ទស្សនៈអ្នកឯកទេសមិនចេះចប់មិនចេះហើយ
ទស្សនៈអ្នកឯកទេសមិនចេះចប់មិនចេះហើយ
នៅសព្វថ្ងៃនេះ មនុស្សអាចប្រើប្រព័ន្ធអ៊ីនធឺណិតតាមកុំព្យូទ័រដើម្បីស្វែងរកយោបល់ ហើយក្នុងនោះអាចរកឃើញឯកសារជាង២៦លានច្បាប់តែក្នុងមួយរំពេច ដែលមានយោបល់អំពីការចិញ្ចឹមអប់រំកូន។ បើចំណាយមួយនាទីក្នុងការមើលឯកសារនីមួយៗ កូននឹងធំឡើងហើយទាំងបែកផ្ទះមុនអាចមើលព័ត៌មានទាំងអស់ចប់។
នៅសម័យដែលមិនទាន់មានប្រព័ន្ធអ៊ីនធឺណិត ឬគ្មានអ្នកចិត្តវិទ្យានិងគ្រូពេទ្យឯកទេសផ្នែកកុមារ តើមាតាបិតាទាំងឡាយបានរកយោបល់ពីណាមក? ជាធម្មតា ពួកគាត់បានទទួលយោបល់ពីសាច់ញាតិជិតឆ្ងាយ។ ចាស់ទុំញាតិមិត្តនិងយាយតាទាំងសងខាងពេញចិត្តផ្ដល់ការណែនាំដល់ឪពុកម្ដាយអំពីរបៀបអប់រំកូន ព្រមទាំងជួយមើលចៅនិងផ្ដល់ជាលុយកាក់ទៀតផង។ ប៉ុន្តែ នៅប្រទេសផ្សេងៗមនុស្សជាច្រើនកំពុងតែចាកចេញពីស្រុកកំណើតដើម្បីទៅរស់នៅទីក្រុង ដូច្នេះលែងមានភាពជិតស្និទ្ធជាមួយសាច់ញាតិ។ ហើយនៅសព្វថ្ងៃនេះ ក៏មានបុរសនិងស្ត្រីជាឪពុកឬម្ដាយខំចិញ្ចឹមអប់រំកូនតែម្នាក់ឯងផង។
នេះហើយជាមូលហេតុមួយដែលមានមជ្ឈមណ្ឌលមើលថែរក្សាក្មេងកាន់តែច្រើនឡើងៗនៅសម័យនេះ។ មូលហេតុមួយទៀតគឺដោយសារមនុស្សជាច្រើនចេះតែពឹងលើវិទ្យាសាស្ត្រ។ មិនយូរប៉ុន្មានមុនឆ្នាំ១៩០០ ប្រជាជននៅសហរដ្ឋអាម៉េរិកជឿជាក់ថា វិទ្យាសាស្ត្រអាចជួយគ្រប់ផ្នែកទាំងអស់ សូម្បីតែក្នុងជីវភាពរស់នៅប្រចាំថ្ងៃ។ ជាលទ្ធផលគេក៏គិតថា វិទ្យាសាស្ត្រអាចជួយក្នុងការចិញ្ចឹមអប់រំកូនបានដែរ។ ដូច្នេះ នៅឆ្នាំ១៨៩៩ ស្ត្រីមួយក្រុម (ហៅថា American National Congress of Mothers) បានថ្លែងជាសាធារណៈថា ពួកគាត់សោកស្ដាយណាស់ដោយសារ«ឪពុកម្ដាយភាគច្រើនខ្វះសមត្ថភាព»ក្នុងការចិញ្ចឹមអប់រំកូន។ ភ្លាមៗនោះ ពួកអ្នកឯកទេសផ្នែកវិទ្យាសាស្ត្របានលេចមុខមកទាំងសន្យាជួយឪពុកម្ដាយទាំងឡាយដែលកំពុងតែមានបញ្ហាអប់រំកូន។
ការអប់រំតាមយោបល់អ្នកឯកទេស
តើយោបល់របស់អ្នកឯកទេសមានលទ្ធផលយ៉ាងណា? នៅសព្វថ្ងៃនេះ តើឪពុកម្ដាយទាំងឡាយមានកង្វល់តិចជាងមុន ឬចេះចិញ្ចឹមអប់រំកូនប្រសើរជាងជីដូនជីតាសម័យមុនៗឬទេ? អត់ទេ! ដ្បិតការស្ទង់មតិមួយនៅប្រទេសអង់គ្លេសបង្ហាញឲ្យដឹងថា ក្នុងចំណោមឪពុកម្ដាយដែលមានកូនតូច ៣៥ភាគរយមិនទាន់រកឃើញយោបល់ដែលអាចទុកចិត្តបាន។ មាតាបិតាឯទៀតគិតថា គាត់ត្រូវធ្វើតាមគំនិតខ្លួនឯងវិញល្អជាជាង។
អ្នកស្រីអាណ ហាល់បឺតជាអ្នកនិពន្ធសៀវភៅដែលរៀបរាប់អំពីឯកសារនីមួយៗនៅសម័យផ្សេងៗទាក់ទងនឹងការចិញ្ចឹមអប់រំកូន។ (Raising America: Experts, Parents, and a Century of Advice About Children) អ្នកស្រីមានកូនពីរនាក់ដែរ ហើយបង្ហាញឲ្យដឹងថា កម្រណាស់ដែលយោបល់របស់អ្នកឯកទេសទាំងនោះមានមូលដ្ឋានលើរបកគំហើញរបស់អ្នកវិទ្យាសាស្ត្រ។ ផ្ទុយទៅវិញ យោបល់របស់ពួកគេមើលទៅដូចជាផ្អែកលើបទពិសោធន៍ផ្ទាល់ខ្លួនជាជាងទៅលើភ័ស្តុតាងជាក់ស្តែង។ ពេលយើងមើលអ្វីដែលគេសរសេរពីមុននោះ ឥឡូវមើលទៅដូចជាទស្សនៈភាគច្រើននោះជាអ្វីដែលគេនិយមតែមួយរយៈខ្លីប៉ុណ្ណោះ ឬក៏ទស្សនៈទាំងនោះផ្ទុយគ្នាទៅវិញ ឬជួនកាលជាទស្សនៈប្លែកៗតែម្ដង។
ដូច្នេះ នៅសព្វថ្ងៃនេះ តើមាតាបិតាទាំងឡាយគួរទុកចិត្តលើយោបល់មួយណា? តាមពិត ដោយសារមានទស្សនៈ យោបល់និងព័ត៌មានច្រើនជាងមុនៗទៅទៀតដែលផ្ទុយពីគ្នា នោះមាតាបិតាភាគច្រើនអត់ដឹងត្រូវធ្វើយ៉ាងណាទេ។ យ៉ាងណាក៏ដោយ ឪពុកម្ដាយខ្លះមិនទាល់គំនិតឡើយ ដ្បិតទូទាំងផែនដីមាតាបិតាខ្លះកំពុងទទួលប្រយោជន៍ពីពាក្យពេចន៍ក្នុងសៀវភៅបុរាណមួយជាប្រភពព័ត៌មានដែលពួកគាត់នៅតែអាចទុកចិត្តបាន។ អត្ថបទបន្ទាប់នឹងរៀបរាប់ពីប្រភពព័ត៌មានទាំងនេះ។