តើរាជាណាចក្ររបស់ព្រះជាអ្វី?
តើរាជាណាចក្ររបស់ព្រះជាអ្វី?
«ដំណឹងល្អនេះអំពីរាជាណាចក្រ . . . »។—ម៉ាថាយ ២៤:១៤
ក្នុងសុន្ទរកថាដ៏ល្បីមួយដែលលោកយេស៊ូថ្លែងនៅលើភ្នំ លោកផ្ដល់ការអធិដ្ឋានគំរូមួយ ដែលរួមមានពាក្យអង្វរនេះទៅព្រះថា៖ «សូមឲ្យរាជាណាចក្ររបស់លោកបានមកដល់»។ មនុស្សរាប់លាននាក់បានទន្ទេញចាំរត់មាត់ពាក្យអធិដ្ឋាននេះ ហើយក៏បានពោលពាក្យនោះម្ដងហើយម្ដងទៀតដែរ។ សព្វវចនាធិប្បាយមួយបានរៀបរាប់ថា នេះជា«សេចក្ដីអធិដ្ឋានសំខាន់បំផុតដែលគ្រិស្តសាសនិកទាំងអស់ប្រើក្នុងការគោរពប្រណិប័តន៍»។ ប៉ុន្តែ មនុស្សជាច្រើនដែលពោលពាក្យអធិដ្ឋាននោះមិនបានដឹងថារាជាណាចក្រនេះជាអ្វី ឬពេលដែលរាជាណាចក្រមកដល់ រាជាណាចក្រនេះនឹងធ្វើអ្វីនោះទេ។—ម៉ាថាយ ៦:៩, ១០
នេះមិនមែនជាអ្វីដែលចម្លែកឡើយ ពីព្រោះពួកអ្នកដឹកនាំនៃពិភពគ្រិស្តសាសនាពន្យល់អំពីរាជាណាចក្រនេះតាមរបៀបដែលពិបាកយល់ និងស្មុគស្មាញ ហើយក៏ខុសៗពីគ្នា។ អ្នកដឹកនាំសាសនាម្នាក់បានសរសេរថា រាជាណាចក្ររបស់ព្រះគឺជា«អ្វីដែលហួសវិស័យធម្មជាតិ . . . ដែលមានក្នុងចិត្តយើងដែលអាចផ្សារភ្ជាប់ជាមួយព្រះដែលមានជីវិតរស់នៅ . . . ដែលជាការទាក់ទងជាមួយព្រះដែលអាចនាំឲ្យមនុស្សទទួលសេចក្ដីសង្គ្រោះបាន»។ ម្នាក់ទៀតពន្យល់ថាដំណឹងល្អនៃរាជាណាចក្រជា«ការណែនាំអំពីសាសនា»។ បន្ថែមទៅទៀត សៀវភៅមួយនៃសាសនាកាតូលិកបានចែងថា៖ «រាជាណាចក្ររបស់ព្រះ[គឺជា]សេចក្ដីសុចរិត សេចក្ដីសុខសាន្ត និងអំណរដែលមកពីវិញ្ញាណបរិសុទ្ធ» (Catechism of the Catholic Church)។
លោកអ្នកនឹងទទួលការពន្យល់ដែលច្បាស់ជាងក្នុងទំព័រទី២នៃទស្សនាវដ្ដីនេះ។ ក្នុងនោះពន្យល់ថា៖ «រាជាណាចក្ររបស់ព្រះជារាជរដ្ឋាភិបាលមួយនៅឯស្ថានសួគ៌ ដែលមិនយូរប៉ុន្មានទៀតនឹងដកអំពើអាក្រក់ទាំងអស់ចេញ ហើយនាំឲ្យមានសួនឧទ្យាននៅពេញផែនដី»។ សូមពិចារណាអំពីរបៀបដែលគម្ពីរគាំទ្រការពន្យល់នេះ។
ពួកអ្នកដែលនឹងគ្រប់គ្រង នៅលើផែនដីទាំងមូលនាពេលអនាគត
រាជាណាចក្រគឺជារដ្ឋាភិបាលមួយដែលមានស្តេចជាអ្នកគ្រប់គ្រង។ ស្តេចនៃរាជាណាចក្ររបស់ព្រះគឺជាលោកយេស៊ូគ្រិស្តដែលបានត្រូវប្រោសឲ្យរស់ឡើងវិញ។ ដានីយ៉ែលដែលជាអ្នកប្រកាសទំនាយម្នាក់បានឃើញក្នុងគំនិតអំពីការតែងតាំងលោកយេស៊ូឲ្យធ្វើជាស្តេចនៅស្ថានសួគ៌ ដោយគាត់សរសេរថា៖ «ខ្ញុំក៏ឃើញក្នុងការជាក់ស្តែងពេលយប់នោះ មាន១អង្គដូចជាមនុស្សជាតិ[លោកយេស៊ូ] ទ្រង់យាងមកក្នុងពពកឰដ៏អាកាស ទ្រង់យាងមកឯព្រះដ៏មានព្រះជន្មពីបុរាណនោះ[ព្រះយេហូវ៉ា] ហើយមានគេនាំចូលទៅចំពោះព្រះអង្គ នោះបានប្រទានឲ្យទ្រង់មានអំណាចគ្រប់គ្រង នឹងសិរីល្អ ព្រមទាំងឲ្យមានរាជ្យផង ដើម្បីឲ្យបណ្ដាជនទាំងឡាយ សាសន៍ដទៃ នឹងមនុស្សគ្រប់ភាសា បានគោរពដល់ទ្រង់។ ឯអំណាចគ្រប់គ្រងរបស់ទ្រង់ នោះក៏ស្ថិតស្ថេរនៅអស់កល្ប ឥតដែលកន្លងបាត់ឡើយ ហើយរាជ្យរបស់ទ្រង់នឹងបំផ្លាញមិនបានផង»។—ដានីយ៉ែល ៧:១៣, ១៤
សៀវភៅក្នុងគម្ពីរឈ្មោះដានីយ៉ែលបង្ហាញថារាជាណាចក្រនឹងត្រូវស្ថាបនាឡើងដោយព្រះផ្ទាល់ ក៏បង្ហាញថារាជាណាចក្រនោះនឹងបំផ្លាញរដ្ឋាភិបាលទាំងអស់របស់មនុស្ស ហើយថាគ្មានអ្វីដែលអាចដានីយ៉ែល ២:២៨, ៤៤
ផ្ដួលរលំរាជាណាចក្រនោះបានឡើយ។ ក្នុងជំពូកទី២នៃសៀវភៅនោះបានពណ៌នាអំពីសុបិនមួយដែលព្រះធ្វើឲ្យស្តេចបាប៊ីឡូនយល់សប្ដិឃើញ ដែលក្នុងនោះគាត់បានឃើញរូបធំសម្បើមមួយដែលតំណាងនូវការគ្រប់គ្រងនៃមហាអំណាចដែលមានជាបន្តបន្ទាប់គ្នា។ ដានីយ៉ែលបានបកស្រាយសុបិននោះ ដោយសរសេរថា៖ «នៅថ្ងៃ[ជាន់]ក្រោយ . . . ព្រះនៃស្ថានសួគ៌ទ្រង់នឹងតាំងនគរ១ឡើង ដែលមិនត្រូវបំផ្លាញឡើយ ហើយអំណាចហ្លួងក៏មិនត្រូវផ្ទេរដល់សាសន៍ដទៃណាដែរ គឺនឹងបំបាក់បំបែក ហើយលេបបំបាត់នគរទាំងនោះវិញ នគរនោះនឹងស្ថិតស្ថេរនៅអស់កល្បជានិច្ច»។—ស្តេចនៃរាជាណាចក្ររបស់ព្រះមិនមែនគ្រប់គ្រងតែម្នាក់ឯងទេ។ ក្នុងអំឡុងគ្រាដែលលោកយេស៊ូផ្សព្វផ្សាយនៅផែនដី លោកបានពង្រឹងទំនុកចិត្តរបស់ពួកសាវ័កដែលស្មោះត្រង់របស់លោកថា ព្រះនឹងប្រោសពួកគាត់និងអ្នកខ្លះទៀតឲ្យរស់ឡើងវិញនៅស្ថានសួគ៌ ហើយពួកគាត់ក៏នឹងអង្គុយលើបល្ល័ង្កដែរ។ (លូកា ២២:២៨-៣០) នេះមិនមែនជាបល្ល័ង្កមែនទែននោះទេ ពីព្រោះលោកបានបញ្ជាក់ថារាជាណាចក្ររបស់ព្រះនឹងស្ថិតនៅស្ថានសួគ៌។ គម្ពីរពណ៌នាពួកអ្នកដែលគ្រប់គ្រងជាមួយលោកនឹងមកពី«គ្រប់កុលសម្ព័ន្ធ គ្រប់ភាសា គ្រប់ពូជសាសន៍ និងគ្រប់ប្រជាជាតិ»។ ពួកគាត់នឹងទៅ‹ជារាជាណាចក្រមួយនិងជាសង្ឃរបស់ព្រះនៃយើង ហើយពួកគាត់នឹងធ្វើជាស្តេចគ្រប់គ្រងលើផែនដី›។—ការបើកបង្ហាញ ៥:៩, ១០
ហេតុអ្វីដំណឹងអំពីរាជាណាចក្រជាដំណឹងល្អ?
សូមកត់សម្គាល់ថាគ្រិស្តយេស៊ូបានត្រូវប្រគល់អំណាចឲ្យគ្រប់គ្រងលើ«បណ្ដាជនទាំងឡាយ សាសន៍ដទៃ នឹងមនុស្សគ្រប់ភាសា» ហើយពួកអ្នកដែលចូលរួមគ្រប់គ្រងជាមួយលោកនឹង«ធ្វើជាស្តេចគ្រប់គ្រងលើផែនដី»។ បើដូច្នេះ តើរាស្ត្រនៃរាជាណាចក្រនេះជាអ្នកណា? គឺពួកអ្នកដែលស្ដាប់ ហើយធ្វើតាមដំណឹងល្អដែលកំពុងផ្សព្វផ្សាយនៅសព្វថ្ងៃនេះ។ រាស្ត្រទាំងនោះក៏រួមបញ្ចូលពួកអ្នកដែលព្រះនឹងប្រោសឲ្យរស់ឡើងវិញនៅផែនដី ដែលមានសេចក្ដីសង្ឃឹមរស់នៅជារៀងរហូតដែរ។
គម្ពីរបានរៀបរាប់យ៉ាងពីរោះអំពីពរដែលបណ្ដាជននឹងទទួល នៅក្រោមការគ្រប់គ្រងនៃរាជាណាចក្រនោះ។ ពរទាំងនោះមានដូចតទៅ:
«ទ្រង់បណ្ដាលឲ្យការសង្គ្រាមស្ងប់រំងាប់ រហូតដល់ចុងផែនដី ទ្រង់បំបាក់ធ្នូ ហើយកាច់លំពែង ក៏ដុតអស់ទាំងរទេះចំបាំងនៅក្នុងភ្លើង»។—ទំនុកតម្កើង ៤៦:៩
«គ្រានោះ មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ គេនឹងមិនសង់ រួចមានម្នាក់ទៀតអាស្រ័យនៅ ឬដាំ រួចមានម្នាក់ទៀតបរិភោគផលនោះឡើយ»។—អេសាយ ៦៥:២១, ២២
«[ព្រះ]នឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។—ការបើកបង្ហាញ ២១:៣, ៤
«គ្រានោះ ភ្នែករបស់មនុស្សខ្វាក់នឹងបានភ្លឺឡើង ហើយត្រចៀករបស់មនុស្សថ្លង់នឹងឮបាន។ គ្រានោះ ពួកមនុស្សខ្វិននឹងលោតដូចជាប្រើស ហើយអណ្ដាតរបស់មនុស្សគក៏នឹងច្រៀងឡើង»។—អេសាយ ៣៥:៥, ៦
«មានវេលាមកដល់ ដែលអស់អ្នកនៅក្នុងផ្នូរដែលសម្រាប់ជាទីរំលឹក នឹងឮសំឡេងរបស់លោក[យេស៊ូ] ហើយចេញមក អស់អ្នកណាដែលបានប្រព្រឹត្តការល្អ អ្នកទាំងនោះនឹងរស់ឡើងវិញហើយបានជីវិត»។—យ៉ូហាន ៥:២៨, ២៩
«មនុស្សរាបសា គេនឹងបានផែនដីជាមរដក ហើយនឹងបានចិត្តរីករាយ ដោយសេចក្ដីក្សេមក្សាន្តដ៏បរិបូរ»។—ទំនុកតម្កើង ៣៧:១១
នេះពិតជាដំណឹងល្អមែន! បន្ថែមទៅទៀត ទំនាយទាំងប៉ុន្មានដែលបានសម្រេចរួចមកហើយបានបង្ហាញថា បន្ដិចទៀតរាជាណាចក្រនេះនឹងគ្រប់គ្រងលើផែនដីទាំងមូលជាមិនខាន។