះសំណួរនេះក៏បានត្រូវលើកឡើងក្នុងកំណត់ហេតុដំបូងក្នុងគម្ពីរដែរ។ ដើម្បីរកចម្លើយចំពោះសំណួរនេះ សូមឲ្យយើងពិចារណារឿងមួយចំនួនដែលបានត្រូវលើកឡើងក្នុងគម្ពីរនៅសៀវភៅលោកុប្បត្តិ។
[រូបភាពនៅទំព័រ៣]
