បំពេញសេចក្ដីត្រូវការរបស់លោកអ្នកខាងការណែនាំពីព្រះ
អាថ៌កំបាំងទី៥
បំពេញសេចក្ដីត្រូវការរបស់លោកអ្នកខាងការណែនាំពីព្រះ
តើគម្ពីរបង្រៀនយ៉ាងណា? «អស់អ្នកដែលស្រេកឃ្លានចំពោះការណែនាំពីព្រះ នោះមានសុភមង្គលហើយ!»។—ម៉ាថាយ ៥:៣
តើមានការពិបាកអ្វីខ្លះ? មានសាសនារាប់ពាន់ដែលភាគច្រើនបង្រៀនលោកអ្នកវិធីខុសៗគ្នាដែលលោកអ្នកអាចបំពេញសេចក្ដីត្រូវការខាងការណែនាំពីព្រះ។ តើលោកអ្នកអាចដឹងយ៉ាងណាថា សាសនាណាបង្រៀនសេចក្ដីពិត ហើយប្រាកដជាធ្វើឲ្យព្រះពេញចិត្ត? អ្នកនិពន្ធខ្លះដែលល្បីល្បាញអះអាងថាជំនឿលើព្រះនិងភក្ដីភាពចំពោះលោកគឺមិនសមហេតុផលទេ ថែមទាំងនាំឲ្យមានគ្រោះថ្នាក់ផង។ ទស្សនាវដ្ដីមួយសង្ខេបទស្សនៈរបស់ជនល្បីល្បាញម្នាក់ដែលមិនជឿថាមានព្រះ ដោយចែងថា៖ «ទស្សនៈរបស់គ្រិស្តសាសនិកដែលថាមានអ្វីក្រៅពីវិទ្យាសាស្ត្រនិងក្រៅពីវិញ្ញាណរបស់យើង . . . ធ្វើឲ្យជីវិតតែមួយដែលយើងមាន គ្មានតម្លៃ ហើយមានភាពទោរទន់ទៅរកអំពើហិង្សា» (Maclean’s)។
តើលោកអ្នកអាចធ្វើអ្វី? សូមពិនិត្យមើលភ័ស្តុតាងដែលថាមានព្រះមែន។ (រ៉ូម ១:២០; ហេប្រឺ ៣:៤) កុំឲ្យអ្នកណាម្នាក់ធ្វើឲ្យលោកអ្នកឈប់ស្វែងរកចម្លើយចំពោះសំណួរសំខាន់ៗ ដូចមាននៅខាងក្រោមនេះ៖ ហេតុអ្វីយើងមានជីវិតរស់នៅ? តើមានជីវិតក្រោយមនុស្សស្លាប់ឬទេ? ហេតុអ្វីមានការឈឺចាប់ច្រើនម្ល៉េះ? តើព្រះតម្រូវអ្វីពីខ្ញុំ? ការរកឃើញចម្លើយដែលនាំឲ្យគាប់ចិត្តចំពោះសំណួរទាំងនោះ គឺសំខាន់ចាំបាច់ដើម្បីលោកអ្នកអាចមានការស្កប់ចិត្តដែលស្ថិតស្ថេរ។
ទោះជាយ៉ាងនេះក្ដី សូមកុំជឿដោយងងឹតងងល់នូវអ្វីៗទាំងអស់ដែលអ្នកឯទៀតប្រាប់លោកអ្នក។ បណ្ដាំរបស់ព្រះលើកទឹកចិត្តលោកអ្នកឲ្យប្រើ«សមត្ថភាពរិះគិត»របស់លោកអ្នក ដើម្បីពិសោធមើលដោយខ្លួនលោកអ្នកឲ្យដឹងនូវអ្វីដែលធ្វើឲ្យព្រះពេញចិត្ត។ (រ៉ូម ១២:១, ២) លោកអ្នកនឹងទទួលលទ្ធផលល្អពីការព្យាយាមរបស់លោកអ្នក។ បើលោកអ្នករកពេលសិក្សាគម្ពីរ ហើយអនុវត្តតាមដំបូន្មានដែលមានប្រយោជន៍ក្នុងគម្ពីរ លោកអ្នកនឹងជៀសផុតពីបញ្ហាផ្សេងៗ កាត់បន្ថយការតានតឹងចិត្ត ហើយបង្កើនការសប្បាយរីករាយនឹងជីវិតរបស់លោកអ្នក។ នេះមិនមែនជាសេចក្ដីសន្យាដែលអសារឥតការនោះទេ។ មនុស្សរាប់លាននាក់ដែលមកពីគ្រប់មជ្ឈដ្ឋានបានទទួលប្រយោជន៍ដោយសារពួកគេរៀនសេចក្ដីពិតអំពីព្រះនិងគោលបំណងរបស់លោក។
កាលដែលលោកអ្នកទទួលប្រយោជន៍ពីការធ្វើតាមឱវាទនៃគម្ពីរ នោះលោកអ្នកនឹងមានភក្ដីភាពចំពោះព្រះកាន់តែខ្លាំង។ សូមអញ្ជើញលោកអ្នកសិក្សាគម្ពីរជាមួយសាក្សីព្រះយេហូវ៉ា។ បើលោកអ្នកធ្វើដូច្នេះ លោកអ្នកទំនងជាយល់ស្របនឹងសាវ័កប៉ូលដែលបានសរសេរថា៖ «ភក្ដីភាពចំពោះព្រះ ជាមួយនឹងការស្កប់ចិត្ត នាំឲ្យបានផលប្រយោជន៍ច្រើនក្រៃលែងមែន»។—ធីម៉ូថេទី១ ៦:៦
[រូបភាពនៅទំព័រ៨]
ចូរពិសោធមើលដោយខ្លួនអ្នកឲ្យដឹងថាអ្វីដែលធ្វើឲ្យព្រះពេញចិត្ត
